Alkitab Bahasa Wondama
Markusi 12
Kavo sora tarawa nanapi siniotu venanaripi na romi anggur pasia
(Mat. 21:33-46; Luk. 20:9-19)
Janama Yesus dinggavora so imam veveru pasia, siniotu veruin sasavu kavo aniau na Torat pasia tutir veveru nana Yahudi pasia nana kavo sora tarawa pesi e diojo, “Siniotu pesi tiana anggur na nie romi pai e nienari war pesi wawariri. Sieriai kamberei ave nienari pi vinggusara anggur pai e viaunu java vetariai pesi so vitarama romi jani. Manau pa siau siniotu venanaripi pasia ave sesajo vedioro nie romi anggur jani tutiri sesamuai vaiti. Avori ria so uta vevesiei.1 Nana rabua raria pai miesi so verosu buo anggur jasi pa, siniotu vene romi pai diemiasa nie womi pesi ria so siniotu venanaripi na romi anggur pasia, ave amamo siemuai nie savaru pai nana romi jani. Vape siniotu venanaripi na romi anggur jasia setapu womi jani e sendorai, avori setamiasi e vievu tutiri vara vereri. Janama vene romi jani diemiasa womi vevesiei pesi ria so sia ea. Vape siniotu venanaripi na romi pasia sendora womi jani na ru pa to vie kapor e sesisiajari. Avori vene romi jani diemiasa womi vevesiei pesi ea, vape semu womi jani. E senanari tojana vei vea maso womi vevesiei pasia vura, esia ma sendora sia e esia ma semu sia kota. Vene romi pai nie siniotu vevata pa siri vea andi matauni atuma sanepaja mo paina. Vepui pa diemiasi nie atuma pai maso venanaripi na nie romi anggur pasia, miemo e diojo, ‘Ariria nari setatuani.’ Vape nana rabua venanaripi na romi anggur jasia sesajo nie atuma pai mana, senggavo nana matau sia e setojo, ‘Mesajo! Siniotu vene romi nei diemiasa nie atuma pai mesari! Atuma ninei andi nari siemuai romi nei. Mendama tamuni, ave nari tata tasamuai romi ninei!’ Apavo setapu atuma vene romi pai e semuni. Avori senggei so romi anggur jani vorira pa.” Yesus duta sia e diojo, “Vitoini nari siniotu vene romi pai nienari pa? Tindija mamo nari riama e mu venanaripi na romi pasia, avori siwi romi anggur pai so siniotu vevesiei ave senanaripi na nie romi pai. Vevata mo metap ayat ninei na Repo pai raro pa to manau,
‘Rovuki siniotu venanari anio pasia senggea pai
andi vie rovuki retena pana.2
Ninei ma Syen nie nanaripi nina,
tasajo pi vura verawai mo pai.’ ”
Apa veveru nana Yahudi pasia senduin toapa kavo sora tarawa Yesus kievora jani ma tiere sia. Aso jana pa, seto sesasera ria ave setapuri. Vape sematai maso siniotu vepau pasia, apa senda vurusu Yesus.
Nanapi vevaiti pajak pai
(Mat. 22:15-22; Luk. 20:20-26)
Avori veveru na Yahudi pasia setamiasa siniotu Farisi pasia tutir vena vori Herodesi pasia, e esia sendama so Yesus ave sesotouri tutiri utana pasi. Sendama so Yesus e setojo, “Jai Guru, amanduin toapa, tuopana kavo ve tindija pai vei vea. Au ma muetai maso siniotu pasia va, aso au ma biri siniotu va. Vape bueniniau Allah nie majar pai to tindija. Apavo ite tuopan ariri kavo nine maso ama, ariri tane pareta agama pai mamo, diadi so amambait pajak maso Kaisar te piva e? Tindija mamo amambait pajak jani te piva e?” Vape Yesus ruini sene awitituwa jani. Kievo maso sia e diojo, “Aso vitopi mesotouru Jau pa? Apa ite menggor pipi perak pesi maso Jau ave isajori.” Avori senggor pipi perak pai maso Yesus. Apa Yesus duta maso sia e diojo, “Teini nie re nine e sano nana pipi perak ninei?” Senduar e setojo, “Kaisar.” Avori Yesus kievo maso sia e diojo, “Tojana mamo, pi vitopi Kaisar nieu mamo metona so Kaisar. Mae pi vitopi Allah nieu mamo metona so Allah.” Setandor aso setadiawa kavo Yesus kievora pasi pana.
