ವಿಮೊಚನ 18

ಇತ್ರೊನ ಮೊಶೆನೆ ಮಳಾನೆ ಆಯಲ

1ಕ್ಹುದಾ ಮೊಶೆನೆ ತಿನಾ ಮನಕ್ಹೊ ಥಯಲ ಇಸ್ರಾಯೆಲೊನೆ ಮಹಾ ಉಪಕಾರೊನೆ ಕರಲ, ಯಹೊವಾ ಇಸ್ರಾಯೆಲೊನೆ ಐಗುಪ್ತ ದೆಶತಾ ಬಲೈಲಿನ ಆಯಲ, ವಿದ್ಯಾನ್ಯರ ಆಚಾರನೂ ಮೊಶೆನೊ ಮಾಮೊ ಥಯಲ ಇತ್ರೊವನ ಪುಚ್ಚ್ಯೊ. 2ತೆಳಾಮಾ ಮೊಶೆನೆ ಮಾಮೊ ಥಯಲ ಇತ್ರೊವಕನ ದಿನ ವಳಾಯಲ ಮೊಶೆನಿ ಬೈಕೊ ಥಯಲ ಚಿಪ್ಪೊರಳನೆ, ತಿನಾ ಬೆ ಗಂಡ ಬಚ್ಚಾ಼ವೊನೆ ಬಲೈಲಿನ ಆಯೊ. 3ತೆ ಬಚ್ಚಾವೊಮಾ ಯಕ್ಲಾನೆ "ಗೆರ್ಷೊಮ” ಕೈನ ನಾಮ ಮ್ಹೆಲ್ಯೊ. ಕಾ ಕದ್ಯಾಮ ಮೊಶೆ, " ಮಿ ಅನ್ಯ ದೆಶಮಾ ಪ್ರವಾಸಿ ಥಯೊಸ” ಕೈನ ಕದ್ಯೊ. 4ತಿನಾ ಬಿಜಕ್ಲಾ ದಿಕ್ರಾನೆ ಮೊಶೆಬಿ, " ಮಾರೊ ಬಾನೊ ಕ್ಹುದಾ ಮನೆ ಸಹಾಯ ಥಯಲಕ್ಹು ಮನೆ ಫರೊಹನನಾ ತಲ್ವಾರನೆ ತಪ್ಪಸಿನ ವಚಾ಼ಡ್ಯೊ” ಅಮ್ಮ ಕೈನ, ತೆ ದಿಕ್ರಾನೆ " ಎಲೀಯೆಜರ್” ಕೈನ ನಾಮ ಮ್ಹೆಲ್ಯಾ. 5ಮೊಶೆನೊ ಮಾಮೊ ಥಯಲ ಇತ್ರೊವನ ಮೊಶೆನಾ ಬಚ್ಚಾ಼ವೊನೆ, ವರಿ ತಿನಿ ಬೈಕೊನೆ ಬಲೈಲಿನ ಉಸಕನಿ ಜಿಮಿನಮಾ ಕ್ಹುದಾನಾ ಡೊಂಗರನಾ ಬಾಜು಼ ಉತ್ರಲ ಮೊಶೆಕನ ಆಯೊ. 6ತೆ ಮೊಶೆನೆ, ತಾರೊ ಮಾಮೊ ಥಯಲ ಇತ್ರೊವ ಥಯಲ ಮಿ ತಾರಿ ಬೈಕೊನೆ, ತಾರಾ ಬೆ ಬಚ್ಚಾ಼ವೊನೆ ಬಲೈಲಿನ ತುಕನ ಆಯೊಸ” ಅಮ್ಮ ಕೈನ ಮೊಕಲ್ಯೊ. 7ಮೊಶೆ ತಿನೊ ಮಾಮೊ ಥಯಲ ಕ್ಹಾಮೊ ಆವಾನೆ ಗೈನ ತಿನೆ ಔಳಿಲಿನ ಮಟ್ಟಿ ದಿದ್ಯೊ. ತ್ಯುನೆ ಪರಸ್ಪರ ಯೊಗ ಕ್ಷೆಮನೆ ವಿಚಾರ ಕರಲ್ಪರ ಗುಡಾರನಾ ಮ್ಹೈ ಗಯಾ. 8ತೆ ಥಯಲ್ಪರ ಮೊಶೆ ಯಹೊವಾ ಇಸ್ರಾಯಲನಾ ಪರವಾಗಿ ಫರೊಹನನೆ, ಐಗುಪ್ತೊನೆ ಕರಲಕ್ಹಾರು, ವಾಟಮಾ ತುಮೊನೆ ಉಂಟ ಥಯಲ ಕ್ಹಾರಾ ಕಷ್ಟೊನೆ, ಯಹೊವಾ ತೆ ಕಷ್ಟೊಕ್ಹು ತಪ್ಪಸಲ ತಿನಾ ಮಾಮಾನೆ ಕದ್ಯೊ. 9ಯಹೊವಾ ಐಗುಪ್ತೊನಾ ಹತೊಕ್ಹು ಇಸ್ರಾಯೆಲೊನೆ ಛೊಡೈನ ತ್ಯುನೊನೆ ಉಪಕಾರ ಕರಲಕ್ಹು ಇತ್ರೊವನ ಕುಷಿ ಥಯೊ. 10ಇತ್ರೊವನ, "ಐಗುಪ್ತನಾ ಹತೊಮಾತೊ, ಫರೊಹನನಾ ಹತ್ತಕ್ಹುಬಿ ತುಮೊನೆ ಛೊಡಾಲಕ್ಹು ಯಹೊವಾನೆ ಸ್ತೊತ್ರಾ! ಇಸ್ರಾಯೆಲೊನೆ ಗುಲಾಮಗಿರಿಮಾತೊ ವಚಾ಼ಡಲ ಯಹೊವಾನೆ ಸ್ತೊತ್ರ! 11ಯಹೊವಾ ತಿನಾ ಮನಕ್ಹೊನೆ ತ್ಯುನಾ ಹತೊಕ್ಹು ಛೊಡೈನ, ತೆ ಐಗುಪ್ತೊ ಕಯಾ ವಿಷಯಮಾ ಗರ್ವಪಡ್ದಾಸತೊ ತೆ ವಿಷಯಮಾ ತ್ಯುನೊನೆ ಬಗ್ಗಾಯಲಕ್ಹು ಯಹೊವಾ ಕ್ಹಾರಾ ಕ್ಹುದಾವೊತಿ ಮ್ಹೊಟೊ ವೈಕೈನ ಹಮ್ನಾ ತಿಳದಿಲಿದ್ಯೊಸ ಕೈನ ಕದ್ಯೊ. 12ತೆ ನೈಸೊ ಮೊಶೆನೊ ಮಾಮೊ ಥಯಲ ಇತ್ರೊವನ ಕ್ಹುದಾನೆ ಸರ್ವಾಂಗ ಹೊಮ ಯಜ್ಞೊನೆ ಸಮರ್ಪಸ್ಯೊ. ಆರೊನ, ಇಸ್ರಾಯಲನಾ ಮ್ಹೊಟಾವೊನೆ ತಿನಾ ಕ್ಹಾತೆ ಕ್ಹುದಾನಾ ಸನ್ನಿದಿಮಾ ಬೊಜನ ಕಾರಾನಾ ಹುತಿ ಆಯಾ.

