1 Yo

Xoka Kireni Nakau

Yonie Xayawotai

Akereki kuna

Mua nakau paiya aimore nanunanu xotapa tuku. Yesusu taiwoteneai xuiapu xeika Emisiki Xoiteu xeika nukou nirau Yesusu Kristusu xeikae, tianikati kirenini xonikikemu tumaxi puropinerire xetai. Ukumu xosaupo apimi weinikiteri ninie xoreinikineri nini purunikeri Xoiteu wetepi nu xiraxina.

Nini pa “ukumu xosaupo kinie” ipaki kunaurouneri, mua ouro puroteneai sapi paiya, asinakuni kutu xana xuwe xirouneri. Yesusu nu Xoiteupo Nono, pa xati nu siko xuiapue kakirounuku sie nu apuni kutu saina ouropu sapi xeika etokepuwatixe. Ninie kunauneri, apue Xoiteu xeika ati puropurexina paiya, nu ouropu sapi teure nanunanuwopuwatixe. Asinaku kutu kapia xeika kireu xosikienikepi kapia xeika, pa rania nini ouropu sapi. Pa xati tinie panumu kapia taiwopure eiyoxaku.

Yesusu taiwoteneai apimie panumu kuna xosa xakuniki iyarepia nu xiraxina. Nue kunauna, Yesusue apuni kutu sayeyai xati, Yesusure xonikisuwoteneai xuiapu paiya nini Xoiteu xiri xonikieuneri kireu xuiapu xiri xonikiewopineri.