प्रेषित 4

न्यायसभा मुन्दार पेत्र इंगा योहान

1पेत्र इंगा योहान मंदीन माटलाळतांना, याजक परमेश्वर भवनदी रखवाली शेशेटोळ सरदार इंगा सदुकी इर वार देगारा वचीर. 2वार कोफामता उंडीर कि पेत्र इंगा योहान मंदीक सिखा मतुदूर कि, येशुन तीकनुस सचीने मंदीक पुनरुत्थान उंडाद. 3आप्पुड वार वारणी फटीर इंगा मापकाळ आईन्या दांचांग बंदीशाळाला फेटीर. 4तरी वचन ऐकाशेटोर नुस संगेम जन विश्वास फेटीर; इंगा विश्वास फेटीने मंसलाद संख्या सुमारे पाच हजार मंदी उंडीर.

5मग दुसरा दिवस इल्ला आय्या, की वारदी अधिकारी, आब्बागार इंगा नियाम्शास्त्रटोर शिक्षकलु इर यरूशलेम शहरला ओकाताळा जमा आय्यीर. 6दांटल्या महायाजक हन्ना इंगा कयफा, योहान, आलेक्सांद्र मुख्य याजक सिकंदर इंगा यावार आंदार महायाजकला नातेवाईकलु उंडीर. 7इर पेत्र इंगा योहान नि मधातला नीला फेटी आळगिर, “इदी मीर या सामर्थ्यता, किंवा या फेरता शेस्तीर?” 8आप्पुड पेत्र पवित्र आत्माता पूर्ण आईन्यापुड, वारणी आन्या, “अरे मंदी अधीकारीलाला, इंगा आब्बागार, 9वगा बिमार मणशी मिंदा उपचार आय्या म्हणजे वाड येटतोन शिंगार शेशीर इ विषयला जर इफोद माद चौकशी इफोद आतुनाद? 10तर मिक आंदार की इंगा इस्राएल मंदीक इदी यरका उंडाला, की यवान मीर क्रूस मिंदा इस्तीर, यवान द्यावार सचीनोरकेल लेप्या, आ नासरत येशु ख्रिस्त फेरता, इ मणशी शिंगार आय्या इड मी मुंदार नीला फडीनाळ. 11या राय मीर कटेतोर नाकारास्तीर आदी कोनशिला राय आय्या आदी इदे उंडाद.1 12इंगा तारण दुसरा येवार लोना लेद येवार तीकेल मनाद तारण आय्यी; इल्ला दुसरा यादुच फेर मोडामकिंदा मन्सुलाला इचीनेद लेद.” 13आप्पुड पेत्रद इंगा योहानदी हिम्मत सुशी, इंगा इदी निरक्षर इंगा बिना शिकाशिनेर मनसलू उंडार, इदी ओळखाशी वारनी आश्चर्य शेशीर इंगा इर येशुन संगतीला उंडीर इल्ला वार ओळखाशीर. 14आप्पुड वाड शिंगार आईने मणशीन वार देगारा नीला फडीनेळ सुशी, दिनकस्रोम वार पेत्र इंगा योहानदी विरोध शेशेटी खोटा येम पण आनेदेंक पूर्ण लेकुंडीर. 15इंगा वारन सभा बेटीक फोयेळदी आज्ञा इच्ची वार आपसाला चर्चा शेशेदेंक आंटीर. 16वार आनीर, “इ मनुष्यलान मनाम येम शेयाला? येनटीक की खरेमे वार शेईता प्रसिद्ध चमत्कार आयीनाय यरुशलेम शहरला नीलचेटोरकि अन्दार्क यरका उंडाद; इंगा दांदी मनाम नकार शेशु शकाम. 17पण इदी मंदीला इंगा पसरारोद, दांचांग मनाम इल्ला धमकी इयाला की, दिन मुंदार मीर इन फेरता यवारनीच माटलाळा कुंडा.” 18मग वार पेत्र इंगा योहाननि वापस कुतेशी आज्ञा शेशीर की मीर येशुन फेरता येमीच माटलाळा कुंडा इंगा शिका पण मता कुंडा. 19पण पेत्र इंगा योहान वारकी उत्तर इच्ची आनीर, “द्यावार पेक्षा मिद इनेद इदी द्यावार विचारता बरोबर का चुक उंडाद, इदी मिरे ठरायमत्ना. 20येनटीक की याय माटलु मिम सुशीनाम इंगा ऐकाशिनाम आय मिम शपकाम बंद शेयाम.” 21आप्पुड वार वारनी धमका मती ईळशेशीर, येनटीक की मंदी कस्रोम वारकी शिक्षा येला शेयाला. इदी वारकि एमी समजा कुंदु, यणटिकी घडाशीने माटला इचांग आंदार मंदी द्यावार्दी गौरव शेयदूर. 22येनटीक की या मणशी मिंदा इदी बागा शेशेळदी चमत्कार घाडाशिन्या वाळ चाळीस वर्ष कना जास्त वयटोळ उंड्या.

