युहान्ना 3:16

निकोदेमस राङ येशु

1फरिसिबे नाङने निकोदेमस नाङान मि झि होतो। खो यहुदिबे झोमसि नाङने घोबा झि हिना। 2खो छाम्मु येशुयि तेहा लेप्सोङ, राङ खोला नाइरेलो, “गुरुज्यु, ङेला छ्या होतो ख्योए कजसुबाने लेलेबि गुरु झिना चिचालानाना कजसुबा ङ्याबो मेना ख्युइ क्याक्याइबि धि हा:लाइयापयि लाइतेबा सुइ याङ कि मिङ्युइबा।” 3येशुयि खोला जवाक पिन्सोङ, “तेम्बारे ङा खेला नाज्याइ, सु याङ सारबा क्याइरे माकेना ख्युइ कजसुबे राज्य मिथुवालो।” 4निकोदेमसयि खोला नाइसोङ, “मि काप्पो च्युङदे च्हिरु क्याइरे किन? च्हि खो याङ आमायि टोपाला लाम्मा ङिबा सुरे याङ क्येङ्युइ किनाइ?”

5येशुयि जवाक पिन्सोङ, “तेम्बारे ङा खेला नाज्याइ, रेन छ्यु राङ आत्माने माकेना कजसुबे राज्यला ढो मिङ्युइबा। 6स्हुने क्येक्येबि सुना, राङ आत्ममाने क्येक्येबा आत्माने। 7ङाहि खेला सारबा क्याइरे क्ये नाइरे हा:मालाइ। 8हुरबो छोम्मुवा काङ यहला ढोसोम होए हति यहला ढुन। ख्युइ हुरबुइ क्ये ङ्यानकिन हिन्नाङ हति काङ योने हुन राङ काङ यहला ढुन, हति हा:मिकुवा। आत्माने क्येक्येबि मि पोरो हति च्वरा राङ हुन।”1 9निकोदेमसयि हतिला टिसोङ, “धि च्हिरु क्याइरे हुन?” 10येशुयि हतिला जवाक पिन्सोङ, “ख्योए इस्राएलयि छिया गुरु ना, झोमयाङ हा:मिकुवाइ?” 11तेम्बारे, ङा खेला नाज्याइ, हुइ च्हि हा:कुन हति नेन, राङ हुइ च्हि थोङ हति साछि तेरिन हिन्नाङ खे ङाहि साछि हिमिछेबालो। 12ङाहि खेला पृथवियि ताम नाइरे, हति हिन्नाङ हिमिछेबा, तेहि खेला तेङलायि ताम नाइना च्हिरु क्याइरे हिछे कि ङ्युइ किन? 13तेङलाने पापाबि मि पिजा अर्थात सु याङ तेङला लाला पुपुता मेता लो।2 14च्हिरु क्याइरे मोशायि रुल्ला च्याङ मेते साला तेक्ते, हति च्वरा क्याइरे मि पिजा धेकोइ हुन3 15ओर सुगे खोला हिछे क्याइ, हतिला नामयाङ मिसिनयापयि मिजे खुयिन। 16“चिचालानाना कजसुबे संसारला धि च्वरा करि क्याइसोङ, कि खोला रेँ पिजा चिक्पा तेहाङ पिन्देलो, हति क्याइरे सुइ याङ खोला हिछे किङान सुवाङ मासि मायोङ नाइरे, हिन्नाङ नामयाङ मिसिनयाप मिजे खु। 17चिचालानाना कजसुबे संसारला दोषि सोयाप नाइरे पिजाला संसारला चाँचाँबा मानालो, हिन्नाङ खोने संसार क्योबोङ नाइरे चाँचाँबा ना। 18सुइ पिजाला हिछे क्याइ, हति घल मिहा हिन्नाङ हिमिछे किङानते ताङलाने राङ घल च्युङ चिचालानाना ख्युइ कजसुबे पिजा चिक्पायि मिनला हिछे मा क्याइबालो। 19ल अल भेयापते छाछाराते धि राङ ना होए संसारला लेप्तु, राङ मि तेबे होएले ले याङ मुन्ना केनलो चिचालानाना हतिबे लाइ अल किन लो। 20चिचालानाना लाइ अल किङान पोरो होएला मि कालो, राङ होएला मिहालो, स्यान अर्थात ख्युइ लाइ थोङिन। 21तेम्बाला मिजे क्योङानयि मि होएला हुन, राङ हति च्वरा क्याइरे ख्युइ क्याक्याइबि लाइ कजसुबे तेहा क्याक्याइबा हिना नाइरे साल्बो थोङसोङ।”

