Sikkiligar Bible
ವಿಮೊಚನ 6
ತೆಳಾಮಾ ಯಹೊವಾ ಮೊಶೆನೆ, "ಮಿ ಫರೊಹನನೆ ಕರಾನು ತು ಹಮ್ನಾ ದೆಕಶಿ. ತೆ ಮಿ ಕೆಕ್ಲೊ ತಾಕತವರ ವ್ಹೈ ಕೈನ ದೆಕಿನ ತ್ಯುನೊನೆ ಜಾ಼ವಾನೆ ದಿವಸ. ಮಿ ದಿವಾನಾ ತ್ರಾಸಕ್ಹು ತೆ ತುಮೊನೆ ತಿನಾ ದೆಶತೊ ವಳೈಪಡಸ” ಕದ್ಯೊ.
ಕ್ಹುದಾ ಮೊಶೆನೆ ಬಲಾಯಲ
ಕ್ಹುದಾ ಮೊಶೆನಾ ಕ್ಹಾತೆ ವರಿ ಬೊಲಿನ ಅಮ್ಮ ಕದ್ಯೊ, "ಮಿಜ಼಼ ವೈ ಯಹೊವಾ, ಮಿ ಅಬ್ರಾಹಮನೆಬಿ, ಇಸಾಕನೆಬಿ, ಯಾಕೊಬನೆಬಿ ಸರ್ವಶಕ್ತ ಥಯಲ ಕ್ಹುದಾ ಥೈನ ದಿಕ್ಹ್ಯೊ. ತೆನೈಸೊ ಯಹೊವಾ ಕೈನ ಮಾರು ನಾಮ ತ್ಯುನೊನೆ ಗ್ವತ್ತ ನ್ಹೊತು. ಮಿ ತ್ಯುನೊನೆ ಕಾನಾನ ದೆಶ ಕದ್ಯಾಮ, ತ್ಯುನೆ ಬಿಜಾ಼ ದೆಶನಾ ಥೈನ ರ್ಹಯಲ ಪ್ರವಾಸನು ದೆಶ ತ್ಯುನೊನೆ ದ್ಯುಸ ಕೈನ ತ್ಯುನಾ ಕ್ಹಾತೆ ವಡಂಬಡಿಕೆ ದಿದಲ ಛೆ. ಐಗುಪ್ತವಾಲಾ ಗುಲಾಮೊ ಕರಲಿನ ಮ್ಹೆಲಿದಲ ಇಸ್ರಾಯೆಲನಾ ಮನಕ್ಹೊನು ತ್ರಾಸ ಮನೆ ಐಕು ಐಯುಸ. ಮಿ ದಿದಲ ವಡಂಬಡಿಕೆ ಮಿ ವರಿ ಶೆ ಕರ್ಯೊ. ತಿನಾಹುತಿ, ತು ಇಸ್ರಾಯೆಲ ಮನಕ್ಹೊನೆ ಮಾರಾ ನಾಮಪರ ಸು ಕೌ ಕದ್ಯಾಮ, ‘ಮಿಜ಼಼ ಯಹೊವಾ ವೈ, ಐಗುಪ್ತಾವಾಲಾ ತುಮೊಕಂತಾ ಕರಾವಾನಾ ಕಾಮೊಕ್ಹು ಛೊಡೈನ, ತ್ಯುನಾ ಗುಲಾಮೊ ಥಯಲ ತುಮೊನೆ ಗುಲಾಮತೊ ಕಾಡಿನ, ಮಿ ತ್ಯುನೊನೆ ಘನ್ನಿ ಮ್ಹೊಟಿ ಶಿಕ್ಷಾದಿನ ತುಮೊನೆ ವಚಾ಼ಡುಸ. ಮಿ ತುಮೊನೆ ಮಾರಾ ಸ್ವಂತ ಮನಕ್ಹೊ ವ್ಹೈ ಕೈನ ಇನಿಲಿನ ತುಮೊನೆ ಕ್ಹುದಾ ಥೈನ ರ್ಹೌಸ. ಐಗುಪ್ತವಾಲಾ ತುಮೊಕನ ಕರಾವಾನಾ ಕಾಮೊಕ್ಹು ತುಮೊನೆ ಛೊಡಾಯಲ್ಪರ ಯಹೊವಾ ಥಯಲ ಮಿಜ಼಼ ತುಮಾರೊ ಕ್ಹುದಾ ವೈ ಕೈನ ತುಮೊನೆ ಗ್ವತ್ತ ಥಾವಸ. ತೆನೈಸೊ ಅಬ್ರಹಾಮ, ಇಸಾಕ ವರಿ ಯಾಕೊಬನೆ ವಾತ ದಿದಲ ದೆಶಮಾಜ ತುಮೊನೆ ಲಿನ ಜೌ಼ಸ, ತೆ ದೆಶಜ಼ ತುಮೊನೆ ರ್ಹವಾನೆ ಕೈನ ದಿ ಪಡುಸ ಕೈನ ಕವಾಲೊ ಯಹೊವಾ ಮಿಜ಼಼ ವ್ಹೈ ಕೈನ ತ್ಯುನೊನೆ ಕೆ” ಕದ್ಯೊ. ಮೊಶೆ ಕ್ಹುದಾ ಕದಲ ತಿಮ್ಮಜ಼ ಇಸ್ರಾಯೆಲ ಮನಕ್ಹೊನೆ ಕತಾಮಾ, ತ್ಯುನು ಮನಸ ಘನ್ನಾ ದುಕಮಾ ರ್ಹಯಲಹುತಿ, ವರಿ ಘನ್ನಾ ತ್ರಾಸಕ್ಹು ತ್ಯುನೆ ಕಾಮೊ ಕರಾನು ಆಯಲಹುತಿಬಿ ತ್ಯುನೆ ಮೊಶೆನಿ ವಾತನೆ ಕಾನ ದಿದ್ಯಾ ನೈ. ತೆಳಾಮಾ ಯಹೊವಾ ಮೊಶೆನಾ ಕ್ಹಾತೆ ಬೊಲಿನ, "ತು ಐಗುಪ್ತನೊ ರಾಜೊ಼ ಥಯಲ ಫರೊಹನಕನ ಗೈನ ತೆ ಇಸ್ರಾಯೆಲ ಮನಕ್ಹೊನೆ ತಿನಾ ದೆಶತೊ ಜಾ಼ವಾನೆ ದ್ಯು ಕೈನ ತು ತಿನಾ ಕ್ಹಾತೆ ಬೊಲ” ಕದ್ಯೊ. ತಿನಾಹುತಿ ಮೊಶೆ ಯಹೊವಾನಾ ಸನ್ನಿದಿಮಾ, "ಇಸ್ರಾಯೆಲ ಮನಕ್ಹೊಜ಼ ಮಾರಿ ವಾತ ನತ್ತಿ ಐಕಾಡಾ; ತಿಮ್ಮ ರ್ಹತಾಮಾ ತೊದಲಿನ ಬೊಲಾನಾ ಮಾರಿ ವಾತ ಫರೊಹನ ಐಕಸ ಸು? ಕದ್ಯೊ. ಯಹೊವಾ ಮೊಶೆ ವರಿ ಆರೊನನಾ ಕ್ಹಾತೆ ಬೊಲಿನ, "ಇಸ್ರಾಯೆಲವಾಲಾವೊನೆ ಐಗುಪ್ತ ದೆಶತೊ ಬಲೈಲಾವಾನಾ ಹುತಿ ತ್ಯುನೊನೆ ಇಸ್ರಾಯೆಲ ಮನಕ್ಹೊಕನ ವರಿ ಐಗುಪ್ತನಾ ರಾಜಾ಼ಕನ ವಳಾಯೊ.”
ಮೊಶೆ ವರಿ ಅರೊನನು ಖಾಂದಾನ
ಇಸ್ರಾಯೆಲನಾ ಖಾಂದಾನನಾ ಘರಮಾ ಮ್ಹೊಟಾ: ಇಸ್ರಾಯೆಲನೊ ಪೈಲಾರ ದಿಕ್ರೊ ಥಯಲ ರುಬೆನನಾ ಬಚ್ಚಾ: ಹನೊಕ, ಫಲ್ಲು, ಹೆಚ್ರೊನ, ವರಿ ಕರ್ಮಿ ಇವ್ನೆಜ ರುಬೆನನಾ ಖಾಂದಾನಮಾ ಮ್ಹೊಟಾ ವ್ಹೈ. ಸಿಮೆಯೊನನಾ ಬಚ್ಚಾ: ಯೆಮೂಯೆಲ, ಯಾಮಿನ, ಓಹದ, ಯಾಕಿನ, ಚೊಹರ, ವರಿ ಕಾನಾನ್ಯನಿ ಬಾಕ್ಡಿಕಂತೊ ಹುಟ್ಟಲ ಸೌಲ ಇವ್ನೆಜ ಸಿಮೆಯೊನನಾ ಖಾಂದಾನಮಾ ಮ್ಹೊಟಾ ವ್ಹೈ. ಲೆವಿನಾ ಖಾಂದನವಾಲಾವೊಮಾ: ಗೆರ್ಷೊನ, ಕೆಹಾತ, ಮೆರಾರಿ, ಇವ್ನೆಜ ವ್ಹೈ. ಲೆವಿ 137 ವರಕ್ಹ ಜಿವ್ತೊ ವ್ಹತ್ತೊ. ಖಾಂದಾನನಾ ಹಿಸಾಬೆ ಗೆರ್ಷೊನನಾ ಬಚ್ಚಾ: ಲಿಬ್ನಿ ವರಿ ಶಿಮ್ಮಿ. ಕೆಹಾತನಾ ಚಾರ ಬಚ್ಚಾ: ಅಮ್ಮ್ರಾಮ, ಇಚ್ಹಾರ, ಹೆಬ್ರೊನ, ಉಜ್ಜಿಯೆಲ. ಕೆಹಾತ 133 ವರಕ್ಹ ಜಿವ್ತೊ ವ್ಹತ್ತೊ. ಮೆರಾರಿನಾ ಬಚ್ಚಾ: ಮಹ್ಲಿ, ಮೂಷಿ ಖಾಂದಾನನಾ ಪ್ರಕಾರ ಲೆವಿನಾ ಘರದಾನಾನಾ ಅವನೆಜ ವೈ. ಅಮ್ಮ್ರಾಮ ತಿನಾ ಬಾನಾ ಭೆನ ಥಯಲ ಯೊಕೆಬದಳನೆ ಹಿವಾ ಕರಲಿದ್ಯೊ. ತೆ ತಿನಾಕ್ಹು ಆರೊನನೆ ವರಿ ಮೊಶೆನೆ ಜ಼ನ್ನಿ. ಅಮ್ಮ್ರಾಮ 137 ವರಕ್ಹ ಜಿವ್ತೊ ವ್ಹತ್ತೊ. ಇಚ್ಹಾರನನಾ ಬಚ್ಚಾ ಕೊರಹ, ನೆಫೆಗ ವರಿ ಚಿಕ್ರಿ. ಉಜ್ಜಿಯರಲನಾ ಬಚ್ಚಾ: ಮಿಷಾಯೆಲ, ಎಲ್ಜಾ಼ಫಾನ ವರಿ ಸಿತ್ರಿ ವ್ಹೈ. ಆರೊನ ಅಮ್ಮಿನಾದಾಬನಿ ದಿಕ್ರಿನಾ ಕ್ಹಾತೆ ಕದ್ಯಾಮ ನಹಶೊನನಿ ಭೆನ ಥಯಲ, ಎಲಿಶೆಬನಾ ಕ್ಹಾತೆ ಹಿವಾ ಕರಲಿದ್ಯೊ. ತೆ ಎಲಿಶೆಬ ತಿನಾಕ್ಹು ನಾದಾಬ, ಅಬಿಹು, ಎಲ್ಲಾಜಾರ, ವರಿ ಇತಾಮಾರನೆ ಜ಼ನ್ನಿ. ಕೊರಹನಾ ಬಚ್ಚಾ: ಅಸ್ಸಿರ, ಎಲ್ಕಾನ, ಅಬಿಯಾಸಾಫ ಇವ್ನೆಜ ಕೊರಹನನಾ ಘರದಾನನಾ ವ್ಹೈ. ಆರೊನನೊ ದಿಕ್ರೊ ಎಲ್ಲಾಜಾರ ಪುಟಿಯೆಲನಾ ಯಕ್ಕ ದಿಕ್ರಿನಾ ಕ್ಹಾತೆ ಹಿವಾ ಕರಲಿದ್ಯೊ. ತೆ ಫಿನೆಹಾಸನೆ ಜ಼ನ್ನಿ. ತ್ಯುನಾ ಘರದಾನನಾ ಹಿಸಾಬೆ ಇವ್ನೆಜ ಲೆವಿಯನಾ ಮ್ಹೊಟಾ ವ್ಹೈ. ಇಸ್ರಾಯೆಲನಾ ಘರದಾನಾನಾ ಹಿಸಾಬೆ, ಐಗುಪ್ತ ದೆಶತೊ ತ್ಯುನೊನೆ ಲೌ ಕೈನ ಯಹೊವಾ ಕಿನೆ ಕದ್ಯೊ ತಿವ್ನೆ ಆರೊನನೆ ವರಿ ಮೊಶೆನೆ ವ್ಹೈ. ಇಸ್ರಾಯೆಲನಾ ಮನಕ್ಹೊನೆ ಐಗುಪ್ತ ದೆಶತಾ ಭಾರಾ ಲಾವಾನಾ ಹುತಿ ಐಗುಪ್ತನೊ ರಾಜೊ಼ ಥಯಲ ಫರೊಹನನಾ ಕ್ಹಾತೆ ಬೊಲಲವಾಲಾ ಮೊಶೆ ವರಿ ಆರೊನ ಇವ್ನೆಜ ವ್ಹೈ.
ಮೊಶೆ ವರಿ ಆರೊನನೆ ಯಹೊವಾನಿ ಆಗನ್ಯಾ
ಯಹೊವಾ ಐಗುಪ್ತ ದೆಶಮಾ ಮೊಶೆನಾ ಕ್ಹಾತೆ ಬೊಲಲ ಟೈಮಮಾ, ತೆ ಮೊಶೆನೆ, "ಮಿ ಯಹೊವಾ ವ್ಹೈ ಮಿ ತುನೆ ಕವಾನು ಕ್ಹಾರು ತು ಐಗುಪ್ತನಾ ರಾಜೊ಼ ಥಯಲ ಫರೊಹನಕನ ಕೌ” ಕದ್ಯೊ. ತೆ ವಾತೆ ಮೊಶೆ ಯಹೊವಾನೆ, "ಐಕ ಸ್ವಾಮಿ ಮಿ ಬೊಲ್ತಾಮಾ ತೊದಲುಸ ವರಿ ಚೊಕಿ ತರಾ ಬೊಲಾನೆ ಆತು ನೈ, ಫರೊಹನ ಕಿಮ್ಮ ಮಾರಿ ವಾತ ಐಕಸ” ಕದ್ಯೊ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.