Skip to content
BibleKenya

Sikkiligar Bible

ವಿಮೊಚನ 17

ಮ್ಹೊಟಾ ದಗ್ಡಾಮಾತು ಪಾನಿ ಆವಾನು

ತೆ ಥಯಲ್ಪರ ಇಸ್ರಾಯಲನಾ ಸಮೂಹ ಕ್ಹಾರಾ ಯಹೊವಾನಾ ಅಪ್ಪಣೆನಾ ಮೆರೆನೆ " ಸಿನ ಕವಾನಾ ಉಸಕನಿ ಜಿಮಿನತಾ ಗೈನ ಅಗಾ ಪ್ರಯಾಣ ಕರಿನ ರೆಫಿದಿಮಾ ಉತ್ರ್ಯಾ. ತ್ಯಾಬಿ ಮನಕ್ಹೊನಾ ಪಿವಾನಾಹುತಿ ಪಾನಿ ನೊತು. ತಿನಾಹುತಿ ಮನಕ್ಹೊ ಮೊಶೆನಾ ಉಪ್ಪರ ಗುಣಗುಟ್ಟತಾ "ಹಮೊನೆ ಪಿವಾನಾಹುತಿ ಪಾನಿ ಲೈನ ದ್ಯು” ಕೈನ ಗದ್ದಲ ಉಚಾವಾನೆ, ಮೊಶೆ ತ್ಯುನೊನೆ, " ಮಾರಾ ಕ್ಹಾತೆ ಕಾ ವಾದ-ವಿವಾದ ಕರೊಸಿ? ಯಹೊವಾನೆ ಕಾ ಪರಿಕ್ಷಾ ಕರೊಸಿ? ಕದ್ಯೊ. ತ್ಯಾ ಮನಕ್ಹೊ ಪಾನಿನಾ ತರಕ್ಹು, ಮೊಶೆ ವಿರುದ್ದ ಥೈನ ಗುಣ ಗುಟ್ಟಿನ, " ತು ಹಮೊನೆ, ಹಮಾರಾ ಬಚ್ಚಾ಼ವೊನೆ, ಜಾನವರೊ ಐಗುಪ್ತ ದೆಶತು ಯ್ಹಾ ಬಲೈಲಿನ ಅಮ್ಮ ಪಾನಿ ನೈಸೊ ಮರಾ ವರಕ್ಹಾ ಕರಲ ಕಾವೈ? ಕದ್ಯಾ. ತೆಳಾಮಾ ಮೊಶೆ ಯಹೊವಾನೆ ಮೊರೆ ಮ್ಹೆಲ್ಯೊ, " ಆ ಮನಕ್ಹೊನಾ ಹುತಿ ಮಿ ಸು ಕರು? ತ್ಯುನೆ ಮನೆ ದಗ್ಡೊ ನಾಕಿನ ತಿಮ್ಮ ಛೆತೊ” ಕದ್ಯೊ.

ತಿನಾಹುತಿ ಯಹೊವಾ ಮೊಶೆನೆ, "ತು ನೈಲ ನದಿನೆ ಫೊಡಲ ಲಾಕಡಿನೆ ಹತ್ಮಾ ಧರಲಿನ ಇಸ್ರಾಯಲನಾ ಮ್ಹಟಾವೊಮಾ ದಕ್ಹಾವೊನೆ ಬಲೈಲಿನ ಮನಕ್ಹೊನಾ ಕ್ಹಾಮಾ ಗೈನ, ಮಿ ದೆಕ್ಲಾಡಾನಾ ಜ಼ಗಾನೆ ಜಾ಼. ತ್ಯಾ ಸಿನ ರ‍್ಹಯಲ ದಗ್ಡಾನಾ ಉಪ್ಪರ ಮಿಜ಼ ತುನೆ ಎದುರ ಥೈನ ಹುಬ್ರವುಸ. ತು ತೆ ದಗ್ಡೊ ಫೊಡಲ್ಪರ, ಮನಕ್ಹೊ ಪಿವಾನು ಪಾನಿ ಭಾರು ಆವಸ” ಕದ್ಯೊ. ಮೊಶೆ ಇಸ್ರಾಯಲನಾ ಮ್ಹೊಟಾವೊಮಾ ಕ್ಹಾಮೊಜ ತಿಮ್ಮಜ಼ ಕರ‍್ಯೊ. ಇಸ್ರಾಯೆಲೊ, " ಯಹೊವಾ ಹಮಾರಾ ವಚ್ಮಾ ಛೆಸು ನೈ? ಕೈನ ಯಹೊವಾನೆ ತ್ಯಾ ಪರಿಕ್ಷಾ ಕರಲಕ್ಹು, ಮೊಶೆ ತೆ ಜ಼ಗಾನೆ ‘ಮಸ್ಸಾ’ ಕವಾನು ತ್ಯುನೆ ಗದ್ದಲ ಕರಲಕ್ಹು ತಿನೆ ‘ಮೆರಿಬಾ’ ಕವಾನು ನಾಮ ಮ್ಹೆಲ್ಯೊ.

