Skip to content
BibleKenya

Sikkiligar Bible

ವಿಮೊಚನ 33

ಇಸ್ರಾಯೆಲ ಮನಕ್ಹೊನೆ ಸಿನಾಯ ಡೊಂಗರ ಛೊಡಿನ ಜಾವೊ ಕೈನ ಯಹೊವಾನಿ ಆಗನ್ಯಾ

ಪಾಚ಼ಲ್ತೊ ಯಹೊವಾ ಮೊಶೆನೆ, "ತು ವರಿ ಐಗುಪ್ತತೊ ತು ಬಲೈಲಿನ ಆಯಲ ಮನಕ್ಹೊ ಎ ಜ಼ಗಾ ಛೊಡು. ಮಿ ಅಬ್ರಹಾಮನೆ, ಇಸಾಕನೆ ವರಿ ಯಾಕೊಬನೆ ವಾಗ್ದಾನ ಕರಲ ದೆಶೆ ಜಾ಼ವೊ. ಮಿ ತ್ಯುನೊನೆ ‘ತುಮೆ ಥಯಲ್ಪರ ಜಿವ್ಸಾನಾ ತುಮಾರಾ ಸಂತತಿವಾಲಾವೊನೆ ತೆ ದೆಶ ದ್ಯುಸ’ ಕೈನ ಮಿ ತ್ಯುನೊನೆ ವಾಗ್ದಾನ ಕರ‍್ಯೊ. ತುಮಾರಾ ಅಗೊ ಜಾ಼ವಾನೆ ಮಿ ಯಕ್ಕ ದುತನೆ ವಳೌಸ. ಕಾನಾನ್ಯವಾಲಾವೊನೆ, ಅಮೊರಿಯವಾಲಾವೊನೆ, ಹಿತ್ತಿಯವಾಲಾವೊನೆ, ಪೆರೆಜಿಯವಾಲಾವೊನೆ, ಹಿವ್ವಿಯವಾಲಾವೊನೆ ವರಿ ಯೆಬುಶಿಯವಾಲಾವೊನೆ ಮಿ ಹರಾಡುಸ. ತಿನಾಹುತಿ ದುದ್ದ ವರಿ ಜೆನ ಹರ್ದಾನಾ ತೆ ದೆಶೆ ಜಾ಼ವೊ. ತೆನೈಸೊ ಮಿ ತುಮಾರಾ ಕ್ಹಾತೆ ನೈ ಆತೊ. ತುಮೆ ಮಾರಿ ಆಗನ್ಯಾನೆ ವಿದೆಯ ಥಯಾ ಬಗರ ಮನೆ ಶಿಟ್ಟ ಲಾವೊಶಿ. ಮಿ ತುಮಾರಾ ಕ್ಹಾತೆ ಆಯೊರೆ, ವಾಟಮಾಜ ತುಮೊನೆ ಖಲಾಸ ಕರಿಪಡುಸ” ಕೈನ ಕದ್ಯೊ.

ಎ ದುಖನಿ ವಾತ ಐಕಿನ ಮನಕ್ಹೊ ದುಖಿ ಥಯಾ. ತ್ಯುನೊಮಾ ಯಕ್ಲೊಬಿ ತ್ಯುನಾ ಕ್ಹೊನಾನಾ ಸಾಮನೊ ಘಾಲಿಲಿದ್ಯಾ ನೈ. ಯಹೊವಾ ಮೊಶೆನೆ, "ಇಸ್ರಾಯೆಲೊನೆ ಅಮ್ಮ ಕೆ: ತುಮೆ ಮಂಡ ಮನಕ್ಹೊ ಥಯಾಸ. ಮಿ ತುಮಾರಾ ಕ್ಹಾತೆ ದಕ್ಹಿಯೆಳ ರ‍್ಹಯೊಮ, ತುಮೊನೆ ಖಲಾಸ ಕರಿಪಡುಸ. ತಿನಾಹುತಿ ತುಮಾರಾ ಕ್ಹಾರಾ ಕ್ಹೊನಾನಾ ಸಾಮನೊ ಕಾಡಿಪಡೊ. ತುಮೆ ಸು ಕರು ಕವಾನು ಮಿ ತಿಳಸುಸ!” ಕೈನ ಕದ್ಯೊ. ಇಸ್ರಾಯೆಲೊ ಸಿನಾಯ ಡೊಂಗರಪರ ರ‍್ಹತಾಮಾ ಕ್ಹೊನಾನಾ ಸಾಮನೊ ಘಾಲಿ ಲಿವಾನು ಛೊಡಿಪಡ್ಯಾ.

