Sikkiligar Bible
ವಿಮೊಚನ 5
ಐಗುಪ್ತನಾ ರಾಜಾ಼ಕನ ಮೊಶೆ ವರಿ ಆರೊನ
ತೆ ಥಯಲ್ಪರ ಮೊಶೆ ವರಿ ಆರೊನ ಫರೊಹನ ರಾಜಾ ಕನ ಗೈನ, "ಇಸ್ರಾಯೆಲನೊ ಕ್ಹುದಾ ಥಯಲ ಯಹೊವಾ ಅಮ್ಮ ಕವಸ, ಮಾರಾ ಮನಕ್ಹೊ ಮಾರಾಹುತಿ ರಾನಮಾ ಮರ್ಯಾದಿ ದಿವಾನೆ ಜ಼ತ್ರಾ ಕರು ಕೈನ ತ್ಯುನೊನೆ ಅಪ್ಪಣೆ ದ್ಯು ಕೈನ ಕದ್ಯೊಸ” ಕದ್ಯಾ. ತಿನಾಹುತಿ ಫರೊಹನ, ಯಹೊವಾ ಕವಾಲೊ ಕುನ್ನ ವ್ಹೈ? ಮಿ ತಿನಿ ವಾತ ಐಕಿನ ಇಸ್ರಾಯೆಲನಾ ಮನಕ್ಹೊನೆ ಜಾ಼ವಾನೆ ದ್ಯು ಸು? ಯಹೊವಾ ಕುನ್ನ ವ್ಹೈ ಕೈನ ಮನೆ ಗ್ವತ್ತ ನತ್ತಿ. ಅಕ್ಲುಜ಼ ನೈಸೊ, ಇಸ್ರಾಯೆಲನಾ ಮನಕ್ಹೊನೆ ಮಿ ಜಾ಼ವಾನೆ ದೆತೊಜ಼ ನೈ” ಕದ್ಯೊ. ತೆಳಮಾ ತ್ಯುನೆ, "ಇಬ್ರಿಯವಾಲಾವೊನೊ ಕ್ಹುದಾ ಹಮೊನೆ ದಿಕ್ಹ್ಯೊ. ತು ಇಜಾಜ಼ತ ದಿದ್ಯಾರೆ ಹಮೆ ಉಸುಕನಿ ಜಿಮಿನ್ಪರ ತನ್ನ ದಿನ್ನ ಲಕ್ಕಾ ದುರ ಚಾ಼ಲಿನ, ಹಮಾರೊ ಕ್ಹುದಾ ಥಯಲ ಯಹೊವಾನಾ ಹುತಿ ಯಜ್ಞ ಕರಿನ ಐಯೆಸ. ತಿಮ್ಮ ಹಮೆ ನೈ ಕರ್ಯಾರೆ ತೆ ಹಮೊನೆ ರೊಗೊಕ್ಹು ವರಿ ತಲವಾರಕ್ಹು ಖಲಾಸ ಕರಿಪಡಸ” ಕೈನ ಕದ್ಯಾ. ಐಗುಪ್ತನೊ ರಾಜೊ಼ ತ್ಯುನೊನೆ, "ಮೊಶೆ ವರಿ ಆರೊನ, "ಆಂ ಮನಕ್ಹೊ ತ್ಯುನು ಕಾಮ ನೈ ಕರು ಕೈನ ತುಮೆ ಕಾ ಅಡ್ಡ ಆವಾಡಾಸ? ತುಮೆ ಗುಲಾಮೊ ಕರಾನಾ ಕಾಮೆ ಜಾ಼ವೊ” ಕೈನ ಕದ್ಯೊ. ತೆನೈಸೊ ಫರೊಹನ, "ಇಬ್ರಿಯವಾಲಾ ದೆಶಮಾ ಘನ್ನಾ ಶೆ. ತ್ಯುನೆ ಗುಲಾಮ ಥೈನ ಕರಾನಾ ಕಾಮೊ ಕಾ ಹುಬ್ರಾಡಾಡಾಸ? ಕದ್ಯೊ. ತೆಜ಼಼ ದಿನ್ನ ತೆ ಫರೊಹನ ಕಾಮೊ ಕರೈಲಿವಾಲಾವೊನೆಬಿ ವರಿ ತ್ಯುನಾ ಅದಿಕಾರಿಯೊನೆ ಬಲೈನ ಆಗನ್ಯಾ ದಿನ, "ಆಜ಼ತಾ ತುಮೆ ತೆ ಮನಕ್ಹೊನೆ ಇಟಂಗಿ ಕರಾನೆ ಚಾರೊ ದಿವೊ ನಕೊ. ತ್ಯುನೆಜ಼ ಚಾರೊ ಲೈನಕಾ, ತೆನೈಸೊ ತ್ಯುನೊನೆ ಆಜ಼ ಲಕ್ಕಾ ಕರಲ ಹಿಸಾಬ ಯಕ್ಲಾಜ ಇಟಂಗಿಯೊ ರ್ಹೌ, ಸುಜ಼ ಕಮ್ಮ ಥೌ ನೈ. ತ್ಯುನೆ ಅಂಗ ರಾಕಾಲಾ ವ್ಹೈ ತಿನಾಹುತಿ ತ್ಯುನೆ, "ಹಮೆ ಗೈನ ಹಮಾರಾ ಕ್ಹುದಾನೆ ಯಜ್ಞ ಕರಿನ ಆವಾನೆ ಇಜಾಜ಼ತ ದೆ” ಕೈನ ಮಾಂಗಿಲಿವಾಡಾಸ. ತುಮೆ ಆಂ ಮನಕ್ಹೊನಾ ಫಾಲತು ವಾತೊಪರ ಧ್ಯಾನ ದ್ಯು ನೈ ಕೈನ ತುಮೆ ಅವ್ನೊಕನ ಜಾಸ್ತ ಕಾಮ ಕರಲಿವೊ. ತ್ಯುನೆ ಹಜು ರಾಬಾದೆ” ಕೈನ ಕದ್ಯೊ.
