Waghri Booli Bible
ವಿಮೋ 21
ಗುಲಾಮ್‌ಗಿರಿನಿ ಬಾರೇಮ
(ಧರ್ಮೊ 15:12-18)
ಹಮ್ಕೆ ತೂ ದ್ಯವಾನು ನ್ಯಾವ್ನು ನಿಯಮ್‌ಖ್ಹಾರು ಖಿವುಕತೊ; “ತುಮಾರಮ ಕೋಣ್‌ತೋಬಿ ಇಬ್ರಿಯಾನ ಏಕ್‌ಜ಼ಣಾನ ಗುಲಾಮ್‌ಗಿರಿನ ಖ್ಹಾಜೆ ಲೀಲಿದೂತೊ, ಯೊ ಇಬ್ರಿಯವಾಳೊ ಛೋ಼ ವರಖ್ಹ್ ಗುಲಾಮ್ ಹುಯಿರ‍್ಹಿನ್ ಖ್ಹಾತ್ನ ವರಖ್ಹ್‌ಮ ಶಾತ್ಬಿ ನಾದೇವ್ಣುತೆ ಛುಟ್ಕಾರ್ ಹುಯಿನ್ ಚ಼ಲ್ಯುಜಾ಼ವ್ಣು. ಪರ್ಖ್ಹೊ ಎಕ್ಲೋಸ್ ಐರ‍್ಹೋತೊ ಎಕ್ಕಲಸ್ ನಿಕ್ಳಿಜಾ಼ವ್ಣು. ವ್ಯಹಾಕರಿನ್ ಐರ‍್ಹೋತೊ ಇನಿ ಬಾವಣ್‌ಬಿ ಇನ ಜೋ಼ಡೆ ಜಾ಼ವದೆ. ಇನೊ ಯಜಮಾನ್ ಇನ ಕಾಯ್‌ತೊಬಿ ವ್ಯಾಹ ಕರೈರಾಖ್ಯೊತೊ ಯೊ ಬಾವಣ್‌ಮ ಪರ್ಖ್ಹೊ ನತರ್ ತಯೇಡ ಲಡ್ಕಾ ಹುಯಿರ‍್ಹುತೊ, ಯೊ ಬಾವಣ್‌ಬಿ ಯೊ ಲಡ್ಕಾವ್‌ಬಿ ಯಜಮಾನ್ನಿ ಶೊತ್‌ಹುಯಿರ‍್ಹಿಷೆ. ಗುಲಾಮ್ ಯೊ ಎಕ್ಲೋಸ್ ನಿಕ್ಳಿಜಾ಼ವ್ಣು.” ಕತೋಬಿ ಯೊ ಗುಲಾಮ್, “ಮೆ ಮಾರ ಯಜಮಾನ್ನಬಿ, ಮಾರಿ ಬಾವಣ್ ಲಡ್ಕಾವ್ನ ಪ್ಯಾರ್‌ ಕರುಸ್. ಇನಖ್ಹಾಜೆ ಮೇ ಛುಟ್ಕಾರ್‌ಹುಯಿನ್ ಜಾ಼ವಾನ ಮನ ದಿಲ್‌ಕೊಯ್ನಿ” ಕರಿ ಬೋಲ್ಯುತೊ, ತದೆ ಇನೊ ಯಜಮಾನ್ ದೇವ್‌ಕನ ಇನ ಬುಲೈಲಿನ್ ಐನ್ ದರ್ವಾಜಕನ ಖನ್ನೆ ನತರ್ ಬಾಕಲ್‌ನಿ ಪಟ್ಟಿಕನ ಭಿರಾಖಿನ್ ಇನ ಕಾನ್ನ ಖ್ಹುಯ್‌ಥಿ ಟೋಚಿನ್ ಖ್ಹಣೇದ್ ಕರ‍್ನು. ತದೆ ಯೊ ಹಮೇಶ ಇನ ಗುಲಾಮ್ ಹುಯಿರ‍್ಹಿಷೆ. ಕೋಣ್‌ತೋಬಿ ಛೋ಼ರಿನ ದಾಸಿಕರಿನ್ ವೇಚ್ಯುತೊ, ಗುಲಾಮ್ ಛುಟ್ಕಾರ್‌ಹುಯಿನ್ ಜಾ಼ವನಿ ಪರಕ್ಮ ಯೊ ಛುಟ್ಕಾರ್‌ಹುಯಿನ್ ನಾಜಾ಼ವ್ಣು. ಇನ ಬೋಲಿರಾಖ್ಯುತೆ ಯಜಮಾನ್ನಿ ಜೋ಼ಡ್ಮ ಎಕ್ ವೇಳ್ ಪಸಂದ್ ನಾರ‍್ಹಯುತೊ ಹೈರಿತೆನ ಛೋ಼ಡೈಲಾವನಿತರ ಯೊ ಮೋಕ ಕರಿ ದೇವ್ಣು. ಯೊ ದಿದೋತೆ ವಾತ್ನ ಛು಼ಕ್ಯೊತೆಖ್ಹಾಜೆ ಯೊ ಹೈರಿತೆನ ವೇಚಾ಼ನ ಇನ ಅದಿಕಾರ್‌ಕೊಯ್ನಿ. ಎಕ್ ವೇಳ್ಮ ಯೊ ಇನ ಛಿಯ್ಯಾನ ಇನ ಬೋಲಿರಾಖ್ಯೊತೊ ಛೋ಼ರಿನಿತರ ಯೊ ಹೈರಿತೆನ ಸೋಚಿಲೇವ್ಣು. ಯಜಮಾನ್ ಬಿಜೇಕ್ ಜ಼ಣೀನ ವ್ಯಹಾಹುಯೂತೊ ಪಹಿಲೀನ ಖಾಣು, ಲುಂಗ್ಡು, ಬಾವಣ್ ಬಾವ್ರಿನಿ ಹಕ್‌ಮ ಕಮ್ ನಾಕರ‍್ನು. ಆ ತೀನ್‌ಮ ಖಿವಾನಬಿ ನಾಚ಼ಲಾಯುತೊ ಹೈರಿತೆ ಶಾತ್ಬಿ ನಾದೀನ್ ಛುಟ್ಕಾರ್ ಹುಯಿನ್ ಜ಼ಯೆಜಾ಼ಯ್.
ಖ್ಹತಾಪ್ಣಿವ್‌ನಿ ಬಾರೇಮ ಖಾನುಲ್‌
ಅದ್ಮಿನ ಮಾರಿನ್ ಖೂನ್ ಕರವಾಳನ ಖ್ಹಚೆಂಬಿಬಿ ಮರಣ್ಣಿ ನಿಶತ್‌ಹೋಣು. ಕತೋಬಿ ಖೂನ್ ಕರ‍್ನುಕರಿ ಸೋಚ್‌ಕೊಂತೆ ದೇವ್ನಿ ಖ್ಹೂಜ಼್‍ಥಿ ಯೊ ಖೂನ್ ಚಾ಼ಲಿರ‍್ಹು ಉಷೇತೊ, ಯೊ ಖೂನಿ ಮೆ ನೇಮಕ್‌ ಕರ‍್ಯೊತೆ ಝ಼ಗೋನ ಜಾ಼ವದೆ. ಕತೋಬಿ ಏಕ್‌ಜ಼ಣೊ ಇನ ಭೀಡೆವಾಳನ ಖೂನ್ ಕರಾನಿ ಖ್ಹೂಜ಼್‌ಥೀಸ್ ಇನ ಠಗೈನ್ ಮಾರ‍್ಯುತೊ, ಯೊ ಮರಾನಿಘೋಣಿ ತೂ ಇನ ಚಾ಼ಚ಼ರ್‌ಕಂಥು ಬುಲೈಲಿಜೈ಼ನ್ ಮಾರಿನಾಕ್ಣು. ಕೋಣ್‌ತೋಬಿ ಇನಿ ಆಯಾನ ರ‍್ಹವೊ ಬಾನ ರ‍್ಹವೊ ಮಾರ‍್ಯೊತೊ ಖ್ಹಚೆಂಬಿ ಯೊ ಮರ‍್ನುಸಸ್ ಮರ‍್ನು. ಕೋಣ್‌ತೋಬಿ ಎಕ್ ಅದ್ಮಿನ ಚೋ಼ರಿಕರಿ ಲೀಜೈ಼ನ್ ವೇಚ್ಯೊತೊ ನತರ್ ಯೊ ಧರೈಜಾ಼ವಾನಿ ವಖ್ಹ್‌ತೆ, ಚೋ಼ರಿ ಹುಯ್ಗಯೊಹುಯೊ ಇನಿ ಜೋ಼ಡ್ಮ ರ‍್ಹಿಯೂತೊ ಇನ ಮರಣ್ಣಿ ನಿಶತ್‌ಹೋಣು. ಆಯಾನ ರ‍್ಹವೊ ಬಾನ ರ‍್ಹವೊ ಶಬರ್‌ದ್ಯವಾಳನ ಮರಣ್ಣಿ ನಿಶತ್‌ಹೋಣು. ಬೇಜ಼ಣ ಲಡೈಭೀಡುಕರಾನಿ ವಖ್ಹ್‌ತೆ ಏಕ್‌ಜ಼ಣೊ ಬಿಜೇಕ್‌ಜ಼ಣಾನ ಬಂಡೇಥಿ ರ‍್ಹವೊ, ಮುಕ್ಕೀಥಿರ‍್ಹವೊ ಮಾರ‍್ಯೊತೆಖ್ಹಾಜೆ ಘಾವ್‌ಹುವಾಳೊ ಮರ‍್ಯೊಕೊಂತೆ ಥೋಡು ಹಗಾಮ್ ಛಾ಼ದ್ರಿ ಧರಿನ್, ಇನವಾರ್ ಉಠಿನ್ ಲಠ್ಠೊ ಟೇಕಿನ್ ಚಾ಼ಲುಕರ್ತೊ ಉಷೇತೊ, ಅಥ್ರಾನಿ ವಖ್ಹತ್‌ಮ ಮಾರಹುಯಾನ ನಿಶತ್ ನಾದೇವ್ಣು. ಕತೋಬಿ ಮಾರ್ ಖಾದುಹುಯು ಅದ್ಮಿ ಅಛ್ಛು಼ ಹುವಾಲಗೂಬಿ ಹುವಾನಿ ಖರ್ಚ್‌ನ ಭರಿನ್ ಅಛ್ಛು಼ಕರ‍್ನು. ಏಕ್‌ಜ಼ಣೊ ಇನ ದಾಸನರ‍್ಹವೊ, ದಾಸಿನರ‍್ಹವೊ ಲಠ್ಠೇಥಿ ಮರಿಜಾ಼ವಯೆತ್ರೆ ಮಾರ‍್ಯುತೊ, ಇನ ಬರಬರ‍್ನಿ ನಿಶತ್‌ಹೋಣು. ಯೊ ದಾಸ ತದೇಸ್‌ ನಾ ಮರಿನ್ ಏಕ್‌ಬೇದನ್ ಬಚಿರ‍್ಹಿಯೂತೊ, ಯಜಮಾನ್ನ ನಿಶತ್ ನಾದೇವ್ಣು. ಶನಕತೊ ಯೊ ದಾಸ ಇನು ಶೊತ್‌ಹುಯಿರ‍್ಹೊಸ್. ಪರ್ಖ್ಹಾ ಲಡೈ ಭೀಡಾನಿವಖ್ಹ್‌ತೆ ಬೇಜೂನಿ ತಯೇಡಾನ ಮಾರ್‌ಲಾಗಿನ್ ಇನ ಪೇಟ್‌ಪಡಿಗಯೂತೊ, ಯೊ ಬಾಯ್ಕೊನೊ ಬಾವ್ರಿ ಬೋಲಯೆತ್ರೆ ಅಜು಼ ನ್ಯಾವ್‌ಮ ತೀರ್ಮಾನ್ ಕರಾಯೆತ್ರೆ ದಂಡ್‌ನ ಯೊ ಮಾರ‍್ಯೊಹುಯೊ ಭರ‍್ನು. ಬಿಜು಼ ಶನೂಬಿ ಲುಕ್ಷಾನ್ ಹುಯುತೊ ಜಾನ್ನ ಬದಲ್ ಜಾನ್‌ ದೇವ್ಣು. ಡೋಳಾನ ಡೋಳೊ, ದಾತ್ನ ದಾತ್‌, ಹಾತ್ನ ಹಾತ್, ಗೋಡಾನ ಗೋಡೊ, ದಾಗ್ನ ದಾಗ್, ಘಾವ್ನ ಘಾವ್, ಮಾರ‍್ನ ಮಾರ್, ಅಮ್ನಿ ಪರಕ್ ಹರ್ ನಿಶತ್ ದೇವ್ಣು. ಖಿವೊ ತೋಬಿ ಇನ ಗುಲಾಮ್‌ನ ನತರ್ ದಾಸಿನ ಡೋಳಾನ ಮಾರಿನ್ ಲುಕ್ಷಾನ್ ಕರ‍್ಯುತೊ ಯೊ ಡೋಳಾನ ಬದಲ್ ಇವ್ಣುನ ಯೊ ಛುಟ್ಕಾರ್‌ಕರಿನ್ ಮೋಕಲ್ನು. ಏಕ್‌ಜ಼ಣೊ ದಾಸನ ನತರ್ ದಾಸಿನ ದಾತ್ನ ಜ಼ಂಜ್ರಾಯೊತೊ ಯೊ ದಾತ್ನ ಬದಲ್ ಇವ್ಣುನ ಛುಟ್ಕಾರ್ ಕರಿನ್ ಮೋಕಲ್ನು.
ಯಜಮಾನವ್ನು ಜಿಮೆದಾರಿಖ್ಹಾರು
ಖಿವುತೋಬಿ ಎಕ್ ಢಾಂಡು ಪರ್ಖ್ಹಾನ ರ‍್ಹವೊ, ತಯೇಡಾನ ರ‍್ಹವೊ, ಠೋಖ್ಹಿನ್ ಮಾರ‍್ಯುತೊ ಯೊ ಢಾಂಡಾನ ಬಂಡೊ ಫೇಖಿನ್ ಮಾರ‍್ನುಸಸ್ ಮಾರ‍್ನು. ಇನಿ ಬೋಟಿನ ನಾಖಾವ್ಣು. ಕತೋಬಿ ಯೊ ಢಾಂಡಾನೊ ಯಜಮಾನ್ ದೋಷಿ ಕೊಹುಯಿರ‍್ಹಿಷೆನಿ. ಕತೋಬಿ ಯೊ ಢಾಂಡು ಠೋಖ್ಹವಾಳುಕರಿ ಯಜಮಾನ್ನ ಮಾಲುಮ್ ರ‍್ಹೀನ್‌ಬಿ ಯೊ ಇನ ಭಾಂದ್ಯೊಕೊಂತೆ ಖ್ಹಾಜೆ ಯೊ ಪರ್ಖ್ಹಾನ ರ‍್ಹವೊ, ತಯೇಡಾನ ರ‍್ಹವೊ ಮಾರಿನಾಖ್ಯುತೊ ಯೊ ಢಾಂಡಾನ ಬಂಡೊ ಫೇಕಿನ್ ಮಾರ‍್ನು. ಕಾಹೆತೆ ಇನು ಯಜಮಾನಬಿ ಮರಣ್ಣಿದಂಡನೆನ ಕಾರಣ್ ಉಷೆ. ಕತೋಬಿ ಯೊ ಯಜಮಾನ್ ರಪ್ಯದ್ಯವಾನಿ ತೀರ್ಮಾನ್ ಹುಯೂತೊ ಯೊ ಇನ ಬೋಲೈರ‍್ಹುಸ್ತೆ ರಪ್ಯಾನ ಭರಿನ್ ಇನ ಜಾನ್ನ ಬಚೈ಼ಲಾವದೆ. ಯೊ ಢಾಂಡು ಛೋ಼ಕ್ರಾನ ರ‍್ಹವೊ ನತರ್ ಛೋ಼ಕ್ರಿನ ರ‍್ಹವೊ ಠೋಖ್ಹ್‌ಯುತೊ ಆಸ್ ನ್ಯಾವ್‍ನಿ ಪರಕ್ಮ ಇನ ಯಜಮಾನ್ನ ಹೋಣು. ದಾಸ ರ‍್ಹವೊ ನತರ್ ದಾಸಿನ ರ‍್ಹವೊ ಢಾಂಡು ಠೋಖ್ಹ್‌ಯುತೊ ದಾಸ ನತರ್ ದಾಸಿನ ಯಜಮಾನ್ನ ಡೋಡಿಖ್ಹ್‌ ರೂಪಾನ ಪಾವ್ಲನ ದೇವ್ಣು, ಅಜು಼ ಯೊ ಢಾಂಡಾನ ಬಂಡೊ ಫೇಕಿನ್ ಮಾರ‍್ನು. ಏಕ್‌ಜ಼ಣೊ ಖಾಡ್ ಖೋಂದ್ಯೊತೊ ನತರ್ ಖೋಂದಿನ್ ಇನ ನಾ ಮೂಚಿನ್ ಇನಾಮ ಢಾಂಡು ರ‍್ಹವೊ, ಗಧೇಡೊ ರ‍್ಹವೊ ಯೊ ಖಾಡ್‌ಮ ಪಡಿನ್ ಮರ‍್ಯುತೊ, ಯೊ ಖಾಡ್‌ನ ಖೋಂದಾಯೊ ಹುಯೊ ಹುಯೂತೆ ನಷ್ಟಂನ್ನ ಬರೊಬರ್‌ಥಿ ಪೈಸ ಬದಲ್ ದೇವ್ಣು. ಢಾಂಡಾನ ಯಜಮಾನ್ನ ಹಕ್ಲಾಲ್ ಹುವಾಯೆತ್ರೆ ದಾಮ್ನ ದೇವ್ಣು. ಮರ‍್ಯುತೆ ಢಾಂಡಾನ ಯೋಸ್ ಪಾಡಿಲಿಯೆಜಾ಼ಯ್. ಏಕ್‌ಜ಼ಣಾನೊ ಢಾಂಡೊ ಬಿಜೇಕ್‌ನ ಢಾಂಡಾನ ಠೋಖ್ಹಿನ್ ಮಾರ‍್ಯುತೊ, ಜಿವ್ತುರ‍್ಹವಾಳು ಢಾಂಡಾನ ಪೈಸನ ಏಚಿನ್ ಇನ ದಾಮ್ನ ಭರ‍್ನು. ಮರಸ್ತೆ ಢಾಂಡಾನ ಭೇಜ಼ಣೂಬಿ ಸಮಾಥಿ ವಾಟಪಾಡಿ ಲೇವ್ಣು. ಕತೋಬಿ ಯೊ ಢಾಂಡು ಪಹಿಲೆಥುಬಿ ಠೋಖ್ಹವಾಳುಕರಿ ಇನ ಯಜಮಾನ್ನ ಮಾಲುಮ್ ರ‍್ಹೀನ್‌ಬಿ ಇನ ಭಾಂದ್ಯೊಕೊಂತೆ ಇನಖ್ಹಾಜೆ ಯೊ ಢಾಂಡಾನ ಬದಲ್ ಢಾಂಡಾನ ದೇವ್ಣುಸ್ ದೇವ್ಣು. ಕತೋಬಿ ಮರ‍್ಯುತೆ ಢಾಂಡಾನ ಯೋಸ್ ಪಾಡಿಲಿಯೆಜಾ಼ಯ್.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.