Mapinda 22

1Kyawama kuba ni bulumba kukila kuba ni bunonsi bwingi.

Ni kwitabilua kuweme kukila kuba ni mutofue pamo ni oro.

2Kintu kimo kili na munonsi ni mupabi ni keki:

Yawe i Kabumba wabo.

3Mukengezi aliwamona bubi ni kufyama,

inzi babipuba balibaya sie ku ntanzi mpaka baikisia.

4Kunakila ni kumutiina Yawe

kulikwaleeta bunonsi, ni mukinzi pamo ni bukose.

5Myunga ni tukose, bili mu nzila ya bafinine mitima,

inzi olia asungile mutima wakue, alikuba wali kule nabio.

6Sambilizia mwana nzila i apalile kukonka,

pantu anzia akakota takafumamo.

7Mupabi, aliwateekua na munonsi,

ni mukopi, mubombi wa olia aliwakopia.

8Olia aliwabyala bubi, aliwazombola bwavia,

ni nfimbo yakue ya kukandilanako ilikutyoka.

9Muntu wa buntu, aliwapaalua,

pantu aliwakasania bapabi bilio byakue.

10Kumba wa kapuni ni mazibo alikupua.

Ee, mazibo ni matuka, bilikupua.

11Olia atonene buswesi bwa mutima ni aliwalanda bulanzi buweme,

likolo alikuba kibuza wakue.

12Menso akua Yawe alialabukila maano,

inzi aliwalovia twebo twa mupoti.

13Munanghani aliwalanda nangue, “Panze pali ni nkalamu!

Ndikwipailua mu kisaakaanino kya bantu.”

14Kanua ka mwanakazi mukambue, kiina kizikile.

Olia asuulilue na Yawe, aliwaponenamo.

15Bupuba bukakiliilue mu mutima wa mwana,

inzi nfimbo ya kumukanda iliyabukumbila kule.

16Olia aliwabiibikizia mupabi pakuti avuzie bunonsi bwakue,

ni aliwapeela munonsi byabupe, bonse babili balibapeleela ku bupabi.

Bulanzi 30 bwa mulangue

17Twilizia unvue bulanzi bwa balia bali ni mulangue,

ni kupooza maano ku bindimukusambilizia.

18Pantu kuti kyawama kine wasunga masambilizio mukati mobe,

ni ku-apitulukamo kubalua musita.

19Evi maswapi obe aye ali muli Yawe.

Ni wewe wenka, nakusambilizia lelo.

20Eba, nsikulembeele bulanzi 30,

bulanzi bwa nsokezi ni bwa maano,

21Evi bukusambilizie kuba wa kiine ni wa kulanda kisinka,

pakuti ubwezie mpunda ya kiine ku balia bakutumine?

Bulanzi bwa mambo

22Tekupompola mupabi bunonsi bwakue pantu ye ni mupabi,

Ni mu kilie tekubiibikizia nsambu muntu abulilue.

23Pantu Yawe aliwabalandila,

ni kubiibikizia bwikazi bwa balia balibababiibikizia.

Bulanzi bwa bubili

24Tekukita bukibuza na olia ali ni kipuki kikata,

ao kwenda pamo ni muntu asiliwakokola kufiitua.

25Ukeeza kusambilila mibeele yakue,

ni kulengia kukwatua we mwine mu muteo.

Bulanzi bwa butatu

26Tekuti ube umo wa pa balia balibalaya,

ao kwitabila kulipa mizia nghwana.

27Kine teuli na kinge kya kumulipa,

wene kuti watwaminamo bulita bobe.

Bulanzi bwa buna

28Tekutelulula kalangi ka mipaka ya kale,

mipaka yaabiikilue na babikolue bobe.

Bulanzi bwa busaano

29Kubako umwene muntu amanine bwino mwilo wakue?

Alikubomba ntanzi ya makolo.

Takaba kubombela babiloolo basipalile.