Waghri Booli Bible
ವಿಮೋ 15
ಮೋಶೆನು ಗೀದ್‌
ತದೆ ಮೋಶೆಬಿ, ಇಸ್ರಾಯೇಲ್‌ವಾಳುಬಿ ಯೆಹೋವನ ಸ್ತುತಿಕರಾನ ಖ್ಹಾಜೆ ಆ ಗೀದ್‌ನ ಬೋಲ್ಯು “ಯೆಹೋವನ ಧನ್ಯವಾದ್‌ ಕರಾನು ಗೀದ್‌ ಬೋಲಿಯೆ; ಯೊ ಮಹಾನ್ ಜಯ್‍ಕಾರ್ ಲಿದೊಹುಯೊ. ಘೋಡಾವ್‌ಖ್ಹಾರನ ಅಜು಼ ಹತ್ತಿ ಚ಼ಲಾವವಾಳನ ದರ‍್ಯಾವ್‌ಮ ಖಂಕ್‌ರೈನ್ ನಾಶ್ ಕರಿರಾಖ್ಯೊಸ್. ಮಾರಿ ತಾಖತ್‌ಬಿ ಗೀದ್‌ಬಿ ಯೆಹೋವಾಸ್, ಇನೇಥಿ ಮನ ರಕ್ಷಣೆ ಮಳ್ಯು. ಅಪ್ಣೊ ದೇವ್ ಯೋಸ್. ಇನ ಸ್ತುತಿ ಕರುಸ್, ಯೋಸ್ ಮಾರೊ ಬಾನೊ ದೇವ್ , ಇನಿ ಮರ‍್ಯಾದಿನಖ್ಹಾಜೆ ಸ್ತುತಿ ಕರೇಸ್. ಯೆಹೋವ ಜಂಗ್‌ನೊ ವೀರ್” ಯೆಹೋವಕರಿ ಬೋಲಾನು ಇನು ನಾಮ್ ಹುಯಿರ‍್ಹುಸ್. “ಯೊ ಫರೋಹನ ರಥ್‌ಖ್ಹಾರನಬಿ, ಶಿಪಾಯ್‌ಖ್ಹಾರನಾಬಿ ದರ‍್ಯಾವ್‌ಮ ಖಂಕ್‌ರೈನಾಖ್ಯೊ. ಫರೋಹನ ಮಹಾನ್ ವೀರರ್‌ನ ಲಾಲ್ ದರ‍್ಯಾವ್‌ಮ ಡುಬೈನಾಖ್ಯೊ. ಗಧಾರ್‌ನೊ ದರ‍್ಯಾವ್ ಇವ್ಣುನ ಮೂಚಿನಾಖ್ಯು”. ಇವ್ಣೆ ಬಂಡಾನಿತರ ದರ‍್ಯಾವ್ನು ಅಂತ್‌ಮ ಮಳಿಗು. “ಯೆಹೋವ ದೇವ್, ತಾರೊ ಖಾವ ಹಾತ್ಮನಿ ಶಕತ್ ಕೆತ್ರೆಕ್ಕಿ ಮಹಾನ್ ಹುಯಿರ‍್ಹುಸ್. ಯೆಹೋವ ದೇವ್, ತಾರೊ ಖಾವೊ ಹಾತ್ ವಹೇರ‍್ಯಾನ ಪುಡಿ-ಪುಡಿ ಕರಿನಾಖಸ್”. ತೂ ಜಾ಼ಖ್ಹತ್ ಊಚೊ಼ ಹುಯಿನ್ ತಾರ ಖ್ಹಾಮೆ ಭೀರಾವವಾಳನ ಖಂಕ್‌ರೈರಾಖ್ಯೊಸ್, ತಾರು ಇರಾದನಿ ಆಗ್ ನಿಕ್ಳಿನ್ ಇವ್ಣುನ ಖ್ಹುಕೈರ‍್ಹವಾನ ಘಾಖ್ಹ್‌ನಿತರ ಬಾಳಿನ್ ರಾಕ್ ಕರಿರಾಖ್ಯುಸ್. ತಾರ ನಾಕೋಳಿನ ದಮ್‌ಥಿ ದರ‍್ಯಾವ್ನು