Skip to content
BibleKenya

Sikkiligar Bible

ವಿಮೊಚನ 9

ಜಾನವರೊನು ಮರಣ

ತೆ ಥಯಲ್ಪರ ಯಹೊವಾ ಮೊಶೆನೆ ಸು ಕದ್ಯೊ ಕದ್ಯಾಮ, "ತು ಫರೊಹನಕನ ಗೈನ ತಿನೆ, ‘ಇಬ್ರಿಯವಾಲಾವೊನೊ ಕ್ಹುದಾ ಥಯಲ ಯಹೊವಾ ತಿನೆ ಆರಾಧನಾ ಕರಾನಾಹುತಿ ತಿನಾ ಮನಕ್ಹೊನೆ ತು ಇಜಾಜ಼ತ ದ್ಯು ಕೈನ ಕದ್ಯೊ. ತು ಹಜಿಬಿ ತ್ಯುನೊನೆ ಜಾ಼ವಾನೆ ದಿದ್ಯಾ ಬಗರ ಹುಬ್ರಾಡ್ಯೊರೆ, ಯಹೊವಾ ತುಮಾರಾ ಹರಯಕ್ಕ ಜಾನ್ವರೊನೆ, ಘೊಡೊ, ಗದಡು, ಉಂಟ, ಬೈಲೊ, ಬಕ್ರಾ ಆಂ ಕ್ಹಾರಾವೊಪರ ತಿನೊ ಹತ ಉಚೈನ ತ್ಯುನೊನೆ ಮ್ಹೊಟೊ ರೊಗ ಆವಾಲಗಾಡಸ ಕೈನ ತು ತಿಳ್ದಿಲೆ. ಇಮ್ಮ ಕರಿನ ಮಿ ತುಮೊನೆ ಶಿಕ್ಷಾ ದ್ಯುಸ. ಮಿ ಇಸ್ರಾಯೆಲ ಮನಕ್ಹೊನಾ ಜಾನ್ವರೊನೆಬಿ ಐಗುಪ್ತನಾ ಮನಕ್ಹೊನಾ ಜಾನ್ವರೊನೆಬಿ ಫರಕ ಕರ‍್ಯೊ. ಇಸ್ರಾಯೆಲ ಮನಕ್ಹೊನು ಯಕ್ಕ ಜಾನ್ವರಬಿ ಮರತು ನೈ ಕೈನ ಕೌ” ಕದ್ಯೊ. ತೆನೈಸೊ ಯಹೊವಾ, "ತಿನೆಜ಼ ಕೈನ ಟೈಮ ಕಾಡಿನ, ವಂತಾಜ಼ ಆಂ ಕಾಮ ಆಂ ದೆಶಮಾ ಕರುಸ ಕೈನ ಕೆ” ಕದ್ಯೊ. ಮರ್ನಾ ದಿನ್ನೆ ಯಹೊವಾ ಆಂ ಕಾಮ ಥಾವಾ ವರಕ್ಹು ಕರ‍್ಯೊ. ಐಗುಪ್ತನಾ ಮನಕ್ಹೊನಾ ಪುರಾ ಜಾನ್ವರೊ ಮರಿ ಗಯಾ. ಇಸ್ರಾಯೆಲ ಮನಕ್ಹೊನು ಯಕ್ಕಬಿ ಜಾನ್ವರ ಮರ‍್ಯು ನೈ. ಫರೊಹನ ಸು ಥಯು ಕೈನ ಪುಚ಼ತಾಮಾ, ಇಸ್ರಾಯೆಲ ಮನಕ್ಹೊನು ಯಕ್ಕಬಿ ಜಾನ್ವರ ಮರ‍್ಯು ನತ್ತಿ ಕೈನ ತಿಳ್ದಿಲಿದ್ಯೊ. ತಿಮ್ಮ ರ‍್ಹಯುತಬಿ ತೆ ತಿನು ಮನಸ ಮಂಡ ಕರಲಿದಲ ಹುತಿ ತೆ ಮನಕ್ಹೊನೆ ತೆ ಜಾ಼ವಾನೆ ದಿದ್ಯೊ ನೈ.

