Skip to content
BibleKenya
SIX 1 Yo 5 Verse

Xoiteupo Kuna

1 Yo 5

Yesusu taiwoteneaie mua oupo sokisoki oroweteneai

Xoiteue nukou xuiapu xiyeri tinikepure tumuworetai apu nu Yesusu xati xokupa xuiapue nure xonikisuneria, nini Xoiteupo nonomi puropineri. Xokupa1 apimie Eminiki xonikieuneria, nupo niraumana rania xonikieurouneri. Sini Xoiteu xiri xosikieunuku nupo xokupa kuna tainuku, pa kapiarei sipaunukua sini Xoiteupo nonomi xiri xosikienikinuku xepu. Sini2 Xoiteu xiri xosikieunukua, sini nupo xokupa kuna tairounuku. Pa xati nupo xokupa kunae sini xu sikerixe. Xokupa3 apimie Xoiteupo nono puroteneaia, ninie mua ouropu sokisoki orouneri. Sini Xoiteure xosikisunuku xati, pa kapiarei xomaxinuku mua ouropu sokisoki orourounuku.

Xoiteue nukou Nonoure kuna pitewotai

Yue4 mua ouropo sokisoki orourounana? Apue Xoiteupo Nono nu Yesusure xousuna paiya, pa apue orourouna. Yesusu Kristusue5 enero ene isepi kapiaure koto, nupo yawi na nikitoto xosa kusawopina kapiaure kotowoyai. Nue enepu kapia kirenire koyaixe. Xuwe. Nu ene xeika yawi xeikapu kapiaure koyai. Xoiteupo Supo Youya nu suau kunapu xotapa xati, Xoiteupo Supo Youyae Yesusu Kristusupo kapiaure kuna uteirouna. Xeimorei6 purineri nupo kapiaure kunauwoteneai, paiya7 nini Xoiteupo Supo Youya xeika ene xeika yawi xeikae kaketeneai. Nini xeimorei kirenie kuna kireni kunawoteneai.

Apue uteirouneri kuna sikoe8 xosikisurounuku. Pana Xoiteue uteiwotai kuna paie, apu nikau kuna xiri oronikina. Pa kuna Xoiteue uteiyetai paiya, nukou Nonoure kunawoyai. Apue9 Xoiteupo Nonoure xousurounae Xoiteue pa kuna uteiwoyai tietai xati, pa kuna nupo xouro purina. Pana apue Xoiteupo kuna xousuwopu xuweunapa, nue Xoiteu nu xoreixoreituaiyeuna, pa amure, Xoiteue nukou Nonopu kapiaure kuna uteiwoyaire xousuwatixe. Pa kapiarei Xoiteue nukou kuna suauxi atarisikina. Xoiteue sipesi sipesi puropu ekisikioma sikeyai xati, pa ekisikiomapu xotapa paiya nukou Nono xosa purina. Apue10 Xoiteupo Nono xeika etokina paiya, nu pa ekeoma tuku. Apue Xoiteupo Nono xeika etokepu xuweuna paiya, nu pa ekeoma xuwe.

Sini sipesi puropu ekisikioma tukuxi sipawopu

Tini11 xuiapue Xoiteupo Nonopu wenumurei xotikisurounuku xosa mua kuna xayaune. Tini sipesi sipesi purakuaire ekitikioma tieikiriaire sipawakuai. Sini12 Xoiteu nukoe xouwewotai nanunanu tainuku kire sapire kunikuninuku kotounukua, nue sikou kunikuni iyesirouna. Pa xati sini Xoiteure ximikiroukirixe. Xuwe. Sini nuko nutiemu xonarounuku. Siko sipa, nue sikou xokupa kunikuni iyesirouna. Pa xati nue kire sapi sikepinaure kotounukua, siko sipa pa sapini kutu tepu.

Kire13 apue xekoati kire xatau Yesusu taiwotaie xunu erati, pa xunue kakati pa apu xumopu xuweuwopina xatia, pa apu nukoini Xoiteu xosa kunikuniwati, Xoiteue pa xatasiki ekeoma tuwopina. Apue xumopi xuweuwopineri xunu erineri xumopu xuweuwopinerire ye kunaune. Apue xunu erineri xumopineri xunu purinana, tini paire kunikuniwakuai xine ye kunautixe. Xokupa kapia asinaku kutu xuweu paiya xunu. Pana apu xumopu xuweurouneri xunu paiya purina.

Siko14 sipa, xokupa apimie Xoiteupo nonomi purineria, ninie xunupo kapia tairouworixe. Xuwe. Apue Xoiteupo nono purotaia Xoiteue ati yakurouna xati, Satanie nu xosa xupo iyarepuwatixe. Siko15 sipa, siko Xoiteupo nonomi purinuku sorena, mua ou xokupa paiya Satanipo sokisoki irue purina.

Siko16 sipa, Xoiteupo Nono kourotai xati, sikoe Xoiteuni kutu sipawopure, nue nanunanu sikina. Sini Xoiteuni kutu xeika Nirau Yesusu Kristusu xeika etokinuku. Yesusu Kristusu paiya nu Xoiteuni kutu xati, nue ekisikioma atinuku sipesi sipesi puropu xotapa.

Yeu17 nono misiarara xura, tini xokupa xoreixorei xoiteu weinikiterinari xetauroni pura.

Source notes (17)
  1. Cross-reference Yo 1.12-13; 15.23;1 Yo 2.22-23; 4.15
  2. Cross-reference Mai 6.8;Mt 11.30;Yo 14.15; 14.21-24;2 Yo 6
  3. Cross-reference Yo 16.33;1 Yo 3.9; 4.4
  4. Cross-reference Ro 8.37;1 Ko 15.57;1 Yo 4.4; 4.15
  5. Cross-reference Yo 1.29; 1.34; 14.17; 16.13; 19.34;1 Ti 3.16;1 Yo 1.7
  6. Cross-reference Yo 1.1; 10.30;XKY 19.13
  7. Cross-reference Yo 15.26
  8. Cross-reference Mt 3.16-17; 17.5;Yo 5.32-37; 8.17-18
  9. Cross-reference Yo 3.33; 5.38;Ro 8.16;Ka 4.6
  10. Cross-reference Yo 3.36; 5.24
  11. Cross-reference Yo 20.31;1 Yo 1.1-2
  12. Cross-reference Yo 14.13; 16.23;1 Yo 3.21-22
  13. Cross-reference Mt 12.31-32;Lu 12.10;Ip 6.4-6;Ye 5.14-15
  14. Cross-reference Yo 17.15;Ye 1.27;1 Pi 1.23;1 Yo 3.9
  15. Cross-reference Ro 8.10; 8.23;Ka 1.4;1 Yo 4.6
  16. Cross-reference Ais 9.6;Mt 25.46;Yo 17.3;1 Ti 3.16;Ip 1.8
  17. Cross-reference 1 Ko 10.14

Xoiteupo Kuna. Copyright © 2024 Pioneer Bible Translators. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.