Sikkiligar Bible
ವಿಮೊಚನ 27
ಯಜ್ಞವೆದಿ
ಯಜ್ಞ ವೆದಿನೆ ಕಾಟಾನಾ ಝಾಡಕ್ಹು ಪಾಂಚ ಮಾರ ಲಾಂಬು ಥಯಲಬಿ, ಪಾಂಚ ಮಾರ ರುಂದ ಥಯಲಬಿ ಚೌಕಬಿ ಕರೌ. ತಿನೂ ಉಚ್ಚೂ ತನ್ನ ಮಾರ ರ್ಹೌ. ತಿನಾ ಚಾರೆ ಮೂಲಾವೊಮಾ ಚಾರ ಸಿಂಗ್ಡಾವೊನೆ ಕರೌ. ತೆ ಸಿಂಗ್ಡಾವೊ ಯಜ್ಞ ವೆದಿಕ್ಹುಜ ಆಯಲ ರ್ಹೌ. ತೆ ಯಜ್ಞ ವೆದಿನೆ ತಾಂಬಾನಾ ತಗಡೊ ವರಾಡೂ. ತಿಮಾ ರ್ಹವಾನೆ ರಾಕನೆ ಕಾಡಿಲಿವಾನಾಹುತಿ ಥಾಳಾವೊನೆ, ಸಲಕಿಯೊನೆ, ತಪಾಲಾವೊನೆ, ಕಾಟಾನಾ ಚಮಚಾವೊ, ತಿಮ್ಮಜ಼ ಅಗಿಷ್ಟಿಯೊನೆ ಕರೌ. ತೆ ಸಾಮನೊ ಕ್ಹಾರಾ ತಾಂಬಾನಾ ಥಯಲ ರ್ಹೌ. ಯಜ್ಞ ವೆದಿನೆ ಹತ್ತನಾ ಕಾಮಕ್ಹು ತಾಂಬಾನಾ ಜಾಲರಿನೆ ಕರೌ, ತೆ ಜಾಲರಿನಾ ಚಾರೆ ಮೂಲಾವೊನೆ ತಾಂಬಾನಾ ಬಾಂಗ್ಡಿಯೊ ಘಲೌ. ತೆ ಜಾಲರುಕ್ಹು ಯಜ್ಞವೆದಿನಾ ಸುತ್ತೆ ರ್ಹವಾನು ಕಟ್ಟಾನೂ ಹೆಟಾಲಕ್ಕಾ ರ್ಹೈನ ಯಜ್ಞವೆದಿನಾ ಅಡಿತು ವಚ್ಮಾಲಕ್ಕಾ ರ್ಹೌ ನಂಗತ ಘಲೌ. ಯಜ್ಞವೆದಿನೆ ಉಚಾವಾನಾ ಲಾಕಡಿಯೊ ಕಾಟಾವೊನಾ ಝಾಡಕ್ಹು ಕರೈನ, ತಾಂಬಾನಾ ತಗಡೊನೆ ವರಾಡೂ. ತೆ ಲಾಕಡಿಯೊನೆ ತೆ ಬಾಂಗ್ಡಿಯೊಮಾ ಮಾಳಾಯಲ್ಪರ ತೆ ಯಜ್ಞವೆದಿನೆ ಉಚಾವಾನಾಹುತಿ ತಿನಾ ಭಂಬೆ ಜ಼ಗಾ ರ್ಹೌ. ತೆ ಯಜ್ಞವೆದಿನೆ ಢೊಲ್ಗಾವೊಕ್ಹು ಪಳ್ಳ ಥಯಲ ಪೆಟಿಗೆ ನಿಂಗತ ಕರೌ. ಮಿ ಡೊಂಗರಪರ ತುನೆ ದೆಕ್ಲಾಡಲ ನಿಂಗತ ತಿನೆ ಕರೌ.
