ಲುಕ 6

ಸಬ್ಬತ ದಿನ್ಪರ‍ ಮಾಲಕ ವ್ಹೈ

(ಮತ್ತಾಯ 12:1-8; ಮಾರ್ಕ 2:23-28)

1ಯಕ್ಕ ಸಬ್ಬತ ದಿನಮಾ ಯೆಸು ಖೆತ್ರೊಮಾತೊ ಜಾ಼ತಾ ಟೈಮಾ ತಿನಾ ಶಿಷ್ಯಾ ಖೆತ್ರೊಮಾನಾ ಬುಟ್ಟಾ ಭಾಗಿಲಿನ ಹತೊಕ್ಹು ತಿಕ್ಕಿನ ಖಾತಾ ಚಾ಼ಲ್ಯಾತಾ. 2ತೆಳಾಮಾ ಪರಿಸಾಯರೊ ಯೆಸುನೆ"ತುಮೆ ಸಬ್ಬತ ದಿನಮಾ ನೈಸೊ ಕರಾನು ಕಾಮ ಕರಾಡಾಸ್ತೊ? ಎ ಮೊಶೆನಾ ಧರಮಶಾಸ್ತ್ರನಾ ವಿರುದ್ದ ವ್ಹೈ "ಕದ್ಯಾ. 3ತೆ ವಾತೆ ಯೆಸು, ಫರಿಸಾಯರೊನೆ "ದಾವಿದ ತಿನಾ ಕ್ಹಾತೆ ರ‍್ಹಯೆಲವಾಲಾವೊನೆ ಭುಕ್ಕಕಲಾಗಲ ಟೈಮಾ ತೆ ಸುಕರ‍್ಯೊ ಕೈನ ತುಮೆ ಒದ್ಯಾ ನತ್ತಿಸು? 4ದಾವಿದ ಕ್ಹುದಾನಿ ಸನ್ನಿದಿಮಾ ಗೈನ ಕ್ಹುದಾನೆ ಚ಼ಡಾಯಲ ರೊಕ್ಲೊ ಯಾಜಕನೆ ಛೊಡಿನ ಬಿಜು಼ ಕುನ್ನಜ಼ ನೈಸೊ ಖಾವಾನೊ ರೊಕ್ಲೊ ದಾವಿದ ಖೈನ ವರಿ ತಿನಾ ಕ್ಹಾತೆ ರ‍್ಹಯಲವಾಲಾವೊನಾ ಖಲಾಯೊಸ್ತೊ? ಕದ್ಯೊ. 5ಮನಕ್ಹನೊ ದಿಕ್ರೊ ಸಬ್ಬತ ದಿನ್ಪರ‍ ಮಾಲಕ ಥಯೊಸ "ಕೈನ ಯೆಸು ಕದ್ಯೊ.

ಸಬ್ಬತ ದಿನಮಾ ಹತ ಅರಾಮ ಥಯಲ ಮನಕ್ಹ

(ಮತ್ತಾಯ 12:9-14; ಮಾರ್ಕ 3:1-6)

