Skip to content
BibleKenya

Alkitab Bahasa Wondama

Markusi 14

Veveru na Yahudi pasia sesasera ria ave seto semu Yesus

(Mat. 26:1-5; Luk. 22:1-2; Yoh. 11:45-53)

Raria muandu ea mamo siniotu Yahudi pasia sesua so Raria baba Paskah pai tutiri Raria baba Mamami Vevaro Ragi pai. Imam veveru pasia e siniotu veruin sasavu kavo aniau na Torat pasia seto sesasera ria ave setapu Yesus tutiri manana, ave semuni.1 Aso senggavo e setojo, “Senggutu kavo ave setapu Yesus nana raria baba pai vape moja, tanggambarai siniotu vepau pasia senggasiou e setono sawau.”

Vavi pesi siara nie mani vesairara pai na Yesus ru pa vavo pa

(Mat. 26:6-13; Yoh. 12:1-8)

Nana rabua Yesus niana Betania pa, miesoi diapi na Simoni nie anio pai, i ma papopa tiere pota pado. Avori vavi pesi riama kior mani vesairara vene vaiti vetariai vesiri, niana pani senanari nana rovuki viate pai. Manau pa tiovo tu pani jani rao pa, dimbuvu mani jani so Yesus ru pai.2 Siniotu venana jasia, esia ma senggasiou e senggavo so esi pasia e setojo, “Aso vitopi vavi wai mieiri saradidioi mani vesairara wani pa? Vesie pa vavi pai viovo mani vesairara pai, ariri nie vaiti pai pipi perak utin toru rawai, e diono pipi jasi maso siniotu vevaro pi pasia!” Apa senggasiou vavi jani. Vape Yesus kievo e diojo, “Meto vaveri vape moja. Aso vitopi metono marabati so i pa? I ma nienari vava viate maso Jau. Aso siniotu vevaro pi pasia ma tawana senana tutir mia. E raria vura ma meto mesanemipai sia, diadi so menanari tojana. Vape Ja ma tawana ina tutiri mia va.3 Vavi ninei nienari vitopi diadi so nienari pa. I ma diono ariri mani vesairara pai nana raria aja sepir Jau na papi pai varami. Vevata mo itopa so mia: Nana topina vea, siniotu setopanusara Allah nie Kavo Vesie nei na dunia nei vetutira, vavi nei pi nienari ninesi ma, nari setopanusari kota ave amamo siniotu vura sesanemipai maso i.”

Yudasi viovo Yesus

(Mat. 26:14-16; Luk. 22:3-6)

Avori Yudas Iskarioti, i ma siniotu sura e muandu verausara Yesus pa esi nina, riama so imam veveru pasia tutiri nie sanepaja pai ave siwi Yesus maso sia. Imam veveru pasia sesanemi pasi siete vesiri aso setadiawa kavo jana pa, e setarer toapa nari setono pipi maso Yudasi. Apa Yudasi siesera ria viate pesi ave amamo siwi Yesus so sia.

Yesus tutir Nie verausari pasia seto seta pisia Paskah pai pa

(Mat. 26:17-25; Luk. 22:7-14, 21-23; Yoh. 13:21-30)

Nana raria baba Mamami Vevaro Ragi pai, nie raria retena pai pa, siniotu pasia senggutu domba so Paskah pai. Yesus nie verausari pasia setuta maso I e setojo, “Uta topi Jai sane vesie ave amambe masis pisia Paskah so Jai au pa?” Avori Yesus diemiasa Nie verausari pa sumbe muandu e kievo maso sandu e diojo, “Mundara so bendar wai, na wana nari musamuai siniotu mua pesi kioro kabesu vesara kambu nana pai. E munda usari, raso anio sua nana pai e mutopa so vene anio jani e murojo, ‘Jai amune Guru pai duta e diojo, andiraro topi nari I tutiri nie verausari nesia seta pisia Paskah pai nana pa?’ Avori siniotu vene anio jani nari dioisara andiraro vebaba pesi nana vavo wa so mandu. Andiraro jani ma diono ariri e miesi to manau. Na uta jana mumbe masis pisia Paskah pai so tata!” Janama Yesus nie verausari pa sunda raso bendar wai, na wana susamuai sia vura ariri kavo Yesus kievora pa. Avori sumbe masis pisia Paskah jani.