ಪಾಣಿ ಎಕ್ಟುಹುಯು; ವ್ಹೆಕ್‌ಳೊ ಭೀತ್‌ನಿ ಘೋಣಿ ಭೀರಿಗಯು; ದರ‍್ಯಾವ್ನ ಗಧಾರ‍್ನ ಮಹಿನು ಪಾಣಿ ಘಟ್‌ಹುಯ್ಗು. ವಹೇರ‍್ಯು, ‘ಮೇ ಅವ್ಣ ಪೀಠೆ ಜೈ಼ನ್ ಧರಿಲಿಶ್. ಇವ್ಣ ಶೊತ್‌ನ ಛಿನೈನ್ ವಾಟಪಾಡಿಲಿಶ್‌; ಇವ್ಣಾಮ ಹಮಾರಿ ಹರಖ್ಹ್‌ನ ತೋಡಿಲಿಶು. ಮೇ ತಲ್ವಾರ್‌ನ ಧರಿನ್; ಶಕಥ್ಥಿ ಇವ್ಣುನ ಸಂಹಾರ್ ಕರಿಶ್ ಕರಿ’ ಬೋಲಿನ್ ವಾತೆ ಬೋಲಿ ಲೆವ್‌ಕರ್ತುಥು. ಕತೋಬಿ ತೂ ವಹಿರಾನ ಫೂಕಾಖ್ಹತರ್, ದರ‍್ಯಾವ್ ಇವ್ಣುನ ಮೂಚಿನಾಖ್ಯು; ಇವ್ಣೆ ಮೋಟ ದರ‍್ಯಾವ್ನ ಮಹಿ ಶೀಸ್‌ನು ಚಂಡಾನಿತರ ಡುಬಿಗಯು. ಯೆಹೋವ ದೇವ್ ಖ್ಹಾರಾಮ ತುನ ಸಮಾನ್ ಕೋಣ್? ತಾರಿನಿಘೋಣಿ ಅದ್ಬುತ್‌ಬಿ ಪರಿಶುದ್‌ಮ ಊಚೊ಼ ಹುಯಿರೋತೆ ಕೋಣ್? ತಾರಿನಿಘೋಣಿ ವೀರ್‌ವ್ಹೆತಾಳಿಬಿ ಅದ್ಬುತ್‌ಬಿ ಮಹಾನ್ ಕಾಮ್‌ನ ಚ಼ಲಾವವಾಳೊ ಹುಯಿರ‍್ಹೋತೆ ತುನ ಸಮಾನ್ ಕೋಣ್ ಛಾ಼? ತೂ ತಾರ ಖಾವ ಹಾತ್ನ ಪಾಡಖ್ಹತರ್, ಜ಼ಮೀನ್ ಮ್ಹೋಡು ಮ್ಹೇಲಿನ್ ವಹೇರ‍್ಯಾವ್ನ ಗಳಿಲಿದೂನಿ. ತಾರು ಒಪ್ಪಂದಾನು ಪ್ಯಾರ್‌ಮ ತೂ ತಾರ ಲೋಕ್ನ ಛುಟ್ಕಾರ್ ಕರಿರಾಖ್ಯೊಸ್. ತಾರು ಶಕಥ್ಥಿ ಇವ್ಣುನ ತೂ ಜಿವ್ಣುಕರಾನ ಪರಿಶುದ್ ಘರ್‌ಮ ಚ಼ಲೈರಾಖ್ಯೊಸ್. ಜ಼ಗ್‌ಜಾ಼ತ್‌ಖ್ಹಾರು ಅನ ಖ್ಹಮ್‌ಜಿನ್ ಕಾಪ್‌ಶೆ. ಫಿಲಿಷ್ಟಿಯಮ ಜಿವ್ಣು ಕರಾವಳು ಡರ್‌ಥಿ ಭರೈಜಾ಼ಶೆ. ಎದೋಮ್ಯವಾಳನು ಗಲ್‌ಢಖ್ಹಾರು ಡರಿಜಾಷೆ; ಮೋವಾಬ್ಯವಾಳನು ಶಿಪಾಯ್‌ಖ್ಹಾರು ಕಾಪ್ಷೆ; ಕಾನಾನ್‌ವಾಳು ಹಿಮ್ಮತ್‌ ಕಾಡಿಲಿಷೆ. ಡರ್‌ಬಿ, ಝ಼ಪಕ್ಣೀಬಿ ಇವ್ಣುನ ಉಷೆ. ತಾರಿ ಭುಜ಼್‌ನಿ ತಾಖತ್‌ನಿ ಶಕಥ್ಥಿ ಇವ್ಣೆ ಬಂಡಾನಿತರ ಠರ್ಕಿಜಾ಼ಷೆ. ಎತ್ರಾಮ ಯೆಹೋವ, ತೂ ಬಚಾ಼ಡ್ಯೊತೆ ತಾರು ಅದ್ಮಿಖ್ಹಾರು ಉಲಾಂಗಿ ಜೈ಼ನ್ ದೇಖ್ಹ್‌ಮ ಮಳ್‌ಷೆ. ತೂ ಇವ್ಣುನ ತಾರು ಶೊಂತ್ ದೇಖ್ಹ್‌ ಹುಯಿರ‍್ಹುತೆ ಪಹಾಡ್‌ನ ಮುಲಕ್‌ಮ ಲೈನ್‌ ತಾಖತ್‌ಕರೀಷ್, ಯೆಹೋವ, ತೂ ತಾರು ಶೊಂತ್ ಘರ್‌ನಖ್ಹಾಜೆ ಚೂ಼ಣಿರಾಖ್ಯೊತೆ ಝ಼ಗೊ ಲಗೂಬಿ ಪ್ರಭು, ತೂ ತಾರಖ್ಹಾಜೆ ತಯಾರ್ ಕರಿರಾಖ್ಯೊತೆ ಪವಿತ್ರ ಪರ್ಭತ್‌ಲಗೂಬಿ ಇವ್ಣುನ ಬುಲೈಲೀನ್ ಅಯಿಶ್. ಯೆಹೋವ ಜ಼ಗ್‌ಜ಼಼ಗ್‌ಮಾಬಿ ರಾಜ಼ಹುಯಿನ್ ಚ಼ಲಾವವಾಳೊ.”
ಮಿರ್ಯಾಮನು ಗೀದ್‌
ಫರೋಹಾನು ಘೋಡಾವ್‌ಖ್ಹಾರು, ರಥ್‌ಖ್ಹಾರುಬಿ, ಹತ್ತಿ ಚ಼ಲಾವವಾಳುಬಿ ದರ‍್ಯಾವ್ನ ಮಹಿ ಆವಖ್ಹತರ್ ಯೆಹೋವ ದರ‍್ಯಾವ್ನ ಪಾಣಿನ ಇವ್ಣಪರ್ ಪಾಛೊ಼ ಲೀಅಯಿನ್ ಡುಬೈನಾಖ್ಯೊ. ಕತೋಬಿ ಇಸ್ರಾಯೇಲ್‌ವಾಳುತೋಬಿ ದರ‍್ಯಾವ್ನು ಇಚ಼್‌ಮಾನು ಖ್ಹುಕ್ಕಿ ಜ಼ಮಿನ್‌ಪರ್ ಉಲಾಂಗಿ ಗಯು. ತದೆ ಪ್ರವಾದಿನಿ ಹುಯಿರ‍್ಹಿಥೀತೆ ಆರೋನನಿ ಭೇನ್ ಮಿರ್ಯಾಮ ಹಾತ್ಮ ದಮ್‌ಡಿ ಪಾಡಿಲಿದಿ. ತಯೇಡಖ್ಹಾರುಬಿ ಹಾತ್ಮ ದಮ್‌ಡಿ ಧರಿನ್ ಖೇಲ್‌ತಿ ಹುಯಿನ್ ಯೊ ಹೈರಿತೆನ ಪೀಛೆ ಗಯು. ಮಿರ್ಯಾಮ ಇವ್ಣುನ ಅಮ್ ಗೀದ್‌ ಬೋಲಿ “ಯೆಹೋವನ ಗೀದ್‌ ಬೋಲೊ. ಯೊ ಮಹಾ ಊಚೊ಼ ಹುಯಿರ‍್ಹಾವಳೊ ದೇವ್ ಹುಯಿರ‍್ಹೊಸ್. ಘೋಡಾವ್‌ನಬಿ, ಹತ್ತಿ ಚ಼ಲಾವವಾಳನಬಿ ದರ‍್ಯಾವ್‌ಮ ಡುಬೈನ್ ನಾಶ್‌ಕರ‍್ಯೊ.”
