ಲುಕ 5

ಯೆಸುನಾ ಪಾಚಾ಼ ಆಯಲ ಪೆತ್ರಾ, ಯಾಕೊಬ, ಯೊಹಾನ

(ಮತ್ತಾಯ 4:18-22; ಮಾರ್ಕ 1:16-20)

1ಯಕ್ಕ ದಿನ್ನ ಯೆಸು ಗೆನೆಜರೆತ ಕವಾನಾ (ಗಲಿಲಾಯ) ನದಿನಾ ದಂಡಿಕನ ಹುಬ್ರೈಲ ಟೈಮಾ, ಮನಕ್ಹೊ ಯಕ್ಕಪರ ಯಕ್ಕ ಢಕಲ್ತಾ ತ್ಯಾ ಯೆಸುನಾ ಸುತ್ತೆ ಐನ ಕ್ಹುದಾನಿಯೊ ವಾತೊ ಐಕಾಡ್ಯಾತಾ. 2ಯೆಸು ನದಿನಾ ದಂಡಿಕನ ಬೆ ಹಡಗಾ ದೆಕ್ಯೊ. ಹಡಗಾಮಾ ರ‍್ಹಯಲ ಮಚ್ಲಿ಼ಯೊ ಧರಾಲಾ ಭಾರಾ ಐನ ತ್ಯುನಿಯೊ ಬಲಿಯೊ ಧವಾಡ್ಯತಾ. 3ಯೆಸು ಸಿಮೊನನೊ ಹಡ್ಗೊ ಚ಼ಡಿನ ಬೈಟ್ಯೊ ವರಿ ಹಡಗಾನೆ ದಂಡಿತೊ ನಕ್ಕರ ದುರ ಢಕಲ ಕೈನ ಯೆಸು ಸಿಮೊನನೆ ಕದ್ಯೊ. ವರಿ ಯೆಸು ಹಡಗಾಪರ ಬೈಟಿನ ಮನಕ್ಹೊನೆ ಉಪದೆಶ ಕರಾಡೊತೊ.

4ಉಪದೆಶ ಕರಲ್ಪರ ಯೆಸು ಸಿಮೊನನೆ ಹಡಗಾನೆ "ಉಂಡು ರ‍್ಹಯಲ ಜ಼ಗಾ ನಿಂಗೈನ. ಮಚ್ಲಿ಼ಯೊ ಧರಾಹುತಿ ತುಮಾರಿಯೊ ಬಲಿಯೊ ಪಾನಿಮಾ ಘಾಲೊ "ಕದ್ಯೊ.

5ತೆಳಾಮಾ ಸಿಮೊನ, ಯೆಸುನೆ "ಗುರು, ಹಮೆ ಕ್ಹಾರಿ ರಾತ ಕಷ್ಟಪಡದ್ಯಾತಬಿ ಯಕ್ಕ ಮಚ್ಲಿ಼ಬಿ ಮಳಿ ನೈ. ವರಿ ತು ಕದಲ ಹುತಿ ಹಮೆ ಬಲಿ ಪಾನಿಮಾ ಘಾಲಾಡ್ಯಾಸ "ಕದ್ಯೊ. 6ತ್ಯುನೆ ತ್ಯುನಿಯೊ ಬಲಿಯೊ ಪಾನಿಮಾ ಘಾಲ್ತಾಮಾ ತ್ಯುನಿಯೊ ಬಲಿಯೊ ಫಾಟಿ ಜಾ಼ವಾಯಕ್ಲಿಯೊ ಮಚ್ಲಿ಼ಯೊ ಢಿಗ ಗಟ್ಳೆ ಮಳಿಯೊ. 7ತೆಳಾಮಾ ತ್ಯುನೆ ಬಿಜೆಕ ಹಡಗಾಮಾ ರ‍್ಹಯಲ ತ್ಯುನಾ ದೊಸ್ತೊನೆ ಹತೊಕ್ಹು ಸ್ವನ್ನಿ ಕರಿನ ಬಲಾಯಾ ತ್ಯುನಾಬಿ ಬೆ ಹಡಗಾ ಮಚ್ಲಿ಼ಯೊ ಭರಿನ ಡುಬಾವರಖಾ ಥಯಾ. 8ಸಿಮೊನ ಯೆಸುನಾ ಖಾಮೊ ಉಂದಾಗುಡ್ಗಾ ಘಾಲ್ಲಿನ ಪಗೆ ಪಡಿನ "ಸ್ವಾಮಿ, ಮಿ ಪಾಪಿ ವ್ಹೈ. ಮನೆ ಛೊಡಿನ ಜಾ಼ "ಕೈನ ಮಾಂಗಿಲಿದ್ಯೊ.

9ಕ್ಹಾರಾ ಮಚ್ಲಿ಼ಯೊ ಧರಾಲಾ ಘಾಬ್ರಾಥಯಾ. (ಇವ್ನೆ ಭಂಬಿಜ಼ನಾ ಸಿಮೊನನಾ ಕ್ಹಾತೆ ವಾಟೊಲಿವಾಲಾ ವ್ಹತ್ತಾ) 10ಎ ದೆಕಿನ ಜೆಬೆದಾಯನಾ ದಿಕ್ರಾ ಥಯಲ ಯಾಕೊಬ ವರಿ ಯೊಹಾನ ಘಾಬ್ರಾಥಯಾ. ಯೆಸು ಸಿಮೊನನೆ"ಭುಚ಼ಕುನಕೊ. ಆಜ಼ತೊಜ಼ ತು ಮಚ್ಲ್ಯೊ಼ ಧರಾಲೊ ನ್ಹವೈ. ವರಿ ಮನಕ್ಹೊನೆ ಕ್ಹುದಾಕನ ಲಾವಾಲೊ ಥಾಸಿ "ಕದ್ಯೊ. 11ತ್ಯುನೆ ತ್ಯುನಾ ಹಡಗಾ ದಂಡಿಯೆ ಲೈನ ಭಾಂದಿನ. ಕ್ಹಾರು ಛೊಡಿನ ಯೆಸುನಾ ಪಾಚಾ಼ ಗಯಾ.

ಯೆಸು ಕುಷ್ಠ ರೊಗಿನೆ ಅರಾಮ ಕರಲ

(ಮತ್ತಾಯ 8:1-4; ಮಾರ್ಕ 1:40-45)

12ಯಕ್ಕ ದಿನ್ನ ಯೆಸು ಯಕ್ಕ ಗಾಮ್ಮಾ ರ‍್ಹತಾಮಾ ಯಕ್ಕ ಕುಷ್ಟರೊಗಿ ಯೆಸುನೆ ದೆಕಿನ ತಿನಾ ಕ್ಹಾಮೊ ಉಂದಾ ಗುಡ್ಗಾ ಘಾಲ್ಲಿನ ಅಡ್ಡಪಡಿನ "ಪ್ರಭು, ತು ಮನಸ್ಸ ಕರ‍್ಯೊಮ ಮನೆ ಅರಾಮ ಕರಶಿ ಕೈನ ಮನೆ ಗ್ವತ್ತ ಛೆ ಕೈನ ಮಾಂಗಿಲಿದ್ಯೊ.

13ಯೆಸು"ತಿನೆ ತುನೆ ಅರಾಮ ಕರಾನೆ ಮನೆ ಮನಸ್ಸೆ ಛೆ ತುನೆ ಅರಾಮ ಥಾವಾದೆ" ಕೈನ ತಿನೆ ಮುಟ್ಯೊ ತೆಳಾಮಾಜ಼ ತಿನೆ ಅರಾಮ ಥಯ್ಯು. 14ಯೆಸು ತಿನೆ, ಎ ಕ್ಹಾರು ತಾರಾ ಖಾಮು ಥಯಲ ಅದ್ಭುತ ಕಿಕನಜ಼ ಕೌ ನಕೊ, ತೆನೈಸೊ ತು ಗೈನ ಸಾಕ್ಷಿ ಥಾವಾನಾ ಹುತಿ ಯಾಜಕನೆ ತಾರು ಅಂಗ ದೆಕಾಡಿನ ಮೊಶೆ ನಿಯಮ ಕರಲ ಶುದ್ಧವಿಚಾರೊ ಪುರಾಕರ ಕೈನ"ಅಪ್ಪಣೆ ದಿದ್ಯೊ.

15ಗಾಮ್ಮಾ ಯೆಸುನಿ ಸುದ್ದಿ ಘನ್ನಿ ಫೈಲಿ ಗೈ. ಘನ್ನಾ ಮನಕ್ಹೊ ತಿನಿಯೊ ವಾತೊ ಐಕು ಕೈನ ತ್ಯುನಾ ರೊಗೊ ಗೈನ ಅರಾಮ ಥಾವು ಕೈನ ತಿಕನ ಆಯಾ. 16ತೆಳಾಮಾ ಯೆಸು ಯಕ್ಕಲೊಜ಼ ಕುನ್ನಜ಼ ನೈಸೊ ರ‍್ಹವಾನ ಜ಼ಗಾ ಗೈನ ಪ್ರಾಥನಾ ಕರ‍್ಯೊ.

