Sikkiligar Bible
ವಿಮೊಚನ 7
ತೆಳಾಮಾ ಯಹೊವಾ ಮೊಶೆನೆ ಅಮ್ಮ ಕದ್ಯೊ, "ತುನೆ ಫರೊಹನನಾ ಕ್ಹುದಾನಿ ಜ಼ಗಾ ಹುಬ್ರಾಡ್ಯೊಸ. ದೆಕ, ತಾರೊ ದಾದೊ ಆರೊನನೆ ತಾರೊ ಪ್ರವಾದಿ ಕರ್ಯೊಸ. ಮಿ ತುನೆ ಆಗನ್ಯಾ ಕರಲ ಕ್ಹಾರು ತು ಕೌ. ಇಸ್ರಾಯೆಲನಾ ಮನಕ್ಹೊನೆ ತಿನಾ ದೆಶತೊ ಜಾ಼ವಾನೆ ಇಜಾಜ಼ತ ದ್ಯು ಕೈನ ತಾರೊ ದಾದೊಜ ಫರೊಹನನಾ ಕ್ಹಾತೆ ಬೊಲು. ತಿಮ್ಮ ರ್ಹೈತಬಿ ಮಿ ಫರೊಹನನೆ ಮನಸ ಮಂಡ ಕರಿನ, ಐಗುಪ್ತ ದೆಶಮಾ ಘನ್ನಾ ಮ್ಹೊಟಾ ಕಾಮೊ ವರಿ ಅದ್ಬುತ ಕಾಮೊ ಕರಿನ ಮಾರಿ ತಾಕತ ದೆಕಾಡುಸ. ಫರೊಹನ ತುಮಾರಿ ವಾತ ನೈ ಐಕ್ತೊ. ತೆಳಾಮಾ ಮಿ ಐಗುಪ್ತವಾಲಾವೊನೆ ಘನ್ನೊ ತ್ರಾಸ ದ್ಯುಸ, ತ್ಯುನೊನೆ ಘನ್ನಿ ಮ್ಹೊಟಿ ಶಿಕ್ಷಾ ದ್ಯುಸ ಮಾರಾ ಮನಕ್ಹೊ ಥಯಲ ಇಸ್ರಾಯೆಲನಾ ಸೆನೆನೆ ಐಗುಪ್ತ ದೆಶತೊ ಭಾರೊ ಲೌಸ. ಮಿ ಐಗುಪ್ತವಾಲಾವೊನಾ ವಿರೊದ ಹುಬ್ರೈನ ತ್ಯುನಾ ವಚ್ಮಾತೊ ಇಸ್ರಾಯೆಲ ಮನಕ್ಹೊನೆ ಭಾರೊ ಲಾತಾಮ ಮಿಜ ಯಹೊವಾ ವ್ಹೈ ಕೈನ ತ್ಯುನೊನೆ ಗ್ವತ್ತ ಥಾವಸ” ಕದ್ಯೊ. ಯಹೊವಾ ಆಗನ್ಯಾ ಕರಲ ತಿಮ್ಮಜ಼ ಮೊಶೆ ವರಿ ಆರೊನ ಕರ್ಯಾ. ತ್ಯುನೆ ಫರೊಹನನಾ ಕ್ಹಾತೆ ಬೊಲನಾ ಟೈಮಮಾ ಮೊಶೆ 80 ವರಕ್ಹನೊ ವ್ಹತ್ತೊ ವರಿ ಆರೊನ 83 ವರಕ್ಹನೊ ವ್ಹತ್ತೊ.
