Waghri Booli Bible
ವಿಮೋ 6
ಅನಕೇಡೆಥು ಯೆಹೋವನೆ ಮೋಶೆನ, “ಮೆ ಫರೋಹನ ಕರಾನು ಅಖ್ಖು ತೂ ಹಮ್ಕೆ ದೇಖಿಷ್. ಯೊ ಮಾರ ಶಕತ್ನ ಹಾತ್ನ ದೇಖಿನ್ ಇವ್ಣುನ ನಖ್ಹಾಡಿದಿಶೆ. ಮಾರಿ ಮೋಟಿ ಶಕಥ್ಥಿ ಖ್ಹತಾಪ್ಣಿಲೀನ್ ಇವ್ಣುನ ಇನ ದೇಖ್ಹ್‌ಥು ಕಾಡಿನಾಕ್ಷೆ” ಕರಿ ಬೊಲ್ಯೊ.
ಮೋಶೆನ ದೇವ್ನೆ ಬುಲಾಯೊತೆ
ದೇವ್ನೆ ಮೋಶೆನ ಜೋ಼ಡೆ ಪಾಛೊ಼ ವಾತ್‌ಬೋಲಿನ್ ಅಮ್ ಬೊಲ್ಯೊ, ಮೇಸ್ ಯೆಹೋವ, ಮೇ ಅಬ್ರಹಾಮ್‌ನಬಿ, ಇಸಾಕ್‌ನಾಬಿ, ಯಾಕೋಬ್‌ನಾಬಿ ಅಖ್ಖೀಸ್ ಶಕತ್ನೊ ದೇವ್‌ಹುಯಿನ್ ದೆಖೈರ‍್ಹೋಥೊ. ಕತೋಬಿ ಯೆಹೋವ ದೇವ್ ಕರಿ ಬೋಲಾನು ಮಾರು ನಾಮ್ ಇವ್ಣುನ ಮಾಲುಮ್‌ ಕೋಪಡ್ಯುನಿ. ಕಾಹೆತೆ , ಇವ್ಣೆ ಅಲ್ಹಾವ್ ದೇಖ್ಹ್‌ವಾಳ ಹುಯಿನ್ ಜಿವ್ಣುಕರ‍್ಯಥಾತೆ ಕಾನಾನ್ ದೇಖ್ಹ್‌ನ ಮೆ ಇವ್ಣುನ ಶೊಂತ್‌ ಮುಲಕ್‌ ಬಣೈನ್ ದಿಶ್‌ಕರಿ ಇವ್ಣ ಜೋ಼ಡೆ ಒಪ್ಪಂದಾನನ ಕರಿರಾಖ್ಯೊಸ್. ಈಜಿಪ್ಟ್‌ವಾಳು ಗುಲಾಮ್‌ ಕರಿರಾಖ್ಯುಥೂತೆ ಇಸ್ರಾಯೇಲ್‌ನಿ ಅಂದ್ರೋಖ್ಹ್‌ ಹಮ್ಕೆ ಮನ ಖ್ಹಮಜ್‌ಪಡ್ಯು ಮೇ ಕರ‍್ಯೋತೆ ವಾಗ್ದಾನ್ನ ಪಾಛು಼ ಖ್ಹಯಾಲ್ಮ ಲೀರಾಖ್ಯೊಸ್. ಇನಖ್ಹಾಜೇಥಿ ತು ಇಸ್ರಾಯೇಲ್‌ವಾಳನ ಮಾರ ನಾಮ್ಮ ಬೋಲ್ನು ಶಾತ್‌ಕತೊ, ‘ಮೇಸ್ ಯೆಹೋವ ಈಜಿಪ್ಟ್‌ವಾಳು ತುಮಾರೇಥಿ ಕರವ್‌ಕರಾತೆ ಫುಗಟ್ನ ಕಾಮ್‍ಥಿ ಛು಼ಕೈನ್, ಇವ್ಣ ಗುಲಾಮ್‌ಗಿರಿಥಿ ತುಮುನ ಛೋ಼ಡೈನ್ ಮಾರೊ ಹಾತ್ ಪೂರೈನ್ ಇವ್ಣುನ ಮಹಾನ್ ಶಿಕ್ಷೆಖ್ಹಾರಿ ದೀನ್ ತುಮುನ ಬಚಾ಼ಡಿಶ್. ಮೇ ತುಮುನ ಮಾರ ಪ್ರಜೆಕರಿನ್ ಚೂ಼ಣಿಲೀನ್ ತುಮುನ ದೇವ್ ಹುಯಿರ‍್ಹೋಸ್. ಈಜಿಪ್ಟ್‌ವಾಳು ಕರವ್‌ಕರಾತೆ ಫುಗಟ್‌ನಿ ಚಾ಼ಕ್ರಿನ ಮೇ ತುಮುನ ಛು಼ಕಾವನಿವಖ್ಹ್‌ತೆ ಯೆಹೋವಕರಿ ಮೇಸ್ ತುಮಾರೊ ದೇವ್‌ಹುಯಿರ‍್ಹಿಷ್ ಕರಿ ತುಮುನ ಮಾಲುಮ್‌ಪಡ್‌ಷೆ. ಆಸ್ ಕಾಹೆತೆ ಅಬ್ರಹಾಮ್, ಇಸಾಕ್ ಅಜು಼ ಯಾಕೋಬನ ಮೇ ಹಾತ್ ಪಾಡಿನ್ ವಾಗ್ದಾನ್ ಕರಿಶ್‌ತೆ ದೇಖ್ಹ್‌ಮ ತುಮುನ ಬುಲೈಲಿ ಅಯಿನ್ ಯೊ ತುಮುನ ಶೊಂತ್‌ಕರಿ ದಿಶ್‌ಕರಿ ಬೋಲ್ಯೊಹುಯೊ ಯೆಹೋವಕರಿ ಮೇಸ್‌ಕರಿ ಇವ್ಣುನ ಬೋಲ್” ಕರಿ ಬೊಲ್ಯೊ. ಮೋಶೆ ಆ ವಾತ್ನ ಯೋಸ್ ಪರಕ್ಮ ಇಸ್ರಾಯೇಲ್‌ವಾಳನ ಬೋಲಾನಿ ವಖ್ಹ್‌ತೆ ಇವ್ಣೊ ಮನ್ ಕಮ್‌ಲೈ ಗಯೋತೆಖ್ಹಾಜೆ ಕಠಣ್‌ಥಿ ಚಾ಼ಕ್ರಿಕರ‍್ನು ಖ್ಹಾಜೇಥಿಬಿ ಇವ್ಣೆ ಮೋಶೆನಿ ವಾತ್ನ ಖ್ಹಮ್‌ಜುಸ್ ಕೊಯ್ನಿ. ತದೆ ಯೆಹೋವನೆ ಮೋಶೆನಿ ಜೋ಼ಡೆ ವಾತೆ ಬೋಲಿನ್, “ತು ಈಜಿಪ್ಟ್‌ನ ರಾಜ಼ ಹುಯಿರೋತೆ ಫರೋಹಕನ ಜೈ಼ನ್ ಯೊ ಇಸ್ರಾಯೇಲ್‌ವಾಳನ ಇನ ದೇಖ್ಹ್‌ಥು ನಿಕ್ಳಿ ಜಾ಼ವನಿತರ ಇನಜೋ಼ಡೆ ವಾತೆ ಬೋಲ್” ಕರಿ ಬೊಲ್ಯೊ. ಇನ ಮೋಶೆ ಯೆಹೋವನ ಖ್ಹಾಮ್ಣೆ, “ಹಂದೇಖೊ ಇಸ್ರಾಯೇಲಸ್ ಮಾರಿ ವಾತ್ನ ಕೊಖ್ಹಮ್‌ಜ್ಯುನಿ. ಅಮ್‌ರ‍್ಹವಾಪರ್ ತೊತ್‌ಳೈನ್ ಬೋಲಾನು ಮಾರಿವಾತೆನ ಫರೋಹ ಕಾನ್ ದಿಶೆ?” ಕರಿ ಬೊಲ್ಯೊ. ಯೆಹೋವನೆ ಮೋಶೆ ಅಜು಼ ಆರೋನನಿ ಜೋ಼ಡ್ಮ ವಾತೆ ಬೋಲಿನ್ ಇಸ್ರಾಯೇಲ್‌ವಾಳನ ಈಜಿಪ್ಟ್‌ಥು ಬುಲೈಲಿನ್ ಆವ್ಣುಕರಿ ಇವ್ಣುನ ಹುಕುಮ್ ದೀನ್ ಇವ್ಣುನ ಇಸ್ರಾಯೇಲ್‌ವಾಳಕನಬಿ ಈಜಿಪ್ಟ್‌ನೊ ರಾಜ಼ ಫರೋಹಕನ ಮೋಕ್‌ಲ್ಯೊ.