विश्वास फेटोरद प्राथना

23आप्पुड पेत्र इंगा योहान इळीनेन्का, वार स्वता मंदी तीकुड वचीर इंगा मुख्य याजकलु इंगा आब्बागार येम पण आंनीनडीर वार आंदार आंता शपीर. 24आदी ऐकाशी वार एकचित्त आय्यी उंच शब्दता द्यावार्नी आंटार, “ये प्रभू, मोळाम, पृथ्वी, समुद्र इंगा दांटलोनी आंताच यवाड निर्माण शेश्या वाड नुये उंडाव.2 25नी सेवक, मा पूर्वज दावीद इन नोरता पवित्र आत्माता नु आंटी, ‘राष्ट्र्ल येनटीक चीडाश्या इंगा मंदी उतेंगाणे कल्पनाल येनटीक शेशीर?

26प्रभून उलटा इंगा वान ख्रीस्तन उलटा पृथ्वीटोळ राजा युद्ध इचांग तैयार आयीर इंगा अधिकारी ओकाताळा जमा आयीर.’3

27येनटीक की खरेखरेमे यवारकी नु अभिषेक शेस्ती वाड नि पवित्र सेवक, येशु दिन उलटा इ नगरला इंगोगो राष्ट्र इंगा इस्राएल मंदी इर संगा हेरोद इंगा पंतय पिलात जमा आय्यीर.4 28दिनकस्रोम की येम पण आते दिनकस्रोम नि शेईता इंगा नि इच्छाता पहिला नेमाशिण्या आदी वार शेयाला. 29तर ये प्रभू, इपुड नु वार धमकील तीकुड सूळ इंगा मिम मा दासला तीकुड स्वता वचन संदेशलाक संगेम हिमंतता माटलायेळदी समर्थ इयाला. 30नु नीद शेई मंदीन बागा शेशेदेंक मुंदार शेस्ताना इल्ला शेय नि पवित्र सेवक येशु इन फेरता चमत्कार इंगा अद्भुतलु घडाला इल्ला पण शेय.” 31इंगा वार प्रार्थना शेशी नेन्का या जागाला जमा आयनीर आदी हालाश्या, इंगा वार आंदार पवित्र आत्माता निंडी फोईर, द्यावार्दी वचन हिमंतता माटलाळदेंक आंटीर.

विश्वास फेटेटोर सामाईक जीवन

32आप्पुड विश्वास शेशेटोर वगा मनुद इंगा वगा जेमुद उंड्या: इंता की यवार पण स्वताद धन स्वताद आना कुंदुर. वारद आणता आंता मदिद उन्डाद. 33इंगा प्रेषित फेदा सामर्थ्यता, प्रभू येशुन पुनरुत्थान विषयला साक्ष इदू, इंगा वार आंदार मिंदा फेदाद कृपा उंड्या. 34वार लोन्केल यवारकीच एमी कमी लेकुंड्या, येनटीक की यंता मंदी भुमी इंगा इलूटोर मालक उंडीर आंता मंदी आदी आम्मीर इंगा आम्मीने वस्तुलाद किंमत येकोचीर. 35इंगा आदी प्रेषितला काळळा देगारा फेटीर, मग यलायला यवार्की गरज आंटूदू, आला-आला वार प्रत्येकोर्की फंची इदूर.

36इंगा कुर्प बेटला नीलचेटोर लेवी योसेफ, यवान प्रेषितलु बर्णबा, म्हणजे उत्तेजन कोडकु इल्ला फेर इचनीर. 37वांदी भुमी उंड्या, आदी आंबी दानी दुडलु येकोची प्रेशितला काळला देगारा फेटीर.