ವಿಮೊಚನ 3

ಕ್ಹುದಾ ಮೊಶೆನೆ ಬಲಾಯಲ

1ಮೊಶೆ ತಿನೊ ಮಾಮೊ ಥಯಲ, ವರಿ ಮಿದ್ಯಾನನೊ ಯಾಜಕ ಥಯಲ ಇತ್ರೊನನಾ ಬಕ್ರಾ ಚರಾತೊ ರ‍್ಹತಾಮಾ ರಾನನಾ ಬಿಜೆಕ್ಕ ಬಜಿ ತೆ ಬಕ್ರಾವೊನೆ ಚರಾತೊ ಚರಾತೊ, ಸಿನಾಯ ಕವಾನಾ ಪವಿತ್ರ ಡೊಂಗರೆ ಆಯೊ. 2ತೆಳಾಮಾ ಕ್ಹುದಾನೊ ದುತ ತಿನೆ ಕಾಟಾನಿ ಕಂಟಿಯೊಮಾ ಲಾಗೆಲ ಆಗ ಲಿಂಗತ ದಿಕ್ಹ್ಯೊ. ಮೊಶೆ ತೆ ಕಾಟಾನಿ ಕಂಟಿಯೊಕನ ದೆಕ್ತಾಮಾ ತೆ ಕಾಟಾನಿ ಕಂಟಿಮಾ ಆಗ ಲಾಗಿತಿ; ತೆನೈಸೊ ತೆ ಕಾಟಾನಿ ಕಂಟಿಯೊ ಬಳಾಡಾ ನ್ಹೊತಾ. 3ತೆಳಾಮಾ ಮೊಶೆ, "ಆಂ ಸು ವ್ಹೈ! ಆಂ ಕಾಟಾನಿ ಕಂಟಿಯೊ ಬಳಾಡಾ ನತ್ತಿತೊ! ಆಂ ಸು ಥಾವಾಡುಸ ಕೈನ ಕ್ಹಾಮೊ ಗೈನ ದೆಕುಸ” ಕೈನ ವಿಚಾರ ಕರ‍್ಯೊ. 4ತೆ ಸು ಥಾವಾಡುಸ ಕೈನ ದೆಕಾನಾ ಹುತಿ ಕ್ಹಾಮೊ ಆವಾಡೊಸ ಕೈನ ಯಹೊವಾ ಕ್ಹುದಾ ದೆಕ್ಯೊ. ತೆಳಾಮಾ ಕ್ಹುದಾ ತೆ ಕಾಟಾನಿ ಕಂಟಿಯೊಮಾತೊ, "ಮೊಶೆ, ಮೊಶೆ” ಕೈನ ತಿನೆ ಬಲಾಯೊ. ತಿನಾಹುತಿ ಮೊಶೆ, "ಹಾಂ ಮಿ ಛೆ” ಕದ್ಯೊ. 5ಕ್ಹುದಾ ತಿನೆ, "ತು ಆಂ ಕಂಟಿಯೊಕನ ಔ ನಕೊ! ತು ಘಾಲ್ಲಿದಲ ಕಾರಮಲಿಯೊ ಕಾಡ, ಕಾಕದ್ಯಾಮ ತು ಹುಬ್ರಯಲ ಜ಼ಗಾ ಪರಿಶುದ್ದ ಜ಼ಗಾ ವ್ಹೈ” ಕೈನ ಕದ್ಯೊ. 6ತೆನೈಸೊ ಕ್ಹುದಾ ತಿನೆ, "ಮಿ ತಾರೊ ಪಿತೃ ಥಯಲ, ಅಬ್ರಾಹಾಮನೊ ಕ್ಹುದಾ ವ್ಹೈ, ಇಸಾಕನೊ ಕ್ಹುದಾ ವ್ಹೈ, ಯಾಕೊಬನೊ ಕ್ಹುದಾ ವ್ಹೈ” ಕದ್ಯೊ. ಮೊಶೆ ಕ್ಹುದಾನೆ ದೆಕಾನೆ ಬುಚ್ಕಿ಼ನ ತಿನು ಮ್ಹೊಡು ಝಾಕಿ ಲಿದ್ಯೊ. 