ಉಕ್ಳಸ

ಯಹೊವಾ ಮೊಶೆನೆ ವರಿ ಆರೊನನೆ, "ತುಮೆ ಚು಼ಲ್ಲಾನಿ ರಾಕ ಹತ್ತ ಭರಿನ ಲಿವೊ. ಮೊಶೆ ತೆ ರಾಕನೆ ಫರೊಹನನಾ ಡೊಳಾನಾ ಕ್ಹಾಮೊ ವಾರಾಮಾ ನಾಕಾದೆ. ತೆಳಾಮಾ ತೆ ರಾಕ ಧುಳ ಥೈನ ಐಗುಪ್ತ ದೆಶಮಾ ಪುರಾ ಮನಕ್ಹೊಪರಬಿ ವರಿ ತ್ಯುನಾ ಜಾನ್ವರೊಪರಬಿ ಹರಿಯಾ ಫುಟಿನ ಮ್ಹೊಟಾ ಗುಮ್ಡಾ ಉಟಾ ವರಕ್ಹು ಕರಸ” ಕೈನ ಕದ್ಯೊ. ತಿನಾ ಲಿಂಗತ ಮೊಶೆ ವರಿ ಆರೊನ ಚು಼ಲ್ಲಾಮಾನಿ ರಾಕ ಹತ್ಮಾ ಲಿನ ಫರೊಹನನಾ ಕ್ಹಾಮಾ ಹುಬ್ರಾಯಾ. ಮೊಶೆ ತೆ ರಾಕ ವಾರಾಮಾ ನಾಕ್ಯೊ. ತೆಳಾಮಾ ತೆ ರಾಕ ಐಗುಪ್ತನಾ ಮನಕ್ಹೊಪರಬಿ ತ್ಯುನಾ ಜಾನ್ವರೊ ಪರಬಿ ಹರಿಯಾ ಫುಟಿನ ಗುಮ್ಡಾ ಉಟಿನ ದುಕ್ಕ ಥಾವಾ ವರಕ್ಹು ಕರ‍್ಯು. ತೆನೈಸೊ ಮಾಟಾಮಂತ್ರಾ ಕರಾಲಾ ಹರಿಯಾನಾ ತ್ರಾಸಕ್ಹು ಮೊಶೆನಾ ಕ್ಹಾಮಾ ಹುಬ್ರಾವಾನೆ ಥಾಯೆ ನೈಸೊ ಗಯಾ. ಕಾಕದ್ಯಾಮ ಹರಿಯಾ ಮಾಟಾಮಂತ್ರಾ ಕರಾಲಾವೊಪರಬಿ ವರಿ ಐಗುಪ್ತನಾ ಮನಕ್ಹೊಪರಬಿ ಉಟ್ಯಾತಾ. ಆಂ ಕ್ಹಾರು ಥಯುತಬಿ ಯಹೊವಾ ಮೊಶೆನೆ ಕದಲ ತಿಮ್ಮಜ಼ ಥಯು. ಯಹೊವಾ ಫರೊಹನನು ಮನಸ ಮಂಡ ಕರಲಹುತಿ ತೆ ತ್ಯುನಿ ವಾತನೆ ಕಾನ ದಿದ್ಯಾ ಬಗರ ರ‍್ಹಯೊ.