ಯಹೊವಾನಿ ಸನ್ನಿದಿನು ಅಂಗಳಾ
ಪರುಶುದ್ದ ಝೊಪ್ಡಾನೆ ಅಂಗಳನೆ ಕರೌ. ತೆ ದಕ್ಷಿಣನಾ ಭಾಗನೆ ಅಂಗಳನೆ ವಣ್ಣಾವೊ ರ್ಹೌ, ತೆ ವಣ್ಣಾವೊನೆ ನಯ ಥೈನ ನವಾ ಅಳ್ಳಿಕ್ಹು ಪದರಕ್ಹು ವಣ್ಣಾವೊನೆ ಕರೌ. ತೆ ಕ್ಹೊ ಮಾರ ಲಾಂಬಾ ಥಯಲ ರ್ಹೌ. ತೆ ಜ಼ಗಾಕನ ಇಕ್ಹ ಕ್ಹಂಬಾವೊ. ತಿನೆ ಇಕ್ಹ ತಾಂಬಾನಾ ಗದಿನಾ ದಗ್ಡಾವೊ ರ್ಹೌ. ಕ್ಹಂಬಾವೊನೆ ರುಪ್ಪಾನಾ ಕೊಂಡಿಯೊ ಪಟ್ಟಿಯೊ ರ್ಹೌ. ತೆ ರಿತಿಮಾ ಉತ್ತರಕನಬಿ ಕ್ಹೊಮಾರ ಲಾಂಬಾ ರ್ಹಯಲ ವಣ್ಣಾವೊ, ಇಕ್ಹ ಕ್ಹಂಬಾವೊ, ಇಕ್ಹ ತಾಂಬಾನಾ ಗದಿಗಿನಾ ದಗ್ಡಾವೊ ರ್ಹೌ ಕ್ಹಂಬಾವೊನಾ ಕೊಂಡಿಯೊ, ಪಟ್ಟಿಯೊ ರುಪ್ಪಾನಾ ಥೈಲ ರ್ಹೌ. ಪಶ್ಚಿಮಾ ಕನ ಅಂಗಳನಾ ರುಂದಮಾ ಐವತ್ತ ಮಾರ ಲಾಂಬು ಥೈನಬಿ ವಣ್ಣಾವೊ ದಕ್ಹ ಕ್ಹಂಬಾವೊ, ದಕ್ಹ ಗದಿಗೆನಾ ದಗ್ಡಾವೊ ರ್ಹೌ. ಪೂರ್ವ ದಿಕ್ಕಮಾಬಿ ಅಂಗಳನಾ ರುಂದಮಾ ಐವತ್ತು ಮಾರ ರ್ಹೌ. ಯಕ್ಕ ಜ಼ಗಾಕನ ಪಂದ್ರಾ ಮಾರ ಲಾಂಬು ರ್ಹಯಲ ವಣ್ಣಾ ರ್ಹೈನ ತಿನೆ ತನ್ನ ಸ್ತಂಬೊನೆ, ತನ್ನ ಗದಿಗಿನಾ ದಗ್ಡಾವೊ ರ್ಹೌ. ಹಜಿಯಕ್ಕ ಜ಼ಗಾಕನ ಪಂದ್ರಾ ಮಾರ ಲಾಂಬು ಥಯಲ ವಣ್ಣಾ ರ್ಹೈನ ತಿನೆ ತನ್ನ ಸ್ತಂಬೊನೆ, ತನ್ನ ಗದಿಗಿನಾ ದಗ್ಡಾವೊ ರ್ಹೌ. ಅಂಗಳನಾ ಬಾಕಲಮಾ ಇಕ್ಹಮಾರನಾ ವಣ್ಣಾವೊ ರ್ಹೌ ತಿನೆ ನಯ ಥೈನ ಹೊಸೆದ ನವಾ ನೂಲ, ನಿಲಿ, ಜಾ಼ಂಬ್ಳಾನೊ, ಘನ್ನುಲಾಲ ಬಿಜಾ಼ ಬಿಜಾ಼ ದೊರಾಕ್ಹು ಕಸೂತಿ ಕಾಮವಾಲಾವೊಕ್ಹು ಹತ್ತಕ್ಹು ಕರೌ. ಬಾಕಲನೆ ಚಾರ ಕ್ಹಂಬಾವೊ ಚಾರ ಗದಗಿನಾ ದಗ್ಡಾವೊ ರ್ಹೌ. ಅಂಗಳನಾ ಸುತ್ತೆಬಿ ರ್ಹವಾನು ಕ್ಹಾರಾ ಕ್ಹಂಬಾವೊನೆ, ರುಪ್ಪಾನಾ ಪಟ್ಟಿಯೊ, ರುಪ್ಪಾನಾ ಕೊಂಡಿಯೊ, ತಾಂಬಾನಾ ಗದಗಿನಾ ದಗ್ಡಾವೊ ರೌ. ಅಂಗಳಬಿ ಕ್ಹೊ ಮಾರ ಲಾಂಬು ಥೈನ ಸುತ್ತೆಬಿ ಐವತ್ತ ಮಾರ ರುಂದ ಥೈನಬಿ ರ್ಹೌ. ತಿನಾ ಸುತ್ತೆ ರ್ಹವಾನಾ ವಣ್ಣಾಬಿ ನಯ ಥೈನ ನವಾ ಅಳ್ಳಿನಾ ಪದರಕ್ಹು ವಣ್ಣಾವೊಕ್ಹು ಕರಲ ತಿನೆ ಪಾಂಚ ಮಾರ ಉಚ್ಚು ರ್ಹೌ. ತಿನೆ ತಾಂಬಾನಾ ಗದಗಿನಾ ದಗ್ಡಾವೊ ರ್ಹೌ. ಝೊಪ್ಡಾನಾ ಬಿಜಾ಼ಬಿಜಾ಼ ಕಾಮನೆ ಚಾ಼ಯೆ ಥಯಲ ಸಾಮನೊ , ಝೊಪ್ಡಾನಾ ಗುಟವೊ, ಅಂಗಳನಾ ಗುಟೊ, ತಾಂಬಾನಾ ಥಯಲ ರ್ಹೌ.
ದಿವ್ವಾನಿ ಕಾಳಜಿ
ದಿವಾ ಕೆಳಾಮಾಬಿ ಬಳು ನಿಂಗತ ಇಸ್ರಾಯೆಲೊ ಒಲಿವ್ ಝಾಡನಾ ಕಚ್ಚಾವೊನೆ ಕುಟ್ಟಿನ ಚೊಕು ಥಯಲ ಒಲಿವ್ ತೆಲನೆ ಕಾಡಿಲಿನ ಆವಾನಿಂಗತ ತ್ಯುನೊನೆ ಅಪ್ಪಣೆ ದ್ಯೂ. ಕ್ಹುದಾನಾ ದರ್ಶನಾ ಝೊಪ್ಡಾಮಾ ಆಜ್ಞಾ ಶಾಸನೊನೆ ಮಂಜುಷನಾ ಅಗಾ ರ್ಹವಾನಾ ವಣ್ಣಾನಾ ಭಾರಾ ಆರೊನನೆ, ತಿನಾ ಬಚ್ಚಾ ತೆ ಕ್ಹಾಂಜತು ಪಾಟಲಕ್ಕಾ ಯಹೊವಾನಾ ಸನ್ನಿದಿಮಾ ತೆ ದಿವೊ ಬಳಲ ನಿಂಗತ ಕರೆಟ್ಟ ಲಾಗಲ ರ್ಹೌ. ಇಸ್ರಾಯೆಲೊ ತಿನಾ ಕ್ಹಾಂದಾನಾವಾಲಾ ಆ ನಿಯಮನೆ ತಲತಲಾಂತರಲಕ್ಕಾ ಶಾಶ್ವತ ಥೈನ ಕರು.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.