Waghri Booli Bible
ವಿಮೋ 20
ದಖ್ಹ್‌ ಹುಕುಮ್‌ಖ್ಹಾರು
(ಧರ್ಮೊ 5:1-21)
ಆ ದೇವ್ನೆ ಬೋಲ್ಯೊತೆ ವಾತೆಖ್ಹಾರಿ: “ತೂ ಗುಲಾಮ್‌ಹುಯಿನ್ ಥೋತೆ ಈಜಿಪ್ಟ್ ದೇಖ್ಹ್‌ಮಾಥು ತುನ ಭಾರ್‌ ಲಾಯೊತೆ ‘ತಾರೊ ಯೆಹೋವ ದೇವ್ ಮೇಸ್’ ಮನ ಮ್ಹೇಲಿನ್ ತುಮುನ ಬಿಜು಼ ದೇವ್‌ಖ್ಹಾರು ನಾರ‍್ಹೇವ್ಣು. “ಖಿವು ಮೂರತ್‌ನಾಬಿ ನಾಕರ‍್ನು. ಆಬ್‌ಮ ರ‍್ಹವೊ ಧರ್ತಿಪರ್ ರ‍್ಹವೊ, ಧರ್ತಿನ ಹೇಟ್‌ಪಾಣಿಮ ಛಾ಼ತೆ ಶನೂ ರೂಪ್‌ನಾಬಿ ನಾಕರಿರಾಕ್ಣು. ಯೋಖ್ಹಾರನ ಆಡುಬಿ ನಾಪಡ್ನು, ಪೂಜ಼ ನಾಕರ‍್ನು. ಶನಕತೊ ತಾರೊ ದೇವ್ ಯೆಹೋವ ಹುಯಿರ‍್ಹೋತೆ ಮನ ಮಳಾನು ಮರ‍್ಯಾದಿನ ಬಿಜೇಕ್‌ನ ಮ್ಹೇಲಿ ಕೋದೆವ್ನಿ. ಇನಖ್ಹಾಜೆ ಮನ ಬಳಾಪೊ ಕರವಾಳನಿ ಬಾರೇಮ ಇವ್ಣಿ ಬಾನಿ ದೋಷ್‌ನಿ ಫಲ್ನ ಇವ್ಣ ಲಡ್ಕಾವ್‌ಪರ್, ತೀನ್ ಚಾರ್ ಮುಂಡಿಲಗು ಲೀನ್‌ಅಯಿಶ್. ಕತೋಬಿ ಮನ ಪ್ಯಾರ್‌ಕರಿನ್ ಹುಕುಮ್‌ನ ಪಾಡಿಚಾ಼ಲವಾಳಪರ್‌ ಹಜಾ಼ರ್ ಮುಂಡಿಲಗು ಮೇ ಇವ್ಣುನ ದಯಾ ಕರಿಶ್. ತಾರೊ ದೇವ್‌ಹುಯಿರ‍್ಹೊತೆ ಯೆಹೋವನು ನಾಮ್ನ ಬೆಕಾರ್‌ಕಾಮ್ನಖ್ಹಾಜೆ ನಾಪಾಡ್ನು. ಯೆಹೋವ ಇನ ನಾಮ್ನ ಬೆಕಾರ್‌ಕಾಮ್ನಖ್ಹಾಜೆ ಪಾಡವಾಳನ ನಿಶತ್ ದಿಶ್‌ಕೊಂತೆ ಮ್ಹೇಲಿಶ್‌ ಕೊಯ್ನಿ. “ಸಬ್ಬತ್ ದನ್ನಾ ದೇವ್ನೊ ಪರಿಶುದ್ ದನ್‌ಕರಿ ಚ಼ಲಾವನ ಯಾದ್ಮ ರಾಕ್ಣು. ಛೋ಼ ದನ್‌ಖ್ಹಾರು ತೂ ರಾಬಿನ್‌ ತಾರು ಕಾಮ್‌ಖ್ಹಾರುಸ್ ಕರಿಲೇವ್ಣು. ಕತೋಬಿ ಖ್ಹಾತ್‌ನೊ ದನ್ ತಾರೊ ದೇವ್‌ಹುಯಿರ‍್ಹೋತೆ ಯೆಹೋವನಖ್ಹಾಜೆ ಛಾ಼ತೆ ಅರಾಮ್‌ನೊ ದನ್ ಹುಯಿರುಸ್. ಯೊ ದನ್ಮ ತುಮೆ ಖಿವು ಕಾಮ್ನಾಬಿ ನಾಕರ‍್ನು. ತಾರ ಪರ್ಖ್ಹೊ ತಯೇಡ ಲಡ್ಕ, ಪರ್ಖ್ಹೊ ಆಳ್‌, ತಯೇಡ ಆಳ್‌, ಜಾನ್ವರ್‌ಖ್ಹಾರು ಜಿನ್‌ಜಿನಾವರ್ ತಾರ ಗಾಮ್ಮ ಛಾ಼ತೆ ಪರ್‌ದೇಖ್ಹ್‌ವಾಳು ಜಿನು ಖಿವು ಕಾಮ್ನಬಿ ನಾಕರ‍್ನು. ಛೋ಼ ದನ್ಮ ಯೆಹೋವನೆ ಆಬ್ ಧರ್ತಿನಾಬಿ, ದರ‍್ಯಾವ್‌ನಾಬಿ, ಇನಾಮ ಛಾ಼ತೆ ತಮಾಮ್‌ನಾಬಿ ತಯಾರ್‌ಕರಿನ್, ಖ್ಹಾತ್‌ನ ದನ್ಮ ಅರಾಮ್ ಕರ‍್ಯೊ. ಇನಖ್ಹಾಜೆ ಯೆಹೋವನೆ ಸಬ್ಬತ್ ದನ್ನಾ ಇನು ಪರಿಶುದ್ಧ್ ದನ್‌ಹುಯಿರ‍್ಹವಾದೆ ಕರಿ ಆಶೀರ್ವಾದ್‌ ಕರ‍್ಯೊ. “ತಾರ ಆಯಬಾನ ಮರ‍್ಯಾದಿ ದೇವ್ಣು, ಮರ‍್ಯಾದಿ ದಿದೂತೊ ತಾರೊ ದೇವ್ ಯೆಹೋವ ತುನ ದೇಸ್‌ತೆ ದೇಖ್ಹ್‌ಮ ತೂ ಜಾ಼ಖ್ಹತ್ ಹಗಾಮ್ ಜಿವಿಷ್. “ಖೂನ್‌ ನಾಕರ‍್ನು. “ವ್ಯಬಿಚಾರ್ ನಾಕರ‍್ನು. “ಚೋ಼ರ್ ನಾಕರ‍್ನು. “ಬಿಜೇಕ್ ಜ಼ಣಪರ್ ಝೂ಼ಟಿ ಸಾಕ್ಷಿ ನಾಬೋಲ್ನು. “ಬಿಜೇಕ್ ಜ಼ಣನ ಘರ್‌ನ ದೇಖಿನ್ ಆಖ್ಹ್ ನಾಕರ‍್ನು. ಬಿಜೇಕ್ ಜ಼ಣಾನಿ ಬಾವಣ್, ದಾಸ, ದಾಸಿ, ಢಾಂಡು, ಗಧೇಡೊ ಬಿಜು಼ ಖಿವಾನಬಿ ಆಖ್ಹ್‌ನಾಕರ‍್ನು.”