6ವರಿ ಯಕ್ಕ ಸಬ್ಬತ್ ದಿನಮಾ ಯೆಸು ಸಬಾಮಂದಿರಮಾ ಗೈನ ಉಪದೆಶ ಕರ‍್ತಾಮಾ ತ್ಯಾ ಯಕ್ಲೊ ದಾಣಗೊ ಸಿದಾ ಹತ ಕುಕ್ಹೈ ಗಯಲವಾಲೊ ತ್ಯಾ ವ್ಹತ್ತೊ. 7ಯೆಸು ತಿನೆ ಸಬ್ಬತ್ ದಿನಮಾ ಅರಾಮ ಕರ‍್ಯೊಮ ತಿಪರ ತಪ್ಪ ಘಾಲಿಯೆ ಕೈನ ಫರಿಸಾಯರೊ ವರಿ ಶಾಸ್ತ್ರಿಯೊ ಟೈಮ ದೆಕಾಡಾತಾ. 8ವರಿ ತ್ಯುನಿ ವಿಚಾರ ಯೆಸುನೆ ತಿಳದಿತಿ. ಯೆಸು ಹತ ಕುಕ್ಹೈ ಗಯಲವಾಲಾನೆ"ತು ಐನ ನ್ಹಾ ಹುಬ್ರೆ "ಕದ್ಯೊ. ತೆ ಉಟಿನ ಐನ ಹುಬ್ರಯೊ. 9ತೆಳಾಮಾ ಯೆಸು ತ್ಯುನೊನೆ"ಸಬ್ಬತ ದಿನಮಾ ಕಯು ಕಾಮ ಕರಾನು ಚೊ಼ಕು ವ್ಹೈ? ಚೊ಼ಕು ಕಾಮ ಕರಾನು ಸು ಕೆಟ್ಟಕಾಮ ಕರಾನು ಚೊ಼ಕು ವ್ಹೈ? ಜ಼ಲಮ ವಚಾ಼ಡಾನು ಸು? ಜ಼ಲಮ ಕಾಡಾನು? ಕೈನ ಪುಚ್ಯೊ. 10ಯೆಸು ತಿನಾ ಸುತ್ತೆ ಹುಬ್ರಯಲವಾಲಾವೊನೆ ದೆಕಿನ, ತೆ ಮನಕ್ಹನೆ, ಯೆಸು "ತಾರೊ ಹತ ಅಗೊ ಕರ" ಕದ್ಯೊ. ತೆ ತಿನೊ ಹತ ಅಗೊ ಕರ‍್ಯೊ. ತೆಳಾಮಾಜ಼ ತಿನೊ ಹತ ಅರಾಮ ಥಯೊ.

11ಫರಿಸಾಯರೊ ವರಿ ಶಾಸ್ತ್ರಿಯೊ ಘನ್ನಾ ಶಿಟ್ಟ ಥೈನ. ತ್ಯುನೆ "ಅಪೆ ಕೈ ಉಪಾಯಕ್ಹು ಯೆಸುನೆ ಸು ಕರಿಯೆ? ಕೈನ ತ್ಯುನೊ ತ್ಯುನೊಮಾಜ಼ ಬೊಲ್ಲಿವಾಡ್ಯಾತಾ. (ಪ್ಯ್ಲಾನ ಕರಾಡಾತಾ)

ಯೆಸುನಾ ಬಾರಾ ಅಪೊಸ್ತಲೊ

(ಮತ್ತಾಯ 10:1-4; ಮಾರ್ಕ 3:13-19)

12ಯಕ್ಕ ದಿನ್ನ ಪ್ರಾಥನಾ ಕರಾ ಹುತಿ ಯೆಸು ಡೊಂಗರಪರ ಗೈನ ಕ್ಹಾರಿ ರಾತ ಪ್ರಾಥನಾ ಕರ‍್ಯೊ. 13ಮರ್ನಾ ದಿನ್ನೆ ಪಾಟೆ ಯೆಸು ತಿನಾ ಶಿಷ್ಯಾವೊನೆ ಬಲೈನ ತ್ಯುನೊಮಾನಾ ಬಾರಾ ಶಿಷ್ಯಾವೊನೆ ಇನಿಲಿನ ತ್ಯುನೊನೆ ಅಪೊಸ್ತಲೊ ಕೈನ ನಾಮ ಮ್ಹೆಲ್ಯೊ. 14ತ್ಯುನೆ ಕುನ್ನ ವ್ಹೈ ಕದ್ಯಾಮ ಸಿಮೊನನೆ (ಯೆಸು ಪೆತ್ರಾ ಕೈನ ನಾಮ ಮ್ಹೆಲ್ಯೊ) ವರಿ ತಿನೊ ಭೈ ಥಯಲ ಅಂದ್ರೆಯ, ಯಾಕೊಬ, ವರಿ ಯೊಹಾನ, ಫಿಲಿಪ್ಪ ವರಿ ಬಾರ್ತೊಲೊಮಾಯ, 15ಮತ್ತಾಯ ತೊಮ, ಯಾಕೊಬ (ಅಲ್ಫಾಯನೊ ದಿಕ್ರೊ) ವರಿ (ದೆಶಪರ ಮಯಾ ರ‍್ಹಯಲ ವಾಲೊ) ಸಿಮೊನ, 16ಯುದ ಯಾಕೊಬನೊ ದಿಕ್ರೊ ವರಿ ಇಸ್ಕರಿಯುತ ಯುದ (ಯೆಸುನೆ ಧರೈನ ದಿದಲ ವಾಲೊ)

