Sikkiligar Bible
ವಿಮೊಚನ 8
ಬೆಂಡ್ಕಿಯೊ
ತೆ ಥಯಲ್ಪರ ಯಹೊವಾ ಮೊಶೆನಾ ಕ್ಹಾತೆ ಬೊಲಿನ ತಿನೆ, "ತು ಫರೊಹನಕನ ಗೈನ ಅಮ್ಮ ಕೌ, ‘ಯಹೊವಾ ತುನೆ ಸು ಕವಸ ಕದ್ಯಾಮ: ಮನೆ ಆರಾಧನಾ ಕರಾನೆ ಮಾರಾ ಮನಕ್ಹೊನೆ ಇಜಾಜ಼ತ ದೆ. ತು ತ್ಯುನೊನೆ ಜಾ಼ವಾನೆ ನೈ ದಿದ್ಯಾರೆ, ಮಿ ತಾರಾ ದೆಶನೆ ಬೆಂಡ್ಕಿಯೊಕ್ಹು ತ್ರಾಸ ದ್ಯುಸ. ನೈಲ ನದಿಮಾ ತುನೆ ಮೊಜಾ಼ನೆ ಥಾತು ನೈ ತೆಕ್ಲಾ ಬೆಂಡ್ಕಿಯೊ ಹುಟ್ಟಸ. ತೆ ತ್ಯಾಂತೊ ಐನ ತಾರಾ ರಾಜ ಮಹಲಮಾ, ತುಮೆ ಕ್ಹುರ‍್ಯಾನಿ ಜ಼ಗಾಮಾ, ತಾರಾ ಪಲಂಗಪರ ನೈಸೊ ವರಿ ತಾರಾ ಅದಿಕಾರಿಯೊನಾ ವರಿ ತಾರಾ ಮನಕ್ಹೊನಾ ಘರೊಮಾ, ತ್ಯುನಾ ಚು಼ಲ್ಲಾವೊಮಾ, ಸಾಮನೊಮಾ ಜಾ಼ವಸ. ತುಪರಬಿ ತಾರಾ ಮನಕ್ಹೊನಾ ಉಪ್ಪರಬಿ ವರಿ ತಾರಾ ಘರದಾನನಾ ಉಪ್ಪರಬಿ ನಿಸ್ತಾ ಬೆಂಡ್ಕಿಯೊಜ ಜಿಗ್ದಸ” ಕದ್ಯೊ. ಯಹೊವಾ ಮೊಶೆನೆ, "ತು ಆರೊನನೆ, ತಾರಿ ಲಾಕ್ಡಿಲಿನ ನದಿ, ವಕಳೆ, ಕಾಲುವೆನೆ ಜಾ಼ ತಿನಾ ಉಪ್ಪರ ತಾರಿ ಲಾಕ್ಡಿ ಉಚಾ ತೆಳಾಮಾ ಐಗುಪ್ತ ದೆಶ ಭರಿನ ನಿಸ್ತಾ ಬೆಂಡ್ಕಿಯೊ ರ‍್ಹವಸ” ಕೈನ ಕೌ ಕದ್ಯೊ. ತಿನಾಹುತಿ ಆರೊನ ತೆ ದೆಶಮಾ ರ‍್ಹಯಲ ಪಾನಿನಿ ಹರಯಕ್ಕ ಜ಼ಗಾಕನ ಗೈನ ತಿನಿ ಲಾಕ್ಡಿ ಉಚಾತಾಮಾ ತೆ ದೆಶ ಭರಿನ ನಿಸ್ತಿಯೊ ಬೆಂಡ್ಕಿಯೊ ಭರಿಗಯೊ. ತೆನೈಸೊ ಮಾಟಾಮಂತ್ರಾ ಕರಾಲಾ ತ್ಯುನಾ ಮಂತ್ರೊಕ್ಹು ತಿಮ್ಮಜ಼ ಐಗುಪ್ತ ದೆಶಮಾ ಬೆಂಡ್ಕಿಯೊ ಆವಾ ಲಗಾಡ್ಯಾ. ತೆಳಾಮಾ ಫರೊಹನ ಮೊಶೆ ವರಿ ಆರೊನನೆ ಬಲೈನ, "ತುಮೆ ಯಹೊವಾನೆ ಪ್ರಾಥನಾ ಕರಿನ ಆಂ ಬೆಂಡ್ಕಿಯೊನೆ ಮಕಂತಾ ವರಿ ಮಾರಾ ಮನಕ್ಹೊಕಂತಾ ವಳಾಯಾರೆ ಮಿ ತುಮಾರಾ ಮನಕ್ಹೊನೆ ಯಹೊವಾಹುತಿ ಯಜ್ಞ ಕರಾನೆ ತ್ಯುನೊನೆ ಇಜಾಜ಼ತ ದ್ಯುಸ” ಕದ್ಯೊ. ತಿನಾಹುತಿ ಮೊಶೆ ಫರೊಹನನೆ, "ತುಮಾರಾಹುತಿ ಪ್ರಾಥನಾ ಕರಾನೆ ಮನೆ ಕ್ಹುಷಿ ಥಾವಸ. ಮಿ ತುಮಾರಾಹುತಿ ತುಮಾರಾ ಅದಿಕಾರಿಯೊನಾಹುತಿ ವರಿ ತುಮಾರಾ ಮನಕ್ಹೊನಾಹುತಿ ಪ್ರಾಥನಾ ಕರಾನೆ ಟೈಮ ದ್ಯುಸ. ತೆಳಾಮಾ ತುಮೆ ಬೆಂಡ್ಕಿಯೊನೆ ಮಾರಿನ ನಾಕೊಶಿ ವರಿ ನೈಲ ನದಿನೆ ಛೊಡಿನ ಕುನ್ನ ನೈ ವಾಚ್ತು. ಫರೊಹನ ಮೊಶೆನೆ, "ವಂತಾಜ಼” ಕದ್ಯೊ. ತೆಳಾಮಾ ಮೊಶೆ, "ತು ಕದಲ ತಿಮ್ಮಜ಼ ಥೈನಕಾ, ಅನಾಕ್ಹು ತು ಹಮಾರೊ ಕ್ಹುದಾ ಥಯಲ ಯಹೊವಾನಾ ಲಿಂಗತ ಕುನ್ನ ನತ್ತಿ ಕೈನ ತಿಳ್ದಿಲೆಶಿ. ಬೆಂಡ್ಕಿಯೊ ತುಕಂತಾ, ತುಮಾರಾ ಘರೊಮಾತಾ, ತಾರಾ ಮನಕ್ಹೊಕಂತಾ ತಾರಾ ಘರವಾಲಾವೊಕಂತಾ ಐನ ಕ್ಹಾಲಿ ನೈಲ ನದಿಮಾ ರ‍್ಹವಸ” ಕದ್ಯೊ. ಮೊಶೆ ವರಿ ಆರೊನ ಫರೊಹನಕಂತಾ ಐಪಡ್ಯಾ. ತೆಳಾಮಾ ಮೊಶೆ ಯಹೊವಾಕನ ತು ಫರೊಹನನಾ ಉಪ್ಪರ ಆಯಾಲ ಬೆಂಡ್ಕಿಯೊನೆ ಕಾಡಿ ಪಡು ಕೈನ ಪ್ರಾಥನಾ ಕರ‍್ಯೊ. ಯಹೊವಾ ಮೊಶೆ ಮಾಂಗಿಲಿದಲ ಲಿಂಗತಜ಼ ಕರ‍್ಯೊ. ಘರೊಮಾ ರ‍್ಹಯಲ, ಅಂಗಳಾಮಾ ರ‍್ಹಯಲ, ಖೆತ್ರೊಮಾ ರ‍್ಹಯಲ ಬೆಂಡ್ಕಿಯೊ ಕ್ಹಾರಾ ಮರಿ ಗಯೊ. ಐಗುಪ್ತವಾಲಾ ತೆ ಮರೆಲ ಬೆಂಡ್ಕಿಯೊನೆ ಯಕ್ಕಜ಼ಗಾ ಲೈನ ಘಾಲ್ಯಾ. ತೆ ಬೆಂಡ್ಕಿಯೊ ಕ್ಹಡಿನ ಪುರಾ ದೆಶಜ಼ ಬಾಸ ಉಟಿಗಯು. ತೆನೈಸೊ ಫರೊಹನ ಬೆಂಡ್ಕಿಯೊನು ತ್ರಾಸ ಕ್ಹರ‍್ಯು ಕೈನ ತಿಳ್ದಿಲೆತಾಮಾ, ತಿನಾ ಮನಸನೆ ಮಂಡ ಕರಲಿದ್ಯೊ. ಯಹೊವಾ ಕದಲ ತಿಮ್ಮಜ಼ ತೆ, ಮೊಶೆ ವರಿ ಆರೊನನಿ ವಾತ ಐಕ್ಯಾ ಬಗರ ರ‍್ಹಯೊ.
