Markusi 15

Yesus niana aropo Pilatusi

(Mat. 27:1-2, 11-14; Luk. 23:1-5; Yoh. 18:28-38)

1Bera vavoru mo pa, imam veveru pasia, veveru na Yahudi pasia e siniotu veruin sasavu kavo aniau na Torat pasia e kaiwasa nana Mahkamah agama pasia senduiri ave senggavo ariri Yesus. Senggutu kavo so setamiasa siniotu pasia senggasie Yesus e senggori e sesiwi maso Pilatusi. 2Pilatusi duta maso I e diojo, “Vevata mo Yahudi pa sene Raja paini Au e?” Yesus ruar maso i e diojo, “Au muesari kuevo tojana.” 3Avori imam veveru pasia sembe karaka Yesus toapa nienari pi vekariria pa pau. 4Pilatusi dutana Yesus riwanea e diojo, “Avo au ma ruar va e? Ite buediawa kavo borai setimbe karaka Au pasi!” 5Vape Yesus dinduara tu kavo pesa va. Apajoma Pilatusi tiendor.

Yesus siemuai hukuman voru pai

(Mat. 27:15-26; Luk. 23:13-25; Yoh. 18:39—19:16)

6Nana Raria Baba Paskah pai mamo, Pilatusi tawana suviri siniotu venana bui pa siri, ariri kaiwasa vepau pasia setiria pa. 7Nana rabua jana esi ma sano pa Barabasi, i ma niana bui pai raro pa tutir siniotu pasia aso sembe marova vavera tutiri Pareta Romawi pai e semu siniotu pasia nana rabua marova jani pa. 8Apavo siniotu vepau pasia sendama so Pilatusi e sesau ave amamo suviri siniotu venana bui pa siri ariri nienari ora pa nana raria baba Paskah pai pa. 9Pilatusi duta maso sia e diojo, “Apavo memajar ave isuviri raja Yahudi ninei so mia e?” 10Pilatusi ruin toapa imam veveru pasia sesiwi Yesus maso i to manau aso sesanemi kariria maso Yesus pana. 11Vape imam veveru pasia senggavo amiasa kaiwasa vepau pasia sesau ave Pilatusi suviri Barabasi maso sia. 12Avori Pilatusi ruar maso sia riwanea e diojo, “Masisi tojana mamo, vitoini nari inanari maso siniotu mesauwa ve raja Yahudi ninei?” 13Apa setananar riwanea e setojo, “Metavakiri na aitabat pai!” 14Avori Pilatusi duta maso sia e diojo, “Aso vitoi? Sasara vitoini nienari to manau pa?” Vape setananar to baba rawai ea e setojo, “Metavakiri na aitabat pai!” 15Pilatusi dio diona ve kaiwasa vepau jasia sesanemi pa siete. Aso jana pa, suviri Barabasi so sia. Avori diemiasa siniotu pasia sendasa Yesus. Janama siwi Yesus maso verut pimamuna na Romawi pasia ave sepai na aitabat pai.

Verut pimamuna pasia sesarap so Yesus e sesisiajari

(Mat. 27:27-31; Yoh. 19:2-3)

16Verut pimamuna pa senggor Yesus so gubernur nie anio pimasa pai repo pa. Avori sesau verut pimamuna pasia vura e senduir na wana. 17Avori sesasun Yesus na sasu veve wombo pai, e senanari tutuvi raja nana ai arawa veve sinia pasi, sesasai nana Yesus ru pa. 18Manau pa setove setatuana maso I e setojo, “Tabea maso raja siniotu Yahudi panau!” 19Sendora Yesus na ru pa tutiri aitato, avori sengganisui e setisa sene aebu pasi na aropo pa, ariri setove sesomi. 20Manau na sesisiajara Yesus pa, setita sasu veve wombo jani avori sesasuni riwanea na matau Nie sasu pai. Avori senggori so vorira wa ave sepai na aitabat pai.

Sepa Yesus na aitabat pai

(Mat. 27:32-44; Luk. 23:26-43; Yoh. 19:17-27)

21Nana raria jani siniotu pesi ria tuwa, erine vori riama nana bendar vorira. Sano pa Simoni vieva nana Kirene, Aleksander tutir Rupusi sutamami paina. Verut pimamuna pasia senggavo amias siniotu nei ave sieriou Yesus Nie aitabat pai.1 22Senggor Yesus so uta vesanomi na Golgota pai, nie tarai pai ma “Suovavo womindu”. 23Avori setono anggur vetetiovara tutiri mur pai maso I, vape Yesus kiembarai dunu anggur pai. 24Janama sepa Yesus na aitabat pai. Avori sengge undi ave teisia sesamuai savaru esasi nana Nie avavar pasi.2 25Sepa Yesus na aitabat pai, nana oras rim e at bera pa. 26Na aitabat pai vavo pa ma sepai wonggia pesi e sembui kavo vediajara e siemuai kariria tonine, “Raja siniotu Yahudi paina”. 27Sepa Yesus tutir siniotu venganggau pa sumbe muandu na aitabat pai. Apa esi pai niana rawa vata pa e esi pai niana rawa sara pa. [28Toapa jana kavo vevui na Repo pai raro pa ma sivediadi vevata, “Nari setatori kota masi ariri siniotu venganggau pasia.”]

