Lukasi 1

Kavo verausara

1Teopilusi, itatuan panau,

Kaiwasa pa sepau setosasera ve sembui ariri vava veve diadi nana kasau rabua tata pasi to manau. 2Sembuisi ariri siniotu vesajo na veremi pasia, setopana Allah nie kavo aniau pai maso tata pa nana retena mo, e vepui setopani e dimasiepara pa. 3Avori isasera ariria tutir sanepaja pasi vura nana retena pa to manau, iruin vesie toapa, ave ivui aririasi maso Jai au. 4Inanari aririasi ave amamo Jai ruini vitopi ve pi aniau to manau maso au pa ma, vevata mo.

Topanusara nanapi Yohanesi viono kambu masi pai vie diadi pa

5Nana rabua Herodesi vie raja na aniose Yudea pa, imam pesi sano pa Zakhariai. I ma sua nana kuaruvi imam Abia pasia. Vinie pai sano pa Elisabeti, ikota ma vieva na usapui imam. 6Sune tenam mambe sawa pa ma tindija ma ono sane vesieni maso Allah. Sandu ma sunggor usara ariri Syen nie kavo ma arer pasi vura. 7Sandu ma sumbaro atuma aso Elisabeti sane masa e sumbe masa ma visa to manau.

8Nana raria pesi pa, kuaruvi Abia1 siemuai kasau, apa Zakhariai ni, ria nanaripi Imam pai nana Syen aropo pa. 9Tutir iria2, ariri Imam pasia setono ora pa, apa Zakhariai ni siemuai isatuira ave suapui so Anio Syen 3 pai raropa ave amamo kiair pi vesairara pasi. 10Aja nanaripi vekair pi som vesairara pai ria rami, kaiwasa vepau pasia ma sembe nadi na vorira wa. 11Na jana Syen nie siniotu rora pai vieruani so Zakhariai. Siniotu rora pai diosa na wavusom vesairara senggair pai rawa vata pa. 12Na jana pa Zakhariai siejo siniotu rora pai veito tiendor e mietai. 13Vape siniotu rora pai kievo e diojo, “Zakharia! Muetai va! Allah diediawa nomu nadi pai. Viniemu Elisabeti nari diavi atuma mua pesi. Buono sano Yohanesi maso i. 14Nari sanemu pa vesie rawai ma nari kaiwasa pa sepau sesanemi vesie nana atuma pai vie diadi pa. 15Aso nari vie siniotu baba ariri Syen nie sajajo pa, e sa dunu anggur pivai sua vekarakuai va. Nari dionu tutir Wainunu Sren pai nana rabua siniani sanevavai pa.

16Nari diedidin kaiwasa Israel pa sepau, ave sesovera maso Allah, sene Syen pai. 17Nari vie siniotu amias vepaja ariri Nabi Eliai. Nari dionae tama pasia sesovera sesanemi pasi so sene atuma pasia, e nari diedidin siniotu vekor usara va pasia so ria sanepaja vetindija pai. Toapa jana kota nienari ariri kaiwasa pesi to manau ave dienota Syen pa.” 18“Nari toane, ave iruin ariri tiopa vava ne veruana maso jau.” Zakhariai dutana siniotu rora pai. “Ja ma ive masa to manau, e vinie wai vie visa kota.” 19Siniotu rora pai ruar so i, “Jau Gabriel, ja ma inanaripi usara Allah e andi diemias jau e irama itopana kavo viate nine maso au. 20Vitopi itopana pa, nari veruana na nie raria pai. Vape aso sanetiar va, apavo nari sa kuevo va e nari soremu pa mumuja veito kavo itopana ne veruana.” 21Aja kaiwasa pasia setanota Zakharia rami pa. Senggavo usara aso vitopi niana Anio Syen pai raropa to woroi pa. 22Nana rabua suviari pa ma, kievo kavo pesa so kaiwasa pai va. E disatuir na vara pasi vei vea, aso sore pa mumuja pana. Janama siniotu pasia senduin toapa siejo piesa nana Anio Syen pai raropa to manau. 23Janama ria nie nanaripi ve nana Anio Syen pai raropa to manau, Zakhariai vievu raso anio wa. 24Woroi pesa va, janama vinie Elisabeti sanevava, apa miesoi vea na anio pa raropa woroi sembai rim. 25Kievo e diojo, “Manau pa Syen sanepai jau, apa rura ine kavo sisiajara pasi.”

Topanusara nanapi Yesus vie diadi pa

26Nana sembai veve rim e siri pai, Allah diemiasa siniotu rora Gabriel ria so uta Galilea aniose sesau ve Nazaret. 27Siniotu rora Gabriel riama so karavi vavoru, veve sawa aru tutir mua vesanomi nana Yusupi vieva na usapui Dauti. Karavi nei sano pa Maria. 28Siniotu rora nei riama so Maria nie anio pai, kievo so i e diojo, “Vesie pai, maso au, Syen vie berkat au, Syen tutir au.” 29Mariai tiendor mo aso diediawa kavo jana pa, avori dutana sane raropa so kavo nine veumaja toane? 30Siniotu rora pai kievo so i e diojo, “Maria, muetai va, aso suemuai sane vesie na Allah aropo pa. 31Vevata mo nari sanevava e buavi atuma mua pesi, amamo buonae sano nana Yesus. 32Nari vie siniotu baba mamo sesauwi ve Atuma Allah vetariai mo. Syen Allah nari dionae miesoi nana tapuni raja Dauti nie karapesa Raja pai. 33E nari vie raja so usapui Yakob veito woroi-woroi mo. Allah nie kerajaan pai kasa mienau va.” 34Maria kievo e dioja so siniotu rora pai, “Nari toane, vava nine veruana maso jau, ja ne ive sawa varami?” 35Siniotu rora pai ruar so i e diojo, “Wainunu Sren pai nari riama so au, e Allah nie paja pai tievavun au, aso nari Atuma mua buavi ninei sano pa ve Sren, Allah Atu nina. 36Vevata mo, nemeta pa Elisabeti, i ma vie visa to manau e kaiwasa diojo sanemasa, vape andi sanevava atuma mua nina, sembai veve rim e siri to manau pa nine. 37Aso Allah ma piaja na pi vura.” 38Maria kievo e diojo, “Vevata mo nomu womi Syen ni jau; ariri kuevo pa.” Avori siniotu rora pai ria vurusui.

Maria tutir Elisabeti

39Mutu raria pa toi, sawawarae Maria ria so aniose pesa na wi rabibua Yudea. 40Na jana ria sua so Zakhariai na nie anio pai, e tiopan tabea so Elisabeti. 41E na rabua Elisabeti diediawa Maria tiopana tabea pa, atuma Elisabeti sanevava pai mieniniawar. Apa Elisabeti dionu tutir paja Wainunu Sren pai, 42avori dumi tutir raupui vebaba, “Berkat pai maso au na kasau rabua vavi pasia! Berkat pai maso atuma vena nomu sane avavi pai! 43Apavo teini jau, apajoma Syen siniani riama so ja ne? 44Toapa jana jediawa nomu tabea pai pa, atuma sanevava nei mieniniawar e sane pa vesie. 45Vesie maso au, aso sanetiar vitopi Syen kievora maso au pa ma nari veruana.”

Ranu sanandika nana Maria

46Maria kievo e diojo,

“Na sane rarone isanandik Syen,

47ma ine wainunu nei sane pa vesie aso Allah vekor vesie pai,

48aso Allah tawana siejo vedior nie womi vena dou nine jau.

Vevata mo, na raria ninesi usapui vura nari sesau jau ve vesanemi vesie,

49aso Allah Vepaja na pi vura pai diono pi tandor baba maso jau, ma sano pa ve Sren.

50Nie sanepaja pai, rama so usapui nana kaiwasa vemataiti pasia.

