Sikkiligar Bible
ವಿಮೊಚನ 4
ಕ್ಹುದಾ ಮೊಶೆನೆ ದಿದಲ ಅದ್ಬುತನಿ ತಾಕತ
ತೆ ವಾತೆ ಮೊಶೆ ಯಹೊವಾನೆ, "ತ್ಯುನೆ ಮಪರ ಬರೊಕ್ಹೊ ಮ್ಹೆಲ್ಯಾ ಬಗರ, ಮಾರಿ ವಾತ ಐಕ್ಯಾ ಬಗರ, ಯಹೊವಾ ತುನೆ ದಿಕ್ಹ್ಯೊಜ಼ ನತ್ತಿ ಕೈನ ಕದ್ಯಾಮ ಮಿ ಸು ಕರು? ಕದ್ಯೊ. ತೆ ವಾತೆ ಯಹೊವಾ ತಿನೆ, "ತಾರಾ ಹತ್ಮಾ ಸು ಶೆ? ಕೈನ ಪುಚ್ಯೊ. ತೆ, "ಆಂ, ಲಾಕ್ಡಿ ವ್ಹೈ” ಕದ್ಯೊ. ಯಹೊವಾ ತಿನೆ, "ತೆ ಹೆಟೊ ಜಿಮಿನ್ಪರ ಭಿರ್ಕಾ” ಕದ್ಯೊ. ತೆ ಲಾಡ್ಕಿ ಜಿಮಿನ್ಪರ ನಾಕಲ ಬರಬ್ಬರ ತೆ ಕ್ಹಾಪ ಥೈ ಗೈ! ಮೊಶೆ ತಿನೆ ದೆಕಿನ ಬುಚ್ಕಿ಼ನ ನ್ಹಾಟಿನ ಗೈ ಪಡ್ಯೊ. ಯಹೊವಾ ಮೊಶೆನೆ, "ತು ಹತ್ತ ಆಗೊ ಕರಿನ ತಿನಿ ಪಿಚ್ಡಿ ಧರ” ಕದ್ಯೊ. ತೆ ತಿನಿ ಪಿಚ್ಡಿ ಧರೆಲ ಬರಬ್ಬರ ತೆ ವರಿ ಲಾಕ್ಡಿ ಥೈ. ತೆಳಾಮಾ ಯಹೊವಾ ತಿನೆ, "ಅನಾಹುತಿ ತ್ಯುನೆ ತ್ಯುನಾ ಪುರ್ವಜೊ ಥಯಲ ಅಬ್ರಹಾಮ, ಇಸಾಕ, ಯಾಕೊಬನೊ ಕ್ಹುದಾ ಥಯಲ ಯಹೊವಾ, ತುನೆ ದಿಕ್ಹಲ ಕ್ಹರಿ ವ್ಹೈ ಕೈನ ಬರೊಕ್ಹೊ ಕರಸ” ಕೈನ ಕದ್ಯೊ.
ಯಹೊವಾ ವರಿ ತಿನೆ, "ತಾರೊ ಹತ್ತ ಅಂಗ್ಡಾನಾ ಮ್ಹೈ ಘಾಲಿನ ಛಾತಿಪರ ಮ್ಹೆಲ್ಲೆ” ಕದ್ಯೊ. ತೆ ತಿನಾ ಲಿಂಗತಜ಼ ಮ್ಹೆಲ್ಲಿದ್ಯೊ ತಿನೊ ಹತ್ತ ಧೊಳಿ ಸುರ್ಮಿ ಲಿಂಗತ ಥೈನ ಬರಪ ಲಿಂಗತ ಧೊಳೊ ಥಯೊ. ಯಹೊವಾ ತಿನೆ, ತು ತಾರೊ ಹತ್ತ ವರಿ ಅಂಗ್ಡಾನಾ ಮ್ಹೈ ಘಾಲಿನ ಛಾತಿಪರ ಮ್ಹೆಲ್ಲೆ ಕದ್ಯೊ. ತೆ ವರಿ ತಿನಾ ಲಿಂಗತಜ಼ ಕರ್ಯೊ ಕರತಾಮಾ ಪೈಲಾ ಕಿಮ ವ್ಹತ್ತೊ ತಿನೊ ಹತ್ತ ತಿನಾ ಲಿಂಗತ ಥಯೊ. ತೆಳಾಮಾ ಯಹೊವಾ ತಿನೆ, "ತ್ಯುನೆ ತುಪರ ಬರೊಕ್ಹೊ ಮ್ಹೆಲ್ಯಾ ಬಗರ, ಪೈಲಾ ತು ಕರಲ ಕಾಮನೆ ಇನ್ಕಾರ್ಯಾ ತಬಿ, ಬೆವಾ ಸಲಾ ಕರಲ ಕಾಮನೆ ದೆಕಿನ ತುಪರ ಬರೊಕ್ಹೊ ಕರಸ. ತೆ ಭಂಬಿ ಕಾಮೊ ದೆಕಿನಬಿ, "ತ್ಯುನೆ ತುಪರ ಬರೊಕ್ಹೊ ನೈ ಮ್ಹೆಲ್ಯಾರೆ, ತಾರಿ ವಾತೊ ನೈ ಐಕ್ಯಾರೆ, ತು ನೈಲ ನದಿನು ಪಾನಿ ಲಿನ ಕುಕ್ಹಿ ಜಿಮಿನ್ಪರ ರಿಚೌ. ತೆಳಾಮಾ ತೆ ಕುಕ್ಹಿ ಜಿಮಿನ್ಪರ ರಿಚಾಯಲ ಪಾನಿ ರಗತ ಥಾವಸ” ಕೈನ ಕದ್ಯೊ.