ಯೆಸು ಯಕ್ಕ ಲಕ್ವೊ ಮಾರಲವಾಲಾನೆ ಅರಾಮ ಕರಲ

(ಮತ್ತಾಯ 9:1-8; ಮಾರ್ಕ 2:1-12)

17ಯಕ್ಕ ದಿನ್ನ ಯೆಸು ಮನಕ್ಹೊನೆ ಭೊದನೆ ಕರಾಡೊತೊ. ತ್ಯಾಜ಼ ಗಲಿಲಾಯ ಪ್ರಾಂತ್ಯತಾ ವರಿ ಯುದೆಯ ಯೆರುಸೆಲಿಮತಾ ಆಯಲ ಫರಿಸಾಯರೊ ವರಿ ನಿಯಮೊನಾ ಶಾಸ್ತ್ರಿಯೊ ತ್ಯಾ ವ್ಹತ್ತಾ. ರೊಗೊ ಅರಾಮ ಕರಾನಿ ಕರ್ತಾನಿ ತಾಕತ ಯೆಸುಮಾ ವ್ಹತ್ತಿ.

18ಇಮ್ಮ ರ‍್ಹತಾಮಾ ಯಕ್ಕ ಲಕ್ವೊ ಮಾರಲವಾಲಾ ರೊಗಿನೆ ದಕ್ಹಾ ಜ಼ನಾ ವಚ್ಚಾ಼ನಾ ಕ್ಹಮಾತಾಜ಼ ಉಚೈನ ಯೆಸು ರ‍್ಹಯಲ ಜ಼ಗಾ ಲಾವಾನೆ ಕೊಶಿಶ ಕರ‍್ಯಾ. 19ವರಿ ತ್ಯಾ ಘನ್ನಾ ಮನಕ್ಹೊನು ಕುಡಿನ ಯೆಸುನಾ ಸುತ್ತೆ ರ‍್ಹಯಲ ಹುತಿ ತ್ಯುನೊನೆ ತೆ ಲಕ್ವೊ ಮಾರಲವಾಲಾನೆ ಯೆಸುಕನ ನಿಂಜಾ಼ವಾನೆ ನೈ ಥಯಲ ಹುತಿ ತ್ಯುನೆ ಘರಪರ ನಿಂಗೈನ ಘರಪರಲ್ಯು ಛತ್ತ ಕಾಡಿನ ತೆ ರೊಗಿನೆ ವಚ್ಚಾ಼ನಾ ಕ್ಹಮಾತಾಜ಼ ಯೆಸುನಾ ಕ್ಹಾಮಾ ಉತಾರ‍್ಯಾ.

20ಯೆಸು ತಿವ್ನೊ ಬರೊಕ್ಹೊ ದೆಕಿನ ತೆ ರೊಗಿನೆ, ಮಾರಾ "ದೊಸ್ತ ತಾರು ಪಾಪ ಮಾಫ ಥಯುಸ "ಕೈನ ಕದ್ಯೊ.

21ತ್ಯಾ ರ‍್ಹಯಲವಾಲಾ ಶಾಸ್ತ್ರಿಯೊ ಫರಿಸಾಯರೊ. ತೆ ಐಕಿನ "ಎ ಕ್ಹುದಾನಾ ವಿರುದ್ದ ಬೊಲಾಲೊ ಕುನ್ನ ವ್ಹೈ? ಕ್ಹುದಾನೆ ಯಕ್ಲಾನೆಜ಼ ಪಾಪ ಮಾಫ ಕರಾನೆ ಥಾವಸ "ಕೈನ ತ್ಯುನೊ ತ್ಯುನೊಮಾಜ಼ ವಿಚಾರ ಕರಲಿವಾಡ್ಯಾತಾ.

22ವರಿ ಯೆಸು ತ್ಯುನಿಯೊ ವಿಚಾರೊ ತಿಳದಿಲಿನ ತ್ಯುನೊನೆ"ತುಮೆ ತಮಾರಾ ಮನಸ್ಮಾ ಇಮ್ಮ ಕಾ ವಿಚಾರ ಕರಲಿವಾಡ್ಯಾಸ? 23ಕಯು ಆಸಾನ ವ್ಹೈ? ತಾರು ಪಾಪ ಮಾಫ ಥಯುಸ, ಕೈನ ತೆ ಲಕ್ವೊ ಮಾರಲವಾಲಾನೆ ಕವಾನು? ನೈತೊ ಉಟಿನ ಜಾ಼ ಕವಾನು? 24ತೆನೈಸೊ ಮನಕ್ಹನಾ ದಿಕ್ರಾನೆ ಭುಲೊಕ್ಪರ ಪಾಪ ಮಾಫ ಕರಾನೆ ಅದಿಕಾರ ಛೆ ಕವಾನು ತುಮೊನೆ ಗ್ವತ್ತ ರ‍್ಹೌ ಕೈನ "ತೆ ಲಕ್ವೊ ಮಾರಲವಾನೆ ದೆಕಿನ"ಉಟ! ತಾರು ವಚ್ಚಾ಼ನು ಲಿನ ಘರೆ ಜಾ಼"ಕದ್ಯೊ. 25ತೆಳಾಮಾಜ಼ ತೆ ಲಕ್ವೊ ಮಾರಲವಾಲೊ ಕ್ಹಾರಾವೊನಾ ಕ್ಹಾಮೊ ಉಟಿನ ಹುಬ್ರಯೆನ, ತಿನು ವಚ್ಚಾ಼ನು ಲಿನ ಕ್ಹುದಾನೆ ಸ್ತುತಿ ಕರತೊ ತಿನಾ ಘರೆ ಗಯೊ. 26ತೆಳಾಮಾ ಕ್ಹಾರಾ ಮನಕ್ಹೊ ಘನ್ನಾ ಘಾಬ್ರಾ ಥೈನ ಕ್ಹುದಾನೆ ಸ್ತುತಿ ಕರತಾ ವರಿ ಭುಚ಼ಕ್ಕತಾ"ಆಜಾ಼ನಾ ದಿನಮಾ ಹಮೆ ಯಕ್ಕ ಅದ್ಭುತ ದೆಕ್ಯಾ"ಕದ್ಯಾ.

ಯೆಸುನಾ ಪಾಚೊ಼ ಆಯಲ ಲೆವಿ

(ಮತ್ತಾಯ 9:9-13; ಮಾರ್ಕ 2:13-17)

27ಪಾಚಲ್ತೊ, ಯೆಸು ತ್ಯಾಂತೊ ಜಾ಼ತಾಮಾ, ಭುಭಾಡೊಲಿವಾಲೊ ಕಟ್ಟಾಪರ ಬೈಟಲವಾಲೊ ಲೆವಿನೆ ದೆಕಿನ "ತು ಮಾರಾ ಪಾಚೊ಼ ಆ"ಕದ್ಯೊ. 28ಲೆವಿ ಉಟಿನ ಕ್ಹಾರು ತ್ಯಾಜ಼ ಛೊಡಿನ ಯೆಸುನಾ ಪಾಚೊ಼ ಗಯೊ.

29ಪಾಚಲ್ತೊ ಲೆವಿ ಯೆಸುನಾ ಹುತಿ ತಿನಾ ಘರಮಾ ಖಾವಾನೆ ಮ್ಹೊಟು ಫಂಕ್ಷನ ಕರಾಯೊ ತೆಳಾಮಾ ಭುಭಾಡೊಲಿವಾಲಾ ಘನ್ನಾ ಜ಼ನಾ ವರಿ ಘನ್ನಾ ಮನಕ್ಹೊ ವ್ಹತ್ತಾ. 30ತೆಳಾಮ ಫರಿಸಾಯರೊ ವರಿ ಶಾಸ್ತ್ರಿಯೊ ಯೆಸುನಾ ಶಿಷ್ಯಾವೊನೆ "ತುಮೆ ಭುಭಾಡೊಲಿವಾಲಾವೊನಾ ಕ್ಹಾತೆ ವರಿ ಪಾಪಿಯೊನಾ ಕ್ಹಾತೆ ಕಾ ಅನ್ನ ಖಾವಾಡ್ಯಾಸ ವರಿ ಪಿವಾಡ್ಯಾಸ? ಕೈನ ಪುಚ್ಯಾ.

31ತೆಳಾಮಾ ಯೆಸು ತೆ ಐಕಿನ ಅರಾಮ ನೈಸೊವಾಲಾನೆ ಡಾಕ್ಟರನಿ ಜ಼ರುರತ ಛೆ ಅರಾಮ ರ‍್ಹಯಲವಾಲಾವೊನಾ ನ್ಹವೈ. 32ತುಮಾರಾ ಪಾಪನೆ ಪಶ್ಚಾತಾಪ ಪಡಿನ ಕ್ಹುದಾಬಗಲ ಫರೊ ಕೈನ ನಿತಿವಂತಕ್ಹು ರ‍್ಹಯಲವಾಲಾವೊನಾ ಮಿ ಬಲಾವಾನೆ ನತ್ತಿ ಆಯೊ. ಪಾಪಿಯೊನಾ ಹುತಿ ಆಯೊಸ" ಕದ್ಯೊ.