17ಯೆಸು ವರಿ ಅಪೊಸ್ತಲೊ ಡೊಂಗರಪರತಾ ಉತ್ರಿನ ಸಿದಾ ರ‍್ಹಯಲ ಜಿಮಿನ್ಪರ ಹುಬ್ರಯಾ. ತ್ಯಾ ತಿನಾ ಪಾಚಾ಼ ಆಯಲ ಶಿಷ್ಯಾವೊನು ಮ್ಹೊಟು ಗುಂಪ ವರಿ ಯುದಾಯತಾ ಯೆರುಸೆಲೆಮ್ತಾ ತುರ ಸಿದೊನ ಗಾಮ್ತಾ ವರಿ ಸಮುಂದರನಿ ಆಜು಼ಬಾಜು಼ಮಾ ರ‍್ಹಯಲ ಮನಕ್ಹೊನು ಮ್ಹೊಟು ಗುಂಪ ತ್ಯಾ ವ್ಹತ್ತು. 18ತ್ಯುನೆ ಕ್ಹಾರಾ ಯೆಸುನಿಯೊ ವಾತೊ ಐಕು ಕೈನ ವರಿ ತೆ ಮನಕ್ಹೊಮಾ ರ‍್ಹಯಲ ರೊಗೊ ಕ್ಹೊ ಅರಾಮ ಥೌ ಕೈನ ತಿಕನ ಆಯಾತಾ. ವರಿ ತ್ಯುನಾಮಾ ದಕ್ಹಾ ಮನಕ್ಹೊಮಾ ಕೆಟ್ಟ ಆತ್ಮಾ ವ್ಹತ್ತಿಯೊ. ತ್ಯುನೆ ಕ್ಹಾರಾ ಅರಾಮ ಥಯಾ. 19ಕ್ಹಾರಾ ಮನಕ್ಹೊ ಯೆಸುನೆ ಮುಟ್ಟಾನಾ ಹುತಿ ಕೊಶಿಶ ಕರಾಡಾತಾ. ಕಾಕದ್ಯಾಮ ಯೆಸುಮಾತಿ ತಾಕತ ಭಾರಿ ಐನ ಕ್ಹಾರಾ ಮನಕ್ಹೊನೆ ಅರಾಮ ಕರಾಡಿತಿ!

20ಯೆಸು ತಿನಾ ಶಿಷ್ಯಾವೊನೆ ದೆಕಿನ ಸು ಕದ್ಯೊ ಕದ್ಯಾಮ,

"ಗರಿಬೊ ರ‍್ಹಯಲವಾಲಾ ತುಮೆ ಧನೈ ವ್ಹೈ;

ಕ್ಹುದಾನಿ ರಾಜ್ಯ ತುಮಾರಿ ವ್ಹೈ.

21ಭುಕ್ಕಾ ರ‍್ಹಯಲವಾಲಾ ತುಮೆ ಧನ್ಯ ವ್ಹೈ.

ತುಮೆ ತೃಪ್ತ ಥಾವೊಸಿ. ವರಿ ತುಮೆ ಹಮ್ನಾ

ರವಾಲಾ ತುಮೆ ಧನ್ಯ ವ್ಹೈ;

ಪಾಚಾ಼ತಾ ತುಮೆ ಅಕ್ಹೊಸಿ.

