Sikkiligar Bible
ವಿಮೊಚನ 26
ಮಾರಾ ನಿವಾಸನಾ ಹುತಿ ಯಕ್ಕ ಗುಡಾರನೆ ದಕ್ಹ ಪಡದಾವೊಕ್ಹು ಕರೌ. ತೆ ನಯಥೈನ ಚೊಕಾ ನವಾ ವಣ್ಣಾ ಥಯಲ ರ್ಹೌ. ತಿಮಾ ನಿಲಿ , ಜಾ಼ಂಬ್ಳಾನೊ ವರಿ ನಕ್ಕರ ಲಾಲ ವರ್ಣನೊನಾ ದೊರಾಕ್ಹು ಕೆರುಬಿಯೊನೆ ನೆಯ್ಗೆಕ್ಹು ಕಸೂತಿ ಘಲವು. ಹರಿಯಕ್ಕ ಫಡ್ಕುಬಿ ಇಕ್ಹಪರಾಟ ಮಾರ ಲಾಂಬುಬಿ ಚಾರ ಮಾರ ರುಂದಬಿ ರ್ಹೌ.ಕ್ಹಾರಾ ಪಡದಾವೊ ನಿ ಯಕ್ಕಜ ಅಳತಿ ಥಯಲ ರ್ಹೌ ಪಾಂಚ ಪಾಂಚ ವಣ್ಣಾವೊನೆ ಯಕ್ಕ ಯಕ್ಕನೆ ಘಡಿಕರು; ಆ ಬೆಂಬಿ ಜೊಡಿಮಾ ಯಕ್ಕ ಯಕ್ಕನೆ ಲಾಸ್ಟ ವಣ್ಣಾನಾ ತುದಿಮಾ ನಿಲಿ ದೊರಾಕ್ಹು ಗ್ಹೊಂಡಾ ಕರೌ. ತೆ ಗ್ಹೊಂಡಾವೊ ಐವತ್ತತಿಬಿ ಹೆಚ್ಚ ಯಕ್ಕನೆ ಯಕ್ಕ ಕ್ಹಾಮಾಜ ರ್ಹೌ. ತೆ ನೈಸೊ ಐವತ್ತ ಕ್ಹೊನಾನಾ ಕೊಂಡಿಯೊ ಕರೈನ ತೆ ವಣ್ಣಾವೊನೆ ಯಕ್ಕನೆ ಯಕ್ಕ ಜಮಾಕರು; ಅಮ್ಮ ಯಕ್ಕಜ ಝೊಪಡು ಥಾವಸ. ತೆ ಝೊಪಡಾನಾ ಉಪ್ಪರ ಝಾಕಾನಾಹುತಿ ಬಕ್ರಾನಾ ಬಾಲೊಕ್ಹು ಗ್ಯಾರಾ ತೆ ವಣ್ಣಾವೊನೆ ಕರೌ. ಯಕ್ಕ ಯಕ್ಕ ವಣ್ಣಾಬಿ ಮೂವತ್ತ ಮಾರ ಲಾಂಬು ಥೈನಬಿ ಚಾರ ಮಾರ ರುಂದ ಥೈನಬಿ ರ್ಹೌ. ಕ್ಹಾರಾ ವಣ್ಣಾವೊ ಯಕ್ಕಜ ಅಳತಿನಾ ಥಯಲ ರ್ಹೌ. ಪಾಂಚ ವಣ್ಣಾವೊನೆ ಯಕ್ಕ ಥೈನ ಜೊಡಸಿನ ಉಗ್ರಲ ಛೆ ವಣ್ಣಾವೊನೆ ಯಕ್ಕಜ ಥೈನ ಜೊಡಸಿನ ವಣ್ಣಾವೊನೆ ಝೊಪಾಡಾನಾ ಕ್ಹಾಮಲ್ಯಾ ಭಾಗಮಾ ಮಡಸಿನ ಘಾಲು. ಅಮ್ಮ ಜೊಡಸಿನ ಸಿಯಲ ವಣ್ಣಾವೊನೆ ಲಾಸ್ಟಮಾ ಐವತ್ತ ಐವತ್ತ ಗ್ಹೊಂಡಾವೊನೆ ಕರ್ಹೌ. ತಾಂಬಾನಾ ಐವತ್ತ ಕೊಂಡಿಯೊ ಕರೈನ ಗ್ಹೊಂಡಾವೊಮಾ ಅಟ್ಕಾಡಿನ ಕ್ಹಾರುಜ಼ ಮಳಿನ ಯಕ್ಕಜ ಝೊಪಡೊ ಥಾವಾ ವರಕ್ಹು ಜೊಡಸುಸ. ಸಿಯೆಲ ವಣ್ಣಾವೊಮಾ ಅರ್ಧಾ ವಣ್ಣಾ ಹೆಚ್ಚ ಥಾವಸ, ತೆ ಹೆಚ್ಚನ ಭಾಗ ಝೊಪಡಾನಾ ಪಾಚಲ್ಯಾ ಭಾಗಮಾ ಕರಿನ ತುಗಾಡಾ ನಿಂಗತ ಛೊಡೂ. ಸಿಯಲ ವಣ್ಣಾವೊನಾ ಲಾಂಬಾಮಾ ತ್ಯಾ ಯಕ್ಕ ಮಾರಬಿ, ಯ್ಹಾ ಯಕ್ಕ ಮಾರ ಹೆಚ್ಚ ಥಾವಸ. ತೆ ಮ್ಹೈಬಿ ಝೊಪಡಾಮಾ ಝಾಕಾವರಕ್ಹು. ಯ್ಹಾಬಿ ತ್ಯಾಬಿ ತುಗಾಡು ವರಕ್ಹು ರ್ಹೌ. ಆ ಯಕ್ಕ ಹೊದಿಕೆನೆ ಸಿವಾನಾ ಹುತಿ ಹದಕರಲ ಲಾಲ ರಂಗನೂ ಟಗರನಾ ಚಾಮ್ಡಾಕ್ಹು ಯಕ್ಕ ಉಪ್ಪರಲಿ ಜ಼ಗಾ ಕಡಲಪ್ರಾಣಿನಾ ಚಾಮ್ಡಾಕ್ಹು ಹಜಿಯಕ್ಕ ಉಪ್ಪರಲಿ ಜ಼ಗಾ ಕರೌ. ಝೊಪ್ಡಾನೆ ಚಾ಼ಯೆಥಯಲ ಚೌಕಟೊನೆ ಕಾಟಾವೊನಾ ಝಾಡಕ್ಹು ಕರೌ. ಹರಿಯಕ್ಕ ಚೌಕಟೊ ದಕ್ಹಮಾರ ಲಾಂಬಾಬಿ ವರಿ ದೆಡಮಾರ ರುಂದ ಥಯಲ ರ್ಹೌ. ಹರಯಕ್ಕ ಚೌಕಟ ಅಡ್ಡ ಪಟ್ಟಿಕ್ಹು ಜೊಡಸಲ ನಿಲುವು ಪಟ್ಟಿಯೊ ಥಯಲ ರ್ಹೌ. ಝೊಪ್ಡಾನಾ ಕ್ಹಾರಾ ಚೌಕಟೊನೆ ತಿಮ್ಮಜ಼ ಕರೌ. ಝೊಪ್ಡಾನಾ ದಕ್ಷಿಣ ದಿಕ್ಕಮಾ ಇಕ್ಹ ಚೌಕಟೊನೆ ಹುಬ್ರಾಡು. ಚಾಳಕ್ಹ ರುಪ್ಪಾನಾ ಗದಗಿನಾ ದಗ್ಡಾವೊನೆ ಕರೈನ ತೆ ಇಕ್ಹ ಚೌಕಟೊನಾ ಹೆಟಾ ಮ್ಹೆಲು.ಯಕ್ಕ ಯಕ್ಕ ಚೌಕಟಮಾ ರ್ಹವಾನು ಬೆ ಪಟ್ಟಿಯೊನೆ ಯಕ್ಕ ಯಕ್ಕ ಗದಿನೊ ದಗ್ಡೊ ರ್ಹೌ. ತಿಮ್ಮಜ಼ ಝೊಪ್ಡಾನಾ ಉತ್ತರ ದಿಕ್ಕಮಾಬಿ ಇಕ್ಹ ಚೌಕಟೊ ವರಿ ಹರಯಕ್ಕ ಚೌಕಟನೆ, ವರಿ ಹರಯಕ್ಕ ಚೌಕನೆ ಬೆಬೆ ರುಪ್ಪಾನಾ ಗದಗಿನಾ ದಗ್ಡಾ ರ್ಹೌ. ಝೊಪ್ಡಾನಾ ಪಾಚಲ್ಯಾ ಭಾಗಮಾ ಕದ್ಯಾಮ ಪಶ್ಚಿಮ ದಿಕ್ಕಮಾ ಛೆ ಚೌಕಟೊ ಕರೌ.