ಬರಪನು ಪಾನಿ

ತೆ ಥಯಲ್ಪರ ಯಹೊವಾ ಮೊಶೆನೆ, "ತು ಪಾಟೆ ಉಟಿನ ಫರೊಹನನಾ ಕ್ಹಾಮೊ ಹುಬ್ರೈನ ತಿನೆ, ‘ಇಬ್ರಿಯನಾ ಮನಕ್ಹೊನೆ ಕ್ಹುದಾ ಥಯಲ ಯಹೊವಾ ಸು ಕವಸ ಕದ್ಯಾಮ, ಮನೆ ಆರಾದನೆ ಕರಾನೆ ಮಾರಾ ಮನಕ್ಹೊನೆ ಇಜಾಜ಼ತ ದೆ. ಹಮ್ನಾ ಮಿ ಸು ಕರುಸ ಕದ್ಯಾಮ ಮಾರಾ ಹತ್ಮಾ ರ‍್ಹಯಲ ತ್ರಾಸ ತಾರಾ ಮನಕ್ಹೊನೆ ವರಿ ಅದಿಕಾರಿಯೊನೆ ಆವಾ ವರಕ್ಹು ಕರುಸ, ತುನೆಬಿ ಶಿಕ್ಷಾ ದ್ಯುಸ. ತಿನಾಹುತಿ ಆಂ ಪುರಾ ದುನಿಯಾಮಾಜ ಮಾರಾ ಲಿಂಗತ ಕುನ್ನ ನತ್ತಿ ಕೈನ ತು ತಿಳ್ದಿಲೆಶಿ. ಮಿ ತುನೆ ವರಿ ತಾರಾ ಮನಕ್ಹೊನೆ ರೊಗೊಕ್ಹು ಮಾರಾನೆ ಮಾರೊ ಹತ್ತ ಉಚಾಯೊಮ ತುಮೆ ಪುರಾ ತರಾ ನಾಶ ಥಾವೊಶಿ. ತೆನೈಸೊ ತುನೆ ಮಾರಿ ತಾಕತ ದೆಕಾಡಿನ ದಿವಾನಾ ಹುತಿಜ಼, ಆಂ ದುನಿಯಾಮಾ ಮಾರು ನಾಮ ಪುರಾ ಮನಕ್ಹೊನೆ ಗ್ವತ್ತ ಥಾವಾನಾ ಹುತಿಜ಼ ಹಜು಼ನಲಕ್ಕಾ ತುನೆ ಜಿವ್ತೊ ಮುಕ್ಯೊಸ. ತೆನೈಸೊ ತುಮೆ ಸೊಕ್ಕನಾ ರ‍್ಹಯಲಕ್ಹು ಮಾರಾ ಮನಕ್ಹೊನೆ ಜಾ಼ವಾನೆ ದಿವಾಡಾ ನತ್ತಿ? ತಿಮ್ಮ ರ‍್ಹಯಾರೆ, ವಂತಾ ಆಂಜ಼ ವಕ್ಹತಮಾ ಘನ್ನೊ ಜೊ಼ರ ಬರಪನು ಪಾನಿ ಹಬಾಳಮಾತೊ ಆವಾ ಲಗಾಡುಸ. ಐಗುಪ್ತ ದೆಶ ಕೆಳಾಮಾತು ಥಯುಸ ತೆಳಾಮಾತು ಹಜು಼ನ ಲಕ್ಕಾ ತ್ಯವು ಬರಪನು ಪಾನಿ ಪಡಲ ತುಮೆ ದೆಕಲಜ಼ ರ‍್ಹೌ ನೈ ತ್ಯವು ಪಾನಿ ಆವಾ ಲಗಾಡುಸ. ತಿನಾಹುತಿ ತುಮೆ ತುಮಾರಾ ಗುಲಾಮೊನೆ ವಳೈನ ತುಮಾರಾ ಖೆತ್ರೊಮಾ ರ‍್ಹಯಲ ಹರಯಕ್ಕ ಜಾನ್ವರನೆ ಲಿನ ತುಮಾರಾ ಘರೊಮಾ ಘಟ್ಟ ಜ಼ಗಾವೊಮಾ ಹುಬ್ರಾಡೊ, ಕುನ್ನ ತೆ ದಿನ್ನೆ ಘರಮಾ ರ‍್ಹವಾನು ಛೊಡಿನ ಭಾರು ರ‍್ಹವಸ ತೆ ಮನಕ್ಹ ತೆ ಜಾನ್ವರ ಬರಪನಾ ಪಾನಿ ಮಾರಕ್ಹುಜ ಮರಿ ಜಾ಼ವಸ” ಕೈನ ಕದ್ಯೊ. ತೆಳಾಮಾ ಫರೊಹನನಾ ಅದಿಕಾರಿಯೊ ಕುನ್ನ ಕುನ್ನ ಯಹೊವಾನಿ ವಾತ ಐಕಿನ ಬುಚ಼ಕ್ಯಾ ತ್ಯುನೆ ತ್ಯುನಾ ಗುಲಾಮೊನೆಬಿ ವರಿ ತ್ಯುನಾ ಜಾನ್ವರೊನೆಬಿ ಘರಮಾ ಝಾಕಿನ ಮ್ಹೆಲ್ಯಾ. ಕುನ್ನ ಯಹೊವಾನಿ ಹುಶಾರ್ಕಿನೆ ಐಕ್ಯಾ ಬಗರ ವ್ಹತ್ತಾ ತ್ಯುನೆ ತ್ಯುನಾ ತ್ಯುನಾ ಜಾನ್ವರೊನೆ ಗುಲಾಮೊನೆ ತಿಮ್ಮಜ಼ ಭಾರಾ ಛೊಡ್ಯಾ. ತೆಳಾಮಾ ಯಹೊವಾ ಮೊಶೆನೆ, "ಹಬಾಳಕನ ತಾರೊ ಹತ್ತ ಉಚಾ, ತೆಳಾಮಾ ಐಗುಪ್ತ ದೆಶನಾ ಮನಕ್ಹೊಪರಬಿ ವರಿ ತ್ಯುನಾ ಜಾನ್ವರೊಪರಬಿ, ಖೆತರಮಾ ರ‍್ಹಯಲ ಪುರಾ ಅನಾಜಪರ ಬರಪನಾ ಮ್ಹೊಟಾ ಹೆಂಟಾ ಪಡಸ” ಕೈನ ಕದ್ಯೊ. ತೆಳಾಮಾ ಮೊಶೆ ತಿನಿ ಲಾಕ್ಡಿ ಹಬಾಳಕನ ಉಚಾತಾಮಾ ಯಹೊವಾ ಬಿಜಿಲಿನೆ ವರಿ ಬರಪನಾ ಪಾನಿನೆ ವಳಾಯೊ. ಬಿಜಲಿ ಜಿಮಿನನೆ ಮಾರಿ. ಯಹೊವಾ ಐಗುಪ್ತ ದೆಶನಾ ಉಪ್ಪರ ಬರಪನು ಪಾನಿ ಆವಾಲಗಾಡ್ಯೊ. ತೆ ಬರಪನು ಪಾನಿ ಘನ್ನು ಜೊ಼ರ ಆವಾಡುತು. ತಿನಾ ಕ್ಹಾತೆ ಬಿಜಿಲಿಬಿ ಘನ್ನಿ ಮಾರಾಡಿತಿ. ಐಗುಪ್ತ ದೆಶಮಾ ಹಜು಼ನ ಲಕ್ಕಾ ತ್ಯವು ಬರಪನು ಪಾನಿ ಥಯು ನ್ಹೊತು. ತೆ ಬರಪನಾ ಪಾನಿಕ್ಹು ಐಗುಪ್ತ ದೆಶಮಾ ಹರಯಕ್ಕ ಜ಼ಗಾ ಭಾರಾ ರ‍್ಹಯಲ ಮನಕ್ಹೊ ಜಾನ್ವರೊ ಮರಿ ಗಯಾ. ವರಿ ಖೆತರಮಾ ರ‍್ಹತಾಮಾ ತಿಮ್ಮ ಛೊಡಲ ಅನಾಜ ಕ್ಹಾರು ಹಾಳ ಥೈ ಗಯು. ಖೆತರೊಮಾ ರ‍್ಹಯಲ ಝಾಡೊ ಪುರಾ ಪಡಿ ಗಯಾ. ಇಸ್ರಾಯೆಲ ಮನಕ್ಹೊ ರ‍್ಹಯಲ ಗೊಷೆನ ಗಾಮ ಯಕ್ಕಜ಼ ಬರಪನು ಪಾನಿ ಪಡ್ಯು ನೈ. ತೆಳಾಮಾ ಫರೊಹನ ಮೊಶೆ ವರಿ ಆರೊನನೆ ಬಲೈನ ತ್ಯುನೊನೆ, "ಮಿ ತಪ್ಪ ಕರ‍್ಯೊಸ ಕೈನ ಹಮ್ನಾ ಮಿ ಒಪ್ಪಿಲ್ಯುಸ. ಯಹೊವಾ ಕರೆಟ್ಟ ಫೈಸಲೊ ಕರಾಲೊ ವ್ಹೈ. ಮಿ ಮಾರಾ ಮನಕ್ಹೊ ತಪ್ಪ ಕರಲವಾಲಾ ವ್ಹೈ. ಆಂ ಖತರನಾಕ ಬಿಜಲಿ ವರಿ ಬರಪನು ಪಾನಿ ಘನ್ನು ಜಾಸ್ತ ಥಯುಸ. ಎ ಕ್ಹಾರು ಹುಬ್ರಾಡ ಕೈನ ಯಹೊವಾನೆ ಪ್ರಾರ್ಥನಾ ಕರೊ ತುಮೊನೆ ಆಂ ದೆಶತೊ ಜಾ಼ವಾನಾ ಹುತಿ ತುಮೊನೆ ಇಜಾಜ಼ತ ದ್ಯುಸ. ಹಮ್ನಾ ಮಿ ತುಮೊನೆ ಹುಬ್ರಾಡತೊ ನೈ” ಕದ್ಯೊ. ತೆ ವಾತೆ ಮೊಶೆ, "ಮಿ ಆಂ ಜ಼ಗಾತೊ ಗಯಲ್ಪರ ಹತ್ತ ಉಚೈನ ಯಹೊವಾಕನ ಪ್ರಾರ್ಥನಾ ಕರುಸ. ತೆಳಾಮಾ ಬಿಜಿಲಿ ವರಿ ಬರಪನು ಪಾನಿ ಹುಬ್ರೈ ಪಡಸ. ತಿನಾಕ್ಹು ತು ಆಂ ಪುರಾ ದುನಿಯಾಜ ಯಹೊವಾನಾ ಹತ್ಮಾ ಶೆ ಕೈನ ತಿಳ್ದಿಲೆಶಿ. ತೆನೈಸೊ ಆಂ ಕ್ಹಾರು ಥಯುತಬಿ ತು ವರಿ ತಾರಾ ಅದಿಕಾರಿಯೊ ಯಹೊವಾನೆ ನೈ ಬುಚ್ಕಿ಼ನ ರ‍್ಹತಾ ಕವಾನು ಮನೆ ಗ್ವತ್ತ ಛೆ” ಕದ್ಯೊ. ಜವೆ ಘೌ ವರಿ ಅಗಸೆ ಹಾಳ ಥೈ ಗಯುತು. ಕಾಕದ್ಯಾಮ ಜವೆ ಘೌ ಮೊಳಕೆ ಛೊಡ್ಯುತು, ಅಗಸೆ ಮೊಗ್ಗ ಛೊಡ್ಯುತು. ತೆನೈಸೊ ಘೌ ವರಿ ಕಡಲೆ ತೆ ಜುನ್ನು ಅನಾಜ ರ‍್ಹಯಲ ಹುತಿ ತೆ ಹಾಳ ಥಯಾ ನೈ. ಮೊಶೆ ಫರೊಹನ ಕಂತೊ ತೆ ಜ಼ಗಾತೊ ಐನ ಯಹೊವಾಕನ ಹತ್ತ ಉಚೈನ ಪ್ರಾರ್ಥನಾ ಕರ‍್ಯೊ. ತೆಳಾಮಾ ತೆ ಬಿಜಿಲಿ ಬರಪನು ಪಾನಿ ಹುಬ್ರೈ ಗಯು. ತೆನೈಸೊ ತೆ ಬರಪನು ಪಾನಿ ವರಿ ಬಿಜಿಲಿ ಹುಬ್ರಯಲ ಫರೊಹನ ದೆಕಿನ ತೆ ವರಿ ತಿನಾ ಅದಿಕಾರಿಯೊ ತ್ಯುನು ಮನಸ ಹಜು಼ನ ಮಂಡ ಕರಲಿನ ವರಿ ಪಾಪ ಕರ‍್ಯಾ. ಯಹೊವಾ ಮೊಶೆನೆ ಕದಲ ತಿಮ್ಮಜ಼ ಥಯು. ಫರೊಹನ ತಿನು ಮನಸ ಮಂಡ ಕರಲಿನ ಇಸ್ರಾಯೆಲ ಮನಕ್ಹೊನೆ ಜಾ಼ವಾನೆ ದಿದ್ಯೊ ನೈ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.