ಕಡು ಪಾಣಿ
ಬಾದ್ಮ ಮೋಶೆನೆ ಇಸ್ರಾಯೇಲ್‌ವಾಳನ ಲಾಲ್ ದರ‍್ಯಾವ್‌ಮಾಕರಿ ಚ಼ಲಾಯೊ. ಇವ್ಣೆ ಶೂರ್ ಜ಼ಂಗಳ್‌ಮ ತೀನ್ ದನ್ ಪಾಣಿಸ್ ಕೊಂತೆ ಚ಼ಲಾಯು. ಇನಕೇಡೆಥು ಇವ್ಣೆ ಮಾರಾ ಕರಿ ಝ಼ಗೋಕನ ಆಯು. ಕತೋಬಿ ಯೊ ಝ಼ಗೋನು ಪಾಣಿ ಕಡುಥೂತೆಖ್ಹಾಜೆ ಇವ್ಣುನ ಇನ ಪಿಯಾನ ಕೊಹುಯುನಿ. ಇನಖ್ಹಾಜೇಸ್ ಯೊ ಝ಼ಗೋನ ಮಾರಾ ಕರಿ ನಾಮ್ ಪಡ್ಯು. ಅದ್ಮಿಖ್ಹಾರು ಮೋಶೆನ, “ಹಮೆ ಶಾತ್ ಪೀಣು?” ಕರಿ ಇನ ವಿರೋದ್‌ಥಿ ಭಣ್‌ಕ್ಯು. ಮೋಶೆ ಯೆಹೋವನ ಪ್ರಾರ್ಥನೆ ಕರ‍್ಯೊ. ತದೆ ಯೆಹೋವನೆ ಇನ ಎಕ್ ಝಾ಼ಡಾನ ವತಾಳ್ಯೊ. ಇನೆ ಯೊ ಪಾಣಿಮ ನಾಖಖ್ಹತರ್, ಪಾಣಿ ಮಿಠ್ಠುಹುಯಿಗು. ಹಿಜ್ಜಾ಼ ಯೆಹೋವನೆ ಇಸ್ರಾಯೇಲ್‌ವಾಳನ ಖ್ಹಾಜೆ ಎಕ್ ನಿಯಮ್ ಕರಿನ್ ಇವ್ಣುನ ತರೀಪ್ಷಕರ‍್ಯೊ. ಯೆಹೋವನೆ ಇವ್ಣುನ, “ತುಮೆ ತುಮಾರ ದೇವ್‌ಹುಯಿರೋತೆ ಯೆಹೋವನಿ ವಾತ್ನ ಧ್ಯಾನ್‌ಥಿ ಖ್ಹಮ್‌ಜಿನ್, ಇನಿ ನಜ಼ರ್‌ಮ ಬರೋಬರ್ ರ‍್ಹವಾನು ಕರಿನ್, ಇನಿ ಹುಕುಮ್‌ನ ಹೇಟುಹುಯಿನ್, ಇನ ಮಾರಗ್‌ಪರ್ ಚಾ಼ಲ್ಯೊತೊ, ಮೆ ಈಜಿಪ್ಟ್‌ವಾಳನ ಉಬ್‌ಜಾ಼ಯೊತೆ ರೋಗ್‌ಮ ಏಕ್‌ಬಿ ತುಮುನ ಕೋಆವದಿಶ್‌ನಿ. ಯೆಹೋವಕರಿ ಮೇಸ್ ತುಮುನ ಅಛ್ಛು಼ ಕರವಾಳೊಬಿ, ತುಮುನ ಗುಣ್‌ಕರವಾಳೊಬಿ ಹುಯಿರ‍್ಹೊಸ್” ಕರಿ ಬೊಲ್ಯೊ. ಇನವಾರ್ ಇವ್ಣೆ ಏಲೀಮ್‌ನ ಆಯು. ಹಿಜ್ಜಾ಼ ಭಾರ ಪಾಣಿನು ಚೇಜ಼್‌ಬಾರೋಬಿ, ಖ್ಹಡ್‌ತೀನಿಖ್ಹ್ ಖಜೂ಼ರ್‌ನು ಝಾ಼ಡುಬಿ ಥೂ. ಯೊ ಪಾಣಿನ ಖನ್ನೆಸ್‌ ಇವ್ಣೆ ರಹಿಗ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.