51Dioisara nie paja pai nanapa pi nienari na vara pasi

e piosasiepara kaiwasa vio vesanandika pasia;

52Viara siniotu vepaja nana masasoi vetaria e piosasana siniotu vena dou;

53Allah diono pi viate vura maso siniotu vevavisi veito vemosir ma diemias siniotu vesamuai pi vepau, senda tutir vara vevereri;

54I ma diono vava vesie maso Israel, nie womi pai,

aso sanepai sovera so nie arer pasi,

55ariri Syen diono arer pasi maso tatapumi pai, Abrahami tutir usapui pai to woroi-woroi mo.”

56Vare sembai toru woroi pa, Mariai nia tutir Elisabet, avori vievu so nie anio pai.

Yohanesi viono kambu masi pai vie diadi pa

57Raria pasi simasi maso Elisabet dio diavi pa. Janama diavi atuma mua nina. 58Mambeneta ma mamberaruo pasia setadiawa Syen nie sanepaja vebaba maso Elisabeti, e sia kota sesanemi vesie tutir Elisabeti. 59Nana raria atuma ninei nie raria veve rim e toru pai, sendama ave sembe sunat atuma nei, e seto setono sano Zakhariai ariri tamani sano pa. 60Vape siniani kievo e diojo, “Pivai! Metono sano Yohanesi.” 61Apa senggavo so i e setojo, “Varo siniotu kota nana kasau rabua nomu anio raro vesanomi to jana,” 62Avori senggavo tutir kavo isatitituira maso Zakhariai e setitutana sano vitopi nari diono maso atu pai pa. 63Zakharia siau rovuki vevui pa siri, avori vui, “Sano pa Yohanesi,” Sia vura senggavo usara. 64Nana raria jani kota Zakhariai diadi so kievo ea e, sienandik Allah.

65Apavo siniotu vena deriasi pasia vura sematai, e vava jana masiepar vura so wi rabibua na uta Yudea. 66Kaiwasa viadiawa vava jana pasia, sesanemi pai usara e senggavo na sene sane raropa pasi, “Sa vurusu va atuma ninei nari vie siniotu baba.” Aso Syen nari nia tutiri.

Ranu sanandika nana Zakhariai

67Zakhariai, Yohanesi tamani, dionu tutir paja Wainunu Sren pai, veito tiopana Syen nie arer. Kievo e diojo,

68“Mendama tasanandik Syen, Allah kaiwasa Israel pai!

Riama to manau e diono vava vesie maso nie kaiwasa pasia,

e kior sia vurusu nanaripi womi pai.

69Nana usapui Dauti nie womi pai

diono vesie vepaja pai maso tata.

70Papo pa, Syen diono nie arer pai to manau

nana Nie nabi diria pasia,

71ave nari riera tata nanapi vio vemu tata,

e nanapi kaiwasa vesisiajar tata pasia vura sembarami pasi.

72Ave dioisara nie vesie pai maso tane tapu pasia,

e nari sanepai so nie arer veve sren jasi.

73Siauwora to manau so tatamami pai, Abrahami, e Allah dierer e diojo diono tata,

74ave kior tata vurusu paja na siniotu viono mamuna tutir tata pai,

ave tasomi nanapi tamatai va,

75nana vava veve sren ma vetindija nanapa tane tenam raria vura.

76E au, ine atuma panau, nari sesau Au ve nabi Allah vetariai mo,

Au nari rua papo na Syen, ave vue masis ria pai maso i,

77ave tuopan sasaar maso nie kaiwasa pasia, aso nari sesamuai vesie pai, masisi Allah vie ampun sene tatar pasi to manau.

78Tane Syen ma diono ate e vie sanepaja,

ave kior sovera tata apa riama.

Masisi wor pai disa bera vavoru,

79toapa jana diono nie sasaar pai maso kaiwasa vetenam nana kumuar pa raropa e vematai pasia vura. Diedidin tata maso mari ma vesie pai.”

80Zakhariai atu jani dibaba e nie wainunu pai kota dipaja. Miesoi na mapar kurumi veseja, veito raria pai miesi, avori vie ruani maso usapui Israel.