Skip to content
BibleKenya

Sikkiligar Bible

ವಿಮೊಚನ 35

ಸಬ್ಬತ ದಿನ್ನನಾ ನಿಯಮೊ

ಮೊಶೆ ಇಸ್ರಾಯಲ ಮನಕ್ಹೊನೆ ಯಕ್ಕ ಜ಼ಗಾಕನ ಕುಡ್ಸಾಯೊ. ಮೊಶೆ ತ್ಯುನೊನೆ, " ತುಮೆ ಅನುಸರಶು ಕೈನ ಯಹೊವಾ ತುಮೊನೆ ಆಗನ್ಯಾ ಕರಲ ಸಂಗತಿಯೊನೆ ಮಿ ಕೌಸ: ಕಾಮ ಕರಾನೆ ಛೆ ದಿನೊ ಛೆ. ತೆನೈಸೊ ಕ್ಹಾತವಾ ದಿನ ತುಮೊನೆ ಘನ್ನು ಚೊಕು ಥಯಲ ಅರಾಮ ಕರಾನೊ ದಿನ ಥಾವಸ. ತೆ ಕ್ಹಾಸ ದಿನಮಾ ಅರಾಮ ಕರಾನಾಹುತಿ ತುಮೊ ಯಹೊವಾನೆ ಸನ್ಮಾನ ಕರೊಸಿ. ಕ್ಹಾತವಾ ದಿನಮಾ ಕಾಮ ಕರಾಲೊ ಮನಕ್ಹ ಕ್ಹಲಾಸ ಥವು. ತುಮೆ ರ‍್ಹವಾನಾ ಕಯಾ ಜ಼ಗಾಮಾ ವ್ಹೈ ಕವಾನು ಸಬ್ಬತ ದಿನ ವ್ಹೈ ಕೈನ ಆಗನೆ ಲಗಾಡು ನೈ” ಕೈನ ಕದ್ಯೊ.

ಮೊಶೆ ಇಸ್ರಾಯೆಲೊನೆ, "ಯಹೊವಾ ಆಗನ್ಯಾ ಕರಲ ಆಜ ವ್ಹೈ. ಯಹೊವಾನಾಹುತಿ ಕಾಣಿಕೆ ಜಮಾಕರೊ. ತುಮಾರೊಮಾ ಹರಯಕ್ಲೊ ತೆ ದಿವಾನು ತಿನಾ ಮನಸಮಾ ತಿರ್ಮಾನ ಕರು. ಪಾಚಾತೊ ತೆ ಕಾಣಿಕೆನೆ ಯಹೊವಾನಾ ಸನ್ನಿದಿನೆ ಲೌ. ಕ್ಹೊನು, ರುಪ್ಪೂ, ತಾಂಬು, ನಿಲಿ, ಜಾ಼ಮ್ಳಾನುಕಲರ, ಲಾಲ ದೊರೊ ವರಿ ಕ್ಹಾಸ ಚೊಕಾ ವಣ್ಣಾ, ಬಕ್ರಾನಾ ಬಾಲೊನಾ ವಣ್ಣಾ, ಲಾಲ ರಂಗನಾ ಬಕ್ರಾನು ಚಾಮ್ಡು, ಸಮುಂದರನು ಡುಕ್ಕರನು ಚಾಮ್ಡು, ಕಾಟಾನು ಝಾಡ, ದಿವಾನೆ ಚಾ಼ಯೆ ಥಯಲ ತೆಲ, ಅಬಿಷಕನು ತೆಲ ವರಿ ಚೊಕಿ ಬಾಸನು ಉದನೆ ತಯಾರ ಕರಾನೆ ಚಾ಼ಯೆ ಥಯಲ ಚೊಕಿ ಬಾಸನಾ ಸಾಮ್ನೊನೆ ಲಾವೊ. ಮಹಾ ಯಾಜಕನಾ ಕವಚನೆ ಚಾಯ ಥಯಲ ರತ್ನವೊ ಪಿಶಿನಾ ಪದಕನಾ ಕೆತ್ತಾನಾ ರತ್ನೊ ಛೆ.

ಯಹೊವಾನಿ ಗುಡಾರನಾ ಲೆಖನೆ

ತುಮೊಮ ರ‍್ಹವಾನಾ ಕ್ಹಾರಾ ಗ್ಯಾನಿಯೊ ಐನ ಯಹೊವಾ ಆಗನ್ಯಾ ದಿದಲ ಕ್ಹಾರು ಕರು. ತ್ಯುನೆ ಕರಾನಾ ಕಾಮೊ ಕಯಾ ವ್ಹೈ ಕದ್ಯಾಮ ಕ್ಹುದಾನಾ ದರ್ಶನು ಝೊಪ್ಡು, ತಿನಾ ಮೆಲಹೊದಿಕೆ, ತಿನಾ ಕೊಂಡಿಯೊ, ಚೌಕಟ್ಟೊ, ತಿನಾ ಅಡ್ಡ ಪಟ್ಟಿಯೊ, ಕ್ಹಂಬಾ, ಗದಗಿನಾ ದಗ್ಡಾ, ಅಜ್ಞಾ ಶಾಸನೊನಾ ಮಂಜುಷ, ತಿನೆ ಉಚಾವಾನಾ ಲಾಕ್ಡಿಯೊ, ಕೃಪಾಸನ, ತಿನೆ ಝಾಕಾನೊ ಪಡ್ದೊ, ಟೆಬಲ, ತಿನಾ ಲಕ್ಡಿಯೊ ತಿನಾ ಸಾಮ್ನೊ, ತಿಪರ ಮ್ಹೆಲಾನಾ ಪರಿಶುದ್ದ ರೊಕ್ಲಾ, ದಿಪಸ್ತಂಬ, ತಿನಾ ಸಾಮ್ನೊ, ಸಮಯೊ, ದಿವಾನೆ ಚಾ಼ಯೆ ಥಯಲ ತೆಲ, ಉದನಾ ಧವಾಂಡಾನೊ ಕಟ್ಟೊ, ತಿನಾ ಲಾಕ್ಡಿಯೊ, ಅಬಿಷೆಕನು ತೆಲ, ಚೊಕ ಬಾಸನು ಉದ, ಝೊಪ್ಡಾನು ಬಾಕಲನೊ ಪಡ್ದೊ, ಯಜ್ಞವೆದಿ, ತಿನು ತಾಂಬಾನಿ ಜಾಳಗಿ, ಲಾಕ್ಡಿಯೊ, ಸಾಮ್ನೊ, ಥಾಳೊ, ತಿನು ಪಿಠ, ಅಂಗಳನಾ ಪಡ್ದಾ, ಕಂಬಾ, ಗದಗಿನಾ ದಗ್ಡಾ, ಅಂಗಳನಾ ಬಾಕಲನಾ ಪಡ್ದಾ, ಝೊಪ್ಡಾನಾ ಗುಟ, ಅಂಗಳನಾ ಗುಟ, ಇವ್ನಾ ರಾಕ್ಹೊ, ಪವಿತ್ರ ಜ಼ಗಾನೆ ಸೆವೆನೆ ಚಾ಼ಯೆ ಥಯಲ ಚೊಕಾ ರ‍್ಹಯಲ ದಿಕ್ಷಆ ದಿವಾನಾ ವಣ್ಣಾ ಕದ್ಯಾಮ ಮಹಾ ಯಾಜಕ ಥಯಲ ಆರೊನನೆ ತಿನಾ ಬಚ್ಚಾ಼ವೊನೆ ಚಯೆ ಥಯಲ ಯಾಜಕನಾ ವಣ್ಣಾ ಆಜ ವ್ಹೈ ಕೈನ ಕದ್ಯೊ.