Nana diru pa, Yesus tutiri nie siniotu sura e muandu verausari pasia sendama so anio jani. Nana rabua semasoi e setapi na jana pa, Yesus kievo e diojo, “Vevata mo Itopa maso mia, nana kasau mia mamo, esi nari siwi Jau maso vio vemu jau pasia, andi diapi tutiri Ja ne.”4 Yesus nie verausari pasia setadiawa kavo nine pa, sesanemi pasi sikariria. Avori sia siri-siri kievo so Yesus e diojo, “Syen panau, ja ma piva?” I ma ruar e diojo, “Siniotu jani ma siniotu sura e muandu verausara Ja pa mia esi nina, siniotu ninei ma andi suana mamami susa paruasi siri tutiri Ja pa. Ariria mamo Atuma Siniotu pai nari vioru ariri kavo vevui nana Repo pai raro pa. Vape kariria vesiri maso siniotu vesiwi Atuma Siniotu jani! Vesie rawai mo siniotu jani ma siniani diavini vape moja!”

Yesus dia pisia vipui mo tutir nie verausara pasia

(Mat. 26:26-29; Luk. 22:15-20; 1Kor. 11:23-25)

Nana rabua Yesus tutir Nie verausara pasia setapi pa, Yesus kior mamami, e vie nadi tutir tiopana vesie maso Allah. Janama piosasavu mamami jani nana vara pasi, avori dionasi maso Nie verausari pasia e kievo e diojo, “Menggori e metani, ninei ma ine tarai paina.” Manau na jana kior toki visara sua anggur pai, tiopana vesie avori dionasi maso sia, e sia vura setunu anggur nana toki jani. E I ma kievo maso sia e diojo, “Ninei ma Ine veria paina, veria arer nana Allah, vetavuvu so siniotu vepau.5 Vevata mo itopa so mia: Kasa junu anggur ninei ea va, veito nana raria junu anggur vavoru tutiri mia na Allah nie uta vie pareta ariri Raja pa.” Avori sendoi ranu som pesi. E manau pa senda so Suovavo Zaitun.

Yesus tiopa toapa nari Petrusi piorasa Yesus

(Mat. 26:31-35; Luk. 22:31-34; Yoh. 13:36-38)

Avori Yesus kievo maso sia e diojo, “Mia vura nari metapai membavuru Jau. Aso nana Repo pai vevui e riotu toapa, Jau ma nari imu gembala pai e nie domba tau pai miesasiepar.6 Vape manau na itenam riwanea mamo, Ja ma nari ira papo nana mia so Galilea.”7 Petrusi kievo maso I e diojo, “Nari sia vura sembavuru Au, vape jau ma piva.” Avori Yesus kievo e diojo, “Vevata mo Itopa so au, diru ninei, kokori pa aja sisau ve muandu varami, au ma puorasa jau ve toru.” Vape Petrusi kievo to karakuai e diojo, “Toapa jana kota Ja ma nari ivoru tutiri Au, e kasa iporasa Au va.” Nie verausari esi pasia senggavo tojana kota.

Yesus vie nadi na uta Getsemani

(Mat. 26:36-46; Luk. 22:39-46)

Janama Yesus tutir Nie verausara pasia sendama so uta vesanomi na Getsemani, e Yesus kievo maso Nie verausari pasia e diojo, “Memasoi nana nine, e ira ive nadi.” Avori Yesus kior Petrusi, Yakobusi, e Yohanesi setoru senda usari. Yesus sane pa vesai vesiri e sane saserai. Avori kievo maso sia e diojo, “Sane raro ne vesai vesiri, masi jo ivoru vea. Memasoi na nine e metarama.” Yesus ria e vie kasau katu nana sia, avori disa aebu pa sandu veito ru pai tiere kakopa e vie nadi. Nana Nie nadi pai siau ave diadi mamo siemuai marior jani vape moja. “Abba, Jai, Au ma puaja so nuenari pi saserai pasi vura. Kuor marior ninei vurusu Jau. Vape, rua ariri Ine majar va, vape ariri Jai nomu majar pai andi vieruana.”

Manau pa Yesus siovera maso Nie verausari pasia e siemuai sia mana setena. I ma kievo maso Petrusi e diojo, “Simoni, buena e? Avo au ma kasa buerama oras pa siri vea va e?” Avori Yesus kievo maso sia e diojo, “Metarama vei vea e membe nadi vea, ave amamo metau so sotoura pai vape moja. Mesanemi pasi sio sinanari veve vata pai, vape mene tarai pasi ma sipaja va.” Janama Yesus ria ea e vie nadi tutiri tiopana kavo vemasi vaveri pasi. E nana rabua siovera ea so Nie verausari pasia, I ma siemuai sia mana setena ea, aso sendemi pasi simarabat to manau e setatara senduara vitopi nari setopa maso I pa.

Janama Yesus siovera ea ve toru maso sia, kievo e diojo, “Avo aja metena e memanau marior pasi rami e? Manau vea! Oras pai miesi to manau so Atuma Siniotu pai ma nari esi siwi maso siniotu veve tatar pasia sembarami pasi. Mesobata mia, mendama tanda. Mesajo! Siniotu vesiwi Ja pai riama to manau!”

Setapu Yesus pa

(Mat. 26:47-56; Luk. 22:47-53; Yoh. 18:3-12)

Yesus andija kievo rami, siniotu sura e muandu verausara Yesus pa esi nina, Yudasi, riama tutiri kaiwasa borai pesia, senggor sumbe e airora. Imam veveru pasia e siniotu veruin sasavu kavo aniau na torat pasia tutir veve baba na Yahudi pasia setamiasa sia. Siniotu vesiwi pai tiopa pi veveruana pesi maso sia, “Siniotu nari isum pai mamo, andi Jana, metapuri e menggori tutiri metaramani to vesie.” Nana rabua Yudasi riama pa, saira ria so Yesus, e kievo e diojo, “Jai Guru,” avori disumi. Avori siniotu verama tutiri Yudasi jasia, sendu Yesus e setapuri. Vape siniotu venana jana esi piati nie sumbe pai e pieratu Imam Baba pai nie womi pai veito taradiau pai tieitu. Yesus kievo maso sia e diojo, “Memamo ja ma siniotu vekariria, apavo mendama tutiri sumbe e airora ave metitapu Jau e? Raria vura ma jeniniau nana Anio Syen na aropo mia, amana metapur Ja va. Vape ariri toapa jana, ave kavo vevui nana Repo pai vieruana.”8 Nie verausari pasia setapai e sembavuri vura. Nana raria jani, katiei pesi ria usara Yesus. Dievavara sis vemanis nina ave dinduana nie tarai pai. Siniotu pasia seto setapuri, vape tiavini sis pai e diepai kakavir.

Yesus niana aropo Mahkamah Agama pai

(Mat. 26:57-68; Luk. 22:54-55, 63-71; Yoh. 18:13-14, 19-24)

Janama senggor Yesus raso aropo Imam Baba pai. Avori imam veveru pasia vura, veve baba na Yahudi pasia e siniotu veruin sasavu kavo aniau na Torat pasia senduiri nana jana. Petrusi ria usara Yesus nana vekasau, veito sua na Imam Baba pai nie anio varavu pa. Na wana miesoi na rabua siniotu viarama pasia e deriaisi adia pai ave amamo riata nie tarai pai. Imam veveru pasia tutiri esi pasia vura nana Mahkamah Agama pai sesasera pi veve ruana nanapi Yesus Nie sasara pasi ave siemuai kariria voru pai. Vape sesamuai nie sasara pasi va. Siniotu pa sepau setopanusara kavo viawitituwa nanapi Yesus, vape kavo setopanusara pasi ma simasi vaveri va. Avori esia setosa e setopa kavo viawitituwa nanapi Yesus e setojo, “Amatadiawa siniotu ninei kievo e diojo, ‘Nari irura Anio Syen siniotu sinanari ninei. E nana raria toru mamo, nari viaunu esi ea, jani ma siniotu senanari va.’ ”9 Vape sene kavo setopanusara jasi ma simasi vaveri va.