ಯಹೊವಾನಿ ಸನ್ನಿದಿನು ಗುಡಾರ

ಮೊಶೆ ಗುಡಾರ ಪಾಳೆಯನಾ ಭಾರೊ ದಕ್ಹೊ ದುರ ಲಿನ ಚಾಲ್ಯೊತೊ. ಮೊಶೆ ತಿನೆ, "ದೆವದರ್ಶನನು ಗುಡಾರ ವ್ಹೈ ಕೈನ ಕದ್ಯೊ. ಯಹೊವಾಕ್ಹು ಉತ್ತರ ಪುಚ್ಚು ಕೈನ ಕದಲ ಮನಕ್ಹ ಪಾಳೆಯನಾ ಭಾರು ರ‍್ಹಯಲ ದೆವದರ್ಶನನಾ ಗುಡಾರೆ ಜಾ಼ವಾಡೊತೊ. ಮೊಶೆ ತೆ ಗುಡಾರಮಾ ಜಾ಼ತಾಮಾ ಮನಕ್ಹೊ ಕ್ಹಾರಾ ತಿನೆ ದೆಕ್ತಾತಾ. ಮನಕ್ಹೊ ತ್ಯುನಾ ಘರೊನಾ ಬಾಕಲೊಮಾ ಹುಬ್ರೈನ ಮೊಶೆ ದೆವದರ್ಶನ ಗುಡಾರಮಾ ಗಯೆಲಕ್ಕಾ ತಿನೆ ದೆಕ್ತಾತಾ. ಮೊಶೆ ಗುಡಾರಮಾ ಗಯಲ್ಪರ ಉಚ್ಚು ಮೆಘಸ್ತಂಬ ಕೆಳಾಮಾಬಿ ಹೆಟು ಉತರ್ತುತು. ತೆ ಮೆಘಸ್ತಂಬ ಗುಡಾರನಾ ಬಾಕಲಕನ ಹುಬ್ರೆತುತು. ಇಮ್ಮ ಯಹೊವಾ ಮೊಶೆನಾ ಕ್ಹಾತೆ ಬೊಲಾಡೊತೊ. ಗುಡಾರನಾ ಬಾಕಲಕನ ಮೆಘಸ್ತಂಬ ರ‍್ಹಯಲ ಮನಕ್ಹೊ ದೆಕಲ ಟೈಮಮಾ, ತ್ಯುನೆ ತ್ಯುನಾ ಸ್ವಂತ ಝೊಪ್ಡಾವೊನಾ ಬಾಕಲೊಕನ ಮುಂಡಿ ಹೆಟಿ ಘಾಲಿನ ಯಹೊವಾನೆ ಆರಾಧನಾ ಕರ್ತಾತಾ. ಯಹೊವಾ ಮೊಶೆನಾ ಕ್ಹಾತೆ ಮುಖಾ ಮುಖಿ ಥೈನ ಬೊಲ್ತೊತೊ. ಯಕ್ಲೊ ತಿನಾ ದೊಸ್ತಮಾ ಕ್ಹಾತೆ ಬೊಲೆ ಲಿಂಗತ ಯಹೊವಾ ಮೊಶೆನಾ ಕ್ಹಾತೆ ಬೊಲ್ತೊತೊ. ಯಹೊವಾನಾ ಕ್ಹಾತೆ ಬೊಲ್ಯಲಪರ ಮೊಶೆ ಝೊಪ್ಡಾಮಾ ಫರಿನ ಜಾ಼ತೊತೊ. ನುನನೊ ಜಾಂಜಿಮಾನ ದಿಕ್ರೊ ಥಯಲ ಯೆಹುಶುವಾ ಮೊಶೆನೊ ಸಹಾಯಕ ಥಯೊತೊ. ಮೊಶೆ ಗುಡಾರ ಛೊಡಿನ ಗಯಲ್ಪರ ಯೆಹುಶುವಾ ಗುಡಾರಮಾಜ ರ‍್ಹತೊತೊ.