29Siniotu vera tuwa na jasia senini sendumi pasi e sesisiajara Yesus e setojo, “Owa Au buo rura Anio Syen pai e buo vuauni soverai nana raria toru vea pa,3 30ite vuar vurusu aitabat pai e kuor Vesie maso Nomu tarai pai mesari!” 31Toapa jana kota imam veveru pasia e siniotu veruin sasavu kavo aniau na Torat pasia sesisiajara Yesus. Senggavo vavera nana matau sia e setojo, “Kior Vesie maso siniotu vevesiei pasia, vape matauni ma kior Vesie maso I va! 32Masisi I ma raja Israel, Raja Vekor Vesie mamo, ite viar vurusu aitabat pai, ave amasajo e amasanemitiar maso Au!” Siniotu muandu sepa nana aitabat tutir I pai sunggavo sisiajara Yesus kota.

Yesus vioru pa

(Mat. 27:45-56; Luk. 23:44-49; Yoh. 19:28-30)

33Nana oras sura e muandu raria rabua pa ma, uta pai kumuar vura veito oras toru ravinena pai. 34Janama nana oras toru ravinena pai, Yesus dienanar tutir raupui vebaba e diojo, “Eloi, Eloi, lama sabakhtani?” Kavo ninei nie tarai pai ma, “Ine Allah panau, Ine Allah panau, aso vitopi vievu vurusu Jau pa?”4 35Siniotu viosa nana jasia setadiawa Yesus dienanar pa, e setojo, “Ite metadiawa, siau Nabi Eliai!” 36Avori sawawarae siniotu pesi ria kior ariau jar pai5, avori suani susa anggur vesiasa pai. Janama kiesie ariau jar jani nana ai pesi sope pa, avori dioni raso Yesus sore pa, kievo e diojo, “Ite tatanota, e tasajo so nari Nabi Eliai riama e viar vurusu aitabat pai pe.”6 37Avori Yesus dienanar tutir raupui vebaba, e vioru. 38Nana rabua jana, sis viavakir vedioro andiraro na Anio Syen pai mieraba ve muandu nana vavo wa veito raso dou wa.7 39Veveru nana verut pimamuna viosa usari na dopo aitabat pai, siejo Yesus vioru pa toane. Avori kievo diojo, “Vevata, siniotu ninei ma Allah Atu paina!” 40Vavi pesia kota setosa nana vekasau e sesajoro vava jasi vura. Nana sia mamo Maria Magdalenai, e Maria Yakobusi atuma vavoru pai tutir Yosesi susiniami pai, e Salomei.8 41Vavi nine setoru senda usara Yesus e senanaripi usari nana rabua nia Galilea pa. E jana kota, vavi vevesie pa sepau senda usara Yesus so Yerusalem to manau.

Sepi Yesus nana papi pai

(Mat. 27:57-61; Luk. 23:50-56; Yoh. 19:38-42)

42Rabua jana ma deriasi diru to manau, e nana raria jani siniotu pasia senanari ariri sia so raria Sabat pai. 43Aso jana pa Yusupi, siniotu Arimatea pai, i ma siniotu vesamuai sano nana Mahkamah Agama Yahudi pa esi nina, dienanota raria Allah vie pareta ariri Raja pai kota, mietai va e riama so aropo Pilatusi e siau Yesus nie wominggo pai. 44Pilatusi tiendor so diediawa toapa Yesus vioru to manau. Apavo diemiasa siniotu pasia sesau veveru nana verut pimamuna viosa usari pai e duta maso i toapa Yesus vioru to manau e. 45Manau na diediawa veveru nana verut pimamuna viosa usari jani tiopa ariria pa, Pilatusi diono kasau so Yusupi kior Yesus nie wominggo pai. 46Avori Yusupi viori sis vemamara vemariat pai e viara Yesus nie wominggo pai, ruani nana sis jani. Avori pir wominggo jani na papi senanari nana suovavo veve robuki pai. Manau na jana kiediduiri rovuki pimasa pesi siori rature papi jani. 47Maria Magdalenai e Maria Yosesi siniani sesajo ariri uta Yusupi pir Yesus nana pa.