Apa Imam Baba pai biatai e diosa nana rabua siniotu veruir jasia e duta maso Yesus e diojo, “Au ma buediawa sene kavo sembe karaka au to manau, apavo au ma ruar nanapi sene kavo pa toane?” Vape Yesus pieja vea e ruara kavo pesa va. Imam Baba jani duta maso I riwanea e diojo, “Apavo Au ma Raja Vekor Vesie pai, e Atuma nana Allah tasanandika pai e?” Yesus ruar e diojo. “Vevata, Ja ma Raja Vekor Vesie paina. Mia vura nari mesajo Atuma Siniotu pai, nari miesoi nana Allah Vepaja nana pi vura pai nie rawa vata pa. Avori nari mesajo Atuma Siniotu pai riama so dunia nei na arepa pa raropa nana rora wa.”10 Apa Imam Baba jani piorabana nie sasu pasi e diojo, “Tata ma kasa tasasera kavo vevesiei ea va! Metadiawa kievo sisiajara maso Allah to manau. Apavo mene sanepaja pasi ma toane?” Sia vura senggutu kavo toapa nari siemuai hukuman voru pai.11 Avori esia sengganisu Yesus. Senduana re pasi tutiri sis e sendorai. E sesisiajari e setojo, “Hei nabi panau, ite tuopa maso ama, teini riora au pa?” Avori siniotu viarama pasia kota senggor Yesus e sendorai.

Petrusi piorasa Yesus pa

(Mat. 26:69-75; Luk. 22:56-62; Yoh. 18:15-18, 25-27)

Nana raria jani Petrusi andija niana Imam Baba pai nie anio pai varavu pa rami. Avori womi vavi venanaripi na anio Imam Baba pai, riama so jana. Nana kasau vavi pai siejo Petrusi dieriasi adia pai e riata nie tarai pai, siesir ariri Petrusi re pasi avori kievo e diojo, “Au kota ma tawana nuana tutiri Yesus, siniotu Nazaret pai.” Vape Petrusi pioras e diojo, “Ja ma iruin siniotu jani va e iruin kavo vitopi kuevora pa.” Avori Petrusi ria so rature baba vesua so anio pai nie varavu pai. [Kasau jana, kokori pai disiau.] Nana rabua womi vavi jani siejo Petrusi ea pa, kievo maso siniotu viosa na jasia e diojo, “Siniotu ninei ma sia esi nina!” Vape Petrusi pioras ea. Worabua va mana siniotu pesia senana jana senggavo kota maso Petrusi e setojo, “Vata, au ma sia esi nina, aso siniotu Galilea nia au pana.” Avori Petrusi siauwora e diojo, “Ja ma iruin siniotu menggavo soa jani va!” E kasau jana kokori pai siau ve muandu. E Petrusi sanepai so kavo Yesus kievora so i pasi e diojo, “Aja kokori pai siau ve muandu varami, nari puorasa Jau ve toru vesiri.” Apa Petrusi sane pa kariria e siai.

Source notes (11)
  1. Cross-reference Kel. 12:1-27
  2. Cross-reference Luk. 7:37-38
  3. Cross-reference Ul. 15:11
  4. Cross-reference Mzm. 41:10
  5. Cross-reference Kel. 24:8; Yer. 31:31-34
  6. Cross-reference Za. 13:7
  7. Cross-reference Mat. 26:32, 28:16
  8. Cross-reference Luk. 19:47, 21:37
  9. Cross-reference Mat. 26:61, 27:40; Mrk. 15:29; Yoh. 2:19
  10. Cross-reference Dan. 7:13
  11. Cross-reference Im. 24:16

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.