Waghri Booli Bible
ವಿಮೋ 5
ಈಜಿಪ್ಟ್‌ನ ರಾಜಾ಼ನ ಖ್ಹಾಮ್ಣೆ ಮೋಶೆ ಅಜು಼ ಆರೋನ
ಇನಕೇಡೆಥು ಮೋಶೆ ಅಜು಼ ಆರೋನ ಫರೋಹನ ಖ್ಹಾಮ್ಣೆ ಜೈ಼ನ್, “ಇಸ್ರಾಯೇಲ್ನ ದೇವ್ ಹುಯಿರ‍್ಹೋತೆ ಯೆಹೋವ ಮಾರು ಅದ್ಮಿ ಮಾರಖ್ಹಾಜೆ ಮರ‍್ಯಾದಿಕರಿನ್ ಜ಼ಂಗಳ್‌ಮ ಜ಼ತ್ರಾ ಚ಼ಲಾವನಿತರ ಇವ್ಣುನ ಹುಕುಮ್ ದೇವ್ಣುಕರಿ ಬೋಲಿರಾಖ್ಯೊಸ್ ಕರಿಬೋಲ್ಯು. ಇನ ಫರೋಹಾನೆ, “ಯೆಹೋವಕರಿ ಬೋಲಾತೆ ಕೋಣ್? ಮೇ ಇನ ವಾತ್ನ ಖ್ಹಮ್‌ಜಿನ್ ಇಸ್ರಾಯೇಲ್‌ವಾಳನ ಮೋಕಲ್ನುತೆ ಶನ? ಯೆಹೋವ ಕೋಣ್‌ಕರಿ ಮನ ಮಾಲುಮ್‌ಕೊಯ್ನಿ. ಆಸ್ ಖಲಿಕಾಹೆತೆ ಇಸ್ರಾಯೇಲ್‌ವಾಳನ ಜಾ಼ವಾನ ಮೇ ಮ್ಹೇಲಿಶಸ್ ಕೊಯ್ನಿ” ಕರಿಬೋಲ್ಯೊ. ತದೆ ಇವ್ಣೆ, “ಇಬ್ರಿಯವಾಳನು ದೇವ್ ಹಮುನ ಮ್ಹೋರೆ ಹುಯೊ. ಹುಕುಮ್ ಹುಯೂತೊ ಹಮೆ ಜ಼ಂಗಳ್‌ಮ ತೀನ್ ದನ್ ಚಾ಼ಲಿನ್, ಹಮಾರೊ ದೇವ್ ಹುಯಿರ‍್ಹೋತೆ ಯೆಹೋವನಖ್ಹಾಜೆ ಬಲಿಕರಿನ್ ಐಯೇಸ್ ನತರ್ ಯೊ ಹಮುನ ರೋಗ್‌ಥಿಕಿ ತಲ್ವಾರ್‌ಥೀಕಿ ಸಂಹಾರ್ ಕರ್ಷೆ” ಕರಿ ಬೋಲ್ಯು. ಈಜಿಪ್ಟ್‌ನ ರಾಜಾ಼ನೆ ಇವ್ಣುನ, “ಮೋಶೆ ಅಜು಼ ಆರೋನ ಆ ಅದ್ಮಿನ ಇವ್ಣಕಾಮ್ನ ಕರ್ನುನಾತೆ ಶನ ಅಡ್ಡಿ ಕರೋಸ್? ತುಮಾರ ಫುಗಟ್‌ನ ಕಾಮ್ನ ಜಾ಼ವೊ ಕರಿಬೋಲ್ಯೊ. ಫರೋಹಾನೆ ಇಬ್ರಿಯವಾಳು ದೇಖ್ಹ್‌ಮ ಜಾ಼ಖ್ಹತ್ ಛಾ಼ ಇವ್ಣೆ ಇವ್ಣು ಫುಗಟ್‌ನ ಕಾಮ್ನ ನಾಕರ‍್ನುತೆ ತಿಮ್ ಭಿರಾಖಿ ದ್ಯವಾನಯುನಿ” ಕರಿ ಬೊಲ್ಯೊ. ಯೊ ದನ್ಮ ಫರೋಹಾನೆ ಫುಗಟ್‌ಥಿ ಕಾಮ್ ಕರಾವವಾಳನ ಅಜು಼ ಇವ್ಣ ಅದಿಕಾರಿಯೇವ್ನ ಬುಲೈನ್, “ಅನಪಾರ್ ತುಮೆ ಆ ಅದ್ಮಿವೋನ ಇಟ್ಕೆ ಕರಾನ ಖ್ಹಾಜೆ ಘಾಖ್ಹ್‌ನ ನಾದೇವ್ಣು ಇವ್ಣೇಸ್ ಜೈ಼ನ್ ಘಾಖ್ಹ್‌ನ ಜ಼ಮ ಕರಿಲ್ಯಾವದೆ. ಕತೋಬಿ ಇವ್ಣೆ ಹಮ್ಕೆಲಗು ಕರ‍್ಯುತೆ ಇಟ್ಕೆನಿ ಇಷಾಬ್‌ಮ ಶಾತ್‌ಬಿ ಕಮ್‌ನಾಹೋಣುಕರಿ ಇವ್ಣುನ ಬೋಲ್ನು. ಇವ್ಣೆ ವಳ್‌ಷಿನ ಖಾದಸ್, ಇನಖ್ಹಾಜೇಸ್ ಇವ್ಣೆ, ಹಮೆ ಜೈ಼ನ್ ಹಮಾರ ದೇವ್ನ ಬಲಿದೀನ್ ಆವಾನ ಹುಕುಮ್ ಹೋಣುಕರಿ ಚಿಕ್ರುಕರಾಸ್. ಆ ಅದ್ಮಿ ಹೋಣುಕೊಂತೆ ವಾತ್ನ ಧ್ಯಾನ್ ನಾದೇವ್ಣುತೆ ತುಮೆ ಇವ್ಣಪರ್ ಜಾ಼ಖ್ಹತ್ ಕಾಮ್ ಢೊವೊ. ಇವ್ಣೆ ರಾಬಾದೆ” ಕರಿ ಹುಕುಮ್ ಕರ‍್ಯೊ. ತದೆ ಫುಗಟ್ ಕಾಮ್‌ಕರಾವವಾಳು ಅಜು಼ ಅದಿಕಾರಿಖ್ಹಾರು ಭಾರ್‌ಜೈ಼ನ್ ಯೊ ಅದ್ಮಿವೊನ, “ತುಮುನ ಘಾಖ್ಹ್‌ ನಾ ದೇವ್ಣುಕರಿ ಫರೋಹನಿ ಹುಕುಮ್ ಹುಯಿರ‍್ಹೀಸ್. ತುಮುನ ಘಾಖ್ಹ್‌ ಕಿಜ್ಜಾ಼ ಮಳಾಸ್ಕಿ ಹಿಜ್ಜಾ಼ ತುಮೇಸ್ ಜೈ಼ನ್ ಲೀಲೆವೊ, ಕತೋಬಿ ತುಮೆ ಕರಾನ ಕಾಮ್ಮ ದರಾಖ್ಹುಬಿ ಕಮ್ ನಾಹೋಣು” ಕರಿ ಬೋಲ್ಯು. ಅಮ್‌ರ‍್ಹವಾಪರ್ ಅದ್ಮಿ ಘಾಖ್ಹ್‌ನ ಜ಼ಮಕರಾನ ಖ್ಹಾಜೆ ಈಜಿಪ್ಟ್ ದೇಖ್ಹ್‌ ಅಖ್ಖು ಫೈಲೈಜ಼ಯಿನ್ ಢೂಂಡಲಗ್ಯು. ಆಸ್ ಕಾಹೆತೆ ಫುಗಟ್‌ನು ಕಾಮ್‌ಕರಾವವಳು, “ತುಮುನ ಘಾಖ್ಹ್‌ ಥೂತೆ ಕಿಮ್ಕಿ ಇಮ್ಮಸ್ ಹರೇಕ್ ದನ್ನಾ ಕಾಮ್ನ ಯೋಸ್ ದನ್ಮಾಸ್ ಖತಮ್ ಕರ‍್ನು” ಕರಿ ಬೋಲಿನ್ ಇವ್ಣುನ ಉತ್ವಾಳಿಕರಾಯು. ಫರೋಹನು ಅಧಿಕಾರಿಖ್ಹಾರು ಇವ್ಣೆಸ್ ನೇಮಕ್ ಕರ‍್ಯುಥೂತೆ ಇಸ್ರಾಯೇಲ್ನು ಮೇಸ್ತ್ರಿವ್‌ನ, “ತುಮೆ ಪಹಿಲೆ ಇಟ್ಕೇನಿ ಗಣ್ತಿ ದೇತಥಾತೆ ತಿಮ್ ಕಾಲೆ ಅಜು಼ ಆಜ಼್ ಶನ ಕೋದಿದಾನಿ” ಕರಿ ಬೋಲಿನ್ ಇವ್ಣುನ ಮಾರ‍್ಯು. ಅಮ್ ರ‍್ಹವಾಪರ್ ಇಸ್ರಾಯೇಲ್‌ವಾಳನು ಮೇಸ್ತ್ರಿಖ್ಹಾರು ಫರೋಹಕನ ಜೈ಼ನ್, “ಮಾಲಿಕ್ ಶನ ತಾರ ದಾಸರ್‌ನ ಅಮ್ ಕರುಕರಸ್ ? ತಾರ ದಾಸರ್‌ನ, ನೇಮ್‌ಶಾಯಾತೆ ಅದಿಕಾರಿಖ್ಹಾರ ಘಾಖ್ಹ್‌ನ ನಾ ದೀನ್ ‘ಇಟ್ಕೆಖ್ಹಾರು ಕರೊ!’ ಕರಿ ಬೋಲಿನ್ ಹಮುನ ಮಾರುಕರಸ್. ಅಮ್ ತಾರು ಅದ್ಮಿ ಕರುಕರಾಸ್ತೆ ಪಾಪ್ನುಕಾಮ್ ಹುಯಿರ‍್ಹುಸ್” ಕರಿ ಬೋಲ್ಯು. ತದೆ ಇನೆ, ‘ತುಮೆ ವಳ್‌ಷಿಭರ‍್ಯ, ತುಮೆ ವಳ್‌ಷಿಭರ‍್ಯ ಹುಯಿರ‍್ಹಾಸ್ತೆ ಇನಖ್ಹಾಜೆ, ‘ಹಮೆ ಜೈ಼ನ್ ಯೆಹೋವನ ಬಲಿಸಮರ್ಪಣ್ ಕರಿನ್ ಆವ್ಣು’ ಕರಿ ಬೋಲುಕರ‍್ಯಾಹೊತ್ತ್. ಇನಖ್ಹಾಜೆ ಹಮ್ಕೆ ಚಾ಼ಕ್ರಿನ ಚಾ಼ಲೊ ತುಮುನ ಘಾಖ್ಹ್‌ ಕೊದೇವ್ನಿ ಕತೋಬಿ ಇಟ್ಕೆನಿ ಇಶಾಬ್ ದೇವ್ಣುಕರಿ ಬೊಲ್ಯೊ. ದನ್‌ರೋಜ಼್‌ಬಿ ಒಪ್‌ಶಾವ್ಣುತೆ ಇಟ್ಕೆವ್ನಿ ಗಣ್ತಿ ಕಮ್‌ನಾಹೋಣುಕರಿ ಬೋಲಾನ ಹುಕುಮ್‌ನ ಖ್ಹಾಜೇಥಿ ಇಸ್ರಾಯೇಲ್‌ವಾಳನು ಮೇಸ್ತ್ರಿಖ್ಹಾರು ಇವ್ಣೆ ಖರಾಬ್ ಹಾಲತ್ಮ ಖ್ಹಪ್‌ಡಿಗಯಕರಿ ಮಾಲುಮ್ ಕರಿಲಿದು. ಇವ್ಣೆಖ್ಹಾರು ಫರೋಹಕಂಥು ಭಾರ್‌ ಆಯತದೆ ಇವ್ಣುನ ಖ್ಹಾಮ್ಣೆ ದೇಖಾನ ಭಿಯಾಥಾತೆ ಮೋಶೆ ಅಜು಼ ಆರೋನ್ನ ದೇಖ್ಯು. ಮೋಶೆ ಅಜು಼ ಆರೋನ್ನ ಇವ್ಣೆ, “ಯೆಹೋವ ತುಮುನ ದೇಖಿನ್ ನ್ಯಾವ್ ಫೇಡಾವದೆ. ಶನಕತೊ ಫರೋಹಬಿ ಅಜು಼ ಇನ ಸೇವಕ್‌ಖ್ಹಾರು ಹಮುನ ದೇಖಿನ್ ಕಚಿಂಡ್ ಕರಾನಿತರ ತುಮೆ ಕರೈರಾಖ್ಯಸ್. ಹಮುನ ಮಾರಿನಾಖಾನ ಇವ್ಣ ಹಾತ್ಮ ತಲ್ವಾರ್‌ ದಿರಾಖ್ಯಸ್” ಕರಿಬೋಲ್ಯ. ಯೆಹೋವ ತುಮಾರಿ ಗಲತ್‌ನ ಬರೊಬರ‍್ನಿ ನಿಶತ್ ದ್ಯವಾದೆ” ಕರಿಬೋಲ್ಯು.
ಮೋಶೆ ದೇವ್ನ ಬೋಲಿವತಾಳ್ಯೋತೆ
ತದೆ ಮೋಶೆ ಯೆಹೋವಕನ ಪಾಛು಼ “ಮಾಲಿಕ್ ಆ ಅದ್ಮಿವ್‌ನ ಕೇಡ್ ಕರಿ ರಾಖ್ಯೊನಿ? ಮನ ಮೋಕ್‌ಲ್ಯೊತೆ ಶನ? ಮೇ ಫರೋಹಕನ ಜೈ಼ನ್ ತಾರ ನಾಮ್ಮ ವಾತೆ ಬೊಲ್ಯೊ ತಪ್‌ಥು ಯೊ ಅದ್ಮಿವೊನ ಕೇಡೆಸ್ ಕರುಕರಸ್. ತೂ ತಾರ ಅದ್ಮಿವ್‌ನ ಖಲಿ ಅತ್ರುಖ್ಹೂಬಿ ಛು಼ಕಾಯೊ ಕೊಯ್ನಿನಿ” ಕರಿ ಬೊಲ್ಯೊ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.