ತೆಳಾಮಾ ಮೊಶೆ ಯಹೊವಾನೆ, "ಕರ್ತಾ, ಮನೆ ವಳೌ ನಕೊ. ಮಿ ಕೆಳಾಮಾಬಿ ಚೊಕಿ ತರಾ ಬೊಲಾಲೊ ನ್ಹವ್ಹೈ, ತು ಮಾರಾ ಕ್ಹಾತೆ ಬೊಲ್ತಾಮಾತೊಬಿ ತಿಮ್ಮಜ ಛೆ. ಮಿ ತೊದಲುಸ ವರಿ ಹಲ್ಲು ಶೆ. ಕಿನೆಬಿ ಬೊಲಾನೆ ಮಿ ಪಾಚೊ ಸರ್ಕುಸ” ಕೈನ ಕದ್ಯೊ. ತೆ ವಾತೆ ಯಹೊವಾ ತಿನೆ, "ಮನಕ್ಹೊನೆ ಬೊಲಾನೆ ಮ್ಹೊಡು ದಿದಲವಾಲು ಕುನ್ನ ವ್ಹೈ? ಯಕ್ಲಾನೆ ಮುಕೊ ,ಯಕ್ಲಾನೆ ಕಿವಡೊ, ಯಕ್ಲಾನೆ ಡೊಳಾ ವರಿ ಯಕ್ಲಾನೆ ಕುಡ್ಡೊ ಕರಲವಾಲು ಕುನ್ನ ವ್ಹೈ? ಯಹೊವಾ ಥಯಲವಾಲೊ ಮಿಜ಼಼ ನ್ಹವ್ಹೈ ಸು? ತಿನಾಹುತಿ ತು ಹಮ್ನಾಜ ಜಾ಼, ಮಿ ತುನೆ ಬೊಲಾನೆ ಮದದ ಕರುಸ, ವರಿ ತು ಸು ಬೊಲು ಕೈನ ಮಿ ತುನೆ ಕೌಸ” ಕೈನ ಕದ್ಯೊ. ತೆ ವಾತೆ ಮೊಶೆ, "ಕರ್ತಾ, ಮಪರ ದಯಾ ಕರಿನ ಬಿಜೆಕ್ಲಾನೆ ವಳಾ” ಕದ್ಯೊ. ತೆಳಾಮಾ ಯಹೊವಾ ಮೊಶೆಪರ ರೆಕ್ಹ ಥೈನ ತಿನೆ, "ಲೆವಿನೊ ಆರೊನ ತಾರೊ ಭೈ ವ್ಹೈ ನೈ? ತಿನೆ ಸಿದಾ ಬೊಲಾನೆ ಆವಸ ಕೈನ ಮನೆ ಗ್ವತ್ತ ಛೆ. ತೆಜ಼಼ ತುನೆ ಮಳಾನೆ ಆವಸ. ತುನೆ ಮಳತಾಮಾ ತೆ ತಿನಾ ಮನಸಮಾಜ ಕುಶಿ ಥಾವಸ. ತು ತಿನಾ ಕ್ಹಾತೆ ಬೊಲಿನ ಕವಾನಾ ವಿಶಯ ತಿಳ್ಸಾ. ಮಿ ತುನೆಬಿ ವರಿ ತಿನೆಬಿ ಸು ಬೊಲು ಕೈನ ಮದದ ಕರುಸ. ವರಿ ತು ಸು ಕರು ಕವಾನು ಕೈನ ದ್ಯುಸ. ತೆ ತಾರಾ ಬದಲ ಮನಕ್ಹೊನಾ ಕ್ಹಾತೆ ಬೊಲಸ. ತೆ ತುನೆ ಬೊಲಾನಿ ಜಿಬ್ಬ ರ್ಹಯಲ ಲಿಂಗತ ರ್ಹವಸ. ತು ತಿನೆ ಕ್ಹುದಾನಾ ಲಿಂಗತ ರ್ಹಶಿ. ತೆನೈಸೊ ಆಂ ಲಾಕ್ಡಿ ತಾರಾ ಕ್ಹಾತೆ ಲಿನ ಜಾ಼. ಅನಾಕ್ಹುಜ಼ ತು ಅದ್ಬುತ ಕಾಮೊ ಕರಶಿ” ಕದ್ಯೊ.
ಮೊಶೆ ಐಗುಪ್ತ ದೆಶನೆ ಫರಿನ ಆಯಲ
ತೆಳಾಮಾ ಮೊಶೆ ತಿನೊ ಮಾಮೊ ಥಯಲ ಇತ್ರೊನಕನ ಐನ ತಿನೆ, "ಮಿ ಐಗುಪ್ತ ದೆಶಮಾ ರ್ಹಯಲ ಮಾರಾ ಭಾಯೊಕನ ಗೈನ ತ್ಯುನೆ ಜಿವ್ತಾ ಶೆ ಸು ನೈ ಕೈನ ದೆಕುಸ” ಕದ್ಯೊ. ಇತ್ರೊನ ಮೊಶೆನೆ, "ತು ಅರಾಮ ಗೈನ ಆ” ಕದ್ಯೊ. ಯಹೊವಾ ಮಿದ್ಯಾನಮಾ ಮೊಶೆನೆ, ತು ಐಗುಪ್ತ ದೆಶನೆ ಫರಿನ ಜಾ಼. ತುನೆ ಖಲಾಸ ಕರಾನೆ ದೆಕಲವಾಲಾ ಮರಿಗಯಾಸ ಕದ್ಯೊ. ಮೊಶೆ ತಿನಾ ಬಾಕ್ಡಿ ಬಚ್ಚಾ಼ವೊನೆ ಗದ್ಡಾಪರ ಬೈಟಾಡಿನ ತ್ಯುನೊನೆ ಬಲೈಲಿನ ತಿನಾ ಕ್ಹಾತೆ ತೆ ಕ್ಹುದಾ ಕದಲ ಲಾಕ್ಡಿಬಿ ಲಿನ ಐಗುಪ್ತ ದೆಶೆ ಗಯೊ. ಯಹೊವಾ ಮೊಶೆನೆ ಅಮ್ಮ ಕದ್ಯೊ, "ತು ಐಗುಪ್ತ ದೆಶನೆ ಫರಿನ ಆತಾಮಾ ಮಿ ತಾರಾ ಹತೆ ಕರಲ ಅದ್ಬುತ ಕಾಮೊ ತು ಫರೊಹನನಾ ಕ್ಹಾಮೊ ಕರು. ತು ತೆಕ್ಲು ಕ್ಹಾರು ಕರಿತಬಿ ಮಿ ತಿನು ಮನಸ ಮಂಡ ಕರುಸ. ತಿನಾಹುತಿ ತೆ ಮನಕ್ಹೊನೆ ಜಾ಼ವಾನೆ ದೆತೊ ನೈ. ತೆಳಾಮಾ ತು ಫರೊಹನನೆ, ‘ಇಸ್ರಾಯೆಲ ಮಾರೊ ಪೈಲಾರ ದಿಕ್ರೊ ವ್ಹೈ. ವರಿ ತು ಮಾರಾ ದಿಕ್ರಾನೆ ತಾರಾ ದೆಶತೊ ವಳೈನ ಮನೆ ಆರಾಧನಾ ಕರಾನೆ ತಿನೆ ಇಜಾಜ಼ತ ದ್ಯು. ತು ಮಾರಿ ವಾತ ನೈ ಐಕ್ಯೊ ಕದ್ಯಾಮ, ಮಿ ತುನೆ ರ್ಹಯಲ ಪೈಲಾರ ದಿಕ್ರಾನೆ ಮಾರಿ ಪಡುಸ ಕೈನ ಯಹೊವಾ ಕವಾಡೊಸ” ಕೈನ ತಿನೆ ತಿಳಸೌ. ತೆನೈಸೊ ಮೊಶೆ ವಾಟ್ಮಾ ಜಾ಼ತಾಮಾ, ಝುಪ್ಡಾಮಾ ರ್ಹತಾಮಾ ಯಹೊವಾ ತಿನಾ ಕ್ಹಾಮೊ ಐನ ತಿನು ಜ಼ಲಮ ಕಾಡಿಪಡು ಕೈನ ವ್ಹತ್ತೊ. ತಿಮ್ಮ ರ್ಹತಾಮಾ ಚಿಪ್ಪೊರಳ ಯಕ್ಕ ಚುಪ ದಗ್ಡೊಲಿನ ತಿನಾ ದಿಕ್ರಾನೆ ಖತ್ನಾ ಕರಿನ ಮೊಶೆನಾ ಪಗೊನೆ ಮುಟ್ಟಾ ಲಾಗಾಡಿ. ತೆ ಥಯಲ್ಪರ "ತು ಮಾರೊ ರಗತಕ್ಹು ಮಾಟಿ ವ್ಹೈ” ಕದಿ. ತೆಳಾಮಾ ಯಹೊವಾ ತಿನೆ ಮಾರ್ಯೊ ನೈ. ತೆಳಾಮಾ ತೆ, "ಖತ್ನಾ ಕರಲಹುತಿ ತು ಮಾರೊ ರಗತಕ್ಹು ಮಾಟಿ ವ್ಹೈ” ಕೈನ ಕದಿ. ತೆನೈಸೊ ಯಹೊವಾ ಆರೊನನೆ, "ತು ಮೊಶೆನೆ ಮಳಾನೆ ಉಸುಕನಿ ಜಿಮಿನ್ಪರ ಜಾ಼” ಕದ್ಯೊ. ತೆ ಗೈನ ಕ್ಹುದಾನಾ ಡೊಂಗರಮಾ ತಿನೆ ಮಳಿನ ಗಳೆ ಲಗಾಳಿನ ಮಟ್ಟಿ ದಿದ್ಯೊ. ತೆಳಾಮಾ ಮೊಶೆ ಆರೊನನೆ, ತಿನೆ ವಳಾಯಲ ಯಹೊವಾನಾ ಕ್ಹಾರಾ ವಾತೊ, ತಿನೆ ಕದಲ ಅದ್ಬುತ ಕಾಮೊ, ತೆ ಕರಲ ಪುರಾ ಆರೊನನೆ ತಿಳಸಾಯೊ. ತೆ ಥಯಲ್ಪರ ಮೊಶೆ ವರಿ ಆರೊನಾ ಗೈನ ಕ್ಹಾರಾ ಇಸ್ರಾಯೆಲೊನಾ ಶಾನಾವೊನೆ ಮಳಾಯಾ. ಯಹೊವಾ ಮೊಶೆನೆ ಕದಲ ಕ್ಹಾರಾ ವಾತೊ ಆರೊನ ತ್ಯುನೊನೆ ತಿಳಸಿನ ಮನಕ್ಹೊನಾ ಕ್ಹಾಮೊ ಅದ್ಬುತ ಕಾಮ ಕರ್ಯೊ. ಮನಕ್ಹೊ ತೆ ವಾತೊಪರ ಬರೊಕ್ಹೊ ಮ್ಹೆಲ್ಯಾ. ಯಹೊವಾ ಇಸ್ರಾಯೆಲ ಮನಕ್ಹೊಪರ ಮರಗಿನ ತ್ಯುನಿ ಕೆಟ್ಟ ಪರಿಸ್ಥಿತಿ ದೆಕ್ಯೊಸ ವರಿ ತ್ಯುನೊನೆ ಛೊಡಾವಸ ಕೈನ, ಐಕ್ತಾಮಾ ಮಾತಾ ಹೆಟಾ ಕರಿನ ತಿನೆ ಆರಾಧನಾ ಕರ್ಯಾ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.