Waghri Booli Bible
ವಿಮೋ 7
ತದೆ ಯೆಹೋವನೆ ಮೋಶೆನ ಅಮ್ ಬೋಲ್ಯೊಕಿ, “ಮೇ ತುನ ಫರೋಹನ ಖ್ಹಾಮ್ಣೆ ದೇವ್ನಿ ಝ಼ಗೋಮ ನೇಮಕ್‌ ಕರಿರಾಖ್ಯೊಸ್ ತಾರೊ ಮೋಟೊ ಭೈ ಆರೋನ ತಾರಖ್ಹಾಜೆ ಪ್ರವಾದಿ ಹುಯಿರ‍್ಹಿಷೆ. ಮೇ ತುನ ಹುಕುಮ್ ದ್ಯವಾನ ಖ್ಹಾರುಸ್ ತು ಬೋಲ್ನು ಇಸ್ರಾಯೇಲ್‌ವಾಳು ದೇಖ್ಹ್‌ಥು ನಿಕ್ಳಿ ಜಾ಼ವನಿತರ ಹುಕುಮ್ ದೆವಾವ್ಣುಕರಿ ತಾರೊ ಮೋಟೊ ಭೈ ಹುಯಿರ‍್ಹೋತೆ ಆರೋನಸ್ ಫರೋಹನ ಖ್ಹಾಮ್ಣೆ ವಾತೆ ಬೋಲ್ನು. ರ‍್ಹಿಯುತೋಬಿ ಮೇ ಫರೋಹನ ಮನ್ಮ ಹಟಕರೈನ್ ಈಜಿಪ್ಟ್ ದೇಖ್ಹ್‌ಮ ಕೈಯೇಕ್ ಖ್ಹಣೇದ್ನುಕಾಮ್ ಅಜು಼ ಅದ್ಭುತ್‌ಕಾಮ್ ಕರೈನ್ ಮಾರಿ ಶಕತ್ನ ವತಾಳಿಶ್. ಫರೋಹ ತಾರಿ ವಾತ್ನ ಖ್ಹಮಜ಼್‌ಷೆ ಕೊಯ್ನಿ. ತದೆ ಮೆ, ಈಜಿಪ್ಟ್ ದೇಖ್ಹ್‌ವಾಳಾನ ಖ್ಹತಾಪ್ಣಿ ದೀನ್, ಮಾರು ಅದ್ಮಿ ಹುಯಿರ‍್ಹುತೆ ಇಸ್ರಾಯೇಲ್ನ ಶಿಪಾಯ್ನಖ್ಹಾರು ಈಜಿಪ್ಟ್ ದೇಖ್ಹ್‌ಥು ಭಾರ್ ಕಾಡಿಷ್. ಮೇ ಈಜಿಪ್ಟ್‌ವಾಳನ ವಿರೋದ್‌ಥಿ ಹಾತ್ ಫಖ್ಹಾರಿನ್ ಇವ್ಣ ಬೀಚ್ಮಾಥು ಇಸ್ರಾಯೇಲ್‌ವಾಳನ ಭಾರ್‌ಲೀನ್ ಆವಾನಿವಖ್ಹ್‌ತೆ ಮೇ ಯೆಹೋವ ಕರಿ ಈಜಿಪ್ಟ್‌ವಾಳು ಮಾಲುಮ್ ಕರಿಲಿಷೆ” ಕರಿ ಬೊಲ್ಯೊ. ಯೆಹೋವನಿ ಹುಕುಮ್‌ನಿತರ ಮೋಶೆ ಅಜು಼ ಆರೋನ ಇವ್ಣೆ ಕರ‍್ಯು. ಇವ್ಣೆ ಫರೋಹಕನ ವಾತೆ ಬೋಲ್ಯುತೆ ವಖ್ಹತ್‌ಮ ಮೋಶೆ ಚಾರಿಖ್ಹ್ ವರಖ್ಹ್‌ನೋಬಿ ಅಜು಼ ಆರೋನ ತೀನ್‌ಉಪ್ಪರ್ ಚಾರಿಖ್ಹ್ ವರಖ್ಹ್‌ವಾಳ ಹುಯಿರ‍್ಹಾಥ.