ತೆಳಾಮಾ ಕಾಮೊ ಕರೈಲಿವಾಲಾ ವರಿ ಅದಿಕಾರಿಯೊ ತ್ಯಾಂತಾ ಭಾರಾ ಗೈನ ತೆ ಮನಕ್ಹೊನೆ, "ತುಮೊನೆ ಚಾರೊ ದ್ಯು ನೈ ಕೈನ” ಫರೊಹನ ಹಮೊನೆ ಕದ್ಯೊಸ. "ತುಮೊನೆ ಚಾರೊ ಕಿ ಮಳಸ ತ್ಯಾಜ ಗೈನ ಲಿವೊ. ತೆನೈಸೊ ತುಮಾರು ಕಾಮ ನಕ್ಕರಬಿ ಕಮ್ಮ ಥೌ ನೈ” ಕೈನ ಕದ್ಯಾ. ತಿನಾಹುತಿ ಮನಕ್ಹೊ ಕ್ಹಾರಾ ಚಾರೊ ಲಾವಾನಾ ಹುತಿ ಐಗುಪ್ತ ದೆಶಮಾ ಚಾರೊ ಕಿ ಮಲಸ ಕೈನ ಹುಡಕಾನೆ ಫೈಲಿ ಗಯಾ. ತೆನೈಸೊ ಕಾಮ ಕರೈಲಿವಾಲಾ, "ತುಮೆ ಚಾರೊ ರ್ಹತಾಮಾ ಕಿಮ ಕಾಮ ಕರತಾತಾ ತಿಮ್ಮಜ಼ ಹಮ್ನಾಬಿ ಕಾಮ ಕರು ತೆ ದಿನ್ನನು ಕಾಮ ತೆಜ಼ ದಿನ್ನೆ ಕ್ಹರೌ” ಕೈನ ತ್ಯುನೊನೆ ಜಲ್ದಿ ಜಲ್ದಿ ಕಾಮ ಕರೊ ಕೈನ ಕದ್ಯಾ. ಫರೊಹನನಾ ಅದಿಕಾರಿಯೊ ತ್ಯುನೆ ಕರಲ ಇಸ್ರಾಯೆಲನಾ ಮೆಲ್ವಿಚಾರಕರೊನೆ, "ತುಮೆ ಪೈಲಾ ಕಿಮ್ಮ ಇಟಂಗಿಯೊನಾ ಲೆಕ್ಕೊ ದೆತಾತಾ ಕಾಲ ವರಿ ಹಮ್ನಾ ಕಾ ಸಿದಾ ದಿವಾಡಾ ನತ್ತಿ? ಕೈನ ಪುಚ್ಚಿನ ತ್ಯುನೊನೆ ಮಾರತಾತಾ. ತಿನಾಹುತಿ ಇಸ್ರಾಯೆಲನಾ ಮೆಲ್ವಿಚಾರಕರೊ ಫರೊಹನ ಕನ ಗೈನ, "ತು ತಾರಾ ಆಳೊನೆ ಅಮ್ಮ ಕಾ ಕರಶಿ? ತಾರಾ ಗುಲಾಮೊನೆ, ತು ತ್ಯುನೊಪರ ಮ್ಹೆಲಲ ಅದಿಕಾರಿಯೊ ಚಾರೊ ದಿದ್ಯಾ ಬಗರಜ "ಇಟಂಗಿಯೊ ಕರೊ!” ಕೈನ ಕತಾ ಹಮೊನೆ ಮಾರಾಡಾಸ. ಅಮ್ಮ ತಾರಾ ಮನಕ್ಹೊ ಕರಾನು ಪಾಪನು ಕಾಮ ವ್ಹೈ” ಕೈನ ಕದ್ಯಾ. ತೆಳಾಮಾ ರಾಜೊ, "ತುಮೆ ಅಂಗ ರಾಕಾಲಾ ವ್ಹೈ, ತಿನಾಹುತಿಜ಼, ‘ತುಮೆ ಗೈನ ಹಮಾರಾ ಕ್ಹುದಾ ಯಹೊವಾನೆ ಯಜ್ಞ ಕರಿನ ಔ’ ಕೈನ ಕವಾಡಾಸ. ತಿನಾಹುತಿ ತುಮೆ ಹಮ್ನಾ ತುಮಾರಾ ಕಾಮೆ ಜಾ಼ವೊ ತುಮೊನೆ ಚಾರೊ ನೈ ದೆತಾ. ಚಾರೊ ನೈ ದಿತಬಿ ಇಟಂಗಿಯೊನೊ ಲೆಕ್ಕೊ ಸಿದಾ ದ್ಯು” ಕದ್ಯೊ. ದಿನ್ನೆ ದಿನ್ನೆಬಿ ಇಟಂಗಿಯೊನೊ ಹಿಸಾಬ ಸಿದಾ ದ್ಯು ಕೈನ ಫರೊಹನ ಕದಲಕ್ಹು ಇಸ್ರಾಯೆಲನಾ ಮೆಲ್ವಿಚಾರಕರೊ ತ್ಯುನೆ ಘನ್ನಾ ಕೆಟ್ಟ ಪರಿಸ್ಥಿತಿಮಾ ಅಟ್ಕಿ ಗಯಾಸ ಕೈನ ತಿಳ್ದಿಲಿದ್ಯಾ. ತ್ಯುನೆ ಫರೊಹನನಾ ರಾಜ ದರ್ಬಾರಮಾತಾ ಭಾರಾ ಜಾತಾಮಾ ತ್ಯುನೊನೆ ಮಳಾನೆ ಆಯಲ ಮೊಶೆ ವರಿ ಆರೊನನೆ ಹುಬ್ರೈನ ಕೈದಾಡಾತಾ. ಮೊಶೆ ವರಿ ಆರೊನನೆ, "ಯಹೊವಾ ತುಮೊನೆ ದೆಕಿನ ಫೈಸಲೊ ಕರಾದೆ. ಕಾಕದ್ಯಾಮ ಫರೊಹನ ವರಿ ತಿನಾ ಅದಿಕಾರಿಯೊ ಹಮೊನೆ ದೆಕಿನ ಅಸೈ ಕರಾವರಕ್ಹು ತುಮೆ ಕರೊಶಿ. ಹಮೊನೆ ಖಲಾಸ ಕರಾನೆ ತ್ಯುನಾ ಹತ್ಮಾ ತುಮೆ ತಲವಾರ ದಿದ್ಯಾಸ” ಕದ್ಯಾ. "ಯಹೊವಾ ತುಮಾರಾ ತಪ್ಪ ಕಾಮನಾ ಲಿಂಗತ ತುಮೊನೆ ಶಿಕ್ಷಾ ದಿವಾದೆ” ಕೈನ ಕದ್ಯಾ.
ಮೊಶೆ ಯಹೊವಾನೆ ಚಾಡಿ ಕದಲ
ತೆಳಾಮಾ ಮೊಶೆ ತ್ಯುನೊಕಂತೊ ಯಹೊವಾಕನ ಐನ, "ಸ್ವಾಮಿ, ಆಂ ಮನಕ್ಹೊನೆ ಬಿನ್ನಕ್ಕರ ತ್ರಾಸ ದಿದ್ಯೊತೊ? ಮನೆ ವಳಾಯಲ ಶಾನಾಹುತಿ ವ್ಹೈ? ಮಿ ಫರೊಹನಕನ ಗೈನ ತಾರಾ ನಾಮಪರ ಬೊಲಲ ದಿನ್ನತೊಬಿ ತೆ ಆಂ ಮನಕ್ಹೊನೆ ತ್ರಾಸ ದಿವಾಡೊಸ. ತು ತಾರಾ ಮನಕ್ಹೊನೆ ವಚಾ಼ಡಾನೆ ಸುಜ ಕರಾಡೊ ನತ್ತಿ!” ಕೈನ ಕದ್ಯೊ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.