ಯಹೊವಾ ತಿನಾ ಮನಕ್ಹೊನಾ ಕ್ಹಾತೆ ರ‍್ಹೌಸ ಕೈನ ವಾಗ್ದಾನ ಕರಲ

ಮೊಶೆ ಯಹೊವಾನೆ, "ಎ ಮನಕ್ಹೊನೆ ಅಗೊ ಚ಼ಲೌ ಕೈನ ತು ಮನೆ ಕದ್ಯೊಸ. ತೆನೈಸೊ ಮಾರಾ ಕ್ಹಾತೆ ಕಿನೆ ವಳಾಶಿ ಕೈನ ತು ಕದ್ಯೊ ನೈ. ತು ಮನೆ, ‘ಮಿ ತುಮೆ ಚೊಕಿ ತರಾ ತಿಳ್ದಿಲಿದ್ಯೊಸ. ಮಿ ತುನೆ ಮೆಚ್ಯೊಸ’ ಕೈನ ಕದ್ಯೊಸ. ಮಿ ತುನೆ ಕ್ಹರಿಮಾಜ಼ ಮೆಚ್ಚಿಸಾನೊ ರ‍್ಹೌ ಕದ್ಯಾಮ, ಮಿ ತುನೆ ತಿಳ್ದಿಲಿಯೆ ಲಿಂಗತ ಮಾರಿ ವಾಟ ಮನೆ ಶಿಕ್ಲಾ. ತೆಳಾಮಾ ಮಿ ತುೆ ಕೆಳಾಮಾಬಿ ಮೆಚ್ಚಿಸಾನೆ ಥಾವಸ. ಇವ್ನೆ ಕ್ಹಾರಾ ತಾರಾ ಮನಕ್ಹೊ ವ್ಹೈ ಕೈನ ಶೆಂ ಕರಿಲೆ” ಕೈನ ಮಾಂಗಿಲಿದ್ಯೊ. ಯಹೊವಾ, "ಮಿ ತುಮಾರಾ ಕ್ಹಾತೆ ಔಸ. ಮಿಜ಼ ತುಮೊನೆ ವಿಶ್ರಾಂತಿ ದ್ಯುಸ” ಕೈನ ಉತ್ತರ ದಿದ್ಯೊ. ತೆಳಾಮಾ ಮೊಶೆ ಯಹೊವಾನೆ, "ತು ಹಮಾರಾ ಕ್ಹಾತೆ ನೈ ಆಯೊಮ, ಎ ಜ಼ಗಾತೊ ಹಮೊನೆ ವಳೌ ನಕೊ. ತೆನೈಸೊ ಮನೆಬಿ ಆಂ ಮನಕ್ಹೊನೆಬಿ ತಾರಿ ದಯಾ ಮಳಿಕೈನ ಹಮೆ ತಿಳ್ದಿಲಿವಾನು ಕಿಮ್ಮ? ತು ಹಮಾರಾ ಕ್ಹಾತೆ ಆಯೊಮ, ತೆಳಾಮಾ ಹಮೆ ಎ ಕ್ಹರಿ ತಿಳ್ದಿಲಿಯೆಸ. ತು ಹಮಾರಾ ಕ್ಹಾತೆ ನೈ ಆಯೊಮ, ತೆಳಾಮಾ ಹಮೊನೆಬಿ ದುನಿಯಾಮಾ ರ‍್ಹಯಲ ಬಿಜಾ಼ ಮನಕ್ಹೊನೆಬಿ ಕಯು ವ್ಯತ್ಯಾಸ ನೈ ರ‍್ಹತು” ಕೈನ ಕದ್ಯೊ. ತೆಳಾಮಾ ಯಹೊವಾ ಮೊಶೆನೆ, "ತು ಮಾಂಗಿಲಿವಾನು ದ್ಯುಸ. ಮಿ ತುನೆ ಮೆಚ್ಯೊಸ ಕೈನ ಎ ಕರುಸ. ಮಿ ತುನೆ ಚೊಕಿ ತರಾ ತಿಳ್ದಿಲಿದ್ಯೊಸ” ಕದ್ಯೊ.

ಪಾಚ಼ಲ್ತೊ ಮೊಶೆ, "ಹಮ್ನಾ ದಯಾ ಕರಿನ ತಾರಿ ಮಹಿಮಾ ಮನೆ ದೆಕಾಡ” ಕದ್ಯೊ.

ತೆಳಾಮಾ ಯಹೊವಾ "ಮಾರಾ ನಾಮನಿ ಮಹಿಮಾ ತಾರಾ ಅಗಿ ದಾಟಿನ ಜಾ಼ವಾವರಕ್ಹು ಕರುಸ. ಮಿ ಯಹೊವಾ ವ್ಹೈ. ತುನೆ ಐಕು ಆಯೆಲಿಂಗತ ಮಾರು ನಾಮ ಪ್ರಕಟ ಕರುಸ. ಮಿ ಇನಿಲಿದಲ ಮನಕ್ಹೊನೆ ದಯಾಬಿ ಮಯಾಬಿ ದೆಕಾಡುಸ. ಮನೆ ಕುನ್ನಜ ಮುಖಾ ಮುಖಿ ಥೈನ ದೆಕಾನೆ ಸಾದ್ಯ ನತ್ತಿ. ಮನೆ ದೆಕ್ಯಲವಾಲೊ ಕುನ್ನಜ ವಾಚ್ತೊ ನೈ. ನ್ಹ್ಯಾ ಯಕ್ಕ ದಗ್ಡೊ ಛೆ. ತು ತೆ ದಗ್ಡಾಪರ ಹುಬ್ರೆ. ಮಾರಿ ಮಹಿಮಾ ತೆ ಜ಼ಗಾನಾ ಮುಲಕ ದಾಟಿನ ಜಾ಼ವಸ. ಮಿ ತುನೆ ತೆ ದಗ್ಡಾನಾ ಮ್ಹೊಟಾ ಬಿರುಕಮಾ ರ‍್ಹವಾಲಗಾಡುಸ; ಮಿ ದಾಟಿನ ಜಾ಼ತಾಮಾ ಮಾರ ಹತ್ತಕ್ಹು ತುನೆ ಝಾಕುಸ. ಪಾಚ಼ಲ್ತೊ ಮಾರೊ ಹತ್ತ ಕಾಡುಸ. ತೆಳಾಮಾ ತು ಮಾರಿ ಪಿಟ್ಟ ದೆಕಶಿ; ತೆನೈಸೊ ಮಾರು ಮ್ಹೊಡು ತುನೆ ನೈ ದಿಕ್ಹತು” ಕೈನ ಉತ್ತರ ದಿದ್ಯೊ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.