7ತೆಳಾಮಾ ಯಹೊವಾ ತಿನೆ, "ಐಗುಪ್ತ ದೆಶಮಾ ರ‍್ಹಯಲ ಮಾರಾ ಮನಕ್ಹೊನು ತ್ರಾಸ ಮಿ ದೆಕ್ಯೊಸ, ತ್ಯುನೆ ಗುಲಾಮೊ ಥೈನ ಕರಾನಾ ಕಾಮೊನಾ ಹುತಿ, ಮಕನ ರವಾನು ಮನೆ ಐಕು ಐಯುಸ. ತ್ಯುನು ದುಕ ಮನೆ ಗ್ವತ್ತ ಛೆ. 8ತಿನಾಹುತಿ ತ್ಯುನೊನೆ ಐಗುಪ್ತನಾ ಹತ್ಮಾತೊ ಛೊಡಾವಾನಾ ಹುತಿ ತೆ ದೆಶತೊ ತ್ಯುನೊನೆ ದುದ್ದ ವರಿ ಜೆನ ಹರದಾನಾ ಮ್ಹೊಟಾ ದೆಶನೆ ಕದ್ಯಾಮ ಕಾನಾನ್ಯನಾ, ಹಿತ್ತಿಯನಾ, ಅಮ್ಮೊರಿಯನಾ, ಪೆರೆಜಿಯನಾ, ಹಿವ್ವಿಯನಾ, ಯೆಬುಸಿಯನಾ ಮನಕ್ಹೊ ರ‍್ಹವಾನಾ ದೆಶನೆ ಲಿನ ಜಾ಼ವಾನಾ ಹುತಿ ಉತ್ರಿನ ಆಯೊಸ. 9ಹಮ್ನಾ ಇಸ್ರಾಯೆಲ ಮನಕ್ಹೊನು ಆವಾಜ ಮನೆ ಐಕು ಐಯುಸ. ಐಗುಪ್ತವಾಲಾ ತ್ಯುನೊನೆ ದಿವಾನು ತ್ರಾಸ ಮಿ ದೆಕ್ಯೊಸ. 10ತಿನಾಹುತಿ ತು ಆಂ, ಮಾರಾ ಮನಕ್ಹೊ ಥಯಲ ಇಸ್ರಾಯೆಲವಾಲಾವೊನೆ ಐಗುಪ್ತ ದೆಶತೊ ಭಾರೊ ಲಾವಾನಾ ಹುತಿ ತುನೆ ಫರೊಹನ ರಾಜಾಕನ ವಳೌಸ” ಕದ್ಯೊ. 11ತೆಳಾಮಾ ಮೊಶೆ ಕ್ಹುದಾನೆ, "ಫರೊಹನನಾ ಕ್ಹಾಮೊ ಜಾ಼ವಾನೆ ವರಿ ಇಸ್ರಾಯೆಲನಾ ಮನಕ್ಹೊನೆ ಐಗುಪ್ತ ದೆಶತೊ ಲಾವಾನೆ ಮಿ ಕುನ್ನ ವ್ಹೈ? ಕೈನ ಕದ್ಯೊ. 12ತಿನಾಹುತಿ ಕ್ಹುದಾ, "ಮಿ ಕ್ಹರಿಬಿ ತಾರಾ ಕ್ಹಾತೆ ರ‍್ಹೌಸ. ತು ಮಾರಾ ಮನಕ್ಹೊನೆ ಐಗುಪ್ತ ದೆಶತೊ ಭಾರೊ ಲಾಯಲ್ಪರ ತುಮೆ ಆಂಜ಼ ಡೊಂಗರಪರ ಮನೆ ಆರಾದನಾ ಕರೊಶಿ. ವರಿ ತುನೆ ವಲಾಯಲವಾಲೊ ಮಿಜ಼಼ ವ್ಹೈ ಕೈನ ವಳಕ ಥೈನ ರ‍್ಹವಸ” ಕದ್ಯೊ.

