Skip to content
BibleKenya

Sikkiligar Bible

ವಿಮೊಚನ 25

ಯಹೊವಾನಿ ಸನ್ನಿದಿ ಗುಡಾರನಿ ಕಾಣಕಿ

ಯಹೊವಾ ಮೊಶೆನೆ ಕದಲ ಸುವೈ ಕದ್ಯಾರೆ, ಇಸ್ರಾಯೆಲೊ ಮಾರಾಹುತಿ ಕಾಣಿಕೆ ಲಿನ ಔ ಕೈನ ತ್ಯುನೊನೆ ಕೆ. ಮನಸೆ ದಿವಾಹುತಿ ತೆ ಕಾಣಿಕೆ ಕಾಡಿಲ್ಯೂ ತು ತ್ಯುನಾಕ್ಹು ಕಾಡಿಲಿವಾನಾ ಕಾಣಿಕಿ ಕೈ ವೈ ಕದ್ಯಾಮ ಕ್ಹೊನೂ ರುಪ್ಪೂ ತಾಂಬು ಕವಾನಾ ಲ್ಹೊಡಾವೊ ನಿಲಿ ಧುಮ್ರನಾ ರಗತನಾ ವರ್ಣಮಾನಾ ದೊರಾವೊ ಚೊ ನಿಲಿ ದುಮ್ರ ರಗತ ವರ್ಣ ರ‍್ಹಯಲ ದೊರಾ ರೆಶ್ಮಿನಾ ವಣ್ಣಾ ಬಕ್ರಾನಾ ಬಾಲೊನಾ ವಣ್ಣಾ ಹದನ ಕರಲ ಲಾಲ ರಂಗನಾ ಬಕ್ರಾನಾ ಬಾಲೊ ಕಡಲ ಡುಕ್ಕುನಾ ಚಮ್ಡು ಜಾಲಿನು ಝಾಡ ದಿವ್ವಾನೆ ಚಾಯೆ ಥಯಲ ತೆಲ ಅಭಿಷೆಕನಾ ತೆಲನೆ ವರಿ ಬಾಸನಾ ಉದನೆ ಛಾಯೆ ಥಯಲ ಚೊಕಿ ಬಾಸನಾ ಅತ್ತರ ಮಹಾಯಾಜಕ ಕವಚನೆ ಚಾಯೆ ಥಯಲ ಗೊಮೆದಕ ರತ್ನ ಪದಕನಾ ಕೈಚಿಲಾಮಾ ಕೆತ್ತಾನಾ ಬಿಜಾ ಬಿಜಾ ರತ್ನ ಛೆ. ಮಿ ತ್ಯುನಾ ವಚ್ಮಾ ರ‍್ಹವಾನಾಹುತಿ ಮನೆ ಯಕ್ಕ ಗುಡಾರ ಭಾಂದು. ಮಿ ತ್ಯುನೆ ದೆಕ್ಲಾಡಾನಾ ಮಾದರಿನಾ ತಿನಾ ನಿಂಗತಜ಼಼ ಗುಡಾರನೆ ತಿಮಾ ರ‍್ಹವಾನಾ ಕ್ಹಾರಾ ಸಮಾನ್ನೊನೆ ಕರೌ.

