Sikkiligar Bible
ವಿಮೊಚನ 34
ವರಿ ಬೆ ದಗ್ಡಾನಾ ಹಲಗಿಯೊ
ತೆ ಥಯಲ್ಪರ ಯಹೊವಾ ಮೊಶೆನೆ, "ಫುಟಿ ಗಯಲ ಪೈಲಾನಾ ಬೆ ದಗ್ಡಾನಾ ಹಲಗಿಯೊ ನಿಂಗತ ಹಜಿ ಬೆ ದಗ್ಡಾನಾ ಹಲಿಗಿಯೊ ಕರ. ಪೈಲಾನಾ ದಗ್ಡಾವೊಮಾ ಬರದಲ ವಾತೊನೆ ಮಿ ಆಂ ದಗ್ಡಾವೊಪರಬಿ ಬರದುಸ. ವಂತಾ ಪಾಟೆ ಸಿನಾಯಿನಾ ಡೊಂಗರ್ಪರ ಚಡಿನ ಆ. ಡೊಂಗರನಾ ಉಪ್ಪರ ಮಾರಾ ಕ್ಹಾಮೊ ಹುಬ್ರೆ. ತಾರಾ ಕ್ಹಾತೆ ಕುನಬಿ ಔನೈ. ಡೊಂಗರನಾ ಜ಼ಗಾವೊಮಾ ಕುನಬಿ ದಿಕ್ಹು ನೈ. ತುಮಾರಾ ಪಶುವೊ ರ್ಹೈತಬಿ ಬಕ್ರಾನಾ ಬಚ್ಚಾ ರ್ಹೈತಬಿ ಡೊಂಗರನಾ ಹೆಟಾ ಚರು ನೈ” ಕೈನ ಕದ್ಯೊ. ತಿನಾಹುತಿ ಮೊಶೆ ಪೈಲಾನಾ ಬೆ ದಗ್ಡಾವೊ ನಿಂಗತ ಹಜಿ ಬೆ ದಗ್ಡಾವೊನಾ ಹಲಗಿಯೊನೆ ಕರ್ಯೊ. ತೆ ಥಯಲ್ಪರ ಅಗಲ್ಯಾ ದಿನ ಪಾಟೆ ಜಲ್ದಿ ಸಿನಾಯಿ ಡೊಂಗರ ಚಡ್ಯೊ. ಮೊಶೆ ಡೊಂಗರ ಚಡಿನ ಗಯಲ್ಪರ ಯಹೊವಾನಾ ಮ್ಹಾಡಮಾ ತಿಕನ ಉತ್ರಿನ ಆಯೊ. ಯಹೊವಾ ಮೊಶೆನಾ ಕ್ಹಾತೆ ತ್ಯಾಜ ಹುಬ್ರಯೊ ವರಿ ಮೊಶೆಬಿ ಯಹೊವಾನಾ ಪವಿತ್ರ ನಾಮನೆ ಬಲಾಯೊ. ಯಹೊವಾ ಮೊಶೆನಾ ಕ್ಹಾಮೊ ಜಾ಼ತಾ ಟೈಮ್ಮಾ, " ಕ್ಹುದಾ ಥಯಲ ಯಹೊವಾನಿ ದಯಾ ಮರಗಾಲೊ ಕ್ಹುದಾ ಥಯೊಸ. ಯಹೊವಾ ಸಿಟ್ಟಮಾ ಆತಾ ಟೈಮಾಬಿ ನಿದಾನ ಥಯೊಸ. ಯಹೊವಾ ಮಯಾ ಕರಾಲೊ ಥಯೊಸ. ಯಹೊವಾನೊ ಬರೊಕ್ಹೊನಾ ಯೊಗ್ಯ ಥಯೊಸ. ಯಹೊವಾ ಹಜಾ಼ರೊಸಿ ತಲೆಮಾರ ಲಕ್ಕಾ ತಿನಿ ಮಯಾ ದೆಕ್ಲಾಡಸ. ಮನಕ್ಹೊ ಕರಾನಾ ಪಾಪನೆ ಯಹೊವಾ ಮಾಫ ಕರಸ. ತೆನೈಸೊ ಅಪರಾದಿಯೊನೆ ತ್ಯುನಾ ಅಪರಾಧನೂ ಫಲ ಶಿಕ್ಷಾ ದಿವಾನು ತೆ ಇಕ್ಹರತೊ ನೈ. ವರಿ ತ್ಯುನಾ ಮಾ-ಬಾಪನು ತಪ್ಪ ಬಚ್ಚಾವೊಪರಬಿ ತನ್ನ ಚಾರ ತಲೆಮಾರ ಲಕ್ಕಾ ಆವಾ ನಿಂಗತಬಿ ಕರಸ” ಕೈನ ಕದ್ಯೊ. ತೆಳಾಮಾಜ಼ ಮೊಶೆ ಜಿಮಿನಪರ ಅಡ್ಡ ಪಡಿನ ಯಹೊವಾನೆ ಆರಾಧನಾ ಕರ್ಯೊ. ಮೊಶೆ, " ಯಹೊವಾ, ತಾರಿ ದಯಾ ಮನೆ ಮಳಾನಿ ರ್ಹಯಾರೆ, ದಯಾ ಕರಿನ ಮಾರಾಕ್ಹಾತೆ ಆ. ಅವ್ನೊ ಅವಿದೆಯ ಮನಕ್ಹೊ ವ್ಹೈ ಕೈನ ಮನೆ ಗ್ವತ್ತ ಛೆ. ಮನಕ್ಹೊನೆ ಸ್ವಿಕಾರ ಕರ” ಕೈನ ಮಾಂಗಿಲಿದ್ಯೊ.
ಒಡಂಬಡಿಕೆ ನವಿಕರಣ
ತೆಳಾಮಾ ಯಹೊವಾ, ಮಿ ತುಮಾರಾ ಕ್ಹಾತೆ ಎ ಒಡಂಬಡಿಕೆ ಕರಾಡೊಸ. ಭೊಲೊಕಮಾ ಕಿಜಾ಼ಬಿ ರ್ಹೈತಬಿ ಕಯಾಬಿ ಜನಾಂಗಮಾ ರ್ಹೈತಬಿ ಕೆಳಾಮಾಬಿ ನೈ ಥಯಲ ಮಹಾತ್ಕಾರೊನೆ ಕರುಸ. ಕ್ಹಾರಾ ಮನಕ್ಹೊ ವರಿ ತಾರಾಕ್ಹಾತೆ ರ್ಹವಾನು ಮನಕ್ಹೊ ಎ ಕ್ಹಾರು ದೆಕಿನ ಯಹೊವಾ ಥಯಲ ಮಿ ಮಹಾ ಮಹಿಮಾ ಸ್ವರುಪ ವ್ಹೈ ಕೈನ ತಿಳ್ದಿಲಿಸ. ಮಿ ಎ ದಿನಮಾ ದಿವಾನಾ ಆಗನ್ಯಾನೆ ವಿದಯೆ ಥಾವೊ. ತುಮಾರಾ ದುಸಮನೊ ಥಯಲ ಅಮೊರಿಯರೊನೆ, ಕಾನಾನ್ಯರೊನೆ, ಹಿತ್ತಿವಾಲಾವೊನೆ, ಪೆರಜಿವಾಲಾವೊನೆ, ಹಿವ್ವಿವಾಲಾವೊನೆ ವರಿ ಯಬುಸಿವಾಲಾವೊನೆ ಮಿ ಭಾರೊ ಘಾಲುಸ. ಹುಶಾರ ಥಾವೊ! ತುಮೆ ಜಾ಼ವಾನಾ ದೆಶಮಾ ರ್ಹವಾನಾ ಮನಕ್ಹೊನಾ ಕ್ಹಾತೆ ಕಯುಜ಼ ಒಪ್ಪಂದ ಕರಲಿವೊ ನಕೊ. ತುಮೆ ತೆ ಮನಕ್ಹೊನಾ ಕ್ಹಾತೆ ಕಯುಬಿ ಒಪ್ಪಂದ ಕರಲಿದ್ಯಾರೆ, ತೆ ತುಮೊನೆ ಇದಿ ಆವಾ ವರಕ್ಹೊ ಕರುಸ. ತುನಿ ಜ಼ಗಾವೊನೆ ನಾಶ ಕರೊ. ತ್ಯುನೆ ಪೂಜಾ ಕರಾನಾ ದಗ್ಡಾವೊನೆ ಫೊಡಿ ಪಾಡೊ. ತ್ಯುನಾ ಮರ್ತಿಯೊನೆ ಕತ್ರಿ ಪಡೊ. ಬಿಜಾ಼ ಕಯಾಜ಼ ಕ್ಹುದಾನೆ ಪೂಜಾ ಕರೊ ನಕೊ. ಮಿಜ಼ ಯಹೊವಾ ವ್ಹೈ ‘ಸ್ವಂತ ಮರಯಾದಿ ವಚಾ಼ಡಿ ಲಿವಾಲೊ’ ಕವಾನು ಮಾರು ನಾಮ ವ್ಹೈ. "ಹುಶಾರ ಥಾವೊ, ತೆ ದೆಶಮಾ ರ್ಹವಾನಾ ಮನಕ್ಹೊನಾ ಕ್ಹಾತೆ ಕಯುಜ಼ ಒಪ್ಪಂದ ಕರಲಿವೊ ನಕೊ ನೈ ಥಯಮಾ ತ್ಯುನ ತ್ಯುನಾ ಕ್ಹುದಾವೊನೆ ಪೂಜಾ ಕರ್ತಾಮಾ ತುಮೆ ತ್ಯುನಅ ಕ್ಹಾತೆ ಸೆರಸಿ ಲಿವೊಸಿ. ತ್ಯುನಾ ಕ್ಹಾತೆ ಸೆರಾನಾ ನಿಂಗತ ತುಮೊನೆ ಸ್ವಾಗತ ಕರಸ; ತ್ಯುನೆ ಯಜ್ಞ ಚಡಾಯಲ ಕ್ಹಾವೊಸಿ. ತುಮೆ ತ್ಯುನಿ ದಿಕ್ರಿಯೊಮಾ ದಕ್ಹಾಜ಼ನಾವೊನೆ ತುಮಾರಾ ದಿಕ್ರಾವೊನೆ ಬೈಕೊ ಥಾವಾನಾಹುತಿ ಇನಿಲಿವೊಸಿ. ತ್ಯುನಿ ದಿಕ್ರಿಯೊ ಸುಳ್ಳ ಕ್ಹುದಾವೊನಾ ಬೊದನೆ ಕರಸ. ತುಮಾರಾ ದಿಕ್ರಾವೊನೆ ತ್ಯುನಾ ತೆಜ಼ ಸೆವಾನೆ ಚಲಾವಸ. ಮೂರ್ತಿಯೊನೆ ಕರಲಿವೊ ನಕೊ. "ಕ್ಹಾಟೂ ನೈ ರ್ಹಯಲ ರೊಕ್ಲಾನಾ ಸನ್ನನೆ ಕರೊ. ಮಿ ತುಮೊನೆ ಪೈಲಾ ಆಗನ್ಯಾ ದಿದಲ ನಿಂಗತ ಕ್ಹಾಟು ನೈ ರ್ಹಯಲ ರೊಕ್ಲಾನೆ ಕ್ಹಾತ ದಿನ್ನ ಲಕ್ಕಾ ಕ್ಹಾವೊ. ಮಿ ಇನಿಲಿದಲ ಅಬಿಬ ಮಾಸಮಾ ಆಂ ಕರೊ. ಕಾ ಕದ್ಯಾಮ ತೆ ಮ್ಹೈನಾಮಾ ತುಮೆ ಐಗುಪ್ತತಾ ಬಿಡಗಡೆ ಹೊಂದ್ಯಾಸ. " ಬಾಕ್ಡಿಯೊಮಾ ಹುಟ್ಟಲ ಪೈಲಾ ಬಚ್ಚು ಕೆಳಾಮಾಬಿ ಮನೆ ಸೆರಲ ವ್ಹೈ. ತುಮಾರಾ ಬೈಲೊ ಬಕ್ರಾಮಾ ಪೈಲಾ ಹುಟ್ಟಲ ಗಂಡ ಬಚ್ಚಾವೊ ಮನೆ ಸೆರಲ ಥಯಾಸ. ಪೈಲಾ ರ್ಹಯಲ ಗದ್ಡಾನೆ ತುಮೆ ಮ್ಹೆಲ್ಲಿವಾನೆ ಆಸ ಕರ್ಯಾಮ, ತೆಳಾಮಾ ತುಮೆ ಬಕ್ರಾನಾ ಬಚ್ಚಾ಼ನೆ ದಿನ ತಿನೆ ಛೊಡಿಲೆ ಸಕೊಸಿ. ತಿನಿ ಗರ್ದನ ತೊಡಿನ ಕಲಾಸ ಕರು.ತುಮೆ ತುಮಾರಾ ಕ್ಹಾರ ಪಸ್ಟ ಗಂಡ ಬಚ್ಚಾ಼ವೊನೆ ಮಕನತಾ ಲ್ಯು.
ಕಯೊಬಿ ವ್ಯಕ್ತಿ ಕಾಣಿಕೆ ನೈಸೊ ಮಾರಾ ಸನ್ನಿದಿನೆ ಔ ನೈ .
" ತುಮೆ ಅಟ್ವಾಡಾಮಾ ಛೆ ದಿನ ಕಾಮ ಕರೊಸಿ. ತೆ ನೈಸೊ ಕ್ಹಾತವಾ ದಿನಮಾ ತುಮೆ ಅರಾಮ ಕರು. ತುಮೆ ಬಿತ್ತಾನು ವರಿ ಕಾಟಾನಾ ಟೈಮ್ಮಾ ಅರಾಮ ಕರು. "ಅಟ್ವಾಡಾನಾ ಸನ್ನೊನೆ ಕರೊ. ಆಂ ಸನ್ನನಾಹುತಿ ಘೌಂ ದಾಳನಾ ಪೈಲಾ ಕಾಳನೆ ಉಪಯೊಗ ಕರೊ ವರಿ ವರಕ್ಹಮಾ ಸುಗ್ಗಿ ಸನ್ನನೆ ಕರೊ. "ವರಕ್ಹಮಾ ತನ್ನ ಸಲಾ ತುಮಾರಾ ರ್ಹವಾನಾ ದಾಣ್ಗಾ ಕ್ಹಾರಾ, ಇಸ್ರಾಯಲನೊ ಕ್ಹುದಾ ಥಯಲ ಮಾಲಕ ಥಯಲ ಯಹೊವಾನಾ ಸನ್ನಿದಿಮಾ ಸೆರು. " ತುಮೆ ದೆಶನಾ ಮ್ಹೈ ಜಾ಼ತಾಮಾ, ಮಿ ತುಮಾರಾ ದುಸ್ಮನೊನೆ ತೆ ದೆಶತೊ ಭಾರೊ ಘಾಲುಸ. ಮಿ ತುಮಾರಾ ಜನಾಂಗ ಜಾಸ್ತಿ ಕರಸ. ತುಮೊನೆ ಹೆಚ್ಚ ಥಯಲ ಜಿಮಿನ ಮಳಸ. ಹರ ವರಕ್ಹೆ ತನ್ನ ಸಲಾ ತುಮೆ ತುಮಾರಾ ಕ್ಹುದಾ ಥಯಲ ಯಹೊವಾನಾ ಸನ್ನಿದಿನೆ ಜಾ಼ವೊಸಿ. ತೆ ಟೈಮ್ಮಾ ಕುನಬಿ ತುಮಾರಾತಾ ಜಿಮಿನೆ ಕಾಳ್ಳಿವಾನೆ ಕೊಶಿಸ ನೈ ಕರ್ತಾ.
"ತುಮೆ ಯಜ್ಞ ಕರ್ತಾಮಾ ತ ಯಜ್ಞನಾ ಪಶುನೆ ರಗತನಾ ಕ್ಹಾತೆ ಕ್ಹಾಟಾ ಲೊಟನೆ ಚಡೌ ನೈ; "ಪಸ್ಕ ಬೊಜನಾ ಮಾಕ್ಹಮಾ ಸುಜ ಅಗಲ್ಯಾ ದಿನ್ನ ಪಾಟಲಕ್ಕಾ ಉಗ್ರಾಡು ನೈ. "ತುಮೆ ಕಾಟಾನು ಪೈಲಾ ಫಲ ರ್ಹಯಲ ಬೆಳೆಯೊನೆ ಯಹೊವಾನೆ ದಿವೊ. ತಿನೆ ತುಮಾರಾ ಕ್ಹುದಾ ಥಯಲ ಯಹೊವಾನಾ ಆಲಯನೆ ಲಾವೊ "ಬಕ್ರಾನಾ ಬಚ್ಚಾ಼ನೆ ತಿನಾಯಾನಾ ದುದ್ದಮಾ ಕೆಳಾಮಾಬಿ ಉನ್ನು ಕರು ನೈ.” ಪಾಚಾತೊ ಯಹೊವಾ ಮೊಶೆನೆ, " ಮಿ ತುನೆ ಕದಲ ಕ್ಹಾರಾ ಸಂಗತಿಯೊನೆ ಲಕ್ಕ. ತೆ ಸಂಗತಿಯೊ ಮಿ ತಾರಾಕ್ಹಾತೆ ವರಿ ಇಸ್ರಾಯಲನಾ ಕ್ಹಾತೆ ಕರಲ ಒಡಂಬಡಿಕೆ ಥಯಿಸ” ಕೈನ ಕದ್ಯೊ. ಮೊಶೆ ತ್ಯಾ ಯಹೊವಾನಾ ಕ್ಹಾತೆ ದಿನ ರಾತ ಚಾಳಕ್ಹ ದಿನ ವ್ಹತ್ತೊ. ತೆ ದಿನೊಮಾ ತಿನು ಆಹಾರ ರ್ಹೈತಬಿ ಪಾನಿನೆ ರ್ಹೈತಬಿ ಕ್ಹಾದ್ಯೊಜ ನೈ. ಒಡಂಬಡಿನಾ ವಾಕ್ಯಾವೊನೆ ಕದ್ಯಾಮ ದಕ್ಹ ಆಗನ್ಯಾವೊನೆ ಬೆ ದಗ್ಡಾನಾ ಹಲಿಗಿಯೊಪರ ಬರದ್ಯೊ.