22ಮನಕ್ಹನಾ ದಿಕ್ರಾನಾ ಹುತಿ ಮನಕ್ಹೊ ತುಮೊಪರ ಸಿಟ್ಟ ಮ್ಹೆಲಸ ತುಮೊನೆ ಕೆಟ್ಟ ವ್ಹೈ ಕವಸ ವರಿ ತುಮಾರಿ ಮರ್ಯಾದಿ ಕಾಡಸ ವರಿ ಎ ಕ್ಹಾರು ತಡ್ದಿಲಿವಾಲಾ ತುಮೆ ಧನೈ ವ್ಹೈ. 23ತೆ ಟೈಮಾ ಖುಶಿ ರ‍್ಹವೊ. ಕಾಕದ್ಯಾಮ ಸ್ವರ್ಗಮಾ ತುಮೊನೆ ಘನ್ನು ಫಲ ಮಳಸ. ಎ ಮನಕ್ಹೊ ತುಮೊನೆ ಕರಲ ತಿಮ್ಮಜ಼ ತ್ಯುನಾ ಪಿತ್ರೊಬಿ ಪ್ರವಾದಿಯೊನಾ ಕ್ಹಾತೆ ಕರ‍್ಯಾಸ.

24ವರಿ ಸೌಕಾರ ರ‍್ಹಯಲವಾಲಾ ತುಮಾರಿ ಯಕ್ಕ ಪರಸ್ತಿ ಮಿ ಸು ಕೌ!

ತುಮಾರಿ ಸುಖಾನಿ ಜಿವ್ನಾ ತುಮೊನೆ ಮಳಿಸ.

25ಹಮ್ನಾ ಪೆಟ ಭರಲವಾಲಾ ಮನಕ್ಹೊ, ತುಮಾರಿ ಗತಿ ಮಿ ಸು ಕೌ!

ತುಮೆ ಭುಕ್ಕಾ ಥಾವೊಸಿ. ಹಮ್ನಾ ಅಕ್ಹಾಲಾ ಮನಕ್ಹೊ,

ತುಮಾರಿ ಗತಿ ಮಿ ಸು ಕೌ! ತುಮೆ ದುಖಿ ಥೈನ ರವೊಸಿ.

26"ಮನಕ್ಹೊನಾ ಮ್ಹೊಡೆ ಕೆಳಾಮಾಬಿ ಚೊ಼ಕೊ ಛೆ ಕವೈಲಿವಾಲಾ ತುಮಾರಿ ಗತಿ ಸು ಕೌ! ತ್ಯುನಾ ಪಿತ್ರೊ ಸುಳ್ಳ ಪ್ರವಾದಿಯೊನೆ ಚೊ಼ಕಾ ಛೆ ಕತಾತಾ.

ತುಮಾರಾ ದುಶ್ಮನೊನೆ ಮಯಾ ಕರೊ

(ಮತ್ತಾಯ 5:38-48; 7:12)