ಒಡಂಬಡಿಕೆನಿ ಪಟ್ಟಗಿ

ತು ಕಾಟಾನ ಝಾಡಕ್ಹು ಯಕ್ಕ ಮಂಜುಷನೆ ಕರೌ.ತೆ ಅಡಿ ಮಾರ ಲಾಂಬು ದೆಡ ಮಾರ ರುಂದ ದೆಡಮಾರ ಉಚ್ಚು ಥಯಲ ರ್ಹೌ. ಚೊಕಾ ಕ್ಹೊನಾನಾ ತಗಡೊ ತಿನಾ ಭಾರಾಬಿ ಮ್ಹೈಬಿ ಲಗಾಡು. ತೆನಾ ಉಪ್ಪರ ವರಿ ತಿನಾ ಸುತ್ತೆಬಿ ಕ್ಹೊನಾನಿ ಪಟ್ಟಿಯೊ ಲಗಾಡು. ಚಾರ ಕ್ಹೊನಾನಾ ಬಾಂಗ್ಡಿಯೊನೆ ಧವೈನ ತಿನಾ ಚಾರೆ ಮೂಲಾವೊಮಾ ಕದ್ಯಾಮ ಯಕ್ಕಯಕ್ಕ ಜ಼ಗಾವೊಕನ ಬೆಬೆ ಬಾಂಗ್ಡಿಯೊನೆ ಮ್ಹೆಲು ತೆ ಮಂಜುಷನೆ ಉಚಾವಾನಾಹುತಿ ತು ಕಾಟಾವೊನಾ ಝಾಡಕ್ಹು ಲಾಕ್ಡಿಯೊ ಕರೈನ ತಿನೆ ಕ್ಹೊನಾನಾ ತಗಡೊ ಲಗಾಡಿನ ವರಿ ಮಂಜುಷನಾ ಭಂಬೆ ಜಾ಼ಗಾವೊನಾ ಬಾಂಗ್ಡಿಯೊಮಾ ಸೆರಸು. ತೆ ಲಾಕ್ಡಿಯೊನೆ ಮಂಜುಷನಾ ಬಾಂಗ್ಡಿಯೊಮಾತಾ ಕಾಡೆವಾಚಿ ತಿಮಾಜ ಮ್ಹೆಲೆಲ ರ‍್ಹೌ ತೆ ಮಂಜುಷಮಾ ಮಿ ತ್ಯುನೆ ದಿವಾನಾ ಆಜ್ಞಾಶಾಸನೆ ಮ್ಹೆಲು. ತೆನೈಸೊ ಚೊಕಾ ಕ್ಹೊನಾನಾ ಝಾಕಾನ ಕೃಪಾಸನನೆ ಕರೌ. ತೆ ಅಡಿ ಮಾರ ಲಾಂಬು ದೆಡ ಮಾರ ರುಂದ ಥಯಲ ರ‍್ಹೌ. ಕೃಪಾಸನನಾ ಬೆ ಮುಲಾವೊಮಾ ಕೆರುಬಿನಾ ಬೆ ಕ್ಹೊನಾನಾ ಆಕಾರೊನೆ ನಕ್ಷಾನಾ ಕಾಮಕ್ಹು ಕರೌ. ಕೃಪಾಸನೆ ಯಕ್ಕಯಕ್ಕ ಕೊನಾಮಾ ಯಕ್ಕಯಕ್ಕ ಕೆರುಬಿಯೊನೆ ಕರೈನ ಕೃಪಾಸನೆ ಜೊಡಸು. ತೆ ಕೆರುಬಿನಾ ಉಪ್ಪರ ರೆಕ್ಯಾವೊನೆ ಫೈಲಾಯಾ ನಿಂಗತ ಕೃಪಾಸನ ತಿನಾ ರೆಕ್ಯಾವೊಕ್ಹು ಝಾಕಿಲಿವಾ ವರಕ್ಹು ರ‍್ಹೌ. ತಿನಾ ಮ್ಹೊಡಾವೊ ಆಮನಾ ಸಾಮನಾ ಥೈನ ಕೃಪಾಸನೆ ದೆಕ್ತಾ ರ‍್ಹೌ. ತೆ ಕೃಪಾಸನೆ ಮಂಜುಶನಾ ಉಪ್ಪರ ಮ್ಹೆಲು. ಮಿ ತ್ಯುನೆ ದಿವಾನಾ ಆಜ್ಞಾನಾ ಶಾಸನೊನೆ ತೆ ಮಂಜುಷನಾ ಮ್ಹೈ ಮ್ಹೆಲು. ತ್ಯಾ ಮಿ ತುನೆ ದರ್ಶನ ದ್ಯುಸ. ಕೃಪಾಸನಾ ಉಪ್ಪರ ಆಜ್ಞಾನಾ ಶಾಸನೊನೆ ಮ್ಹೆಲಲ ಮಂಜುಷನಾ ಉಪ್ಪರ ಬೆ ಕೆರುಬಿಯೊನಾ ವಚ್ಮಾ ಮಿ ರ‍್ಹೈನ ತಾರಾ ಕ್ಹಾತೆ ಬೊಲಿನ ತು ಇಸ್ರಾಯೆಲೊನೆ ಆಜ್ಞಾಕರಾನಾ ಚಾ಼ಯೆ ಥಯಲ ಕ್ಹಾರಾ ಸಂಗತಿಯೊನೆ ತಿಳಸುಸ. "ತು ಕಾಟಾನಾ ಝಾಡಕ್ಹು ಯಕ್ಕ ಮೆಜ ಕರೌ. ತೆ ಬೆಮಾರ ಲಾಂಬು ಥೈನಬಿ, ಯಕ್ಕ ಮಾರ ರುಂದ ಥೈನಬಿ, ದೆಡಮಾರ ಉಚ್ಚು ಥೈನಬಿ ರ‍್ಹೌ. ತಿನೆ ಚೊಕು ಕ್ಹೊನೂ ತಗಡೊ ಮಾರಿನ, ಸುತ್ತೆಬಿ ಕ್ಹೊನಾನಾ ತೊರಣ ಭಂದೌ. ಮೆಜನಾ ಸುತ್ತೆಬಿ ಅಂಗೈ ರುಂದನಾ ಅಡ್ಡ ಪಟ್ಟಿ ಕರೈನ ತಿನೆ ಕ್ಹೊನಾನೂ ತೊರಣ ಭಾಂದು. ಚಾರ ಕ್ಹೊನಾನಿಯೊ ಬಾಂಗ್ಡಿಯೊ ಕರೈನ ಚಾರೆ ಪಗೊನೆಬಿ ಘಾಲು.

