प्रेषित 3

लंगड्या भिकारेण शिंगार शेस्काम

1इंगा मग पेत्र इंगा योहान इदी प्रार्थना वेळला मद्यानी मूळ वाजता मिन्दिक परमेश्वर भवनला फोदूर. 2इंगा फुट्टीनोट अपंग इल्ला वगा मणशी उंड्या, भवनला सुंदर फेर दरवाजा देगार भवनलोंग फोयेतोर्णी भिक आडगेदेंक धीन्नाम वान येवार तरी येकाफोई फेटदूर. 3पेत्र इंगा योहान भवनला फोतुणार, इल्ला सुशी वाड वारणी भिक आळग्या. 4आपुळ पेत्र, योहान संगा वान टकटक सुस्का, आन्या, “मा तीकुड सूळ.” 5आप्पुड वार तीकेल येमाना शिकी, इल्ला आशा फेटी वाळ वार तीकुड लक्ष आंच्या. 6इंगा पेत्र आन्या, “येंडी इंगा बंगार ना देगारा येमीच लेद; पण येम ना देगारा उंडाद. आदी नीन निक इस्तान, नासरतटोळ येशु ख्रीस्तन फेरता लेशी नळदेंक आंट.” 7इंगा वाड वांदी मंची शेई फेटी वान लेप्या: आप्पुड लगेच वान पंजाल इंगा घोट्याल की ताकत वच्या. 8इंगा वाड उडी मती नीला फड्या इंगा नळदेंक आंट्या, इंगा वाड नळस्का इंगा उडी मतका इंगा द्यावार्दी स्तुती शेस्का वान संगा परमेश्वर भवनला फोया. 9इपुड आंदार मंदी वान नळस्ताना इंगा द्यावार्दी स्तुती शेस्तांना सुश्यार. 10इंगा यवाड मंदिरदी सुंदर फाटक देगारा भिक आळगुदू भिक आळगीदेंक वाड इळे उंडाळ वान ओळखाशीर आप्पुड वांकी येम आय्या दीनता संगेम चकीत इंगा आश्चर्य आयीर.

पेत्रद शालमोन देवडी मिन्दुळदी भाषण

11आप्पुड वाड पेत्रन इंगा योहान सांगा ने उंड्या, आंदार मंदी संगेम आश्चर्य शेस्का शालमोनदी दरवाजा मंडप आनीने जागाला, वान तीकुड फारका वचीर. 12इदी सुशी पेत्र आ मंदीक उत्तर इच्या, वाड आन्या, “अरे इस्राएल मन्ससलू, दिन मिन्द्केल मीर आश्चर्य येनटीक शेस्तार? नाही तर मिम स्वता सामर्थ्यता किंवा सुभक्तीता इन नळदेंक आंचीनाम, इल्ला समजाशी मा तीकुड येनटीक लक्ष इच्ची सुस्तार? 13अब्राहम, इसहाक, इंगा याकोब द्यावार, मा पूर्वजला द्यावार, वाड स्वता सेवक येशु इनदी गौरव शेशिनाळ. वान मीर मतीदेंक इचाकाळतीर, इंगा पिलात वान ईळशेळदी ठहरा मतीनेन्का पण मीर वान देगारा नाकारास्तीर. 14मीर तर यवाड पवित्र इंगा नीतिमान वान नाकारास्तीर, इंगा घातक मणशीन माक इयाला आंका इल्ला आळगुतीर. 15इंगा जीवन इचेटोन मीर जेमता मतुतीर; वान द्यावार सचीनेकेल लेप्या दिंदी मिम साक्ष उंडाम. 16इंगा वान फेरता वान फेर मिन्दुल विश्वास तीकेल यवारणी मीर सुस्तार, इंगा ओळखास्तार आ इ मंशीन शक्तीमान शेशिनाळ. इंगा, वान तीकेल शिकीने विश्वासताने मीर आंदार मुंदार इनकी इदी पूर्ण आरोग्य इच्चीनाड.”

17“तर इपुड हे तमुळलु नीन जाणास्तान की अज्ञानता मीर आले मी अधिकारील पण इदी शेशिणाळ, 18पण मना ख्रिस्तड दुख येत्ती, आंका द्यावार वान आन्नी संदेष्ट्याल आयी, संदेष्ट्याल नोरता येम पहिलाने शपीन्या, आदी दिन लेका पूर्ण शेशीनाड. 19तर मि पापलू तुड्सकाडाला, आंका पश्च्याताप शेयना, इंगा तीर्गुंडा दिन इचांग की आरामदी वेळल प्रभून देगारकेल दावाला; 20इंगा मी इचांग पहिला नेमाशीनेळ, ख्रिस्त येशु इन वाड आम्पडीयाला. 21आन्नी माटलाद सुस्थिती डबल स्थापित आईळ काळपर्यंत स्वर्गला वांकी नीलचकाम अवश्य उंडाद, आ काळ बद्दल युग सुरवात नुस द्यावार स्वता पवित्र संदेष्ट्याल नोरता शापिनाळ. 22यला मोशेळ तर शापिनाळ की, ‘प्रभू द्यावार मी इचांग ना लेका संदेष्टा मी तमुळला लोन्केल येल्यार. वाड येम पण मिक शपी आदी आंता वांदी एकांडा.’ 23इंगा इल्ला आय्यी की यवार पण जेम आ संदेष्ट्याल दी ऐकायार वाड मंदी लोन्केल अगदी नष्ट शेशी.1 24इंगा, शमुवेल नुस येम संदेष्ट्याल परंपराता आय्या, यंता माटलाळका वचीर, आ आंदारकी आ दिवस बद्दल कळामत्या. 25मीर संदेष्ट्याल बीळलु उंडार इंगा नि संततीता पृथ्वी मिन्दुली कुळलु आशीर्वादित आय्यी, इल्ला अब्राहमनि माटलाळी, ‘द्यावार मी पूर्वजला संगा जो करार शेश्या आ करारटोर मीर बीळलु उंडार.’2 26द्यावार सेवक येशु इन लेपि पहिला मी तीकुड आम्पडीच्या, दिनकस्रोम की, वाड मी लोन प्रत्येकोन मी दुष्कर्मकेल तीर्गुते मिक आशीर्वाद इयाला.”