Skip to content
BibleKenya

Alkitab Bahasa Wondama

Markusi 11:24

Verse 24 is marked below, with the whole chapter around it. Read from the start

Kaiwasa pa senda vedior Yesus na Yerusalem ariri raja pesi

(Mat. 21:1-11; Luk. 19:28-40; Yoh. 12:12-19)

Nana rabua Yesus tutiri Nie verausari pasia senda sederiaisi Yerusalem to manau pa, sendama so aniose Betfage tutir Betania, aniose nine sandu ma sunana Suovavo Zaitun. Na jana Yesus diemiasa nie verausari pa sandu e sunda papo. E kievo so sandu e diojo, “Munda papo so aniose venana dopo tata nesi. Nana rabua musua na aniose jani mamo, nari musajo keledai vavoru pesi senggasiesi e aja esi sia nana varami. Mundera wai setinggasiesi pai, e munggori maso Jau. E masisi siniotu pesi duta aso vitopi mundera wai vekasie keledai pai pa, munggavo e murojo, ‘Syen diemiasa amunggori. E nari saira sioverai ea maso nine.’ ” Yesus nie verausara pa sandu surinda, e susamuai keledai vavoru pai, senggasiesi na rature pai na ria dere pa. Avori sundera wai vekasie keledai jani. Siniotu viosa na jasia setuta maso sandu e setojo, “Aso vitopi mundera wai vekasie keledai jani pa?” Avori sunduar so sia, ariri vitopi Yesus kievo maso sandu pa. Apa siniotu jasia setonae sunggor keledai jani. Avori sunggor keledai jani maso Yesus, e setasie sene sasu pasi na keledai atu pai karu vavo pa, avori Yesus siajai e miesoi nana. Siniotu pa sepau setasie sene sasu pasi na ria pai, esia ma sepir ai arawa vekake senggor nana romi pasi. Siniotu vera na dopo pasia e siniotu verausari nana dopui pasia, sia vura setumi e setojo,

“Som sanandika maso Allah!

Syen diono vesie pai maso verama nana Syen sano pai!1

Som sanandika maso Nie pareta nari verama wai, I ma nari vie pareta masisi tatapumi pai Dauti nana papo pa!

Tasom sanandika maso Allah vetariai mo pai!”

Nana rabua Yesus riama so Yerusalem to manau pa, sua so Anio Syen pai. Na wana siejo wawariri. Vape vare diru to manau pana, apavo suvi tutir Nie siniotu sura e muandu verausari pasia e senda so Betania.

Yesus sioramo so airavo ara pai

(Mat. 21:18-19)

Raria kausapa pai, Yesus tutiri Nie siniotu sura e muandu verausari pasia senda vurusu Betania, nana rara pai Yesus vievisi. Nana vekasau siejo airavo ara pesi, nie rau pasi simariewa. Apavo ria so airavo jani ave siejo so vie buo pe. Vape nana rabua riama so airavo jani pa, siemuai buo pesi va, vape nie rau pasi vea, aso nana rabua jana, airavo ara pai aja viebuo varami pana. Avori Yesus kievo maso airavo ara pai e diojo, “Kasa siniotu pesi nari dian buo pesi nana au ea va to woroi-woroi mo!” Yesus nie verausari pasia setadiawa kavo kievora pasi.

Yesus ria so Anio Syen pai

(Mat. 21:12-17; Luk. 19:45-48; Yoh. 2:13-22)

