Waghri Booli Bible
ವಿಮೋ 16
ದೇವ್ನೆ ಗೇರ್‌ಜು ಅಜು಼ ಮನ್ನಾನ ದಿದೋತೆ
ಇಸ್ರಾಯೇಲ್‌ವಾಳನು ಟೋಳ್‌ಕೊ ಖ್ಹಾರು ಏಲೀಮ್‌ಥು ಚಾ಼ಲಿನ್ ಇವ್ಣೆ ಈಜಿಪ್ಟ್ ದೇಖ್ಹ್‌ಥು ನಿಕ್‌ಳ್ಯುತೆ ಬೇನ ಮಹಿನಾನು ಪಂಧ್ರಾನ ದನ್ಮ ಎಲೀಮಿನಾಬಿ ಸೀನಾಯಿ ಪಹಾಡ್‌ನಾಬಿ ಬೀಚ್ಮಛಾ಼ತೆ ಸೀನ್ ಕರಿ ಜ಼ಂಗಳ್‌ಮ ಆಯ. ತದೆ ಇಸ್ರಾಯೇಲ್‌ನು ಟೋಳ್ಕೊಖ್ಹಾರು ಜ಼ಂಗಳ್‌ಮ ಮೋಶೆ ಅಜು಼ ಆರೋನ್‌ಯಿವ್ಣಪರ್ ಭಣ್‌ಕಾಲಗ್ಯು. ಇಸ್ರಾಯೇಲ್‌ವಾಳು ಮೋಶೆ ಅಜು಼ ಆರೋನ್ನ, “ಆ ಟೋಳ್‌ ಅಖ್ಖಾಸ್ನ ಭುಕ್ಯು ಮಾರ‍್ನುಕರಿ ತುಮೆ ಹಮುನ ಆ ಜ಼ಂಗಳ್‌ಮ ಬುಲೈಲೀನ್ ಐರ‍್ಹಾಸ್. ಹಮೆ ಈಜಿಪ್ಟ್ ದೇಖ್ಹ್‌ಮ ರ‍್ಹವಾನಿವಖ್ಹ್‌ತೆ ಬೋಟಿನ ಹಂಡ್ಕಕನಾಸ್ ಬೇಖ್ಹಿನ್ ಪೇಟ್‌ಭರಿನ್ ರೋಟಾನ ಖಾವನಿ ವಖ್ಹ್‌ತೆ ಯೆಹೋವನ ಹಾಥ್ಥಿ ಮರಿಗಯಹೊತ್ತೊ ಕೆತ್ರೆಕ್ಕಿ ಅಛ್ಛು಼ಥು” ಕರಿ ಬೋಲ್ಯು. ತದೆ ಯೆಹೋವ ಮೋಶೆನ, “ಮೇ ಆಬ್‌ಥು ತುಮಾರಖ್ಹಾಜೆ ಖಾಣಾನ ರಂಚು಼ಸ್. ಅದ್ಮಿಖ್ಹಾರು ಹರೇಕ್ ದನ್‌ಬಿ ಭಾರ್‌ಜೈ಼ನ್ ಯೊ ದನ್ಮಾ ಹೋಣುತೆ ಎತ್ರಾನ ಖಲಿ ಎಕ್ಟುಕರಿಲೇವ್ಣು. ಅನೇಥಿ ಇವ್ಣೆ ಮಾರಿ ನಿಯಮ್ನ ಪಾಡಿಚಾ಼ಲಸ್ಕಿ ಶು ಕೊಯ್ನಿಕಿ ಕರಿ ತರೀಪ್ಷಾಕರುಸ್. ಛೋ಼ನ ದನ್ಮ ಖಲಿ ಇವ್ಣೆ ಲೀನ್ ಆಯುತೆಯಿನ ತಯಾರ್ ಕರಾನಿವಖ್ಹ್‌ತೆ ಯೊ ಹರೇಕ್ ದನ್ಮ ಎಕ್ಟುಕರಿರಾಖಥಿಬಿ ಬೇಪಟ್‌ಹುಯಿರ‍್ಹಿಷೆ” ಕರಿ ಬೊಲ್ಯೊ. ಮೋಶೆ ಅಜು಼ ಆರೋನಯಿವ್ಣೆ ಇಸ್ರಾಯೇಲ್‌ವಾಳನ, “ತುಮುನ ಈಜಿಪ್ಟ್‌ಮಾಥು ಬುಲೈಲಿನ್ ಆಯೊತೆ ಯೆಹೋವಾಸ್ ಕರಿಬೋಲಾನು ಹಮ್ಕೆ ಖ್ಹಾಂಜ಼್‌ಮ ತುಮುನ ಮಾಲುಮ್‌ ಪಡ್‌ಶೆ. ವ್ಹಾಣ್‌ಖ್ಹತ್ರೆಮ ಯೆಹೋವನು ಮಹಿಮೆ ತುಮುನ ದೆಖಾವ್‌ಷೆ, ಶನಕತೊ ತುಮೆ ಯೆಹೋವನ ವಿರೋದ್‌ಥಿ ಭಣ್‌ಕ್ಯಥಾತೆಯಿನ ಯೊ ಖ್ಹಮ್‍ಜಿರಾಖ್ಯೊಸ್. ಹಮಾರಪರ್ ತುಮೆ ಭಣ್‌ಕಾನು ಶಾತ್? ಹಮೆ ಕೆತ್ರಾಖ್ಹ?” ಕರಿ ಬೋಲ್ಯು. ತದೆ ಮೋಶೆ, “ಯೆಹೋವ ಖ್ಹಾಂಜ಼್‌ನಿ ವಖ್ಹತ್‌ಮ ತುಮುನ ಬೋಟಿನಾಬಿ, ವ್ಹಾಣಾನು ಹೋಣುತೆಯೆತ್ರು ರೋಟಾನಬಿ ದಿಶೆ. ತುಮಾರಿ ಭಣ್‌ಕಾರ್ ಯೆಹೋವನ ಖ್ಹಮಜ಼್ ಪಡ್ಯು. ಮೇ ಅಜು಼ ಆರೋನ ಕೆತ್ರಾಖ್ಹವಾಳ? ತುಮಾರಿ ಭಣ್‌ಕಾರ್ ಯೆಹೋವನು ವಿರೋದಸ್ ಪಣ್ಕಿ ಹಮಾರಿ ವಿರೋದ್‌ಕಾಹೆ” ಕರಿ ಬೊಲ್ಯೊ. ಮೋಶೆನೆ ಆರೋನ್ನ, “ತೂ ಇಸ್ರಾಯೇಲ್‌ವಾಳನು ಟೋಳ್‌ಕಾನ ಜೈ಼ನ್ ಇವ್ಣುನ, ‘ಯೆಹೋವ ತುಮಾರಿ ಭಣ್‌ಕಾರ್‌ನ ಖ್ಹಮ್‍ಜಿರಾಖ್ಯೊಸ್. ಇನಖ್ಹಾಜೆ ತುಮೆಖ್ಹಾರುಬಿ ಇನ ಖ್ಹಾಮ್ಣೆ ಎಕ್ಟುಮಳಿನ್ ಆವ್ಣುಕರಿ ಹುಕುಮ್‌ಕರ್” ಕರಿ ಬೊಲ್ಯೊ. ಆರೋನ ಇಸ್ರಾಯೇಲ್‌ವಾಳನ ಟೋಳ್‌ನ ಆ ವಾತೆ ಖ್ಹಮ್‌ಜಾ಼ಡುಕರಾನಿ ವಖ್ಹ್‌ತೆ, ಇವ್ಣೆ ಜ಼ಂಗಳ್ ಭಣಿ ದೇಖಾನಿ ವಖ್ಹ್‌ತೆ, ವಾದ್ಳಾಮ ಯೆಹೋವನಿ ಉಜಾ಼ಖ್ಹ್‌ ಇವ್ಣುನ ದೆಖಾಯು. ಯೆಹೋವಾನೆ ಮೋಶೆನ ಜೋ಼ಡ್ಮ ವಾತೆಬೊಲ್ತೊಹುಯಿನ್ ಅಮ್ ಬೊಲ್ಯೊ: “ಇಸ್ರಾಯೇಲ್‌ವಾಳನು ಭಣ್‌ಕಾರ್ ಮನ ಖ್ಹಮಜ್‌ಪಡ್ಯು. ತೂ ಇವ್ಣುನ, ‘ತೂ ಖ್ಹಾಂಜ಼್‌ಮ ಬೋಟಿನಾಬಿ, ವ್ಹಾಣಾನು ಹೋಣುತೆಯೆತ್ರು ರೋಟಾನಬಿ ಖಾಷು. ಅನೇಥಿ ಮೇ ತುಮಾರೊ ದೇವ್ ಹುಯಿರ‍್ಹೋತೆ ಯೆಹೋವ ಕರಿ ತುಮುನ ಮಾಲುಮ್‌ಪಡ್‌ಷೆಕರಿ ಬೋಲ್ನು” ಕರಿ ಬೊಲ್ಯೊ. ಖ್ಹಾಂಜ಼್ ಹುವಾಖ್ಹತರ್ ಗೇರ್‌ಜುಖ್ಹಾರು ಐನ್ ಇವ್ಣ ಇಟಾರಮ ಭರೈಗು. ಆ ನಾಹುಯಿನ್ ವ್ಹಾಣೆವೇಳಿಮ ಬರಪ್ ಇಟಾರನ ಅಶ್‌ಪಿಶ್ ಪಡ್ಯುಥು. ಯೊ ಬರಪ್ ಪಿಗ್ಳಿಜಾ಼ವಾನ ಪಾರ್ ಜ಼ಂಗಳ್‌ನಿ ಜ಼ಮಿನ್‌ಪರ್ ಬರಪ್‌ನ ಬೂಂದನಿತ್ರ ಶಾತ್ಕಿ ನ್ಹಾನುನ್ಹಾನು ರವೆಖ್ಹಾರು ದೆಖಾಯು. ಇಸ್ರಾಯೇಲ್‌ವಾಳು ಇನ ದೇಖಿನ್ ಏಕ್‌ಥಿ ಎಕ್, “ಶಾತ್ ರ‍್ಹೇವ್ಣು?” ಕರಿ ಬೋಲಿಲಿದು. ಯೊ ಶಾತ್‌ಕರಿ ಇವ್ಣುನ ಮಾಲುಮ್‌ಕೋಪಡ್ಯುನಿ. ಮೋಶೆ ಇವ್ಣುನ, “ಆ ಹೈರುತೆ ಯೆಹೋವನೆ ತುಮಾರಖ್ಹಾಜೆ ಖಾವನ ದಿರಾಖ್ಯೊಸ್ತೆ ರೋಟೊ ಹುಯಿರ‍್ಹುಸ್. ಯೆಹೋವ ಅನಿ ಬಾರೇಮ ಶಾತ್ ಹುಕುಮ್ ದಿದೊಕತೊ: ತಮಾಮ್‌ಜ಼ಣು ಇವ್ಣ ಕುಟುಂಬ್‌ನಿ ಗಣ್ತಿನಿ ಪರಕ್ಮ ಎಕ್ ಜ಼ಣಾನ ತೀನ್ ಶೇರ್‌ನಿತರ ಇವ್ಣ ಡೇರಾಮ ರ‍್ಹವಾಳನಖ್ಹಾಜೆ ಎಕ್ಟುಕರಿಲ್ಯವಾದೆ. ಹರೇಕ್‌ಜ಼ಣು ಯೊ ಕೆತ್ರು ಖಾಸ್ಕಿ ಇನಿ ಪರಕ್ಮಾಸ್ ತುಮೆ ಜ಼ಮಕರಿಲೆವೊ” ಕರಿ ಬೊಲ್ಯೊ.
