Skip to content
BibleKenya

Alkitab Bahasa Wondama

Lukasi 2

Yesus vie diadi pa

(Mat. 1:18-25)

Nana rabua jana pa veve baba na kerajaan Roma, Kaisar Agustus suviri pareta e diemias e sembui kepana kaiwasa pai vura na dunia vetutira. Nine ma retena mo sembui kepana kaiwasa pa sesanomi pasi nana rabua Kireniusi vie gubernur na uta Siria pa. Apa kaiwasa vura senda ve sembui kepana sesanomi pa siri-siri nana aniose matauni vieva nanapa.

Toapa jana kota Yusupi ria nana aniose Nazaret na Galilea, so Betlehem na Yudea, uta Raja Dauti vie diadi na pa; aso i ma vieva nana usapui Dauti. Ave amamo Yusupi ria vui sano pa tutiri Maria, vavi diaru e vesanemi vava pai. Rabua senda so Betlehem, Maria nie raria pa simasi so nie atuma pai. Apa diavi atuma mua pesi, atuma retena paina, atuma jani sunduani tutir tarua pai avori supiri e viata nana aiku piaum pasi siapi nana pai; aso susamuai uta nana anio surena nana va.

Gembala tutir siniotu rora

Na diru jani pa gembala pasia setaran vedior sene piaum domba pasi na mapar veve samue nana uta jana. Woroi va mana Syen nie siniotu rora pai vieruani so sia, ma sasaar vena Syen disanggapara sia, apa sematai veito. Vape siniotu rora pai kievo e diojo, “Mematai va! Aso vevata mo irama itopana kavo arer viate maso mia -- kavo viate vesanemi vesie so kaiwasa vura. Raria ninei, Raja Vekor Vesie maso mia pai, andina Kristus, Syen siniani diavini to manau, nana Dauti nie aniose pa. Nine nari ve oisara ma so mia: Nari menda e mesamuai atuma katu pai senduani na tarua e viata na aiku samue pesi raropa.” Woroi va mana, siniotu rora nei tutir siniotu rora pa esia sepau sendama, e sesom sesanandiki Allah. Setojo, “Som sanandik maso Allah, na uta vetariai mo, e mari ma vesie pai maso kaiwasa Allah sane vesiena!” Manau na siniotu rora pasia sembavu e sesovera so rora wa, gembala pasia senggavo vavera so sia e setojo, “Mendama ve tanda so Betlehem, e tasajo vitopi vediadi nana wana, ariri Syen tiopa maso tata pa.” Apa seto sawawara e senda pa sesamuai Maria ma Yusupi, tutir atuma katu nei viata nana aiku samue pai raropa. Nana rabua Gembala pa sia sesajo atuma nei pa, setopanusara kavo setadiawa nana siniotu rora pai maso sia nana atuma nei pa. E kaiwasa pasia vura senggavo usara so kavo setadiawa nana gembala pasia. Vape Maria piri ariri kavo pasi vura nana sane raropa e disanemipai usara. Gembala pasia sesovera so mapar samue wa, ma sesom, sesanandik Allah, aso kavo setadiawa ma sesajora pa, tindi mo ariri siniotu rora pai kavo tiopana pa.

Setono sano maso Yesus

Manau na raria veve rim e toru pai, atuma pai vie sunat. E setoni e sano Yesus, siniotu rora pai sano diono maso i nana aja siniani sanevavai varami pa.

Yusupi tutir Maria sunggoro Yesus maso Anio Syen pai

Raria pai miesi pa Yusupi tutir Maria sunda buai veve sren vene tarai pa ariri hukum torat Musai vevui. Apa sunggor atuma pai so Yerusalem ave sesiwi maso Syen. Aso nanapi Syen nie hukum pa ve aivuire to nine, “Nana atuma mua retena pasia vura, ave amamo viono sia maso Syen.” Sia kota setono pi som, andina aja tekukur pa muandu pivai aja nu atu vavoru pa muandu, ariri Syen nie hukum pai tiopana pa.

