Lukasi 3

Topanusara nana Yohanesi viono kambu masi pai

(Mat. 3:1-12; Mrk. 1:1-8; Yoh. 1:19-28)

1Nana taun veve sura e rim pai na Kaisar Tiberiusi vie pareta pa, Pontius Pilatusi vie gubernur na Yudea, e Herodesi vie pareta na Galilea. Philipusi, Herodesi neta pai vie pareta na uta Iturea e Trakonitis, mae Lisaniasi vie pareta na Abilene. 2Nana rabua Hanas tutir Kayapasi sumbe imam baba pa, Allah kievo maso Yohanesi, Zakhariai atu pai nana uta veve mapar rubua pa. 3Apa Yohanesi ria wawariri uta vura na Maria Yordan, e tiopan Allah nie kavo pai. Yohanesi kievo e dumi, “Mia vura memanau nana mene tatar pasi e mesovera so Syen pai, ave amamo mesamuai kambu masi e nari Allah vie ampun mia nanapi mene tatar pasi.” 4Nana Nabi Yesayai nie surat pai pa, vevui toapa nine:

“Siniotu pesi dumi nana mapar rubua pa e diojo,

‘Membe masis ria pai maso Syen,

Metono ariri ria pai tindija maso i.

5Kurumi pasi ma nari sitaur e

wi ma suovavo pasi vionasi e simasisis.

Ria vekapau pasi ma vionasi e sitindija,

ma ria vetabibuar pasi vionasi ve simasisis.

6Kaiwasa vena dunia nei vura nari sesajo

Allah kioro vesie pai vurusu kariria pai maso siniotu pasia!’”

7Siniotu pa sepau sendama so Yohanesi ave seto sesamuai kambu masi. Yohanesi kievo maso sia e diojo, “Siniotu vekariria pa mia! Mesanemipai to jana va, toapa metojo nari membavuru Allah nie kasiou verama wai e? 8Metoisara nanapi mene nanaripi, toapa mesovera mesanemi nana mene tatar pasi to manau! Menggavo e metojo, Abrahami, i ma metapumi paina vape moja. Vevata mo itopa maso mia e jojo: Nana rovuki ninesi kota ma Allah piaja dionae sive usapui maso Abrahami! 9Tama pai vie masis to manau ave vindova airavo pai raso nie war pasi. Airavo veve buo viate va pai, nari riova e kie so adia pai raropa.”

10Kaiwasa pasia setutan maso i e setojo, “Toapa jana mamo vitoni nari amananari pa?”

11Yohanesi ruar e diojo, “Siniotu teini siemuai sasu pa muandu, amamo diono esi pai so vevaro sasu pai; ma siniotu vesamuai pisia pasia, amamo sembovo kota.”

12Siniotu vesau pajak pasia kota senda maso Yohanesi ave sesamuai kambu masi. Sia kota setutan Yohanesi e setojo, “Jai Guru, vitopi nari amananari pa?” 13Yohanesi ruar e diojo, “Kasa mesau to rawai va nana vitopi vekutu to manau pa.”

14E siniotu verut pi mamuna pasia kota setutani e setojo, “Toane tutir ama? Vitopi nari amananari ne?”

Yohanesi ruar e diojo, “Mesau pi to rawai na siniotu vape moja, ma metawara pipi vait vape moja tutiri kavo awitituwa va. Mesanemi vesie tutir mene pipi vait vitosi mesamuaisi pa vea!”

15Nana rabua jana pa siniotu pasia setutana sene sane raropa, “Apavo Yohanesi ma Raja vekor vesie, andi tatanotai ne e?” 16Toapa jana Yohanesi kievo so sia vura e diojo, “Ja ma ive masi mia na kambu vea, vape siniotu vepaja rawai na ja pesi nari riama. Ja ma sa ipa so ireku nie wai ae va sor pasi va. I ma nari vie masi mia na Wainunu Sren pai e na adia pai. 17Susir pai niana vara pasi to manau ave dindaja nie gandum pasi, nari ruir nie gandum pasi na java pesi, vape sine rawa pasi ma nari kiairisi na adia vevoru moja va pai!” 18Toapa jana Yohanesi dieniniau kaiwasa pai tutir vava vepau na rabua tiopanusara Kavo Vesie pai pa. 19Vape Yohanesi kievo e suara Herodesi veve Raja nana uta Galilea pai, aso riaut Herodiasi, nie neta pai vinie pai pa, e kota tutir kariria vevesiei nienari pasi. 20Vape Herodesi diono kariria pai e riewai vea e dionae Yohanesi sua so bui pai raropa.