Siniotu Saduki pasia setuta nanapi tenam riwanea vurusu voru pai pa
(Mat. 22:23-33; Luk. 20:27-40)
Avori siniotu Saduki pa esia senda maso Yesus. Sia ma senggorusara va toapa siniotu vevoru pasia nari setenam riwanea. Setuta maso Yesus e setojo,3 “Jai Guru, Musai vui pareta ninei so tata: Masisi mua veririau pesi vioru vape siemuai atuma va, apavo neta katu pai nari riatu inar jani, ave amamo neta katu pai viara usapui so neta vava vevoru to manau pai.4 Apa mambe neta pa esia sembe rim e muandu. Mua retena pai riautu vavi pesi. Vape mua pai vioru e siemuai atuma va. Avori mua veve muandu jani riautu inar jani. Vape andi kota vioru e siemuai atuma va. Toapa jana kota vediadi maso neta mua veve toru pai, e tojana kota rama so neta katu veve rim e muandu pai, sia vura semboru e sesamuai atuma va. Vepui pa vavi jani vioru kota. Nana raria siniotu vevoru pasia setenam ea mamo, nari vavi nei teini vie sawa so i mo? Aso mambenata rim e muandu jasia sendauti to manau pana!” Yesus Ruar maso sia e diojo, “Mesanemi sasera vesiri, aso mia ma menduini Repo pai va, tutir Allah nie paja pai va. Aso nana raria siniotu vevoru pasia setenam ea mamo, kasa sendiriau ea va, vape setenam ariri siniotu rora pasia na rora wa. E nanapi siniotu vevoru pasia setenam sovera pa, vevata mamo metap nana Musai nie surat pai, nanapi topanusara samue sinia veveviar pasi pa. Nana ayat jasi raro pa sivui toapa Allah kievo maso Musai e diojo, ‘Jau ma Allah Abrahami, Allah Isaki, e Allah Yakopi.’5 I ma Allah siniotu vevoru paina va, vape Allah siniotu vetenam paina. Vevata mesanemi sasera mia vesiri!”
Pareta veve retena pai
(Mat. 22:34-40; Luk. 10:25-28)
Avori siniotu veruin sasavu kavo aniau na Torat pa esi, diediawa Yesus tutiri kaiwasa nana kuaruvi Saduki pasia senggavo vavera. Siejo toapa Yesus ruar kaiwasa jasia sene utana pasi to vesie. Apavo duta maso Yesus e diojo, “Pareta toini vie retena nana pareta pasi vura pa?” Yesus ruar maso siniotu jani e diojo, “Ninei ma pareta veve retena paina, kaiwasa Israel pa mia, Metadiawa, Syen jani ma Allah tasom paina, Syen jani ma siri vea.6 Sanepai Syen andina nomu Allah tutir sanemu raro vetutira, ma nomu wainunu pai vetutira, ma nomu sanepaja vetutira, ma nomu paja pai vetutira. Pareta veve muandu pai ma, Sanepai siniotu vevesiei pai masi ariri sanepai nomu tarai pai mesari pa. Pareta muandu nine sandu ma subaba rawai nana pareta esi pasi vura.”7 Avori siniotu veruin sasavu kavo aniau na Torat pai kievo maso Yesus e diojo, “Vata vesiri, Jai Guru! Kuevo pa vevata toapa Syen Allah ma siri vea, e varo Allah vevesiei ea.8 Tindija mamo tasanemipai Allah tutiri tasanemi pasi vetutira, tutiri tane sanepaja pasi vetutira, tutiri tane paja pasi vetutira. Tata kota nari tasanemipai siniotu vevesiei pasia masi ariri tasanemipai tane tarai pasi mesari pa. Tatatuan maso pareta nine sandu pa ma vesie rawai vurusu tatono pisom venunu e pisom vevesiei pasi vura maso Allah pa.”9 Yesus siejo toapa siniotu veruin sasavu kavo aniau na Torat pai ruar tutiri vesie vesiri to manau. E Yesus kievo maso i e diojo, “Au ma vare vue kaiwasa nana uta Allah vie pareta ariri Raja pa.” Manau pa, siniotu pasia vura sematai setuta ea maso Yesus.
Nanapi Raja Vekor Vesie pai
(Mat. 22:41-46; Luk. 20:41-44)
Nana rabua Yesus dieniniau kaiwasa pasia na Anio Syen pai pa, duta maso sia e diojo, “Aso vitopi siniotu veruin sasavu kavo aniau na Torat pasia senggavo toapa Raja Vekor Vesie pai vie usapui nana Dauti pa? Aso nana rabua Wainunu Allah pai diedidini Dauti pa, miesari kievo tonine,
‘Syen Allah kievo maso ine Syen pai:
Muesoi na Ine rawa vata ne,
veito jonae siniotu veve marova tutir Au pasia setuan maso Au.’10
Apavo Dauti matauni ma siau Raja Vekor Vesie pai ve ‘Syen’, i ma vie usapui nana Dauti pa ma toane?” Siniotu vepau nana Anio Syen pasia sesanemi pa siete vesiri so setadiawa Yesus dieniniau pa.
Yesus diono kavo sanepaja ave setarama vedioro sia maso siniotu veruin sasavu kavo aniau na Torat pasia
(Mat. 23:1-36; Luk. 20:45-47)
I ma kievo maso sia e diojo, “Metarama vedioro mia maso siniotu veruin sasavu kavo aniau na Torat pasia. Sia ma semajar senda bari tutiri sesasun sia nana sasu viaroi pasi. Sia ma semajar siniotu venana uta vevovo pi pasia setatuana sia.11 Masisi sendama so uta siniotu sembe ari nana pasi e uta siniotu setono mei pasi, semajara semasoi na uta vesamuai tatuan pasi. Setawi vaveri inar pasia e setawara sene pi vepau pasi. E sembe nadi viaririoisi ave amamo setitupu vava kariria senanari pasi, Allah nari diono hukuman vemarabat vesiri maso sia!”
Pi som nana inar vevaro pi pesi
(Luk. 21:1-4)
Nana raria pesi pa Yesus niana Anio Syen pai. Miesoi deriaisi aiku vetini pi som pai e dieduata kaiwasa pasia setono sene pipi pasi susa aiku jani raropa pa. Siniotu vene pi vepau pasia setono pipi pa pau. Avori inar vevaro pi pesi riama kota. Diono pipi tembaga katu mo pa muandu. Apavo Yesus siau nie verausari pasia avori kievo maso sia e diojo, “Vevata mo Itopa maso mia, inar vevaro pi nei ma diono to pau rawai nana esi pasia vura, setono pipi susa aiku vetin pi som pai Aso sia vura ma setono esasi nana sene pipi vepau rawai pasi pana. Vape inar nei viero pi vesiri, diono pipi venana pasi vura. Arora vae pipi pa sandu ma nari dimbori pisia so i pana.”
Source notes (11)
- Cross-reference Yes. 5:1-2
- Cross-reference Mzm. 118:22-23
- Cross-reference Mat. 22:23; Luk. 20:27; Kis. 23:8
- Cross-reference Ul. 25:5-6
- Cross-reference Kel. 3:6
- Cross-reference Ul. 6:4-5
- Cross-reference Im. 19:18
- Cross-reference Ul. 4:35
- Cross-reference Hos. 6:6
- Cross-reference Mzm. 110:1
- Cross-reference Luk. 11:43
Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.