Na raria jani na Yerusalem siniotu pesi sano pa Simeon. I ma siniotu vetindija nina, i ma mietai Allah e aja dienota raria Allah kior vesie maso kaiwasa Israel pasia pa. Wainunu Sren pai andia nia tutiri, e Wainunu Sren pai tiopa sasara to manau maso i toapa i ma kasa vioru va rami veito siejo Raja vekor vesie veve arer na Syen. Wainunu Sren pai diedidina Simeoni e suapui so Anio Allah pai. Na raria jani Yusupi tutir Maria sunggor Yesus e sesua, aja vemadia rami pai, ave senanaripi ariri hukum Torat pai vieruana pa. Apa Simeon kior Atuma jani e tiepuri, avori sienandik Allah,

“Raria ninei, Syen, Nomu arer pai miesi to manau.

Apavo tuavini nomu womi ne ivoru tutir mari ma vesie pai.

Aso nana rene sandu isajo

Vekor Vesie venana Au pai to manau.

Vekor Vesie jani vue masis to manau

maso kaiwasa vura:

Atuma ninei miesisi sasaar visambiara ria maso kaiwasa vevesiei,

ave sendama so Au;

andina sasaar vekor sanandika

so nomu kaiwasa Israel.”

Tamani e Atuma jani siniani sunggavo usara, aso suradiawa kavo vitopi Simeon kievora ma nana Atuma nei pa. Avori Simeon vie berkat sia, e kievo maso Maria, atuma jani siniani e diojo, “Atuma ninei ma, Allah diri to manau ave diono kariria pai e nari kior vesie pai maso kaiwasa Israel pa sepau. I ma nari vieva ariri pi veve ruana nana Allah, e siniotu pa sepau nari sembaririwi tutiri, e toapa jana nari piosasiepara sene sanepaja pasi, sanemu vekariria pai, nari disa sanemu pa masisi sumbe vemasai.”

Na jana kota nabi vavi pesi vie visa vesiri. Sano pa Hanai, Panueli atu vavi paina, na usapui Asyer. Ririau to manau pa taun rim e muandu, Hanai vie inar, e nine ma nie tenam pai taun siniotu at e vemandi at. I ma vievuru Anio Syen pai va. Diru sasaar ma vie ari na jana maso Allah tutir vie nadi e dimbe puasa. Nana raria jani kota riama, avori sienandik Allah e kievo nana Atuma jani maso kaiwasa vianota raria Allah kior vesie maso Yerusalem vurusu kariria pai pa.

Sesovera so Nazaret

Avori Yusupi tutir Maria sunanari usara pi vura ariri Syen nie hukum Torat pai, janama sembavu so Nasaret na Galilea. Janama atuma ninei dibaba, e piaja e ruin vesiri, apa Allah sane vesieni.

Yesus nia na Anio Syen pa raropa

Nana taun pasi ora Yesus nie baba pa sandu, sunda so Yerusalem ave setanunu usara Raria baba Paskah pai. Nana rabua Yesus vie umur taun sura e muandu pa, senda so anunu pai ariri senanari ora pa . Anunu pai mienau pa sembavu, vape Yesus, atuma jani ma andija nia na Yerusalem, e tamani, siniani sunduin va. Sune sanepaja pai toapa andija ria usara nana rara kuaruvi pai. Sunda na raria woroi pai, janama susaserai wawariri mambe raruo ma maneta pasia. Vape susamuai va, apa susovera sandu so Yerusalem e susaserai. To manau pa susaserai veito raria toru, avori susamuai I na Anio Syen pa raropa. Andija miesoi nana kasau rabua pa e diediawa usara guru agama pasia e dio dutana usara sia kota. Siniotu viadiawa pasia vura senggavo usara, aso nie kavo ruara pasi sitindija vesiri. Nie baba sandu kota, susajori e, sunggavo usara, siniani kievo so i e diojo, “Komo, buotopi buoto jana so ama pa? Tamamui amusasera veito amusanemi sasera nandu so Au?”

Yesus ruar e diojo, “Jai, mai murotopi musasera ja pa? Apavo munduin va so Ja ma inana Jai Nie anio raro ne pa e?” Vape sunduin ariri mo va so vitopi Yesus kievora pa.

Janama Yesus tutir nie baba pasia, sembavu so Nasaret, e kiorusara sene kavo pasi. Kavo jasi vura ma siniani sanepai tawanasi nana sane raro pa.

Yesus dibaba e ruin usara pi vura, apa Allah sanepai ma siniotu pa sesanemi vesieni.

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.