ಮೊಶೆ ಸಿನಾಯ ಡೊಂಗರಪರ್ತೊ ಉತ್ರಲ
ತೆ ಥಯಲ್ಪರ ಮೊಶೆ ಸಿನಾಯ ಡೊಂಗರತೊ ಉತ್ರಿನ ಆಯೊ ಒಡಂಬಡಿಕೆನಾ ವಾಕ್ಯಾ ಲಿಕ್ಕಲ ಬೆ ದಗ್ಡಾನಾ ಹಲಿಗಿಯೊನೆ ತೆ ಧರಲಿದ್ಯೊತೊ. ಯಹೊವಾ ತಿನಾಕ್ಹಾತೆ ಬೊಲಲಕ್ಹು ತಿನೊ ಮ್ಹೊಡು ಮಿಂಚಾಡುತು. ತೆನೈಸೊ ಮೊಶೆನೆ ಆಂ ತಿಳ್ದುನ್ಹೊತು. ಮೊಶೆನು ಮ್ಹೊಡು ಮಿಂಚಾನು ಆರೊನಬಿ ಇಸ್ರಾಯೆಲೊ ಕ್ಹಾರಾ ದೆಕ್ಯಾ. ತಿನಾಹುತಿ ತಿಕನ ಜಾ಼ವಾನೆ ತ್ಯುನೆ ಬುಚ್ಕ್ಯಾ. ತೆ ನೈಸೊ ಮೊಶೆ ತ್ಯುನೊನೆ ಬಲಾಯೊ. ತಿನಾಹುತಿ ಆರೊನಬಿ ಮನಕ್ಹೊ ಕ್ಹಾರಾ ಮೊಶೆ ಕನ ಗಯಾ. ಮೊಶೆ ತ್ಯುನಾಕ್ಹಾತೆ ಬೊಲ್ಯೊ. ತೆ ಥಯಲ್ಪರ, ಇಸ್ರಾಯೆಲೊ ಕ್ಹಾರಾ ಮೊಶೆಕನ ಆಯಾ. ಯಹೊವಾ ಸಿನಾಯಿ ಡೊಂಗರಪರ ತಿನೆ ದಿದಲ ಆಗನ್ಯಾವೊನೆ ಮೊಶೆ ತ್ಯುನೊನೆ ದಿದ್ಯೊ. ಮೊಶೆ ಮನಕ್ಹೊನಾ ಕ್ಹಾತೆ ಬೊಲಿನ ಕ್ಹರಾಯಲ್ಪರ, ತಿನ ಮ್ಹೊಡಾಪರ ಮುಸುಕ ಘಾಲ್ಲಿಲಿದ್ಯೊ. ಮೊಶೆ ಯಹೊವಾನಾ ಕ್ಹಾತೆ ಬೊಲಾನೆ ತಿನಾ ಸನ್ನಿದಿನೆ ಗಯಲ ಟೈಮಾ ಮೊಶೆ ಮುಸಕ ಕಾಡಿನ ಮ್ಹೆಲ್ತೊತೊ. ಪಾಚಾತೊ ಮೊಶೆ ಭಾರೊ ಐನ ಯಹೊವಾ ಆಗನ್ಯಾ ಕರಲ ಸಂಗತಿಯೊನೆ ಇಸ್ರಾಯೆಲೊನೆ ತಿಳ್ಸಾತೊತೊ. ಮೊಶೆನು ಮ್ಹೊಡು ಮಿಂಚಾನು ಮನಕ್ಹೊ ದೆಕ್ಯಾ. ತಿನಾಹುತಿ ಮೊಶೆ ಅಗಲ್ಯಾ ಟೈಮಾ ಯಹೊವಾನಾ ಕ್ಹಾತೆ ಬೊಲಾನು ಗಯೆಲಕ್ಕಾ ತಿನಾ ಮ್ಹೊಡಾನೆ ಮುಸಕ ಘಾಲ್ಲಿಲಿದಲ ರ್ಹವಸ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.