13ತಿನಾಹುತಿ ಮೊಶೆ ಕ್ಹುದಾನೆ, "ಮಿ ಇಸ್ರಾಯೆಲ ಮನಕ್ಹೊನಾ ಕ್ಹಾಮೊ ಗೈನ, ‘ತುಮಾರೊ ಪಿತೃನೊ ಕ್ಹುದಾ ಮನೆ ತುಮೊಕನ ವಳಾಯೊಸ’ ಕೈನ ಕತಾಮಾ, ತ್ಯುನೆ ಮನೆ ತಿನು ನಾಮ ಸು ವ್ಹೈ? ಪುಚ್ಚಾರೆ ಮಿ ಸು ಕೌ? ಕದ್ಯೊ. 14ತೆಳಾಮಾ ಕ್ಹುದಾ ಮೊಶೆನೆ, "ರ‍್ಹವಾಲೊಜ಼ ವ್ಹೈ” ಕೈನ ಕದ್ಯೊ. "ವರಿ ತು ಇಸ್ರಾಯೆಲವಾಲಾವೊನೆ, ರ‍್ಹವಾಲೊಜ಼ ಮನೆ ತುಮೊಕನ ವಳಾಯೊಸ ಕೈನ ಕೌ” ಕದ್ಯೊ. 15ಕ್ಹುದಾ ವರಿ ಮೊಶೆನೆ ಸು ಕದ್ಯೊ ಕದ್ಯಾಮ, "ತು ಇಸ್ರಾಯೆಲವಾಲಾವೊನೆ, ತುಮಾರಾ ಪಿತೃ ಥಯಲ ಅಬ್ರಹಾಮ, ಇಸಾಕ, ಯಾಕೊಬನೊ ಕ್ಹುದಾ ಥಯಲ ಯಹೊವಾಜ ಮನೆ ತುಮೊಕನ ವಳಾಯೊಸ” ಕೈನ ಕೌ. ಎ ಕೆಳಾಮಾಬಿ ರ‍್ಹವಾನು ಮಾರು ನಾಮ ವ್ಹೈ. ಎ ತಲತಲಾಂತರನೆಬಿ ಮನೆ ಶೆ ಕರಾನು ನಾಮ ವ್ಹೈ. 16ಕ್ಹುದಾ, ತು ಗೈನ ಇಸ್ರಾಯೆಲನಾ ಕ್ಹಾರಾ ಶಾನಾವೊನೆ ಮಳೈನ, ತ್ಯುನೊನೆ "ತುಮಾರಾ ಪುರ್ವಜನೊ ಕ್ಹುದಾ ಕದ್ಯಾಮ ಅಬ್ರಹಾಮ, ಇಸಾಕ, ಯಾಕೊಬನೊ ಕ್ಹುದಾ ಥಯಲ ಯಹೊವಾ ಮನೆ ದರ್ಶನ ದಿನ ತುಮೊಪರ ಮರ್ಗಾ ದೆಕಾಡಿನ ಐಗುಪ್ತ ದೆಶಮಾ ತುಮೆ ಕ್ಹಾದಲ ತ್ರಾಸ ಮಿ ದೆಕ್ಯೊಸ. 17ಐಗುಪ್ತಮಾ ತುಮೆ ರ‍್ಹಯಲ ಕೆಟ್ಟ ಪರಿಸ್ಥಿತಿಮಾತೊ ತುಮೊನೆ ಕಾಡಿನ, ದುದ್ದ ವರಿ ಜೆನ ಹರದಾನು ದೆಶ ಕದ್ಯಾಮ ಕಾನಾನ್ಯನಾ, ಹಿತ್ತಿಯನಾ, ಅಮ್ಮೊರಿಯನಾ, ಪೆರಿಜಿಯನಾ, ಹಿವ್ವಿಯಾನಾ, ಯೆಬುಸಿಯನಾ ರ‍್ಹವಾನಾ ದೆಶನೆ ತುಮೊನೆ ಬಲೈ ಲೌ ಕೈನ ಫೈಸಲೊ ಕರ‍್ಯೊಸ” ಕೈನ ತ್ಯುನೊನೆ ಕೆ.

