Mapinda 23

Bulanzi bwa mutanda

1Luuliwaikala ku kulia pamo ni kateeka,

tekulaba nangue ulimukulia nani.

2Kine uli nkandakalio,

biika mwele pa mukolomino obe.

3Kabili tekutokamua bilio byakue biweme,

pantu kuti bya kubembia.

Bulanzi bwa kilooba

4Tekwiemia mu kukeba bunonsi.

Tekupozesiako maano.

5Pantu kuti wa bumona, ni bo bwazeeza

pantu kisinka bunonsi bulibwaikitila mapaapi,

nga nzwiba aliwapupuka mu muulu.

Bulanzi bwa mwanda

6Tekulia bilio bya muntu wa butani,

kabili tekutokamua bilio byakue biweme,

7Pantu mu mutima wakue alimukupenda biulimukulia,

alikukwana, “Mina, Lia!”

Inzi mu mutima mwali binge.

8Elia mikusu iwalyanga ulikuiluka,

ni ntasio yobe ilikuba ya mpuni.

Bulanzi bwa fundi

9Tekulanda twebo twa maano ku kipuba,

pantu alikufuupula mulangue wa twebo tobe.

Bulanzi bwa lyanondo

10Tekutelulula kalangi ka mipaka ya kale,

kabili tekupoka makaba a baana nsiiwa.

11Pantu Kalubula wabo ali ni maka,

wene waakabalandila, ni we waakamoneka wali ni kilubo.

Bulanzi bwa lyanondo ni bumo

12Poozako maano mu kukonka masambilizio,

ni kuteya matui obe ku kutwilizia twebo twa maano.

Bulanzi bwa lyanondo ni bubili

13Tekumulekeela mwana pasili kumuuma,

pantu kine wamusepula nfimbo, tafua.

14Musepule nfimbo

ni kupususia bukose bwakue ku lufu.

Bulanzi bwa lyanondo ni butatu

15We mwana wane, kine mutima obe uli ni mulangue,

kisinka mutima wane ni o ulikuwaminua.

16Mutima wane ulikuwaminua,

milomo yobe luiliyalanda bilungi.

Bulanzi bwa lyanondo ni buna

17Mutima obe tekuti unvwile bantu ba bibalo bunkua,

inzi wewe tiina Yawe koba konse.

18Pantu kisinka kuli ni buwame ku ntanzi,

ni maswapi obe teakapua.

Bulanzi bwa lyanondo ni busaano

19Unvua we mwana wane, kabili ba ni mulangue,

lombola mutima obe mu nzila iweme.

20Tekuya wali pa libumba lya bakyakolua,

ao balia balibalia munani wa nama nga bakazule.

21Pantu kyakolua ni kazule baakapeleela ku bupabi,

ni tulo twaakabavwika bilaka.

Bulanzi bwa lyanondo ni mutanda

22Mutwilizie so akuvyele,

kabili tekumufuupula noko mu bukote bwakue.

23Sita kiine, inzi tekuti ukisisie.

Sita mulangue, ni masambilizio pamo ni maano.

24Se kwa mwana mulunghami, ali ni nsansa ikata.

Olia avyele mwana wa maano, ni ye aliwasansamusiiwa.

25So ni noko bawaminue,

noko akuvyele asangalale.

Bulanzi bwa lyanondo ni kilooba

26We mwana wane, n'mpeele mutima obe,

ni menso obe awaminue na nzila yane.

27Pantu mukende, ali nga kiina kizikiisie,

ni mwanakazi mweni ali nga kiina kyondele.

28Ee, aliwabenza nga kabooko,

ni kulengia balalume bengi kusiba ba kisinka.

Bulanzi bwa lyanondo ni mwanda

29Nani ali ni maavia? Nani ali ni bulanda? Nani ali ni mazibo?

Nani aliwaitendooka? Nani ali ni bilonda bya mpuni?

Nani akasikile menso?

30Ni olia aliwakokola musita uleepele mu bumini,

olia aliwakeba kutompatompa bwalua bulekenkeene.

31Wewe tekutokamua bwalua lubukasikile,

anzia kine bulimukufumia tufulo twabenghema,

ni kukooka bwino bukebuke.

32Inzi pa mpeleezio bulibwasuma nga nzoka,

ni bwimba bwakue nga bwa ngwezie.

33Menso obe alikumona byeni,

ni mutima obe ulikufumia bintu bisipalile.

34Ee, ulikuya wali nga muntu aleele pakati buziba,

nga muntu aleele ku mulingoti wa bwato.

35Ulikulanda evi, “Bakinsepa, inzi nsyakikisika.

Bakinghuma, inzi nsyakyunvua kantu.

Ndikubuuka musitaki kuti ntwalilile kukeba bunge bwalua?”