ಇಸ್ರಾಯೇಲ್‌ವಾಳು ಇಮ್ಮಸ್ ಕರ‍್ಯು. ಥೋಡುಜ಼ಣು ಜಾ಼ಖ್ಹತ್, ಥೋಡುಜ಼ಣು ಕಮ್ ಜ಼ಮಕರ‍್ಯು. ಇವ್ಣೆ ಇನ ಶೇರ್‌ಥಿ ಆಳ್ತಿಕರ‍್ಯು. ಘಣು ಜ಼ಮಕರಾವಳನ ಶಾತ್ಬಿ ಜಾ಼ಖ್ಹತ್ ಕೊಹುಯುನಿ, ಥೋಡು ಜ಼ಮಕರಾವಳನ ಶಾತ್ಬಿ ಕಮ್‍ಕೋಹುಯುನಿ. ಹರೇಕ್‌ಜ಼ಣು ಇವ್ಣ ಖಾಣಾನ ಬರೋಬರ್‌ ಹುವಾಯೆತ್ರೆ ಜ಼ಮ ಕರಿಲಿದು. ಆ ನಾಹುಯಿನ್ ಮೋಶೆ ಇವ್ಣುನ, “ಅನ ಕೋಣ್‌ಬಿ ಕಾಲ್ಲಗು ನಾ ಮ್ಹೇಲಿರಾಕ್ಣು” ಕರಿ ಬೊಲ್ಯೊ. ರ‍್ಹೀನ್‌ಬಿ ಇವ್ಣೆ ಮೋಶೆನಿ ವಾತ್ನ ಖ್ಹಮ್‌ಜುಕೊಂತೆ, ಇನಾಮ ದರಾಖ್ಹು ಬಿಜೇಕ್ ದನ್‌ಲಗು ರಾಖಿಮ್ಹೇಲಖ್ಹತರ್ ಯೊ ಕೀಡಾ ಪಡಿನ್ ಖ್ಹಡಿವಾ಼ಧರಿನ್ ಖರಾಬ್ ಹುಯಿಗು. ಇನ ಮೋಶೆನೆ ಇವ್ಣಪರ್ ಖಿಜಾ಼ಯೊ. ಅದ್ಮಿಖ್ಹಾರು ದನ್‌ರೋಜ಼್ ವ್ಹಾಣೆವೇಳಿಮ ಇವ್ಣ ಖಾವನ ಹೋಣುತೆಯೆತ್ರು ಜ಼ಮಕರಿಲಿದು. ತಡ್‌ಕೊ ಜಾ಼ಖ್ಹತ್ ಹುವಾನಿವಖ್ಹ್‌ತೆ ಯೊ ಪಿಗ್ಳಿಜಾ಼ತುಥು. ಛೋ಼ನೆ ದನ್ ಬೇಪಟ್ ಖಾಣು, ಕತೊ ಏಕ್‌ಏಕ್‌ಜ಼ಣಾನ ಬೆಬ್ಬೆ ಶೇರ್‌ನಿತರ ಛ಼ಟೈನ್ ಭರಿರಾಖ್ಯುಥುತೆ ಇನಖ್ಹಾಜೆ ಟೋಳ್‌ನು ಅದಿಕಾರಿಖ್ಹಾರು ಮೋಶೆಕನ ಅಯಿನ್ ಆ ವಾತೇವ್ನ ಖ್ಹಮ್‌ಜಾ಼ಡ್ಯು. ಇನ ಇನೆ, “ಆ ಹೈರುತೆ ಯೆಹೋವಾನೆ ಬೋಲ್ಯೊತೆ ವಾತ್, ‘ಕಾಲೆ ಯೆಹೋವನ ಅರಾಮ್‌ನೊ ಪರಿಶುದ್ ಸಬ್ಬತ್‌ನೊ ದನ್‌ಹುಯಿರ‍್ಹೊಸ್. ಆಜ಼ಸ್ ಭುಂಜ್ನು಼ತೆಯಿನ ಭುಂಜಿನ್, ರ‍್ಹಾಂದ್‌ಣುತೆಯಿನ ರ‍್ಹಾಂದೊ. ಅನಾಮ ಉಭ್‌ರ‍್ಹಾಸ್ತೆಯಿನ ಕಾಲ್ಲಗು ರಾಖಿಮ್ಹೇಲೊ” ಕರಿ ಬೊಲ್ಯೊ. ಮೋಶೆ ಹುಕುಮ್ ಕರ‍್ಯೊತೆ ಇಮ್ಮಸ್ ಇವ್ಣೆ ಬಿಜೇಕ್ ದನ್‌ಲಗು ಇನ ರಾಖಿಲಿದು. ಕತೋಬಿ ಯೊ ಖ್ಹಡಿರ‍್ಹೂಥು ಕೊಯ್ನಿ, ಕೀಡೊ ಪಡ್ಯೊಬಿ ಕೊಯ್ನಿ. ತದೆ ಮೋಶೆನೆ ಇವ್ಣುನ, “ಆ ವಖ್ಹತ್ ಅನ ಖಾವೊ. ಆ ದನ್ ಯೆಹೋವನೊ ಸಬ್ಬತ್ ದನ್‌ಹುಯಿರ‍್ಹೊಸ್ತೆ ಖ್ಹಾಜೆ ಆ ದನ್ ಯೊ ಖೇತರ್‌ಮ ದೆಖಾವಕೊಯ್ನಿ. ಛೋ಼ ದನ್ ಇನ ಜ಼ಮಕರಿನ್ ಮ್ಹೇಲ್ನು. ಖ್ಹಾತ್‌ನೊ ದನ್ ಸಬ್ಬತ್ ದನ್‌ಹುಯಿರ‍್ಹೊಸ್ತೆ ಖ್ಹಾಜೆ ಯೊ ಮಳ್‌ಷೆ ಕೊಯ್ನಿ” ಕರಿ ಬೊಲ್ಯೊ. ಇಮ್ಮಸ್ ಹುಯು. ಅದ್ಮಿಮ ಥೋಡುಜ಼ಣು ಖ್ಹಾತ್‌ನ ದನ್ಮ ಇನ ಚೂ಼ಣಾನ ಜಾ಼ವಾಮ ಇವ್ಣುನ ಶಾತ್ಬಿ ಮಳ್ಯುಕೊಯ್ನಿ. ತದೆ ಯೆಹೋವನೆ ಮೋಶೆನ, “ತುಮೆ ಕಿಜ್ಜಾ಼ಲಗು ಮಾರಿ ಹುಕುಮ್‌ನಾಬಿ, ಮೇ ಕರಿರಾಖ್ಯೊತೆ ನಿಯಮ್‌ನಾಬಿ ಪಾಡಿಚಾ಼ಲ್‌ಶು ಕೊಂತೆ ಝಿಟ್ಕಾರ್‌ಶು? ದೇಖೊ, ಯೆಹೋವನೆ ತುಮುನ ಸಬ್ಬತ್ ದನ್ನಾ ಚ಼ಲಾವ್ಣುಕರಿ ಹುಕುಮ್ ದಿರಾಖ್ಯೊಸ್ತೆ ಖ್ಹಾಜೆಸ್ ಛೋ಼ನ ದನ್ಮ ಬೇ ದನ್ನು ಖಾಣು ತುಮುನ ಮಳಾನಿತ್ರ ಕರಿರಾಖ್ಯೊಸ್. ತುಮಾರಮ ತಮಾಮ್‌ ಜ಼ಣೋಬಿ ಯೊ ರ‍್ಹಾವನಿ ಝ಼ಗೋಮ ರ‍್ಹೇವ್ಣು. ಖ್ಹಾತ್‌ನ ದನ್ಮ ಏಕ್‌ಜ಼ಣೊಬಿ ಇನಿ ಝ಼ಗೋನ ಮ್ಹೇಲಿನ್ ಭಾರ್‌ ನಾಜಾ಼ವ್ಣು” ಕರಿ ಬೊಲ್ಯೊ. ಇನಖ್ಹಾಜೇಥಿ ಖ್ಹಾತ್‌ನ ದನ್ಮ ಅದ್ಮಿಖ್ಹಾರು ಕಾಮ್ ಕೋಕರ‍್ಯುನಿತೆ ಅರಾಮ್ ಕರ‍್ಯು.
