Waghri Booli Bible
ವಿಮೋ 19
ಸೀನಾಯಿ ಪಹಾಡ್‌ಕನ ಇಸ್ರಾಯೇಲ್‌ವಾಳು
ಇಸ್ರಾಯೇಲ್‌ವಾಳು ಈಜಿಪ್ಟ್ ದೇಖ್ಹ್‌ಥು ನಿಕ್‌ಳ್ಯುತೆ ತೀನ್ನ ಮಹಿನಾನ ಯೋಸ್ ದನ್ಮ ಸೀನಾಯಿ ಜ಼ಂಗಳ್‌ಮ ಆಯು. ಇಸ್ರಾಯೇಲ್‌ವಾಳು ರೆಫೀದೀಮಿನ ಮ್ಹೇಲಿನ್ ಜ಼ಂಗಳ್‌ಮ ಅಯಿನ್ ಸೀನಾಯಿ ಪಹಾಡ್‌ನ ಮ್ಹೋರೆ ಡೇರೊ ಠೋಕಿನ್ ರ‍್ಹಯ. ಮೋಶೆ ಪಹಾಡ್ ಛ಼ಡೀನ್ ದೇವ್‌ಕನ ಗಯೊ. ತದೆ ಯೆಹೋವನೆ ಪಹಾಡ್‌ನ ಉಪ್ಪರ್‌ಥು ಮೋಶೆನ ಚಿಕ್ರಿನ್ ಇನ, “ತೂ ಯಾಕೋಬನಿ ಖಾನ್‌ದಾನ್‌ವಾಳು ಹುಯಿರ‍್ಹುತೆ ಇಸ್ರಾಯೇಲ್‌ವಾಳನ ಆ ವಾತೇವ್ನ ಬೋಲ್ನು. ‘ಮೇ ಈಜಿಪ್ಟ್‌ವಾಳನ ಕರ‍್ಯೊತೇಬಿ, ಗರದ್ ಇನ ಚೆಲ್ಕಾವ್ನ ಫಾಕ್ಡಿನ ಉಪ್ಪರ್ ಢೊಯ್‌ರಾಖನಿತರ ಮೇ ತುಮುನ ಢೊಯಿಲಿನ್ ಆ ಝ಼ಗೋನ ಬುಲೈಲಿನ್ ಆಯೋತೆಖ್ಹಾರು ತುಮೆ ದೇಖಿರಾಖ್ಯಸ್. ಇನಖ್ಹಾಜೆ ತುಮೆ ಮಾರಿ ವಾತೇವ್ನ ಧ್ಯಾನ್‌ಥಿ ಖ್ಹಮ್‌ಜಿನ್, ಮಾರಿ ಒಪ್ಪಂದಾನ ಬಚಾ಼ಡಿಲಿದಾತೊ, ತುಮೆ ಅಖ್ಖೀಸ್ ಜ಼ಗ್‌ಜಾ಼ತ್‌ಮ ಮನ ಶೊಂತ್ ಅದ್ಮಿಹುಯಿರ‍್ಹಿಶು. ತಮಾಮ್‌ ಧರ್ತಿಬಿ ಮಾರಿಸ್. ತುಮೆ ಮನ ಮಹಾನ್ ಯಾಜಕರ್‌ಬಿ, ಪರಿಶುದ್ಧಂ ಅದ್ಮಿಬಿ ಹುಯಿರ‍್ಹಿಶು’ ತೂ ಇಸ್ರಾಯೇಲ್‌ವಾಳನ ಬೋಲ್ನುತೆ ವಾತೆಖ್ಹಾರು ಆಸ್” ಕರಿ ಬೊಲ್ಯೊ. ತದೆ ಮೋಶೆ ಅಯಿನ್ ಅದ್ಮಿಯೇವ್ನ ಶಾಣಾವ್ನ ಎಕ್ಟು ಮಳಾಯೊ. ಯೆಹೋವನೆ ಹುಕುಮ್‌ ಕರಿರಾಖ್ಯೊಥೋತೆ ವಾತೇವ್ನ ಇವ್ಣುನ ಖ್ಹಮ್ಜಾ಼ಡ್ಯೊ. ಅದ್ಮಿಖ್ಹಾರುಬಿ ಎಕ್ಟುಹುಯಿನ್, “ಯೆಹೋವನೆ ಬೋಲ್ಯೊತೆ ತಿಮ್ಮಸ್ ಕರಿಯೇಸ್” ಕರಿ ಜವಾಬ್ ದಿದು. ಮೋಶೆ ಯೆಹೋವಕನ ಪಾಛೊ಼ ಜೈ಼ನ್ ಇವ್ಣೆ ಬೋಲ್ಯುತೆ ವಾತೇವ್ನ ಇನ ಬೊಲ್ಯೊ. ಯೆಹೋವನೆ ಮೋಶೆನ, “ಹಂದೇಕ್, ಮೇ ತಾರಿ ಜೋ಼ಡ್ಮ ವಾತೆ ಬೋಲಾನಿವಖ್ಹ್‌ತೆ, ಅದ್ಮೆವ್ ಖ್ಹಮ್‌ಜಿನ್ ಕೆದೇಬಿ ತುನ ವಿಶ್ವಾಸ್‌ಕರಾನಿತರ ಮೇ ವಾದ್ಳಾನ ಮಹಿಥು ತಾರಕನ ಆವುಸ್‌” ಕರಿ ಬೊಲ್ಯೊ. ಮೋಶೆ ಅದ್ಮಿಯೇವ್‌ನು ವಾತೇವ್ನ ಯೆಹೋವನ ಖ್ಹಮ್ಜಾ಼ಡ್ಯೊ. ಯೆಹೋವನೆ ಮೋಶೆನ ಶಾತ್ ಬೋಲ್ಯೊಕತೊ, “ತೂ ಅದ್ಮಿಕನ ಜೈ಼ನ್, ಆಜ಼್ ಅಜು಼ ಕಾಲೆ ಇವ್ಣುನ ಶುದ್‌ಕರ್. ಮಾರು ಆವಾನಖ್ಹಾಜೆ ಇವ್ಣುನ ತಯಾರ್‌ಕರ್. ಇವ್ಣೆ ಇವ್ಣ ಲುಂಗ್ಡಾವ್ನ ಧೊಯ್‌ಲಿನ್, ಬಿಜೇಕ್ ದನ್ಮ ಇವ್ಣೆ ತಯಾರ್ ಹುಯಿರ‍್ಹೇವ್ಣು. ತೀನ್ನ ದನ್ಮ ಯೆಹೋವ ತಮಾಮ್‌ ಅದ್ಮಿನಾಬಿ ದೆಖಾವ್‌ತೊ ಹುಯಿನ್ ಸೀನಾಯಿ ಪಹಾಡ್‌ಪರ್ ಉತ್ರಿನ್ ಆವ್‌ಶೆ. ಹಿಜ಼್ಜಾ ತುಮೆ ಮನ ದೇಕ್‌ಶು. ಅದ್ಮಿಖ್ಹಾರು ಖನ್ನೆ ನಾ ಆವ್ಣುತೆ ತೂ ಪಹಾಡ್‌ನ ಅಶ್‌ಪಿಶ್‌ಬಿ ಟಪ್ಪಾನ ಕರಿನ್ ಅದ್ಮಿವ್‌ನ, ‘ಹೊಷಾರ್‌ಥಿ ರ‍್ಹವೊ, ತುಮೆ ಆ ಪಹಾಡ್‌ನ ನಾಛ಼ಡ್ನುತೇಬಿ ಇನ ಟಪ್ಪಾನ ನಾಛೀಮ್‌ಣುತೇಬಿ ಜ಼ತನ್‌ಥಿ ರ‍್ಹೇವ್ಣು. ಪಹಾಡ್‌ನ ಛೀಮವಾಳು ಖ್ಹಾರುಸ್ ಖ್ಹಚೆಂಬಿ ಮರಿಜಾ಼ಷೆ.’ ಎಥ್ರಾನವಾಳನ ಕೋಣ್ಬಿ ನಾಛೀಮ್‌ಣು. ಬಂಡೊ ಫೇಕಿನ್ ನತರ್ ತೀರ್‌ನ ಫೇಕಿನ್ ಇನ ಮಾರ‍್ನುಸಸ್ ಮಾರ್ನು. ಅದ್ಮಿರ‍್ಹವೊ, ಜಾನ್ವರ್‌ರ‍್ಹವೊ ಪಹಾಡ್‌ನ ಛೀಮ್ಯುತೊ ಮರ‍್ನುಸ್ ಮರ‍್ನು. ಕತೋಬಿ ರಣ್‌ಶಿಂಗ್ಡಾನೊ ಅವಾಜ಼್ ಖ್ಹಮಜ಼್ ಪಡಾನಿ ವಖ್ಹ್‌ತೆ ಇವ್ಣೆ ಪಹಾಡ್‌ನ ಖನ್ನೆ ಆವ್ಣು” ಕರಿ ಬೊಲ್ಯೊ. ಮೋಶೆ ಪಹಾಡ್‌ಪರ್‌ಥೊ ಉತ್ರಿನ್ ಅದ್ಮಿಕನ ಐನ್, ಇವ್ಣುನ ಆರಾದನೆಕರಾನ ತಯಾರ್‌ಕರ‍್ಯೊ. ಇವ್ಣೆ ಇವ್ಣ ಲುಂಗ್ಡಾವ್ನ ಧೊಯ್‌ಲೀನ್ ಶುದ್‌ಹುಯು. ತದೆ ಮೋಶೆ ಅದ್ಮಿಯೇವ್ನ, “ತೀನ್ನಾ ದನ್ನಖ್ಹಾಜೆ ತಯಾರ್ ಹುವೊ. ಅನಿ ಬೀಚ್ಮ ಖಿವೊ ಪರ್ಖ್ಹೋಬಿ ತಯೇಡನ ಜೋ಼ಡೆ ನಾಮಳ್ನು” ಕರಿ ಬೊಲ್ಯೊ.
ಬಿಜೇಕ್ ದನ್ಮ ಚಾ಼ಂದ್ ನಿಕ್ಳಾನಿ ವಖ್ಹ್‌ತೆ ಯೊ ಪಹಾಡ್‌ಪರ್ ಘಲಾರನು, ವಿಜ಼್‌ಳೀಬಿ, ಕಾಳೊಮೋಡ್‌ಬಿ, ತುತ್ತೂರಿನು ಮಹಾನ್ ಅವಾಜ಼್‌ಬಿ ಹುವಾಖ್ಹತರ್ ಇಟಾರಮ ಥೂತೆ ಅದ್ಮಿಖ್ಹಾರುಬಿ ಕಾಪ್ಯು. ದೇವ್ನಿ ದರ್ಶನ್ನಖ್ಹಾಜೆ ಮೋಶೆ ಅದ್ಮಿಯೇವ್ನ ಟಾಂಡಾನ ಭಾರ್ ಬುಲೈಲಿನ್ ಆವಖ್ಹತರ್, ಇವ್ಣೆ ಪಹಾಡ್‌ನ ಹೇಟ್ ಭೀರಿಗಯು. ಯೆಹೋವ ಆಗ್‌ಮ ಸೀನಾಯಿ ಪಹಾಡ್‌ಪರ್ ಉತ್ರಿನ್ ಆಯೊ. ಇನಖ್ಹಾಜೆ ಯೊ ಪಹಾಡ್ ಅಖ್ಖೂಸ್ ಧುವ್ವಾನಿ ಪೋಯ್‌ಥಿ ಫೈಲೈರ‍್ಹೂಥು. ಯೊ ಧುವ್ವೊ ಆವೀನ ಧುವ್ವಾನಿತ್ರ ಛ಼ಡ್ಯು. ಕಾಹೆತೆ ಪಹಾಡ್ ಅಖ್ಖು ಘಣು ಕಾಪ್ಯು. ತುತ್ತೂರಿನು ಅವಾಜ಼್ ಜಾ಼ಖ್ಹತ್ ಹೋತು ಆವಖ್ಹತರ್, ಮೋಶೆನೆ ದೇವ್ನ ಜೋ಼ಡೆ ವಾತೆ ಬೊಲ್ಯೊ. ತದೆ ದೇವ್ನೆ ಊಚ಼ ಘಲಾರ್‌ಥಿ ಇನ ಜ಼ವಾಬ್ ದಿದೊ. ಯೆಹೋವ ಸೀನಾಯಿ ಪರ್ಭತ್‌ಪರ್ ಉತ್ರಿನ್ ಆಯೊ. ಇನೆ ಪರ್ಭತ್‌ನ ಉಪ್ಪರ್ ಆವ್‌ಕರಿ ಮೋಶೆನ ಬುಲಾವಖ್ಹತರ್ ಇನೆ ಪಹಾಡ್ನಿ ನೋಕ್‌ನ ಗಯೊ. ತದೆ ಯೆಹೋವನೆ ಮೋಶೆನ, “ತೂ ಉತ್ರಿನ್ ಜೈ಼ನ್ ಅದ್ಮಿವ್‌ನ ಝೇತಾವ್ಣು. ಅಮ್‌ ಮನ ಇವ್ಣೆ ದೇಖಾನಿ ಆಖ್ಹ್‌ಥಿ ಟಪ್ಪಾನ ಉಲಾಂಗಿನ್ ಯೆಹೋವನ ಖನ್ನೆ ಆಯುತೆ ಇವ್ಣಾಮ ಕೈಯೇಕ್‌ಜ಼ಣು ಮರಿಜಾ಼ಷೆ. ಯೆಹೋವನಿ ಝ಼ಗೋಮ ಆವಾಳು ಯಾಜಕರ್‌ಬಿ ಇವ್ಣುನ ಶುದ್ದಿಕರಿಲೇವ್ಣು. ನಾಕತೊ ಯೆಹೋವ ಇವ್ಣುನ ನಾಶ್‌ಕರಿಷ್” ಕರಿಬೋಲ್ಯೊ.
ಇನ ಮೋಶೆ ಯೆಹೋವಾನ, “ಅದ್ಮಿಖ್ಹಾರು ಸೀನಾಯಿ ಪಹಡ್‌ನ ಛ಼ಡಾನ ಕೋಹೊಯ್ನಿ. ಶನಕತೊ ‘ಪಹಾಡ್‌ನ ಅಶ್‌ಪಿಶ್ ವಾಡ್‌ಗಿ ನಖೈನ್ ತಾರಖ್ಹಾಜೆ ಶುದ್‌ಕರ್” ಕರಿ ಹುಕುಮ್‌ ಕರಿರಾಖ್ಯೊಸ್ನಿ ಕರಿ ಬೊಲ್ಯೊ. ಯೆಹೋವ ಮೋಶೆನ, “ತೂ ಉತ್ರಿಜೈ಼ನ್ ಆರೋನ್ನ ತಾರಿ ಜೋ಼ಡ್ಮ ಬುಲೈಲಿನ್ ಉಪ್ಪರ್ ಆವ್ ಕತೋಬಿ ಯಾಜಕರ್‌ಬಿ, ಅದ್ಮಿಖ್ಹಾರುಬಿ ಯೊ ಟಪ್ಪಾನ ಉಲಾಂಗಿನ್ ಯೆಹೋವಕನ ನಾ ಆವ್ಣು. ಉಲಾಂಗಿನ್ ಆಯುತೊ ಮೇ ಇವ್ಣುನ ಒಗ್ಗಿಸ್‌ಮ ನಾಶ್‌ಕರಿಷ್” ಕರಿ ಬೊಲ್ಯೊ. ಅಮ್‌ ಮೋಶೆನೆ ಅದ್ಮಿಕನ ಉತ್ರಿನ್ ಜೈ಼ನ್ ದೇವ್ನಿ ವಾತೇವ್ನ ಇವ್ಣುನ ಖ್ಹಮ್ಜಾ಼ಡ್ಯೊ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.