27"ಮಾರಿಯೊ ವಾತೊ ಐಕಾಲಾವೊ ತುಮೊನೆ ಮಿ ಸು ಕೌಸ ಕದ್ಯಾಮ; ತುಮಾರಾ ದುಶ್ಮನೊನೆ ಮಯಾ ಕರೊ. ತುಮೊನೆ ಕದ್ರಾವಾಲಾವೊನೆ ತುಮೆ ಚೊ಼ಕು ಕರೊ. 28ತುಮೊನೆ ಕ್ಹರಾಪಾಲಾವೊನೆ ತುಮೆ ಆಶಿರ್ವಾದ ಕರೊ, ತುಮೊನೆ ಕೆಟ್ಟ ಕರಾಲಾವೊನಾ ಹುತಿ ಪ್ರಾಥನಾ ಕರೊ. 29ಯಕ್ಲೊ ತುಮೊನೆ ಯಕ್ಕ ಗಾಲ್ಪರ ಮಾರಯೊಮ, ತಿನೆ ಬಿಜೆಕ ಗಾಲ ಮಾರಾನೆ ದಿವೊ. ಯಕ್ಲೊ ತಮಾರಾ ಅಂಗಪರ ಉಪ್ಪರಲ್ಯೊ ಅಂಗ್ಡು ಕಾಳ್ಳಿದ್ಯೊಮ, ತುಮೆ ತಿನೆ ಮ್ಹೈನು ಅಂಗ್ಡು ದಿವೊ. 30ತುಮೊಕನ ಮಾಂಗಾಲಾವೊನೆ ಹರಿ ಯಕ್ಲಾನೆ ದಿವೊ. ಯಕ್ಲೊ ತುಮೊಕನ್ನು ಸುಬಿ ಕಾಳ್ಳಿದಲ ರ‍್ಹಯೊಮ ತೆ ವಾಪಾಸ ಮಾಂಗಿಲಿವೊ ನಕೊ. 31ಬಿಜಾ಼ ಮನಕ್ಹೊ ತುಮಾರಾ ಕ್ಹಾತೆ ಸು ಕರು ಕೈನ ಆಸ ಛೆ ತೆಜ಼ ತುಮೆ ತೆ ಮನಕ್ಹೊನಾ ಕ್ಹಾತೆ ಕರೊ.

32ತುಮೊನೆ ಮಯಾಕರಾಲಾನೆಜ಼ ತುಮೆ ಮಯಾ ಕರ‍್ಯಾಮ ತೆ ಸು ಉಪಯೊಗ ಛೆ? ಕಾಕದ್ಯಾಮ ಪಾಪಿಯೊಬಿ ತ್ಯುನೊನೆ ಮಯಾ ಕರಾಲಾನೆಜ಼ ಮಾಯಾ ಕರಸ್ತೊ! 33ತುಮೊನೆ ಚೊ಼ಕು ಕರಾಲಾವೊನೆ ತುಮೆ ಚೊ಼ಕು ಕರ‍್ಯಮ ತುಮೊನೆ ಸು ಚೊ಼ಕು ವ್ಹೈ? ಪಾಪಿಯೊಬಿ ತಿಮ್ಮಜ಼ ಕರಸ್ತೊ! 34ತುಮೆ ಕಿನೆಬಿ ಸಾಲಾ ದಿದ್ಯಾಮ, ತುಮೊನೆ ಫರಿನ ದಿವಾಲಾವೊನೆ ಸಾಲಾ ದಿದ್ಯಾಮ ತುಮೊನೆ ಸು ಉಪಯೊಗ ವ್ಹೈ? ಪಾಪಿಯೊಬಿ ಬಿಜಾ಼ ಪಾಪಿಯೊನೆ ಸಾಲಾ ದಿದಲ ತೆಕ್ಲು ದಿದಲ ಮಳಸ ಕೈನ ದಿವಸ್ತೊ!

35"ತಿನಾಹುತಿ ತುಮಾರಾ ದುಶ್ಮನೊನೆ ಮಯಾಕರೊ, ತ್ಯುನೊನೆ ಚೊ಼ಕು ಕರೊ, ತುಮೆ ತ್ಯುನೊನೆ ಸಾಲಾ ದೆತಾಮಾ ವರಿ ಫರಿನ ದಿವಸ ಕವಾನು ಆಸ ಮ್ಹೆಲೊ ನಕೊ. ತೆಳಾಮಾ ತುಮೊನೆ ಮ್ಹೊಟು ಪ್ರತಿಫಲ ರ‍್ಹಯಲ ರ‍್ಹವಸ, ವರಿ ಪರಾತ್ಪರ ಕ್ಹುದಾನಾ ದಿಕ್ರಾ ಥಾವೊಸಿ. ಕಾಕದ್ಯಾಮ ಕ್ಹುದಾ ಪಾಪಿಯೊನೆ, ಕೆಟ್ಟ ಮನಕ್ಹೊ ರ‍್ಹಯಲ ವಾಲಾವೊನೆ ಚೊ಼ಕೊ ವ್ಹೈ. 36ತುಮಾರೊ ಸ್ವರಗನೊ ಬಾ ಥಯಲ ಕ್ಹುದಾ ಮರಗಾಲೊ ರ‍್ಹಯಲ ಲಿಂಗತಜ಼ ತುಮೆಬಿ ಮರಗಾಲಾ ರ‍್ಹವೊ.