ತೆ ಬಾಂಗ್ಡಿಯೊ ಅಡ್ಡ ಪಟ್ಟಿನೆಬಿ ಅಂಟಿ ಲಿದಲ ರ‍್ಹೌ. ಮೆಜನೆ ಉಚಾವಾನಾಹುತಿ ಲಾಕಡಿಯೊನೆ ತಿಮಾ ಸೆರಸು. ತೆ ಲಾಕಡಿಯೊ ಕಾಟಾವೊನಾ ಝಾಡಕ್ಹು ಕರೈನ ತಿನೆ ಕ್ಹೊನಾನಾ ತಗಡೊ ಘಾಲು. ತಿನಾಕ್ಹು ಮೆಜನೆ ಉಚೌ. ಮೆಜನಾ ಉಪ್ಪರ ಮ್ಹೆಲಾನಾ ಹರಿವಾಣೊ, ಧೂಪಾರತಿಯೊ, ಹುಜಿಯೊ, ಪಾನನಾ ದ್ರವ್ಯಯೊ ಎಡಿ ಕರಾನೆ ಚಾ಼ಯೆ ಥಯಲ ಕುಂಡಾವೊ ಚೊಕಾ ಕ್ಹೊನಾಕ್ಹು ಕರೌ. ಪರಿಶುದ್ದ ರೊಕ್ಲಾವೊ ಹರದಿನ್ನೆ ತೆ ಮೆಜನಾ ಉಪ್ಪರ ಮಾರಾ ಸಮ್ಮುಕಮಾಜ ಮ್ಹೆಲಲ ರ‍್ಹೌ.