ಉಪಾಸ ರ‍್ಹವಾನಾ ಹುತಿ ಯೆಸು ಕದಲ

(ಮತ್ತಾಯ 9:14-17; ಮಾರ್ಕ 2:18-22)

33ದಕ್ಹಾ ಮನಕ್ಹೊ ಯೆಸುನೆ"ಫರಿಸಾಯರೊನಾ ಶಿಷ್ಯಾ ವರಿ ಯೊಹಾನನಾ ಶಿಷ್ಯಾ ಹಗ್ಲೆಲ್ಲಾ ಉಪಾಸ ವರಿ ಪ್ರಾಥನಾ ಕರಸ; ವರಿ ತಾರಾ ಶಿಷ್ಯಾ ಖಾವಾಡ್ಯಾಸ ಪಿವಾಡ್ಯಾಸ ಕೈನ ಕತಾಮಾ 34ಯೆಸು ತ್ಯುನೊನೆ "ನೌರೊ ಹಿವಾನಾ ಮನಕ್ಹೊನಾ ಕ್ಹಾತೆ ರ‍್ಹಯೆಲಕ್ಕಾ ತ್ಯುನೆ ಭುಕ್ಕಾ ಜಾ಼ವಸು? 35ವರಿ ನೌರಾನೆ ತ್ಯುನೊಕಂತೊ ನಿಂಜಾ಼ವೊನೊ ಟೈಮ ಆವಸ ತೆಳಾಮಾ ತ್ಯುನೆ ವಂದತ ಕರಸ" ಕದ್ಯೊ.

36ಪಾಚಲ್ತೊ ಯೆಸು ತ್ಯುನೊನೆ ಯಕ್ಕ ಸಾಮ್ಯ ಕದ್ಯೊ. ತೆ ಸುವೈ ಕದ್ಯಾಮ "ಕುನ್ನಬಿ ಜು಼ನ್ನಾ ಅಂಗ್ಡಾನೆ ಥಿಗ್ಡು ಲಗಾಡಾ ಹುತಿ ನವಾ ಅಂಗ್ಡಾನೆ ಪ್ಹಾಡ್ತಾ ನೈ. 37ತಿನಾಲಿಂಗತಜ಼ ನೌ (ನವು) ದ್ರಾಕ್ಷಿಯೊನೊ ರಕ್ಹ ಜು಼ನ್ನಿಯೊ ದ್ರಾಕ್ಷಿಯೊನಿ ರಕ್ಹನಿಯೊ ಚಾ಼ಮ್ಡಾನಿ ಕೈಚಿಲಾವೊಮಾ ಭರಿನ ಮುಕ್ಕತಾ ನೈ. ವರಿ ಭರಿನ ಮ್ಹೆಲ್ಯಾಮ ನೌ ದ್ರಾಕ್ಷಿಯೊನು ರಕ್ಹ ತೆ ಜು಼ನ್ನಿಯೊ ಚಾ಼ಮ್ಡಾನಿ ಕೈ ಚಿಲಾವೊನೆ ಫಾಡಿನ ಹೆಟು ಪಡಿನ ಕೆಟ್ಟಿ ಜಾ಼ವಸ, ವರಿ ಕೈಚಿಲಾ ಹಾಳ ಥೈ ಜಾ಼ವಸ. 38ಮನಕ್ಹೊ ನೌ ದ್ರಾಕ್ಷಿಯೊನು ರಕ್ಹ ನೈಯೊ ಚ಼ಾಮ್ಡಾವೊನಿ ಕೈಚಿಲಾವೊಮಾ ಭರಿನ ಮ್ಹೆಲಸ. 39ಜು಼ನ್ನು ದ್ರಾಕ್ಷಿಯೊನು ರಕ್ಹ ಪಿದಲವಾಲೊ ನೌ ದ್ರಾಕ್ಷಿಯೊನು ರಕ್ಹನಿ ಸ್ವಾದ ಗೊತ್ತ ಥಾತು ನೈ. ತೆ ಮನಕ್ಹ ಜು಼ನ್ನು ದ್ರಾಕ್ಷಿಯೊನು ರಕ್ಹ ನೆಜ಼ ಪಸಂದ ಕರಸ"