ಬಿಜಾ಼ವೊನೆ ಫೈಸಲೊ ಕರೊ ನಕೊ

(ಮತ್ತಾಯ 7:1-5)

37"ಬಿಜಾ಼ವೊನೆ ತಿರಪ ಕರೊ ನಕೊ, ತೆಳಾಮಾ ತುಮೊನೆಬಿ ತಿರಪ ಥಾತು ನೈ. ಅಪರಾದಿ (ಕೆಟ್ಟ ಕರಲವಾಲೊ) ವ್ಹೈ ಕೈನ ಫೈಸಲೊ ಕರೊ ನಕೊ, ತೆಳಾಮಾ ತುಮೆಬಿ ಅಪರಾದಿ ವ್ಹೈ ಕೈನ ಫೈಸಲೊ ಥಾತೊನೈ. ಬಿಜಾ಼ವೊನೆ ತುಮೆ ಮಾಫ ಕರೊ ತುಮೊನೆಬಿ ಮಾಫಿ ಮಳಸ. 38ಬಿಜಾ಼ವೊನೆ ದಿವೊ, ಕ್ಹುದಾ ತೆಳಾಮಾ ತುಮೊನೆ ಬಿ ದಿವಸ. ಚೊ಼ಕಿ ಅಳತಿ ಕರಿನ ದಾಬಿನ ಹಲೈನ ಪಡೆಲಿಂಗತ ತುಮಾರಾ ಖೊಳಾಮಾ ಘಾಲಸ ತುಮೆ ಅಳತಿ ಕರಾನಿ ಅಳತಿಕ್ಹುಜ಼ ಕ್ಹುದಾ ತುಮೊನೆಬಿ ಅಳತಿ ಕರಿನ ದಿವಸ ಕದ್ಯೊ. 39ಎನೈಸೊ ಯೆಸು ತ್ಯುನೊನೆ ಯಕ್ಕ ಸಾಮ್ಯ ಕದ್ಯೊ. ತೆ ಸುವೈ ಕದ್ಯಾಮ ಯಕ್ಕ ಕುಡ್ಡೊ ಬಿಜೆಕ್ಕಲಾ ಕುಡ್ಡಾನೆ ವಾಟ ದೆಕಾಡಸ್ಸು? ತಿಮ್ಮ ಥಯುಮ ತ್ಯುನೆ ಭಂಬಿಜ಼ನಾ ಖಾಡಿಮಾ ಪಡಿ ಜಾ಼ವಸ್ತೊ. 40ಗುರುತಿ ಶಿಷ್ಯೊ ಮ್ಹೊಟೊ ನ್ಹವೈ, ಶಿಷ್ಯೊ ಪುರಾ ಶಿಕ್ಕಕಲ್ಪರ ಹರಿ ಯಕ್ಲೊ ತಿನಾ ಗುರು ಲಿಂಗತ ಥಾವಸ. 41ಎನೈಸೊ ತು ತಾರಾ ಡೊಳಾಮಾ ರ‍್ಹಯಲ ವ್ಹಲಸ ದೆಕ್ಯಾವಾಚಿ ಬಿಜೆ಼ಕ್ಲಾನೆ ಹಸಾಕರಲೆ ಕಾ ಕಸಿ. 42ಪೈಲಾ ತು ಹಸಾ ಥಾ ತುನೆ ದೆಕಾಲೊ ತುನೆ ದೆಕಿನ ಸುದ್ರಸ.