Janama sendama so Yerusalem, Yesus ria so Anio Syen pai. Dietavar siniotu vevori e vevovo pi som pasia nana uta jana. Piobari sene dora setindiwa pipi pasi, tutir sene kadera vemasoi pasi ave setimbovo aja nu pasi. E kiembarai esia senggor pi e senda kara nana Anio Syen pai. Janama Yesus dieniniau sia e diojo, “Na Repo pai vui tonine: Allah kievo e diojo, ‘Ine Anio nei ma nari sesawi ve anio kaiwasa vura vie nadi na.’ Vape metoni ariri ve uta siniotu viawara pi pasia setaniwa nana pa!”2 Imam veveru pasia tutir siniotu veruin sasavu kavo aniau na Torat pasia setadiawa Yesus nie kavo tiopana pasi. Apavo sesasera ria ave amamo semu Yesus. Sematai maso I, aso kaiwasa pasia vura senggavo usara so setadiawa Nie aniau pai pana. Nana vare diru to manau pa, Yesus tutiri Nie verausari pasia sesuvi nana bendar jani.

Aniau nana airavo ara pai

(Mat. 21:20-22)

Kausapa bera vavoru pa, nana rabua senda siwara airavo ara jani pa, sesajo airavo jani vioru to manau e miasa veito raso war pasi. Avori Petrusi sanepai riwanea vitopi Yesus kievo so airavo ara pai pa na ravine pa. Apa kievo maso Yesus e diojo, “Jai Guru, ite suejora! Airavo ara suoramo soa pai miasa to manau!” Yesus kievo maso Nie verausari pasia e diojo, “Mesanemitiar maso Allah! Vevata mo, itopa maso mia, masisi esi kievo so wi pesi e diojo, ‘tuesiasa, e tuawa so rawana wa.’ Masisi sane vavera va e sanetiar toapa pi kievora jasi ma nari siveruana.3 Apavo mesanemipai nine: Masisi membe nadi e mesau piesa mamo, mesanemitiar toapa Allah diono pi mesauwa pa to manau, apavo nari mesamuai. E masisi meto membe nadi, nari membe ampun siniotu venanari sasara maso mia pai papori, ave amamo metamami venana rora pai vie ampun mene tatar pasi kota.4 [Masisi membe ampun siniotu vevesiei va mamo, metamami venana rora pai nari kasa vie ampun mene tatar pasi kota va.]”

Utana nanapi Yesus nie paja pai

(Mat. 21:23-27; Luk. 20:1-8)

Yesus tutiri Nie verausari pasia sesovera ea so Yerusalem. E nana rabua Yesus ria wawariri na Anio Syen pai varavu pa, imam veveru pasia, e siniotu veruin sasavu kavo aniau na Torat pasia e veveru nana Yahudi pasia sendama so I. Setuta maso I e setojo, “Tutiri paja vitoi nuenari vava ninesi pa? E teini diono paja jani maso Au pa, apajoma nuenari vava ninesi pa?” Yesus ruar maso sia e diojo, “Jo juta mia kota. Menduara ine kavo ne mamo, nari itopa maso mia teini diono paja maso Jau ave inanari tonine pa. Teini diono paja so Yohanesi viono kambu masi pai pa, Allah te siniotu e? Apa ite menduar maso Jau!” Avori imam veveru pasia, tutir siniotu veruin sasavu kavo aniau na Torat pasia e veveru nana Yahudi pasia senduir e senggavo vaveri nana matau sia e setojo, “Masisi tanduar e tatojo, ‘Allah diono paja so Yohanesi,’ nari kievo maso tata e diojo, ‘Metotopi mesanemitiar maso Yohanesi va pa?’ Vape marabat kota so tanggavo e tatojo, ‘tutir paja nana siniotu.’ ” Aso sematai kaiwasa pasia toapa, kaiwasa vura semamo toapa Yohanesi ma nabi pesi nina. Apavo, senduar maso i e setojo, “Amanduini va.” Avori Yesus kievo maso sia e diojo, “Masisi tojana mamo, Ja kota, ikambarai itopa maso mia teini diono paja so Jau, inanari pi ninesi vura pa.”

Source notes (4)
  1. Cross-reference Mzm. 118:26
  2. Cross-reference Yes. 56:7; Yer. 7:11
  3. Cross-reference Mat. 17:20; 1Kor. 13:2
  4. Cross-reference Mat. 6:14

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.