Skip to content
BibleKenya

Alkitab Bahasa Wondama

Markusi 13

Yesus kievavo nanapi Anio Syen pai nari mierura pa

(Mat. 24:1-2; Luk. 21:5-6)

Nana rabua Yesus suvi nana Anio Syen pai pa, Nie verausari pa esi, kievo e diojo, “Jai Guru, ite suejo rovuki wasi sine karakuai pa e Anio Syen wani diete vesiri!” Yesus ruar maso i e diojo, “Maite suejo Anio Syen pai ma diete vesiri. Nana raria pesi mamo, rovuki vena Anio Syen jasi vura, sa sivata sasana na uta sinana pa ea va. Pi suejo pasi vura nari simarura.”

Yesus kievo nanapi Nie verausari pasia nari sesamuai marior

(Mat. 24:1-2; Luk. 21:5-6)

Janama Yesus ria so Suovavo Zaitun pai. Na jana miesoi na uta diadi so siejo Anio Syen pai. Avori Petrusi, Yakobusi, Yohanesi, tutir Andreasi semesari sendama so Yesus avori setutani e setojo, “Jai Guru, ite tuopa maso ama. Raria toni nari kavo tuopana ninesi vura simasi ne? Vava vitopi nari vieruana pa, veito amanduina raria pai miesi nana pa?” Avori Yesus ruar maso sia e diojo, “Metarama, ave esia setawi vavera mia vape moja. Siniotu pa sepau nari sendama e senggor sano ne setojo, ‘Raja Vekor Vesie pa Ja nine.’ Avori nari setawi titituwa siniotu pa sepau. Nana rabua metadiawa kavo nanapi siniotu sembe marova vavera pivai raupui marova pai, mematai vape moja. Aso jasi vura ma nari siveruana, vape raria vemanau pai ma aja pi varami. Kaiwasa pesi nari biatai vie marova tutiri kaiwasa pa esi. Kerajaan pesi nari vie marova tutiri kerajaan pa esi. Mundija pimasa pai nari vie diadi na uta pa pau, e nari vavisi pai mu. Vape jasi vura ma marior retena paina vea, ariri pota veter vavi pesi dio diavi pa. Vape metarama mia, aso nari siniotu setapu mia e sesiwi mia so kuaruvi vekutu kavo pai. Nari sendora mia na anio ari agama Yahudi pai. Nari senggor mia raso aropo veveru pasia e veve raja pasia aso menda usara Jau pana. Nana kasau jana nari metopanusara kavo pai nanapi Jau so sia.1 Nari siniotu setopanusara Kavo Vesie pai papo maso kaiwasa vura. E nana rabua setapu mia e senggor mia so kuaruvi vekutu kavo pai, mesanemi sasera mia so kavo vitosi menggavora pasi vape moja, vape menggavo kavo vitosi Allah tiopana maso mia pa, aso kavo menggavora pasi ma mene kavo sina va, vape Wainunu Sren pai andi kievo.

Esi nari siwi neta pai mesari ave semuni. Toapa jana kota, tama pai siwi atu pai ave semuni. Atuma pasia nari seto vavera e sesiwi sene baba pasia ave semu sia. Siniotu pasia vura nari senggambarai mia aso menda usara Ja pana. Vape siniotu teini rutawana nie sanetiar pai veito raria vemanau wai, nari siemuai vesie pai.”2

Pi vekariria mo pai nari riama

(Mat. 24:15-28; Luk. 21:20-24)

Avori Yesus kievo ea e diojo, “Nari mesajo pi vekariria mo Allah kiembarai pai. Pi vekariria ninei ma nari diosa na uta kasa sua nana va3. [Viapa nine mia ma nari menduini ariri kavo ninesi to vesie mo.] Nana raria jani siniotu venana Yudea pasia nari setapai so uta veve suovavo wa.4 Siniotu venana anio pa nie babua pai ma kasa viar va e sua so anio pai raro pa ave kior piesasi vape moja.5 Siniotu venana romi pai ma kasa tievera ave kior nie sasu pasi vape moja. Vape kariria vesiri maso vavi vesanemi vava pasia e vavi viono susu so sene atuma pasia nana rabua jana. Membe nadi maso Allah ave amamo pi jasi vura sive diadi va nana rabua veriewas pai. Aso nana raria jasi siniotu pasia nari setere marior vebaba, marior jani ma aja vie diadi varami, nana rabua retena Allah nienari dunia nei pa veito raria ninei. E marior vetoapa jani ma kasa nari tiere siniotu ea va.6 Masisi Allah sio sisui raria jasi va mamo, sa siniotu pesi kota tienam va. Vape so siniotu Allah diri to manau pasia, Allah sio sisui raria jasi.