ಇಸ್ರಾಯೇಲ್‌ವಾಳು ಆ ಖಾಣಾನ “ಮನ್ನ” ಕರಿ ನಾಮ್ ಮ್ಹೇಲ್ಯು.ಯೊ ಧೋಳ ಕೊತ್‌ಮಿರ್‌ನ ಪಂಡಾನಿತರ ರ‍್ಹೀನ್ ಲಜ಼ತ್‌ಮ ಶೇತ್ ಲೋಥ್ಯಹುಯ ದೋಶನಿತರ ಥು. ಮೋಶೆ ಅದ್ಮಿಖ್ಹಾರನ, “ಯೆಹೋವನೆ ಹುಕುಮ್ ದಿದೋತೆ ಆಸ್, ‘ಮೇ ಈಜಿಪ್ಟ್ ದೇಖ್ಹ್‌ಥು ತುಮುನ ಭಾರ್‌ ಬುಲಾವನಿವಖ್ಹ್‌ತೆ ಜ಼ಂಗಳ್‌ಮ ಖಾವಾನ ದಿದೊತೆ ಖಾಣಾನ ತುಮಾರಿ ಪಿಳ್ಗಿವಾಳು ದೇಖಾನಿತರ ಇವ್ಣಖ್ಹಾಜೆ ತುಮೆ ಎಕ್ ಶೇರ್ ಮನ್ನಾನ ಭರಿನ್ ಜ಼ತನ್‌ಥಿ ರಾಕ್ಣು” ಕರಿ ಬೊಲ್ಯೊ. ಇನಖ್ಹಾಜೆ ಮೋಶೆನೆ ಆರೋನ್ನ, “ತೂ ಎಕ್ ಹಂಡ್ಕಾನ ಲೀನ್. ಇನಾಮ ಎಕ್ ಶೇರ್‌ಯೆತ್ರೆ ಮನ್ನಾನ ನಾಖಿನ್ ತುಮಾರು ಪಿಳ್ಗಿವಾಳು ದೇಖಾನಖ್ಹಾಜೆ ಇನ ಯೆಹೋವನು ಝ಼ಗೋಮ ಮ್ಹೇಲ್ನು” ಕರಿ ಬೊಲ್ಯೊ. ಯೆಹೋವನೆ ಮೋಶೆನ ಹುಕುಮ್‌ಕರಾನಿತರಸ್, ಆರೋನ್ನೆ ಹುಕುಮ್‌ನುಶಾಸನ್ನು ಪಿಟಾರನ ಭೀಡೆ ಇನ ಮ್ಹೇಲ್ಯೊ. ಇಸ್ರಾಯೇಲ್‌ವಾಳು ಇವ್ಣೆ ಜಿವ್ಣುಕರ‍್ನುತೆ ಮುಲಕ್‌ಮ ಆವಲಗು ಕತೊ ಕಾನಾನ್ ದೇಖ್ಹ್‌ನ ಅಯಿನ್ ಮಳಾಲಗೂಬಿ ಚಾ಼ಳಿಖ್ಹ್ ವರಖ್ಹ್ ಮನ್ನಾನಸ್ ಖಾದು. ಓಮೆರ್ (ಶೇರ್)ಕರಿ ಬೋಲಾನು ಏಫಾಮ1 ದಖ್ಹ್‌ನು ಎಕ್ ವಾಟೊ.
Source notes (1)
- Footnote ಎಫಾಮ ಕತೊ ಖ್ಹುಮಾರ್ ಡೋಡಿಖ್ಹ್‌ ಶೇರ್ ಎತ್ರು
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.