ಅಮಾಲೆಕ್ಯರೊನಾ ಕ್ಹಾತೆ ಯುದ್ದ

ಅಮಾಲಕ್ಯರೊ ರೆಪಿದಿಮಾ ಇಸ್ರಾಯಲನಾ ಕ್ಹಾತೆ ಯುದ್ದ ಕರ‍್ಯಾ. ತೆಳಾಮಾ ಮೊಶೆ ಯೆಹುಶುವಾನೆ, " ತು ಹಮಾರಾ ಮನಕ್ಹೊಮಾ ದಕ್ಹಾವೊನೆ ಇನಿಲಿನ ಅಮಾಲೆಕ್ಯನಾ ಕ್ಹಾತೆ ಯುದ್ದ ಕರು. ಮಿ ವಂತಾ ಕ್ಹುದಾನಿ ಲಾಕಡಿ ಹತ್ಮಾ ಧರಲಿನ ಡೊಂಗನಾ ಉಪ್ಪರ ಹುಬ್ರವುಸ” ಕೈನ ಕದ್ಯೊ. ಮೊಶೆ ಅಪ್ಪಣೆನಾ ಮರೆನೆ ಯೆಹುಶುವಾ ಅಮಾಲೆಕ್ಯೊನಾ ಕ್ಹಾತೆ ಯುದ್ದ ಕರ‍್ಯೊ. ಮೊಶೆ ವರಿ ಆರೊನನ ವರಿ ಹುರನ ಡೊಂಗರಪರ ಚಡಿನ ಗಯಾ. ಮೊಶೆ ತಿನಾ ಹತೊನೆ ಉಪ್ಪರ ಉಚಾಯಲಪರ ಇಸ್ರಾಯೆಲೊ ತಾಕತ ಹೊಂದಿಲಿವಸ. ತೆ ತಿನೊ ಹತ್ತ ಉತಾರಲ್ಪರ ಆಮಾಲೆಕ್ಯೊ ತಾಕತ ಹೊಂದಿ ಲಿವಸ. ಮೊಶೆನಾ ಹತೊ ವಜ್ಜು ಥಾತಾಮಾ, ಆರೊನ ವರಿ ಹುರನ ಯಕ್ಕ ದಗ್ಡಾನೆ ಲಿನ ಐನ ಮ್ಹೆಲ್ಯಾ. ಮೊಶೆ ತಿನಾ ಉಪ್ಪರ ಬೈಟ್ಯೊ. ಆರೊನ ಯಕ್ಕ ಜ಼ಗಾ ಹುಬ್ರೈನ ವರಿ ಹುರನ ಯಕ್ಕ ಜ಼ಗಾ ಹುಬ್ರೈನ ಮೊಶೆನಾ ಹತೊನೆ ಉಚೈನ ಧರಾನೆ ಸಹಾಯ ಕರ‍್ಯಾ. ಅಮ್ಮಜ ತಿನಾ ಹತೊ ಸುರ‍್ಯೂ ಡುಬೆಲಕ್ಕಾ ಹೆಟಾ ಉತಾರೆ ವಾಚಿಜ ವ್ಹತ್ತಾ. ಯೆಹುಶುವಾ ಅಮಾಲೆಕ್ಯೊನೆ ವರಿ ತ್ಯುನಾ ಸೈನಿಕೊನೆ ತಲ್ವಾರಕ್ಹು ಹರಾಡಿ ಪಡ್ಯಾ.

ತೆಳಾಮಾ ಯಹೊವಾ ಮೊಶೆನೆ, " ಅನೆ ಸ್ಹೆ ಮ್ಹೆಲ್ಲಿವಾ ವರಕ್ಹು ಯಕ್ಕ ಬುಕ್ಕಮಾ ಲಿಕ್ಕ. ತೆ ಯೆಹುಶುವಾನೆ ತಿಳಸಾ. ಕಾ ಕದ್ಯಾಮ ಮಿ ಅಮಾಲೆಕ್ಯರೊ ಸ್ಹೆ ಜಿಮಿನಪರ ಅನಾ ನಂಗತ ಸಂಪೂರ್ಣ ನಾಶ ಕರಿನ ಛೊಡುಸ”ಕೈನ ಕದ್ಯೊ. ತೆ ಜ಼ಗಾಮಾ ಮೊಶೆ ಯಜ್ಞ ವೆದಿ ಭಾಂದಾಲಗಾಡಿನ ತಿನೆ "ಯಹೊವಾ ನಿಸ್ಸಿ” ಕೈನ ನಾಮ ಮ್ಹೆಲ್ಯೊ. ಮೊಶೆ , ಆಮಾಲೆಕ್ಯರನಾ ಹತ್ತ ಯಹೊವಾನ ಸಿಂಹಾಸನನೆ ವಿರೊದ ಥೈನ ಉಚಾಯಲಕ್ಹು ಯಹೊವಾನಾ ಸಿಂಹಾಸನೆ ಅಮಾಲೆಕ್ಯರನಾ ಉಪ್ಪರ ಯಹೊವಾನೆ ತಲತಲಾಂತರಮಾ ಯುದ್ದ ರ‍್ಹವಸ ಕದ್ಯೊ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.