येशु राङ युहान्ना

22हतिच्येला येशु राङ ख्युइ लोब्टुतेबा यहुदियायि प्रदेशला पुइसोङ, तेहि हतिया हतिबा ङ्याबो ङिन रेन ढोम्बोला त्येसोङ राङ बप्तिस्मा पिन्सोङ। 23युहान्नायि याङ सालिम यी धुनयि एनोनला बप्तिस्मा तेरिनलो चिचालानाना हतिया छ्यु लेइ राङ धुलो। हतिया मितेबा हुन राङ बप्तिसमा खेरिनलो। 24हति भेला थु युहान्ना झ्याल्ला पुपुता मेतालो।

25हति भेलाला राङ युहान्नायि लोब्टु झि यहुदि ङ्याबो चाङमा सोयाप यि भारेला नारे च्युङसोङ। 26युहान्नायि तेहा लेप्ते हतिबे खोला नाइसोङ, “गुरुज्यु, यर्दनयि स्यार छोयि फारकानला सु ख्योए ङ्याबो होतो, सुइ भारेला ख्युइ साछि पिन्दे, तेहि, खो बप्तिस्मा तेरिन तेतु, राङ पोरो ख्युइ तिया ढुन्दु।” 27युहान्नायि जवाक पिन्देलो, “मिला तेङलाने मा पिन थु च्याङ मिखुबा।” 284 ङा ख्रिष्ट माना हिन्नाङ ङा खोले ताङला चाँचाँबा हिना नाङानयि ङाहि साछि खेराङ तेरिन्दु। 29सु ङ्याबो नामा होतो, ख्योबो हति राङ ना। ख्योबोयि रेँ रुवा सु ख्युइ धुनला लाँरे तोकिन, ख्युइ क्ये थोइरे लेइराङ किप्पो हुन। हतिचाला ता ङाहि किप्पो पुरा च्युङसोङ। 30खो याला राङ ङा माला होङकोइ राङ होतो।

खो सु तेङलाने लेप्ते

31कोङने होङान ते पोरो ले छेया ना। पृथविते पृथ्‍वीने राङ ना, राङ पृथवि राङ ताम नेन। तेङलाने लेलेबा ते पोरोले छेना।5 32ख्युइ च्हि थोङ राङ थोइरे, हति साछि हति राङ तेरिन हिन्नाङ ख्युइ साछि सुइयाङ मिङ्यानालो। 33सुइ ख्युइ साछि ङ्यानकिन, हति कजसुबा तेम्बा हिना नाङानयि तामयि प्रमान तेरिन। 34चिचालानाना सुला कजसुबायि चाँरे, हतियि कजसुबे वचन नेन चिचालानाना कजसुबे छे माक्याइबा पवित्र आत्मा तेरिनलो। 35आकि ख्युइ पिजाला करि किनलो, राङ क्यु पोरो खुरि लाला टोटोता होतो।6 36सुइ पिजाला हिछे किन, हतिला नामयाङ मिसिनयापयि मिजे खु। सुइ पिजायि आदेस मिङ्याना, हति मिजे मिथुवालो, हिन्नाङ कजसुबे स्येताङ हति थोला ताताति ताताता किनलो।