ದಿಪಸ್ತಂಬ

ಚೊಕಾ ಕ್ಹೊನಾನಾ ದಿವಾನಾ ಖಂಬಾವೊನೆ ಕರೌ. ತಿನಾ ಹೆಟಲ್ಯಾ ಭಾಗಮಾ ಕಂಬಾವೊನೆ ನಕ್ಷಾನಾ ಕಾಮಕ್ಹು ಕರೌ. ತೆ ದಿವಾನಾ ಬುಡತುಜ಼ ಅಖಂಡ ಥೈನ ಫುಲ್ಲನೊ ಗೊಂಚಲೊ,ಅರಳೆಲ ಫುಲ್ಲೊ ಮೊಗ್ಗವೊ ಅಲಂಕಾರ ಥೈನ ಕೆತ್ತು. ಕ್ಹಂಬಾನಾ ಯಕ್ಕ ಯಕ್ಕ ಪಾರ್ಶ್ವಮಾ ತನ್ನ ತನ್ನ ಸಿಂಗ್ಡಾ ನಿಂಗತಜ಼಼ ಛೆ ಸಿಂಗ್ಡಾವೊ ರ‍್ಹೌ. ಹರಿಯಕ್ಕ ಟೊಂಗಿಯೊಮಾ ಬಾದಾಮಾನಾ ಫುಲ್ಲೊ ನಿಂಗತ ರ‍್ಹವಾನಾ ತನ್ನ ತನ್ನ ಫುಲ್ಲೊ ಮೊಗ್ಗವೊ ರ‍್ಹೌ. ದಿವಾನಾ ಕ್ಹಂಬಾಕ್ಹು ಆವಾನಾ ತೆ ಟೊಂಗಿಯೊನೆ ತಿಮ್ಮಜ಼ ಕರೌ. ದಿವಾನಾ ಸ್ತಂಭನಾ ಕ್ಹಂಬಾಮಾ ಫುಲ್ಲೊನೊ ಗೋಂಚಲೊ, ಫುಲ್ಲೊ, ಮಗ್ಗಿಯೊ ರ‍್ಹವಾನಾ ಬಾದಾಮನಾ ಫುಲ್ಲೊ ನಿಂಗತ ಚಾರ ಫುಲ್ಲೊನಾ ಅಲಂಕಾರೊ ರ‍್ಹೌ. ಬೆ ಬೆ ಟೊಂಗಿಯೊ ಕವಲ ಫುಟಲ ಜ಼ಗಾವೊಮಾ ಕ್ಹಾರಾ ಯಕ್ಕ ಯಕ್ಕ ಮೊಗ್ಗ ರ‍್ಹೌ. ಫುಲ್ಲೊನಾ ಸಾಮನೊ, ಸಿಂಗ್ಡಾಯೊ ರ‍್ಹೈತಬಿ ದಿಪ ಸ್ತಂಬೊಕ್ಹಾರಾ ಕ್ಹಾತೆಜ಼ ಚೊಕಾ ಕ್ಹೊನಾಕ್ಹು ಕೆತ್ತಾನಾ ಕಾಮಕ್ಹು ಕರೌ. ತಿನೆ ಕ್ಹಾತ ಹಣೆತೆಯೊ ಕರೌ. ತೆ ಹಣೆತೆನಾ ಉಜಾಳು ಕ್ಹಾಮಾತು ಪಡು ಕೈನ ತಿನೆ ಲಗಾಡಲ ರ‍್ಹೌ. ದಿಪನಾ ಪಿನಕಾಡಾನು ಕಾತರೊ, ಕಟ್ಟ ಕರಲ ಕುಡಿಯೊನೆ ಘಾಲಾನಾ ಕುಂಡಾವೊನೆ ಚೊಕಾ ಕ್ಹೊನಕ್ಹುಜ ಕರೌ. ದಿಪಸ್ತಂಬೊ ತಿನಾ ಕ್ಹಾರಾ ಉಪಕರಣೊ ಮುವ್ವತ್ತ ಕಿಲೊ ಚೊಕಾ ಕ್ಹೊನು ಥಯಲ ರ‍್ಹೌ. ದೆಕ, ಡೊಂಗರಪರ ಮಿ ತುನೆ ದೆಕ್ಲಾಡಲ ಮಾದರಿಮಾ ಕ್ಹಾರುಜ಼ ಎಚ್ಚರಿಕೆಕ್ಹು ಕರೌ.”

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.