ಆರೋನನೊ ಲಠ್ಠೊ
ಯೆಹೋವನೆ ಮೋಶೆ ಬಿಜು಼ ಆರೋನ್ನ ಜೋ಼ಡ್ಮ ವಾತೆ ಬೋಲಿನ್, “ಫರೋಹ ತುಮುನ, ‘ಮೇ ತುಮಾರಿ ವಾತೆನ ನಂಬಾನಿತರ ತುಮೆ ಮಹಾನ್ ಕಾಮ್ ಖ್ಹಾಮ್ಣೆ ಕರ್ನು’ ಕರಿ ಬೋಲ್ಯೆತೊ ಮೋಶೆ ಆರೋನ್ನ ‘ತಾರ ಹಾತ್ಮ ಛಾ಼ತೆ ಲಠ್ಠಾನ ಫರೋಹನ ಖ್ಹಾಮ್ಣೆ ಮಾಟಿನಪರ್ ಫೇಕ್’ ಕರಿ ಬೋಲ್ನು, ಯೊ ಖ್ಹಾಪ್ ಹುಯಿಜಾಷೆ” ಕರಿ ಹುಕುಮ್‌ದಿದೊ. ಮೋಶೆ ಅಜು಼ ಆರೋನ ಇವ್ಣೆ ಫರೋಹಕನ ಜೈ಼ನ್ ಯೆಹೋವನೆ ಇವ್ಣುನ ಹುಕುಮ್ ದ್ಯವಾನಿತರಾಸ್ ಕರ‍್ಯಾ. ಆರೋನನೆ ಇನ ಲಠ್ಠಾನ ಫರೋಹ ಅದಿಕಾರಿಯೇವ್ನ ಅಜು಼ ಶಿಪಾಯ್ನ ಖ್ಹಾಮ್ಣೆ ಜ಼ಮಿನ್‌ಪರ್ ನಾಖಖ್ಹತರ್ ಯೊ ಖ್ಹಾಪ್ ಹುಯಿಗು. ಫರೋಹನು ಈಜಿಪ್ಟ್ ದೇಖ್ಹ್‌ನು ಫಡಂತ್‌ವಾಳನಬಿ ಜಾ಼ದು ಕರಾವಳನಾಬಿ ಬುಲಾವಖ್ಹತರ್ ಯೊ ಜಾ಼ದು ಕರಾವಳು ಇವ್ಣಿ ಮಂತರ್‌ಥಿ ಇಮ್ಮಸ್ ಕರ‍್ಯು. ಇವ್ಣೆ ಇವ್ಣ ಇವ್ಣ ಲಠ್ಠಾವ್ನ ಜ಼ಮಿನ್‌ಪರ್ ಫೇಕಾಖ್ಹತರ್ ಯೊ ಅಖ್ಖುಬಿ ಖ್ಹಾಪ್ ಹುಯಿಗು. ಕತೋಬಿ ಆರೋನ್ನೊ ಲಠ್ಠೊ ಇವ್ಣ ಅಖ್ಖ ಲಠ್ಠಾವ್ನ ಗಳಿಲಿದು. ಯೆಹೋವ ಪಹಿಲೆ ಬೋಲನಿತರಾಸ್ ಫರೋಹನ್ನೊ ದಿಲ್‌ ಕಠಣ್ ಹುಯಿಗು. ಇನೆ ಇವ್ಣಿವಾತ್ನ ಖ್ಹಂಜೊ ಕೊಂತೆ ಚ಼ಲೆಗಯೊ.