18ತ್ಯುನೆ ತಾರಾ ವಾತನೆ ಐಕಸ. ತು ವರಿ ಇಸ್ರಾಯೆಲನಾ ಶಾನಾ ಐಗುಪ್ತನಾ ರಾಜಾ಼ಕನ ಗೈನ ತಿನೆ, "ಇಬ್ರಿಯನೊ ಕ್ಹುದಾ ಹಮೊನೆ ದರ್ಶನ ದಿದ್ಯೊಸ. ತಿನಾಹುತಿ ಹಮೆ ಉಸಕನಿ ಜಮಿನ್ಪರ ತನ್ನ ದಿನ್ನ ಲಕ್ಕಾ ದುರ ಚಾ಼ಲಿನ ಹಮಾರೊ ಕ್ಹುದಾ ಥಯಲ ಯಹೊವಾನೆ ಯಜ್ಞ ಕರು. ತಿನಾಹುತಿ ತು ಹಮೊನೆ ಜಾ಼ವಾನೆ ದ್ಯು” ಕೈನ ಮಾಂಗಿಲಿವೊ. 19ತೆನೈಸೊ ತೆ ಐಗುಪ್ತನೊ ರಾಜೊ಼ ತುಮೆ ಕೆಕ್ಲಾ ಮಾಂಗಿಲಿದ್ಯಾತಬಿ ನೈ ಛೊಡತೊ ಕೈನ ಮನೆ ಗ್ವತ್ತ ಛೆ. 20ತಿನಾಹುತಿ ಮಿ ಮಾರೊ ಹತ್ತ ಆಗೊ ಕರಿನ ಐಗುಪ್ತ ದೆಶಮಾ ಅದ್ಬುತ ಕಾಮೊ ಕರಿನ ತ್ಯುನೊನೆ ಘನ್ನಾ ತರಿಕಾಕ್ಹು ತ್ರಾಸ ಕರುಸ. ತೆಳಾಮಾ ತೆ ರಾಜೊ಼ ತುಮೊನೆ ವಳಾವಸ. 21ತೆನೈಸೊ ಮಾರಾ ಮನಕ್ಹೊಪರ ಐಗುಪ್ತ ದೆಶವಾಲಾ ಮರ್ಗೆ ನಿಂಗತ ಕರುಸ. ತಿನಾಹುತಿ ತುಮೆ ಜಾತಾಮಾ ಕ್ಹಾಲಿ ಹತೆ ಜಾತಾ ನೈ. 22ತುಮೊಮಾನಿ ಹರಯಕ್ಕ ಬಾಕ್ಡಿ ತಿನಾ ಆಜ಼ು಼ ಬಾಜು಼ವಾಲಿಯೊ ಬಾಕ್ಡಿಯೊ ಕಂತಿ, ತುಮಾರಾ ಘರೊಮಾ ರ‍್ಹವಾನೆ ಆಯಲವಾಲಾ ಬಾಕ್ಡಿಯೊ ಕಂತಿ ರುಪ್ಪು ಖೊನು ಘಾಲ್ಯಾನು ಸಾಮಾನ, ವಣ್ಣಾ ಮಾಂಗಿಲಿವಾದೆ. ತುಮೆ ತೆ ತುಮಾರಾ ಹೆಣ್ಣ ಗಂಡ ಬಚ್ಚಾವೊನೆ ಘಾಲೊ. ಅಮ್ಮ ತುಮೆ ಐಗುಪ್ತವಾಲಾವೊಕನು ಸಂಪತ್ತ ಪುರಾ ಲಾಯಲ ಲಿಂಗತ ಥಾವಸ” ಕದ್ಯೊ.