ಮೋಶೆ ಅಜು಼ ಆರೋನನಿ ಪಿಳ್ಗಿ
ಇಸ್ರಾಯೇಲ್ ಖಾನ್‌ಖೋಜ್‌ನ ಕುಟುಂಬ್‌ನ ಶಾಣ ಇಸ್ರಾಯೇಲ್‌ನೊ ಪೈಲ್ಹೋಟೊ ಛಿಯ್ಯೊ ಹುಯಿರ‍್ಹೋತೆ ರೂಬೇನ್ನ ಲಡ್ಕಾ: ಹನೋಕ್, ಫಲ್ಲೂ, ಹೆಚ್ರೋನ್, ಕರ್ಮೀ. ಅವ್ಣೇಸ್ ರೂಬೆನ್‌ಥಿ ಹುಯೂತೆ ಖಾನ್‌ಖೋಜ಼್‌ನ ಪಹಿಲ ಪರ್ಖ್ಹ. ಸಿಮೆಯೋನ್ನ ಲಡ್ಕಾಹುಯಿರ‍್ಹಾತೆ; ಯೆಮೂಯೇಲ್, ಯಾಮೀನ್, ಓಹದ್, ಯಾಕೀನ್, ಚೋಹರ್ ಅಜು಼ ಕಾನಾನ್ನಿ ತಯೇಡಾಮ ಪೈದಹುಯೊತೆ ಸೌಲ, ಅವ್ಣೆ ಸಿಮೆಯೋನ್‌ಥಿ ಹುಯಾತೆ ಖಾನ್‌ಖೋಜ಼್‌ನ ಪಹಿಲ ಪರ್ಖ್ಹಾ. ಖಾನ್‌ದಾನ್ನಿ ಪರಕ್ಮ ಲೇವಿನ ಲಡ್ಕಾ: ಗೇರ್ಷೋನ್, ಕೆಹಾತ್, ಮೆರಾರೀ, ಅವ್ಣೇಸ್. ಲೇವಿ ಎಕ್‌ಖ್ಹೊ ಖ್ಹಾತ್ ಉಪ್ಪರ್ ಡೋಡಿಖ್ಹ್‌ ವರಖ್ಹ್ ಬಚಿನ್‌ಥೊ. ಖಾನ್‌ಖೋಜ಼್‌ನಿ ಪರಕ್ಮ ಗೇರ್ಷೋನನ ಲಡ್ಕಾ: ಲಿಬ್ನೀ ಅಜು಼ ಶಿಮ್ಮಿ. ಕೊಹಾತನ ಲಡ್ಕಾ: ಅಮ್ರಾಮ, ಇಚ್ಹಾರ್, ಹೆಬ್ರೋನ್, ಉಜ್ಜಿಯೇಲ್. ಕೆಹಾತ್ ಎಕ್‌ಖ್ಹೊ ತೀನ್‌ಉಪ್ಪರ್ ಡೋಡಿಖ್ಹ್‌ ವರಖ್ಹ್ ಬಚಿಥೊ. ಮೆರಾರೀನ ಲಡ್ಕಾ: ಮಹ್ಲೀ, ಮೂಷೀ ಖಾನ್‌ದಾನ್ನಿ ಪರಕ್ಮ ಲೇವಿಥಿ ಹುಯೂತೆ ಖಾನ್‌ಖೋಜ಼್‌ ಆಸ್ ಹುಯಿರ‍್ಹುಥು. ಅಮ್ರಾಮನೆ ಇನ ಬಾನಿ ನ್ಹಾನಿ ಭೇನ್‌ ಯೋಕೆಬೆದನ ವ್ಯಾಹ ಕರಿಲಿದೊ. ಹೈರಿತೆನೆ ಇನ ಆರೋನನ ಮೋಶೆನ ಪೈದಾಕರಿ. ಅಮ್ರಾಮ ಏಕ್‌ಖ್ಹೊ ಖ್ಹಾತ್ ಉಪ್ಪರ್ ಡೋಡಿಖ್ಹ್‌ ವರಖ್ಹ್ ಬಚ್ಯೊ. ಇಚ್ಹಾರನ ಲಡ್ಕಾ ಕೋರಹ, ನೆಫೆಗ್ ಅಜು಼ ಜಿಕ್ರೀ ಉಜ್ಜಿಯೇಲ್‌ನೊ ಲಡ್ಕಾ: ಮೀಷಾಯೇಲ್, ಎಲ್ಜಾಫಾನ್ ಅಜು಼ ಸಿತ್ರೀ. ಆರೋನನೆ ಅಮ್ಮಿನಾದಾಬನಿ ಛೋ಼ರಿ ನಹಶೋನ್ನಿ ನ್ಹಾನಿ ಭೇನ್‌ಬಿ ಹುಯಿರ‍್ಹಿಥೀತೆ, ಎಲೀಶೇಬನ ವ್ಯಹಾಕರ‍್ಯೊ. ಹೈರಿತೆಮ ಇನ ನಾದಾಬ್, ಅಬೀಹೂ, ಎಲ್ಲಾಜಾರ್, ಈತಾಮಾರ್ ಕರಿ ಬೋಲವಾಳು ಪೈದಹುಯು. ಕೋರಹನ ಲಡ್ಕಾ: ಅಸ್ಸೀರ್, ಎಲ್ಕಾನ್, ಅಬೀಯಾಸಾಫ್ ಅವ್ಣೇಸ್ ಕೋರಹಿವಾಳನು ಖಾನ್‌ಖೋಜ಼್‌. ಆರೋನನೊ ಛಿಯ್ಯೊ ಎಲ್ಲಾಜಾರನೆ ಪೂಟಿಯೇಲ್ನ ತಯೇಡ ಲಡ್ಕಾವ್ಮ ಏಕ್‌ಜ಼ಣಿನ ವ್ಯಹಾಕರ‍್ಯೊ. ಹೈರಿತೆನ ಇನ ಫಿನೇಹಾಸನ್ನ ಪೈದಾಕರಿ. ಇವ್ಣ ಇವ್ಣ ಖಾನ್‌ಖೋಜ಼್‌ನಿ ಪರಕ್ಮ ಅವ್ಣೇಸ್ ಲೇವಿನು ಖಾನ್‌ದಾನ್‌. ಇಸ್ರಾಯೇಲ್‌ವಾಳನ ಇವ್ಣ ಖಾನ್‌ಖೋಜ಼್‌ನಿ ಪರಕ್ಮ, ಈಜಿಪ್ಟ್ ದೇಖ್ಹ್‌ಥು ಭಾರ್ ಕಾಡಿಲಿನ್ ಆವ್ಣುಕರಿ ಯೆಹೋವನೆ ಕಿನ ಬೋಲ್ಯೊಕಿ ಇವ್ಣೆಸ್ ಆರೋನ ಅಜು಼ ಮೋಶೆ. ಇಸ್ರಾಯೇಲ್‌ವಾಳನ ಈಜಿಪ್ಟ್ ದೇಖ್ಹ್‌ನ ಭಾರ್ ಬುಲೈಲಿನ್ ಆವಾನಖ್ಹಾಜೆ ಈಜಿಪ್ಟ್‌ನೊ ರಾಜ಼ ಹುಯಿರ‍್ಹೊಥೋತೆ ಫರೋಹನ ಜೋ಼ಡೆ ವಾತೆ ಬೋಲ್ಯಾತೆ ಮೋಶೆ ಅಜು಼ ಆರೋನ ಅವ್ಣೇಸ್.
ಮೋಶೆಬಿ ಆರೋನನೆ ದೇವ್ನಿ ಹುಕುಮ್
ಯೆಹೋವ ಈಜಿಪ್ಟ್ ದೇಖ್ಹ್‌ಮ, ಮೋಶೆನ ಜೋ಼ಡೆ ವಾತೆ ಬೋಲಾನಿ ವಖ್ಹ್‌ತೆ, ಇನೆ ಮೋಶೆನ, “ಮೆ ಯೆಹೋವ ಮೇ ತುನ ಬೋಲ್ಯೊತೆ ಅಖ್ಖಾನ ತೂ ಈಜಿಪ್ಟ್‌ನೊ ರಾಜ಼ ಹುಯಿರ‍್ಹೋತೆ ಫರೋಹಾನ ಖ್ಹಮ್‌ಜಾ಼ಡ್” ಕರಿಬೋಲ್ಯೊ ಕತೋಬಿ ಮೋಶೆ ಯೆಹೋವಾನ, “ಹಂದೇಕ್, ಮಾಲಿಕ್ ಮೇ ತೊತ್‌ಳ್ಯೊ ಹುಯಿರೊಸ್, ಫರೋಹ ಮಾರಿ ವಾತೆನ ಕಿಮ್ ಖ್ಹಮಜ಼್‌ಷೆ?” ಕರಿಬೋಲ್ಯೊ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.