ಝಾಡ ವರಿ ಫಲ

(ಮತ್ತಾಯ 7:17-20; 12:34-35)

43ಚೊ಼ಕು ಝಾಡ ಕೆಟ್ಟ ಫಲ ದೆತು ನೈ, ತಿನಾಲಿಂಗತಜ಼ ಕೆಟ್ಟ ಝಾಡ ಚೊ಼ಕು ಫಲ ದೆತು ನೈ. 44ಹರಿ ಯಕ್ಕ ಝಾಡ ತೆ ದಿವಾನಾ ಫಲಕ್ಹು ತಿನೆ ವಳಕಸ, ಮನಕ್ಹೊ ಕಾಟಾವೊನಾ ಝಾಡಮಾ ಉಂಬ್ರೊನು ಫಲ ನೈತೊ ದ್ರಾಕ್ಷಿಯೊ ಹುಟ್ಟತ್ಯೊ ನೈ. 45ಚೊ಼ಕು ಮನಸ ರ‍್ಹಯಲವಾಲಾನಾ ಚೊ಼ಕಿಯೊ ಸಂಗತಿಯೊ ಲಾವಸ. ಮನಸ್ಮಾ ಚೊ಼ಕು ರ‍್ಹಯಲಜ಼ ಮ್ಹೊಡಾತು ಆವಸ. ವರಿ ಕೆಟ್ಟ ರ‍್ಹಯಲ ಮನಕ್ಹನಾ ಮನಸ್ಮಾ ರ‍್ಹಯಲಜ಼ ಮ್ಹೊಡಾತು ಕೆಟ್ಟ ಆವಸ.

ಬೆ ಜ಼ನಾ ಘರ ಭಾಂದಾಲಾ

(ಮತ್ತಾಯ 7:24-27)

46ಎನೈಸೊ ತುಮೆ ಮನೆ ಸ್ವಾಮಿ-ಸ್ವಾಮಿ, ಕೈನ ಬಲೈನ ಮಿ ಕವಾನು ಕಾ ನೈ ಕರತಾ? 47ಮಕನ ಐನ ಮಾರಿಯೊ ವಾತೊ ಐಕಿನ, ತಿನಾ ಲಿಂಗತ ಚಾ಼ಲಾಲೊ ತೆ ಕೆವೊ ವ್ಹೈ ಕೈನ ಮಿ ತುಮೊನೆ ಕೌಸ. 48ತೆ ಘರ ಭಾಂದಾಲಾ ಲಿಂಗತ ಛೆ. ತೆ ಘನ್ನಿ ಉಂಡಿ ಖಾಡಿ ಖಂದಿನ ಫಾಯಾ ಘಾಲಿನ ದಗಡಾಪರ ಘರ ಭಾಂದಲ ಲಿಂಗತ ತೆ ಮನಕ್ಹ ರ‍್ಹವಸ. ಕೆಕ್ಕಲು ಜೊ಼ರ ನದಿನು ಪಾನಿ ಐನ ತೆ ಘರನೆ ಪಾನಿ ಲಾಗ್ಯು ತಬಿ ತಿನೆ ಸುಜ಼ ಥಯುನೈ. ಕಾಕದ್ಯಾಮ ತೆ ಘರ ದಗ್ಡಾಪರ ಭಾಂದಲ ವ್ಹೈ. 49ತೆನೈಸೊ ಮಾರಿಯೊ ವಾತೊ ಐಕಿನ ತಿನಾಲಿಂಗತ ನೈ ಚಾ಼ಲಾಲೊ ಉಂಡಿ ಫಾಯಾ ನೈ ರ‍್ಹಯಲ ಲಿಂಗತ ಕ್ಹಾಲಿ ಜಿಮಿನ್ಪರ ಭಾಂದಲವಾಲಾ ಲಿಂಗತ ರ‍್ಹವಸ, ತೆ ನದಿನು ಪಾನಿ ತೆ ಘರನೆ ಲಾಗ್ಯುಮ ತೆ ಘರ ಭೆಗಿನ ಪಡಿಜಾ಼ವಸ"