2 Timotiusi 3:16

Siniotu pasia sene tatar pasi nana raria vemanau pai

1Sanepai ninei, nana raria vemanau jasi nari tasamuai marior vepau. 2Siniotu pasia nari sesanemipai sene tarai pasi mesari e sendemi baba pipi. Nari senggavo to tariai vesiri e sesanandiki sia, senggavo sisiajara siniotu, nari senggorusara sene baba pasia va e setatara setopana buai viate, setatuana Allah va, 3sesanemipai siniotu vevesiei va, sia ma senggambarai setono ampun, sesanemi vesie sesisiajara siniotu vevesiei, setatara setawan sene tarai pasi, e semas, senggambarai vava viate. 4Sesanemi vesie sesiwi sene maneta pesi maso siniotu vekariria, vene sanepaja viaroi va, setojo senduini rawai nana siniotu vevesiei. Sesanemi vesie senda usara pi venana sane vesie dunia nei, rawai nana senda usara Allah. 5Sia ma setove veve ari maso Allah, vape vevata mo seporasa Allah nie paja pai. Au ma tuerir vurusu siniotu vetoapa jasia! 6Aso esia ma setoto sesua manana maso siniotu vevesiei pasia sene anio pasi e setawia setuva vavi vemaruvasa veve tatar to pau vesiri tutir venanari pi saserai ariri sene sanepaja vekor kariria pai. 7Vavi jasia sesau vei vea ave sesamuai aniau pai, vape diadi va so sesamuai ruina Allah nie aniau vata pai. 8Ariri papo pa Yanesi tutir Yambresi sunggorusara Musai va, toapa jana kota, siniotu nine sia ma senggorusara Allah nie aniau pasi va. Sene sanepaja pasi sikariria to manau, sene sanetiar pasi sisoeta to manau, Allah kievo pidiara sia.1 9Vape nari kasa senda topo ea va, aso sene nganggau pasi nari sive ruana maso siniotu vura, ariri Yanesi e Yambresi sune vava pasi kota.

Paulusi diono kavo sanepaja maso Timotiusi

10Vape Timotiusi au ma rua usara ine aniau pai to manau e nuenari ariri ine rara tenam e ine sanepaja pai. Suejo ine sanetiar pai maso Kristus vevata to manau pa, e isanemipai siniotu vevesiei to manau. Kota suejo ine mariat pai e imanasi nana marior. 11Suejo isamuai kariria pa tutir marior to manau. Ruini pi vura vevediadi maso jau na Antiokhia pa, na Ikonium, tutir Listra e ruini ine marior pasi vura! Vape Syen dionae itaisu vurusu jasi vura.2 12Vevata mo, siniotu vio vetenam veve ari maso Allah, e vetenam veve siri tutir Yesus Kristusi pasia vura ma, nari sesamuai kariria pai. 13Mae siniotu vekariria pasia e siniotu viawitituwa pasia, nari senggariria rawai ea. Setawi vaveri siniotu vevesiei pasia, e matau sia kota sesamuai awia pai. 14Vape ariria mamo, Timotiusi au ma rut tawana aniau vetindija itopa so au to manau pai e sanetiari to manau, aso ruini teisia sembe guru so au pa. 15Tindija mamo au ma sanepai toapa rabua muedia pa ruini Repo pai to manau. Repo jani ma diono sanepaja vetindija pai maso au ave suemuai vesie pai nanapi nomu sanetiar pai maso Kristus Yesusi pa. 16Kavo vevui nana Repo pasi vura ma, Allah vieruanasi e siete vesiri ave amamo sieniniau ariri vetindija pai maso siniotu pasia, kuevo suara sia, ave sive ruana veve sasara pasi ave sive vevata pa, e sieniniau siniotu pasia ave amamo setenam ariri Allah nie majar pai. 17Nanapi Repo jani, nari siniotu venanaripi maso Allah pasia, sesamuai aniau vemasi mo pai, ave amamo senanari pi saserai viate pasi.