Nana rabua jana, masisi esi kievo maso sia e diojo, ‘Ite mesajo, Raja Vekor Vesie pai andi nia nine!’ pivai ‘Raja Vekor Vesie pai andi nia wana!’ Mesanemitiar kavo senggavora pasi vape moja. Aso Raja Vekor Vesie veve vata va pasia e nabi veve vata va pasia nari sendama. E senanari vava verawai e pitandor pesasi, ave amamo setawititu siniotu pasia, masisi diadi so sesamuai paja mamo senanari maso siniotu Allah diria pasia kota. Apavo, metarama mia! Itopana ninesi vura maso mia papo, nana rabua aja sive diadi varami pa.”

Atuma Siniotu pai riama pa

(Mat. 24:29-36; Luk. 21:25-33)

“Nana raria marior jasi sikara to manau, nari wor pai riwani ve kumuar, e sembai pai disambiara ea va.7 Siverere pasi nari sitauwa nana rora wa, e paja venana rora wa nari simaniniawar.8 Nana raria jani, nari siniotu pasia sesajo Atuma Siniotu pai riama na arepa pasi tutiri Nie paja vebaba e sasaar visanggapara pai.9 Avori nari diemiasa nie siniotu rora pasia ave senduiri Nie kaiwasa diria pasia nana dunia nei samabu ata pasi, nana sope dunia nei veito sope rora wa.”

“Menggor pi aniau nana kavo sora tarawa nanapi airavo ara pai. Masisi arawa pasi sikake e sive kititiri mamo, menduina toapa deriasi rabua ve wor pana. Toapa jana kota, nana raria mesajoro pi borai ikavora maso mia pasi erine sivediadi, apa menduina toapa raria pai dieriaisi vesiri to manau. Vevata mo ikavo maso mia, siniotu vetenam na raria nine pasia, semboru va nana aja pi ninesi vura nari sivediadi varami pa. Rora e kakopa nari sinai, vape ine kavo nei ma nari viata veito woroi-woroi.”

Siniotu pasia senduin Nie raria te oras pai va

(Mat. 24:36-44)

“Vape nanapi raria te oras pai, sa esi ruini va, siniotu rora ve nana rora pasia piva, Atuma kota piva, vape jai miesari, andi ruina.10 Apavo mesanemipai e metarama mia to vesie, aso menduini va raria toini vava jani nari vie diadi pa. Atuma Siniotu pai riama pa ma masi ariri siniotu pesi vievuru nie anio pai e ria so uta viaroi. I ma diemiasa siniotu venanaripi pasia sesajo vedioro nie anio pai, e diono nanaripi so sia vura. Avori dierer so viarama nana rature pai ave amamo dierama rature nei tutiri vesie veito siovera!11 Apavo mia kota, metarama to vesie mo, aso menduini oras nari vene anio jani siovera ma pa va, diadi so riama na deriaisi diru pa te, diru rabua pa te, deriaisi bera pa te, bera vavoru mo pa. Masisi ria tandor mamo, siemuai mia metena vape moja. Vitosi itopanasi so mia pa, itopanasi kota maso siniotu vura: metarama mia vea!”

Source notes (11)
  1. Cross-reference Mat. 10:17-20; Luk. 12:11-12
  2. Cross-reference Mat. 10:22
  3. Footnote uta kasa sua nana va Uta ninei ma Anio Allah paina
  4. Cross-reference Dan. 9:27, 11:31, 12:11
  5. Cross-reference Luk. 17:31
  6. Cross-reference Dan. 12:1; Why. 7:14
  7. Cross-reference Yes. 13:10; Yeh. 32:7; Yl. 2:10, 31, 3:15; Why. 6:12
  8. Cross-reference Yes. 34:4; Yl. 2:10; Why. 6:13
  9. Cross-reference Dan. 7:13; Why. 1:7
  10. Cross-reference Mat. 24:36
  11. Cross-reference Mat. 25:14; Luk. 12:36-38

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.