ಮನಕ್ಹೊ ಲಾಯಲ ತ್ಯುನಾ ಕಾಣಿಕೆ

ಇಸ್ರಾಯಲನಾ ಸಮೂಹನಾ ಕ್ಹಾರಾ ಮೊಶೆನಾ ಕ್ಹಾಮಾತಾ ಗಯಲ್ಪರ ಕಿನೆಕಿನೆಬಿ ಮನಸ ಸು ಕದ್ಯು ಕಿನು ಕಿನು ಮನಸ ಸಿದ್ದ ವ್ಹತ್ತು ತ್ಯುನೆ ಕ್ಹಾರಾ ಐನ ಕ್ಹುದಾನಾ ದರ್ಶನಾ ಝೊಪ್ಡಾನಾ ಕಾಮನಾಹುತಿ ತಿನಾ ಪೂರಾ ಸೆವಾನಾಹುತಿ ದಿಕ್ಷಾ ವಣ್ಣಾವೊನಾಹುತಿ ಯಹೊವಾನೆ ಕಾಣಿಕೆ ಲಾಯಾ. ಸಿದ್ದ ಥಯಲ ದಾಣ್ಗಾ ಬಾಕ್ಡಿಯೊ ಐನ ಯಹೊವಾನ ಕ್ಹೊನಾನಿ ಕಾಣಿಕೆನೆ ಕದ್ಯಾಮ ಕಡು, ಕಾನಮಾನು, ಇಟ್ಟಿ, ನಕಲೆಸೊ, ಕ್ಹಾರಾ ತರಾನಾ ಕ್ಹೊನಾನಾ ಸಾಮನೊ ಕಿನಾಮಾ ನಿಲಿದ್ರುಮ ರಕ್ತ ವರ್ಣಗಳಳ್ಳ ದೊರಾ ಚೊಕಾ ವಣ್ಣಾ ಬಕ್ರಾನಾ ಬಾಲೊನಾ ವಣ್ಣಾ ಹದಕರಲ ಲಾಲ ರಂಗನಾ ಬಕ್ರಾನು ಚಾಮ್ಡು ಡುಕ್ಕರನು ಚಾಮ್ಡು ವ್ಹತ್ತು ತ್ಯುನೆ ತೆಕ್ಹಾರು ಲೈನ ದಿದ್ಯಾ. ಕಿಕನ ರುಪ್ಪು ನತ್ತಿ ತಾಂಬು ವ್ಹತ್ತು ತ್ಯುನೆ ತೆ ಕ್ಹಾರು ಲೈನ ಯಹೊವಾನೆ ಒಪ್ಸ್ಯಾ.ಕಿಕನ ಝೊಪ್ಡಾನಾ ಕಮನೆ ಚಾ಼ಯೆ ಥಯಲ ಕಾಟಾನು ಝಾಡ ವ್ಹತ್ತು, ತ್ಯುನೆ ತಿನೆ ಲೈನ ದಿದ್ಯಾ. ಶ್ಯಾಣಿಯೊ ರ‍್ಹಯಲ ಬಾಕ್ಡಿಯೊ ತ್ಯುನಾ ಹತೊಕ್ಹು ನಿಲಿ ದುಮ್ರ ಘನ್ನು ಲಾಲ ರ‍್ಹಯಲ ನೂಲನೆ ನಾರಿನ ನೂತ ತೆ ನೂಲನೆ ಲೈನ ದಿದ್ಯಾ. ಬಿಜಾ಼ ಗ್ಯಾನ ರ‍್ಹಯಲ ಬಾಕ್ಡಿಯೊ ಬಕ್ರಾನಾ ಬಾಲೊನೆ ಪರೈನ ಲೈನ ದಿದ್ಯಾ. ಅದಿಪತಿಯೊ ಮಹಾ ಯಾಜಕನಾ ಕವಚನೆ ಚಾ಼ಯೆ ಥಯಲ ಗೊಮೆದಕ ರತ್ನನಿ ಪಿಶಿನಾ ಪದಕಮಾ ಕೆತ್ತಾನಾ ರತ್ನೊನೆ ದಿವಾನೆ ಚಾ಼ಯೆ ಥಯಲ ತೆಲನೆ ಅಬಿಷೆಕ ತೆಲನೆ ವರಿ ಚೊಕಿಬಾಸನು ಉದನೆ ಚಾ಼ಯೆಥಯಲ ಚೊಕಿನಾ ಬಾಸನಾ ದ್ರವ್ಯನೆ ಲೈನ ದಿದ್ಯಾ. ಮೊಶೆನಾ ಮೂಲಕ ಯಹೊವಾ ಆಜ್ಞಾಕರಲ ಕ್ಹಾರಾ ಕಾಮೊನಾಹುತಿ ತಿನೆ ಕಾಣಿಕೆ ಲೈನ ದಿನ ಇಸ್ರಾಯಲನಾ ದಾಣ್ಗಾ ಬಾಕ್ಡಿಯೊ ಕ್ಹಾರಾ ಪೂರಾ ಮನಸಕ್ಹೊ ದಿದ್ಯಾ.

ಯಹೊವಾನಿ ಸನ್ನಿದಿನಾ ಗುಡಾರನು ಕಾಮ ಕರಾಲಾ

ವರಿ ಮೊಶೆ ಇಸ್ರಾಯಲ ಮನಕ್ಹೊನೆ ಅಮ್ಮ ಕದ್ಯೊ ಚೊಕಿತರಾ ನರಮ ಕಾಮೊನೆ ಕರಾನೆ ಯಹುದನಾ ಕುಲನೂ ಥಯಲ ಹುರನೊ ನಾತ್ನೊ ಉರಿನೊ ದಿಕ್ರೊ ಥಯಲ ಬೆಚಲ ಕವಾನಾ ಯಕ್ಲಾನೆ ಗ್ವತ್ತ ಕರಿನ ನೆಮ್ಸೊ ತಿನೆ ದಿವ್ಯಾ ಆತ್ಮಾನೆ ದಿನ ಚಾ಼ಯೆ ಥಯಲ ಗ್ಯಾನನಾ ವಿದ್ಯಾ ವಿವೆಕೊನೆ ಚೊ಼ಕು ರ‍್ಹಯಲ ಶಾಸ್ತ್ರನಿ ಗ್ಯಾನನೆ ದಿದ್ಯೊಸ. ಕಹಾರಾ ಶೃಂಗಾರನಾ ಕಾಮೊ ಕರಾನೆ ಕ್ಹೊನು ರುಪ್ಪು ತಾಂಬಾಕ್ಹು ಕಾಮ ಕರಾನಾಹುತಿ ರತ್ನ ಕೆತ್ತಾನಾಹುತಿ ಝಾಡಾಮಾ ವಿಚಿತ್ರ ಥಯಲ ಕತ್ತನು ಕಾಮ ಕರಾನಾಹುತಿ ಬಿಜಾ಼ ಥಯಲ ಶೃಂಗಾರ ಥಯಲ ಕಾಮ ಕರಾನಾಹುತಿ ಯಹೊವಾ ಇನಿಲಿದ್ಯೊಸ. ತೆನೈಸೊ ಹಜಿಯಕ್ಲಾನೆ ಸಿಕ್ಲೈನ ದಿವಾನಾಹುತಿ ತಿನೆಬಿ ದಾನ ಕುಲನಾ ಅಹಿಸಾಮಕನೊ ದಿಕ್ರೊ ಥಯಲ ಒಹೊಲಿಯಾಬನೆ ತಾಕತ ದಿದ್ಯೊಸ. ಕಲೆಗಾರ ಚಮತ್ಕಾರ ಥಯಲ ಕರಾಲಾ, ನಿ ಘನ್ನು ಲಾಲ ರ‍್ಹಯಲ ದೊರಾಕ್ಹು ಚೊಕಾ ವಣ್ಣಾಕ್ಹು ಬುಟೆದಾರಿ ಕಾಮ ಕರಾಲಾ, ಆಜು಼ಬಾಜು಼ವಾಲಾ, ರ‍್ಹೈತಬಿ ಕ್ಹಾರಾ ಕಾಮ ಕರಾಲಾ ಕರಾನಾ ಕಾಮೊನೆ ಕರಾನಾಹುತಿ ಯಹೊವಾ ತ್ಯುನೊನೆ ಗ್ಯಾನ ಪೂರಾಜ ದಿದ್ಯೊಸ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.