ಆರೊನನಿ ಲಾಕ್ಡಿ
ಯಹೊವಾ ಮೊಶೆ ವರಿ ಆರೊನನಾ ಕ್ಹಾತೆ ಬೊಲಿನ, "ಫರೊಹನ ತುಮೊನೆ, ‘ಮಿ ತುಮಾರಿ ವಾತಪರ ಬರೊಕ್ಹೊ ಮ್ಹೆಲು ಕದ್ಯಾಮ ತುಮೆ ಮಾರಾ ಕ್ಹಾಮಾ ಕುನ್ನ ನೈ ಕರಾನಾ ಕಾಮೊ ಕರು’ ಕೈನ ತುಮೊನೆ ಕದ್ಯಾಮ, ‘ತಾರಾ ಹತ್ಮಾ ರ್ಹಯಲ ಲಾಕ್ಡಿ ಫರೊಹನನಾ ಕ್ಹಾಮೊ ಹೆಟಿ ನಾಕ’ ಕೈನ ಕೌ. ತೆ ಕ್ಹಾಪ ಥೈ ಜಾ಼ವಸ” ಕೈನ ಆಗನ್ಯಾ ಕರ್ಯೊ. ಮೊಶೆ ವರಿ ಆರೊನ ಫರೊಹನಕನ ಗೈನ ತ್ಯುನೊನೆ ಆಗನ್ಯಾ ಕರಲ ತಿಮ್ಮಜ಼ ಕರ್ಯಾ. ಆರೊನ ತಿನಿ ಲಾಕ್ಡಿ ಫರೊಹನ ವರಿ ತಿನಾ ಸೈನಿಕೊನಾ ವರಿ ಅದಿಕಾರಿಯೊನಾ ಕ್ಹಾಮೊ ಹೆಟೊ ನಾಕ್ಯೊ. ನಾಕಲ್ಪರ ತೆ ಲಾಕ್ಡಿ ಕ್ಹಾಪ ಥೈ ಗೈ. ಫರೊಹನ ಐಗುಪ್ತ ದೆಶಮಾ ರ್ಹಯಲ ವಿದ್ವಾಂಸೊನೆ ವರಿ ಮಾಟಾಮಂತ್ರಾ ಕರಾಲಾವೊನೆ ಬಲಾಯೊ ತ್ಯುನೆಬಿ ತ್ಯುನಾ ಮಂತ್ರಕ್ಹು ತಿಮ್ಮಜ಼ ಕರ್ಯಾ. ತ್ಯುನೆ ತ್ಯುನಾ ಲಾಕ್ಡಿಯೊ ಹೆಟಾ ನಾಕತಾಮಾ ಕ್ಹಾಪ ಥೈ ಗಯಾ. ತೆನೈಸೊ ತೆ ಆರೊನನಿ ಲಾಕ್ಡಿ ತ್ಯುನಾ ಕ್ಹಾರಾ ಲಾಕ್ಡಿಯೊನೆ ಗಳಿ ಗೈ. ಯಹೊವಾ ಪೈಲಾ ಕದಲ ತಿಮ್ಮಜ಼ ಫರೊಹನನು ಮನಸ ಮಂಡ ಕರಿನ, ತೆ ತ್ಯುನಿ ವಾತ ಐಕ್ಯೊ ನೈ.
ಐಗುಪ್ತವಾಲಾವೊನು ತ್ರಾಸ
ರಗತ
ತೆಳಾಮಾ ಯಹೊವಾ ಮೊಶೆನೆ, "ಫರೊಹನನು ಮನಸ ಘನ್ನು ಮಂಡ ಥೈಯುಸ, ತೆ ಮನಕ್ಹೊನೆ ಜಾ಼ವಾನೆ ನೈ ದೆತೊ ಕವಾಡೊಸ. ತು ಪಾಟೆ ಫರೊಹನಕನ ಜಾ಼, ತೆ ನದಿನಾ ಪಾನಿಕನ ಆವಸತೊ. ಕ್ಹಾಪ ಥಯಲ ತೆ ಲಾಕ್ಡಿನೆ ತಾರಾ ಹತ್ಮಾ ಧರ್ಲಿನ ತು ತಿನೆ ಮಳಾನೆ ನೈಲ ನದಿನಾ ಬಿಜೆ ದಂಡಿನೆ ಹುಬ್ರೈನ ತು ತಿನಾಹುತಿ ಕೈದೊ. ತೆಳಾಮಾ ತು ರಾಜಾನೆ ಅಮ್ಮ ಕೆ, ‘ಇಬ್ರಿಯನೊ ಕ್ಹುದಾ ಥಯಲ ಯಹೊವಾ ಮನೆ ತುಕನ ವಳಾಯೊಸ, ರಾನಮಾ ತಿನೆ ಆರಾಧನಾ ಕರಾನೆ ತಿನಾ ಮನಕ್ಹೊನೆ ತು ವಳೌ ಕೈನ ಕೈತಬಿ, ತು ಐಕ್ಯೊ ನೈ. ತಿನಾಹುತಿ ಯಹೊವಾ ಸು ಕವಸ ಕದ್ಯಾಮ, ತು ಮನೆ ಯಹೊವಾ ವ್ಹೈ ಕೈನ ತಿಳ್ದಿಲಿವಾನಾಹುತಿ ಮಾರಾ ಸೆವಕನೆ ತಿನಾ ಹತ್ಮಾ ರ್ಹಯಲ ಲಾಕ್ಡಿಕ್ಹು ನೈಲ ನದಿನೆ ಮಾರಾಲಗಾಡುಸ. ತೆ ನೈಲ ನದಿನು ಪಾನಿ ರಗತ ಥೈ ಜಾ಼ವಸ. ನದಿಮಾ ರ್ಹಯಲ ಮಚ್ಲಿಯೊ ಮರಸ. ನದಿನಾ ಪಾನಿಮಾತು ಕೆಟ್ಟ ಬಾಸ ಆವಸ. ತೆ ಪಾನಿ ಪಿವಾನೆ ಐಗುಪ್ತವಾಲಾವೊನೆ ನೈ ಥಾತು ಕೈನ ಕೌ” ಕದ್ಯೊ. ಯಹೊವಾ ಮೊಶೆನಾ ಕ್ಹಾತೆ ಬೊಲಿನ, "ತು ಆರೊನನೆ ‘ತಾರಿ ಲಾಕ್ಡಿಲಿನ ತು ಐಗುಪ್ತ ದೆಶನಾ ಹರಯಕ್ಕ ಇರೆ, ಹೊಳೆ, ವಕಳೆ, ಕಾಲುವೆನೆ, ಪಾನಿ ಕಿ ರ್ಹವಸ ತ್ಯಾ ಗೈನ ತಾರಿ ಲಾಕ್ಡಿ ಉಚೌ಼’ ಕೈನ ಕೌ. ಆರೊನ ತೆ ಲಾಕ್ಡಿ ಉಚಾತಾಮಾ ಪಾನಿ ಪುರಾ ರಗತ ಥಾವಸ. ಐಗುಪ್ತ ದೆಶಮಾ ರ್ಹಯಲ ಲಾಕ್ಡಾನು ಸಾಮನಮಾ ದಗ್ಡಾನಾ ಸಾಮನಮಾ ರ್ಹಯಲ ಪಾನಿ ಪುರಾ ರಗತ ಥಾವಸ” ಕದ್ಯೊ. ಮೊಶೆ ವರಿ ಆರೊನ ಯಹೊವಾ ಕದಲ ತಿಮ್ಮಜ಼ ಕರ್ಯಾ. ಆರೊನ ಫರೊಹನ ವರಿ ತಿನಾ ಅದಿಕಾರಿಯೊನಾ ವರಿ ಸೈನಿಕೊನಾ ಕ್ಹಾಮೊ ಲಾಕ್ಡಿ ಉಚೈನ ನೈಲ ನದಿನೆ ಮಾರತಾಮಾ ತಿಮಾನು ಪುರಾ ಪಾನಿ ರಗತ ಥಯು ಗಯು. ತೆ ಪಾನಿಮಾ ರ್ಹಯಲ ಮಚ್ಲಿಯೊ ಮರಿ ಗಯೊ. ತೆ ನದಿಮಾನು ಪಾನಿ ಬಾಸಗಂದ ಥಯಲ ಹುತಿ ಐಗುಪ್ತನಾ ಮನಕ್ಹೊನೆ ತೆ ಪಾನಿ ಪಿವಾನೆಜ಼ ಥಯು ನೈ. ಐಗುಪ್ತ ದೆಶಮಾ ಕ್ಹಾಲಿ ರಗತಜ಼ ದಿಕ್ಹಾಡುತು. ತೆನೈಸೊ ಐಗುಪ್ತ ದೆಶಮಾ ರ್ಹಯಲ ಮಾಟಾಮಂತ್ರಾ ಕರಾಲಾ ತ್ಯುನಾ ಮಂತ್ರಾಕ್ಹು ತಿಮ್ಮಜ಼ ಕರತಾಮಾ ಫರೊಹನನು ಮನಸ ಹಜು಼ನಕ್ಕರ ಮಂಡ ಥಯು. ಯಹೊವಾ ಕದಲ ತಿಮ್ಮಜ಼ ಫರೊಹನ ಮೊಶೆ ವರಿ ಆರೊನನಿ ವಾತ ಐಕ್ಯೊ ನೈ. ಇಮ್ಮ ಫರೊಹನ ತೆ ಅದ್ಬುತ ಕಾಮಪರ ಧ್ಯಾನ ದಿದ್ಯೊ ನೈ ತ್ಯಾಂತೊ ತಿನಾ ಘರೆ ಗೈ ಪಡ್ಯೊ. ಕ್ಹಾರಾ ಐಗುಪ್ತನಾ ಮನಕ್ಹೊನೆ ನೈಲ ನದಿನು ಪಾನಿ ಪಿವಾನೆ ನೈ ಥಾತಾಮಾ ತ್ಯುನೆ ನದಿನಾ ದಂಡಿಮಾ ಕ್ಹಾಡಿಯೊ ಖಂದ್ಯಾ. ಯಹೊವಾ ನೈಲ ನದಿನೆ ಮಾರಿನ ಕ್ಹಾತ ದಿನ್ನ ಥಯಾ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.