ಅದ್ಮಿಖ್ಹಾರು ಡರ‍್ಯುತೆ
(ಧರ್ಮೊ 5:22-33)
ಯೊ ಘಲಾರ್, ವಿಜ಼್‌ಳಿ, ತುತ್ತೂರಿನು ಅವಾಜ಼್, ಬಿಜೂ಼ ಪಹಾಡ್‌ಥಿ ಭಾರ್‌ ನಿಕ್‌ಳುಕರ್ತುಥೂತೆ ಧುವ್ವಾನ ದೇಖಿನ್ ಅದ್ಮಿಖ್ಹಾರು ಕಾಪ್ತುಹುಯಿನ್ ದೂರಸ್ ಭೀರಿಗಯು. ಇವ್ಣೆ ಮೋಶೆನ, “ತೂಸ್ ಹಮಾರ ಜೋ಼ಡೆ ವಾತೆಬೋಲ್ ಹಮೆ ಖ್ಹಮ್‌ಜೆಸ್. ಕತೋಬಿ ದೇವ್ ಹಮಾರಿ ಜೋ಼ಡೆ ವಾತೆ ಬೋಲ್ಯೊತೊ ಹಮೆ ಮರಿಜಾಶು” ಕರಿ ಬೋಲ್ಯು. ಇನ ಮೋಶೆನೆ ಅದ್ಮಿವ್‌ನ, “ಡರೊ ನಕೊ, ದೇವ್ ತುಮುನ ತರೀಪ್‌ಶ ಕರಾನಖ್ಹಾಜೆ, ತುಮೆ ಪಾಪ್ ನಾಕರ‍್ನುತೆ ಇನಪರ್ನಿ ಡರ್‌ ತುಮುನ ರ‍್ಹೇವ್ಣುಕರಿಬಿ ಉತ್ರಿ ಐರ‍್ಹೋಸ್” ಕರಿ ಬೊಲ್ಯೊ. ಅದ್ಮಿವ್ ದೂರ್‌ಮ ಭಿಯೂಥು. ಮೋಶೆನೆ ದೇವ್‌ರ‍್ಹವಾನು ಯೊ ಅಂಧಾರ ವಾದ್ಳಾನ ಖನ್ನೆ ಗಯೊ.
ಬಲೀನಿ ಚಾ಼ಚ಼ರ್‌ನಿ ಬಾರೇಮ ನಿಯಮ್‌
ಯೆಹೋವನೆ ಮೋಶೆನ ಅಮ್‌ಬೋಲ್ಯೊ, “ತೂ ಇಸ್ರಾಯೇಲ್‌ವಾಳನ ಬೋಲ್ನು ಶಾತ್‌ಕತೊ ‘ಮೇ ಆಬ್‌ಪರ್‌ಥು ತುಮಾರಿ ಜೋ಼ಡೆ ವಾತೆ ಬೋಲ್ಯೊತೆ ತುಮೆ ದೇಖಿರಾಖ್ಯಸ್. ಮನ ಮ್ಹೇಲಿನ್ ತುಮೆ ಖ್ಹೊನ್ನ ರೂಪಾನು ದೇವ್ನ ನಾ ಕರ್ನು. ತುಮೆ ಮಾರಿ ಚಾ಼ಚ಼ರ್‌ನ ಮಾಟಿಥಿ ಕರ್ನು. ತುಮೆ ಇನ ಉಪ್ಪರ್ ತುಮಾರಿ ಅಖ್ಖೀಸ್ ಶರೀರ್‌ನು ಬಲೀನ, ಸಮಾಧಾನ್ನಿ ಬಲಿ, ಢಾಂಡ ಮೇಂಢಾವ್ನ ಸಮರ್ಪಣ್‌ಕರ‍್ನು. ಮೆ ಮಾರ ನಾಮ್ನ ಮರ‍್ಯಾದೆ ದ್ಯವಾನಿತರನಿ ಅಖ್ಖೀಸ್ ಝ಼ಗೋಮಬಿ ಮೇ ತುಮಾರಕನ ಅಯಿನ್ ತುಮುನ ಆಶೀರ್ವಾದ್‌ ಕರಿಶ್. ತುಮೆ ಮಾರಖ್ಹಾಜೆ ಬಂಡಾಥಿ ಚಾ಼ಚ಼ರ್‌ನ ಭಾಂದನುರ‍್ಹಯೂತೊ, ಇನ ಟಕಾಯಹುಯ ಬಂಡೇಥಿ ನಾಭಾಂದ್‍ಣು. ಶನಕತೊ ಉಳಿ, ನತರ್ ಬಿಜು಼ ಖಿವೂಬಿ ಇನ ಉಪ್ಪರ್ ಉಪಯೋಗ್ ಕರ‍್ಯುತೊ ಯೊ ಮೈಲು ಹುಯಿರ‍್ಹುಸ್. ಆಸ್ ಕಾಹೆತೆ ತುಮಾರು ಉಘಾಡು ಶರೀರ್ ಚಾ಼ಚ಼ರ್‌ನಪರ್ ದೆಖಾವ್ಣುನಾತೆ ಖಿಡ್‌ಖೀಯೆಪರ್‌ಕರಿ ನಾಛ಼ಡ್ನು” ಕರಿ ಹುಕುಮ್ ಕರ‍್ಯೊ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.