ಜುವೊ
ವರಿ ಯಹೊವಾ ಮೊಶೆನಾ ಕ್ಹಾತೆ ಬೊಲಿನ, "ತು ಆರೊನನೆ, ‘ತಾರಿ ಲಾಕ್ಡಿ ಉಚೈನ ಜಿಮಿನನಾ ಧೂಳನೆ ಮಾರ, ತೆಳಾಮಾ ಐಗುಪ್ತ ದೆಶಮಾ ಜಿಮಿನ್ಪರ ರ‍್ಹಯಲ ಧೂಳ ಪುರಾ ಜುವೊ ಥಾವಸ” ಕದ್ಯೊ. ತ್ಯುನೆ ತಿಮ್ಮಜ಼ ಕರ‍್ಯಾ. ಆರೊನ ಲಾಕ್ಡಿಲಿನ ಉಚೈನ ಜಿಮಿನನಾ ಧೂಳನೆ ಮಾರ‍್ಯೊ. ತೆಳಾಮಾ ಮನಕ್ಹೊಪರಬಿ, ಪಶುವೊಪರಬಿ ಜುವೊ ಆಯಾ. ಐಗುಪ್ತ ದೆಶನಾ ಜಿಮಿನ್ಪರ ರ‍್ಹಯಲ ಧೂಳ ಪುರಾ ಜುವೊ ಥೈ ಗಯಾ. ತೆನೈಸೊ ಮಾಟಾಮಂತ್ರಾ ಕರಾಲಾ ತ್ಯುನಾ ಮಂತ್ರೊಕ್ಹು ತಿನಾ ಲಿಂಗತ ಜುವೊ ಕರಾನೆ ಗಯಾ ತ್ಯುನೊಕನ ಥಯು ನೈ. ತೆ ಜುವೊ ಮನಕ್ಹೊಪರಬಿ ಪಶುವೊಪರಬಿ ವ್ಹತ್ತಾ. ತೆಳಾಮಾ ತೆ ಮಾಟಾಮಂತ್ರಾ ಕರಾಲಾ ಫರೊಹನನೆ, "ಆಂ ಕ್ಹುದಾನು ಕಾಮ ವ್ಹೈ” ಕೈನ ಕದ್ಯಾ. ತೆನೈಸೊ ಫರೊಹನನು ಮನಸ ಮಂಡ ವ್ಹತ್ತು. ಯಹೊವಾ ಮೊಶೆನೆ ಪೈಲಾಜ ಕದಲ ತಿಮ್ಮಜ಼ ಫರೊಹನ ತ್ಯುನಿ ವಾತ ಐಕ್ಯೊ ನೈ.
ಮಾಕ್ಕಿಯೊ
ತೆ ಥಯಲ್ಪರ ಯಹೊವಾ ಮೊಶೆನೆ, "ತು ಪಾಟೆ ಉಟಿನ ಫರೊಹನನಾ ಕ್ಹಾಮೊ ಗೈನ ಹುಬ್ರೆ. ತೆ ನದಿಕನ ಆವಸ. ತೆ ನದಿಕನ ಆಯಲ್ಪರ ತು ತಿನೆ ಅಮ್ಮ ಕೌ, ‘ಯಹೊವಾ ಸು ಕವಸ ಕದ್ಯಾಮ, ಮನೆ ಆರಾಧನಾ ಕರಾನೆ ಮಾರಾ ಮನಕ್ಹೊನೆ ಇಜಾಜ಼ತ ದ್ಯು. ತೆನೈಸೊ ತು, ಮಾರಾ ಮನಕ್ಹೊನೆ ಜಾ಼ವಾನೆ ನೈ ದಿದ್ಯಾರೆ, ಮಿ ತುನೆಬಿ ತುಮಾರಾ ಅದಿಕಾರಿಯೊನೆಬಿ, ತುಮಾರಾ ಘರೊಮಾಬಿ ಮಾಕ್ಕಿಯೊಕ್ಹು ತ್ರಾಸ ದ್ಯುಸ. ಐಗುಪ್ತ ದೆಶನಾ ಮನಕ್ಹೊನಾ ಘರೊಮಾಬಿ ತ್ಯುನಾ ಜಿಮಿನೊಪರಬಿ ಕ್ಹಾಲಿ ತೆ ಮಾಕ್ಕಿಯೊಜ಼ ರ‍್ಹವಸ ಕೈನ ಹುಶಾರ್ಕಿ ಕರಾಡೊಸ. ತೆನೈಸೊ ತೆ ದಿನೊಮಾ ಮಿಜ಼಼, ಆಂ ಪುರಾ ದುನಿಯಾಮಾ ಯಹೊವಾ ವ್ಹೈ ಕೈನ ತಿಳ್ದಿಲಿವಾನಾ ಹುತಿ ಮಾರಾ ಮನಕ್ಹೊ ರ‍್ಹವಾನಿ ಜ಼ಗಾ ಗೊಷೆನ ಬಿಜೊ಼ ಕರುಸ. ತ್ಯಾ ತೆ ಮಾಕ್ಕಿಯೊನು ತ್ರಾಸ ನೈ ರ‍್ಹತು. ಅಮ್ಮ ತಾರಾ ಮನಕ್ಹೊಮಾಬಿ ಮಾರಾ ಮನಕ್ಹೊಮಾಬಿ ಫರಕ ತುನೆ ದೆಕಾಡಿನ ದ್ಯುಸ. ವಂತಾಜ಼ ಆಂ ಮ್ಹೊಟು ಕಾಮ ಥಾವಸ ಕೈನ ಕೌ” ಕದ್ಯೊ. ಯಹೊವಾ ಮ್ಹೊಟಾ ಮಾಕ್ಕಿಯೊನೆ ಫರೊಹನನಾ ರಾಜ ಮಹಲಮಾಬಿ, ತಿನಾ ಅದಿಕಾರಿಯೊನಾ ಘರೊಮಾಬಿ ವಳಾಯೊ ಪುರಾ ಐಗುಪ್ತ ದೆಶಮಾ ತೆ ಮಾಕ್ಕಿಯೊಕ್ಹು ತೆ ದೆಶ ಹಾಳ ಥೈ ಗಯು. ತೆಳಾಮಾ ಫರೊಹನ ಮೊಶೆನೆ ವರಿ ಆರೊನನೆ ಬಲೈನ ತ್ಯುನೊನೆ, "ತುಮೆ ಗೈನ ಆಂ ದೆಶಮಾ ತುಮಾರಾ ಕ್ಹುದಾನೆ ಯಜ್ಞ ಕರೊ” ಕದ್ಯೊ. ತೆ ವಾತೆ ಮೊಶೆ, "ತಿಮ್ಮ ಕರಾನು ಚೊ಼ಕು ನವೈ, ಹಮಾರೊ ಕ್ಹುದಾ ಥಯಲ ಯಹೊವಾನೆ ಯಜ್ಞ ಕರಾನು ಐಗುಪ್ತ ದೆಶನಾ ಮನಕ್ಹೊನೆ ಚೊ಼ಕು ನೈ ಲಾಗತು. ತ್ಯುನೊನೆ ಚೊ಼ಕು ನೈ ಲಾಗಾನು ಕಾಮ ತ್ಯುನಾ ಕ್ಹಾಮಾ ಕರ‍್ಯಾರೆ ತ್ಯುನೆ ಹಮೊನೆ ದಗ್ಡಾ ನಾಕಿನ ಮಾರಿ ಪಡ್ತಾನೈಸು? ಹಮೆ ರಾನಮಾ ತನ್ನ ದಿನ ಲಕ್ಕಾ ದುರ ಚಾ಼ಲಿನ ಗೈನ ಹಮಾರೊ ಕ್ಹುದಾ ಥಯಲ ಯಹೊವಾ ಆಗನ್ಯಾ ದಿದಲ ತಿಮ್ಮಜ಼ ಯಜ್ಞ ಕರು” ಕದ್ಯೊ. ತೆ ವಾತೆ ಫರೊಹನ ತ್ಯುನೊನೆ, "ತುಮಾರೊ ಕ್ಹುದಾ ಥಯಲ ಯಹೊವಾನೆ ರಾನ್ಮಾ ಗೈನ ಯಜ್ಞ ಕರಾನೆ ಮಿ ತುಮೊನೆ ಇಜಾಜ಼ತ ದ್ಯುಸ. ತೆನೈಸೊ ತುಮೆ ಜಾಸ್ತಿ ದುರ ಜೌ಼ ನೈ. ಮಾರಾಹುತಿ ಪ್ರಾರ್ಥನಾ ಕರೊ” ಕದ್ಯೊ. ತೆ ವಾತೆ ಮೊಶೆ, "ಮಿ ತುಕಂತೊ ಗಯಲ ಬರಬ್ಬರಜ಼, ಫರೊಹನ ಥಯಲ ತುನೆಬಿ, ತಾರಾ ಅದಿಕಾರಿಯೊನೆಬಿ ಮಾಕ್ಕಿಯೊನು ತ್ರಾಸ ವಂತಾತು ರ‍್ಹೌ ನೈ ಕೈನ ಮಿ ಯಹೊವಾಕನ ಪ್ರಾಥನಾ ಕರುಸ. ತೆನೈಸೊ ತು ಯಹೊವಾನೆ ಯಜ್ಞ ಕರಾನೆ ಜಾ಼ವಾನಾಹುತಿ ಹಮೊನೆ ಮೊಸ ಕರು ನೈ” ಕದ್ಯೊ. ಮೊಶೆ ಫರೊಹನ ಕಂತೊ ಗೈನ ಯಹೊವಾನೆ ಮಾಂಗಿಲಿದ್ಯೊ. ಮೊಶೆ ಪ್ರಾರ್ಥನಾ ಕರಲ ಲಿಂಗತ ಯಹೊವಾ ಕರ‍್ಯೊ. ತೆ ಮಾಕ್ಕಿಯೊ ಫರೊಹನ ಕಂತಾಬಿ ತಿನಾ ಅದಿಕಾರಿಯೊಕಂತಾಬಿ ತಿನಾ ಮನಕ್ಹೊಕಂತಾಬಿ ಗೈ ಪಡ್ಯಾ. ಯಕ್ಕಬಿ ಮಾಕ್ಕಿ ವಾಚಿ ನೈ. ತೆನೈಸೊ ಎ ಸಲಾಬಿ ಫರೊಹನ ತಿನು ಮನಸ ಮಂಡ ಕರಲಿನ ಇಸ್ರಾಯೆಲ ಮನಕ್ಹೊನೆ ಜಾ಼ವಾನೆ ದಿದ್ಯೊ ನೈ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.