ಝೊಪ್ಡಾನಾ ಪಾಚಲ್ಯಾ ಬೆ ಮೂಲಾವೊನೆ ಬಿಜಾ಼ ಬೆ ಚೌಕಟೊನೆ ಕರೌ. ತೆ ಹೆಟಾತುಬಿ ತುದಿಲಕ್ಕಾ ಜೊಡಸಲ ರ್ಹೌ. ಉಪ್ಪರಲ್ಯಾ ಭಾಗಮಾ ಯಕ್ಕಜ ಬಾಂಗ್ಡಿನೆ ಜೊಡಸಲ ರ್ಹೌ. ತಿಮ್ಮಜ಼ ಬೆ ಮೂಲಾವೊನೆ ಕರೌ. ಚೌಕಟೊ ವರಿ ಹರಯಕ್ಕ ಚೌಕಟನೆ ರುಪ್ಪಾನಾ ಗದಗಿನಾ ದಗ್ಡಾವೊನೆ ತಿಮ್ಮಜ಼ ಕ್ಹೊಳಾ ಗದಗಿನಾ ದಗ್ಡಾವೊ ರ್ಹೌ. ಕಾಟಾವೊನಾ ಝಾಡಕ್ಹು ಅಗುಳಿಯೊನೆ ಕರೌ. ಝೊಪ್ಡಾನಾ ಭಂಬೆಜ಼ಗಾ ಚೌಕಟೊನೆ. ತಿನಾ ಪಾಚಾ ಕದ್ಯಾಮ ಪಶ್ಚಿಮಕನ ಚೌಕಟೊನೆ ಪಾಂಚ ಪಾಂಚ ಅಗುಳಿಯೊನೆ ಕರೌ. ಚೌಕಟೊನಾ ವಚ್ಮಾ ರ್ಹವಾನು ಅಗುಳಿನಾ ಯಕ್ಕ ಕೊನಾತೊ ವರಿಯಕ್ಕ ಕೊನಾಲಕ್ಕಾ ಲಾಗಾ ವರಕ್ಹು ರ್ಹೌ. ತೆ ಚೌಕಟೊನೆ ಕ್ಹೊನಾನಾ ತಗಡೊ ಲಗಾಡಿನ ತಿಮಾ ತೆ ಅಗುಳಿಯೊನಾ ಹುತಿ ಕ್ಹೊನಾನಾ ಬಾಂಗ್ಡಿಯೊ ಕರೌ. ತೆ ಅಗುಳಿಯೊನೆ ಕ್ಹೊನಾನಾ ತಗಡೊ ಲಗಾಡೂ. ಮಿ ಡೊಂಗರಪರ ತುನೆ ದೆಕ್ಲಾಡಲ ತರಿಕಾಮಾ ಝೊಪ್ಡಾನೆ ಕ್ಹೊಲು. ನಿಲಿ, ಜಾ಼ಮ್ಳಾನೊ, ಘನ್ನು ಲಾಲ ವರ್ಣೊ ತಿಮ್ಮಜ಼ ನವಾ ಥೈನ ಹೊಸೆಲ ಅಳ್ಳನಾ ಪದರಕ್ಹು ವಣ್ಣಾವೊನೆ ಕರೈನ, ತಿನೆ ಕೆರುಬಿಯೊನಾ ಹುತಿ ಕಾಮಾ ಕೌಶಲ್ಯ ಪೂರ್ಣ ಥೈನ ಕಸೂತಿ ಘಲೌ. ಕಾಟಾನಾ ಝಾಡಕ್ಹು ಚಾರ ಕ್ಹಂಬಾವೊನೆ ಕರೈನ, ಕ್ಹೊನಾನಾ ತಗಡೊನೆ ಲಗಾಡಿನ, ಚಾರ ರುಪ್ಪಾನಾ ಗದಗಿನಾ ದಗ್ಡಾವೊನೆ ಉಪ್ಪರ ಮ್ಹೆಲಿನ ಕ್ಹೊನಾನಾ ಕೊಂಡಿಯೊಕ್ಹು ತೆ ಪರದಾನೆ ತೆ ಚಾರೆ ಕ್ಹಂಬಾವೊನೆ ಅಟ್ಕಾಡು. ತೆ ಪರದಾವೊನೆ ಕೊಂಡಿಯೊನೆ ಅಟ್ಕಾಡಲಪರ ತಿಮಾ ಆಜ್ಞಾಶಾಸನೊನೆ ಮಂಜುಷನೆ ಮಂಗೈನ ಮ್ಹೆಲು. ತೆ ಪರದಾನಾ ಪವಿತ್ರ ಜಾ಼ಗಾ ವ್ಹೈ ಕೈನ ವರಿ ಮಹಾ ಪವಿತ್ರ ಜ಼ಗಾ ವ್ಹೈಕೈನ ಬಿಜಾ಼ಕರಾನು. ಮಹಾ ಪವಿತ್ರ ಜ಼ಗಾಮಾ ಆಜ್ಞಾ ಶಾಸನೊನಾ ಮಂಜುಷನಾ ಉಪ್ಪರ ಸಿಂಹಾಸನೆ ಲೈನ ಮ್ಹೆಲು. ಪರದಾನಾ ಭಾರಾ ಮೆಜನಾ ಮೆಜನೆ ಕ್ಹಾಮಾ ಥೈನ ಝೊಪ್ಡಾನಾ ದಕ್ಷಿಣ ದಿಕ್ಕಮಾ ದಿವಾನಾ ಕ್ಹಂಬಾವೊ ಮ್ಹೆಲು. ಮೆಜ ಉತ್ತರ ಭಾಗಮಾ ರ್ಹೌ. ಝೊಪ್ಡಾನಾ ಬಾಕನೆ ಅಡ್ಡ ಥೈನ ನಯಥೈನ ನವಾ ಚೊಕಾ ವಣ್ಣಾಮಾ ನಿಲಿ, ಜಾ಼ಮ್ಳನೂ, ಘನ್ನು ಲಾಲ ವರ್ಣೊನಾ ದೊರಾಕ್ಹು ಕಸೂತಿ ಘಾಲು. ತೆ ವಣ್ಣಾ ತೊಲಾನಾಹುತಿ ಕಾಟಾವೊನಾ ಝಾಡಕ್ಹು ಕ್ಹಂಬಾವೊ ಕರೈನ ಕ್ಹೊನಾನಾ ತಗಡೊ ವರಾಡೂ. ತೆನಾ ಕೊಂಡಿಯೊನೆ ಕ್ಹೊನಾಕ್ಹು ಕರಲ ತಿನಾಹುತಿ ಪಾಂಚ ತಾಂಬಾನಾ ಗದಿಗಿನಾಹುತಿ ದಗ್ಡಾವೊನೆ ಕರೌ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.