Yesus siemuai kambu masi pa

(Mat. 3:13-17; Mrk. 1:9-11)

21Siniotu vepau pa sesamuai kambu masi to manau pa, Yesus kota siemuai kambu masi. E nanapa aja vie nadi rami e rora pai tiesieva, 22e Wainunu Sren pai viar mesu so i vieva ariri aja nu. Avori viadiawa raupui nie Allah nana rora wa kievo e diojo, “Au ma ine Atuma isanemipaja mo pa au na. Au buono sane vesieni so jau.”

Yesus Nie wamus pai

(Mat. 1:1-17)

23Nana rabua Yesus retena ria nie nanaripi pai pa, vare vie umur taun siniotu siri e sura, e siniotu pa semamo setojo, I ma tamani ni Yusupi, Yusupi tamani ni Eli, 24Eli tamani ni Matat, Matat tamani ni Lewi, Lewi tamani ni Malkhi, Malkhi tamani ni Yanai, Yanai tamani ni Yusupi, 25Yusupi tamani ni Matatias, Matatias tamani ni Amos, Amos tamani ni Nahum, Nahum tamani ni Hesli, Hesli tamani ni Nagai, 26Nagai tamani ni Maat, Maat tamani ni Matica, Matica tamani ni Simei, Simei tamani ni Yosekh, Yosekh tamani ni Yoda, 27Yoda tamani ni Yohanan, Yohanan tamani ni Resa, Resa tamani ni Zerubabel, Zerubabel tamani ni Sealtiel, Sealtiel tamani ni Neri, 28Neri tamani ni Malkhi, Malkhi tamani ni Adi, Adi tamani ni Kosam, Kosam tamani ni Elmadam, Elmadam tamani ni Er, 29Er tamani ni Yesuai, Yesuai tamani ni Eliezeri, Eliezeri tamani ni Yorimi, Yorimi tamani ni Matati, Matati tamani ni Lewi, 30Lewi tamani ni Simeoni, Simeoni tamani ni Yehudai, Yehudai tamani ni Yusupi, Yusupi tamani ni Yonami, Yonanmi tamani ni Elyakimi, 31Elyakimi tamani ni Meleai, Meleai tamani ni Minai, Minai tamani ni Matatai, Matatai tamani ni Natani, Natani tamani ni Dauti, 32Dauti tamani ni Isai, Isai tamani ni Obedi, Obedi tamani ni Boasi, Boasi tamani ni Salmoni, Salmoni tamani ni Nahasoni, 33Nahasoni tamani ni Aminadabi, Aminadabi tamani ni Admini, Admini tamani ni Arni, Arni tamani ni Hezroni, Hezroni tamani ni Peresi, Peresi tamani ni Yehudai, 34Yehudai tamani ni Yakopi, Yakopi tamani ni Isaki, Isaki tamani ni Abrahami, Abrahami tamani ni Terahi, Terahi tamani ni Nahori, 35Nahori tamani ni Seruki, Serki tamani ni Rehui, Rehui tamani ni Pelegi, Pelegi tamani ni Eberi, Eberi tamani ni Salmoni, 36Salmoni tamani ni Kenani, Kenani tamani ni Arpakhsadi, Arpakhsadi tamani ni Semi, Semi tamani ni Nuhi, Nuhi tamani ni Lamekhi, 37Lamekhi tamani ni Metusalahi, Metusalahi tamani ni Henokhi, Henokhi tamani ni Yareti, Yareti tamani ni Mahalaleeli, Mahalaleeli tamani ni Kenani, 38Kenani tamani ni Enosi, Enosi tamani ni Seti, Seti tamani ni Adami, Adami tamani ni Allah.