ಈಜಿಪ್ಟ್‌ನ ಆಯುತೆ ಖತ್ರ
ಲ್ಹೋಯಿ
ತದೆ ಯೆಹೋವ ಮೋಶೆನ, “ಫರೋಹ ಘಣು ಹಟಕರಿನ್, ಯೊ ಅದ್ಮಿವ್‌ನ ಜಾ಼ವಾನ ಕೋ ಮ್ಹೇಲ್‌ಶೇನಿ ಕರಿ ಬೊಲ್ಯೊ. ತು ವ್ಹಾಣೆಸ್ ಫರೋಹಕನ ಜಾ಼, ಯೊ ಪಾಣಿಕನ ಉತ್ರಿನ್ ಆವ್‌ಶೇನಿ ಖ್ಹಾಪ್‌ಹುಯಿನ್ ಬದ್ಲಿಗಯೊತೆ ಲಠ್ಠಾನ ತಾರ ಹಾತ್ಮ ಪಾಡಿಲಿನ್ ಇನ ಮ್ಹೋರೆ ಹುವಾನಸ್‌ಖ್ಹಾಜೆ ನೈಲ್ ನದ್ದೀನಿ ಕನಾರಿಮ ಭಿಯೊರಿನ್ ಇನಖ್ಹಾಜೆ ಟಿವಾವೊ. ರಾಜ಼ನ ಅಮ್ ಬೋಲ್, ಇಬ್ರಿಯಾನೊ ದೇವ್ ಯೆಹೋವನೆ ಮನ ತಾರಕನ ಮೋಕ್ಲಿನ್, ಝ಼ಂಗಳ್‌ಮ ಇನ ಆರಾದನೆ ಕರಾನಖ್ಹಾಜೆ ಇನ ಅದ್ಮಿನ ಅಧಿಕಾರ್ ದೇವ್ಣುಕರಿ ಹುಕುಮ್ ದಿರಾಖ್ಯೊಸ್. ಹಮ್ಕೆ ಲಗೂಬಿ ತುನೆ ಇನ ಖ್ಹಮ್‌ಜ್ಯೊಕೊಯ್ನಿ. ಅನಖ್ಹಾಜೇಥಿ ಯೆಹೋವನೆ ಬೋಲ್ಯೊತೆ ಶಾತ್‌ಕತೊ ತೂ ಮನ ಯೆಹೋವಕರಿ ಮಾಲುಮ್ ಕರಿಲ್ಯವಾನಖ್ಹಾಜೆ ಮಾರ ಸೇವಕ್‌ನ ಹಾತ್ಮನೊ ಲಠ್ಠೇಥಿ ನೈಲ್ ನದ್ದಿನ ಪಾಣಿನ ಮಾರೈಶ್, ತದೆ ಯೊ ಲ್ಹೋಯಿ ಉಷೆ. ನದ್ದೀಮ ಛಾ಼ತೆ ಮಾಚ್ಲಖ್ಹಾರು ಮರಿಜಾ಼ಷೆ ನದ್ದಿ ಗಲೀಜ಼್‌ಹುಯಿನ್ ವಾ ಮಾರ್‌ಶೆ. ಇನ ಪಿಯಾನ ಈಜಿಪ್ಟ್‌ವಾಳನ ಕಚಿಂಡ್ ಹುಯಿಜಾ಼ಶೆ’ ಕರಿ ಬೋಲ್ನು” ಕರಿಬೋಲ್ಯೊ. ಯೆಹೋವನೆ ಮೋಶೆನ ಜೋ಼ಡೆ ವಾತೆ ಬೋಲಿನ್, “ಆರೋನನ, ‘ತಾರ ಲಠ್ಠಾನಲೀನ್ ಈಜಿಪ್ಟ್ ದೇಖ್ಹ್‌ಮ ಛಾ಼ತೆ ನದ್ದಿ, ವ್ಹೆಕ್‌ಳೊ, ತಲಾವ್, ಪಾಣಿನೊ ಕುಂಟೊ ಅಥ್ರಾನು ಪಾಣಿರ‍್ಹವಾನು ಅಖ್ಖೀಸ್ ಝ಼ಗೋಪರ್ ಇನ ವತಾಳ್’ ಕರಿ ಬೋಲ್ನು, ಆರೋನ್ನೆ ಇಮ್ ಯೊ ಲಠ್ಠಾನ ಧರಿನ್ ವತಾಳನಿ ವಖ್ಹ್‌ತೆ ಯೊ ಪಾಣಿ ಅಖ್ಖು ಲ್ಹೋಯಿಉಷೆ. ಈಜಿಪ್ಟ್ ದೇಖ್ಹ್‌ ಅಖ್ಖು ಲಾಕ್ಡಾನ ರಾಛಾ಼ಮಾಬಿ ಬಂಡಾನ ಬಾನೆಮಾಬಿ ಛಾ಼ತೆ ಪಾಣಿ ಲ್ಹೋಯಿ ಹುಯಿಜಾಷೆ ಕರಿ ಬೊಲ್ಯೊ. ಮೋಶೆ ಅಜು಼ ಆರೋನ ಇವ್ಣೆ ಯೆಹೋವ ಇವ್ಣುನ ಬೋಲನಿತರಾಸ್ ಕರ‍್ಯಾ. ಆರೋನನೆ ಫರೋಹ ಅಜು಼ ಇನ ಅದಿಕಾರಿನ ಖ್ಹಾಮ್ಣೆ ಲಠ್ಠಾನ ಪಾಡಿನ್, ನೈಲ್ ನದ್ದಿಮಾನು ಪಾಣಿನ ಮಾರಖ್ಹತರ್ ಯೊ ಅಖ್ಖು ಲ್ಹೋಯಿ ಹುಯಿಗು. ಇನಾಮ ಥೂತೆ ಮಾಚ್ಲ ಮರಿಗಯು. ನದ್ದಿ ಖ್ಹಡಿ ವಾ ಮಾರುಕರ್ತುಥೂತೆ ಇನಖ್ಹಾಜೆ ಈಜಿಪ್ಟ್‌ವಾಳು ನೈಲ್ ನದ್ದಿನ ಪಾಣಿನ ಪಿಯಾನ ಕೊಹುಯುನಿ. ಈಜಿಪ್ಟ್ ದೇಖ್ಹ್‌ಅಖ್ಖು ಲ್ಹೋಯಿಸ್ ದೆಖವ್‌ಕರ್ತುಥು. ಕತೋಬಿ ಈಜಿಪ್ಟ್ ದೇಖ್ಹ್‌ನು ಮಂತರ್‌ಕರಾವಳು ಇವ್ಣ ಮಂತರ್‌ಥಿ ಯೋಸ್ ಪರಕ್ಮ ಕರ‍್ಯುತೆ ಫರೋಹನು ದಿಲ್‌ ಬಿಜೂ಼ಬಿ ಕಠಣ್ ಹುಯಿಗು. ಯೆಹೋವ ಬೋಲ್ಯೊತೆ ತಿಮ್ಮಸ್ ಇನೆ ಮೋಶೆ ಅಜು಼ ಆರೋನಾನಿ ವಾತೆನ ಖ್ಹಂಜೊ ಕೊಂತೆ ಗಯೊ. ಅಮ್ ಫರೋಹನೆ ಯೊ ಮಹಾನ್ ಕಾಮ್ನ ಖ್ಹಾಯ್ ಕರ‍್ಯೊಕೊಂತೆ ಇನ ಘರೆ ಚ಼ಲೆಗಯೊ. ಈಜಿಪ್ಟ್‌ವಾಳು ಖ್ಹಾರು ನದ್ದಿನ ಪಾಣಿನ ಪಿಯಾನ ಕೊಹುಯುನಿತೆ ಪಿಯಾನ ಪಾಣಿನಖ್ಹಾಜೆ ನದ್ದಿನ ಅಶ್‌ಪಿಶ್ ಖಾಡ್‌ ಖೋಂದ್ಯು. ಯೆಹೋವ ನೈಲ್ ನದ್ದಿನಪರ್ ಮಾರನ ಪಾರ್ ಖ್ಹಾತ್‌ದನ್ ಭರೈಗು.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.