ನ್ಯಾಯಪತಿನೆ ನೆಮ್ಸಲ

13ಅಗಲ್ಯಾ ದಿನ್ನೆ ಮೊಶೆ ಮನಕ್ಹೊನೆ ನ್ಯಾಯಾ ಕರಾನಾಹುತಿ ಬೈಟಲ ಪಾಟತಾ ಕ್ಹಾಂಜ಼ಲಕ್ಕಾ ಮನಕ್ಹೊ ತಿನಾ ಬಾಜು಼ಮಾಜ ಹುಬ್ರಯಾತಾ. 14ಮೊಶೆ ಮನಕ್ಹೊನಾಹುತಿ ಕರಲ ಕ್ಹಾರು ಮಾಮೊ ದಿಕಿನ ತಿನೆ, " ತು ಶ್ಯಾನೆ ಮನಕ್ಹೊನಾಹುತಿ ಅಕ್ಲೊ ಪ್ರಯಾಸ ಕರಾಡೊಸತೊ? ಪಾಟತೊ ರಾತಲಕ್ಕಾ ನ್ಹ್ಯಾಜ ಹುಬ್ರೈನ ತು ಯಕ್ಲೊ ನ್ಯಾಯಾ ಕರಾನೆ ಬೈಟಲ ಕಾವೈ? ಕೈನ ಪುಚ್ಚ್ಯೊ. 15ಮೊಶೆ ತಿನಾ ಮಾಮಾನೆ, "ಎ ಮನಕ್ಹೊ ಕ್ಹುದಾನು ನ್ಯಾಯ ಐಕಾನಾಹುತಿ ಮಕನ ಆವಸ, 16ತಿಮ್ಮಜ಼ ತ್ಯುನಾಮಾ ಲಡೈ ಸು ಥೈತಬಿ ಮಕನ ಆವಸ. ಮಿ ವಿಚಾರ ಕರಿನ ತ್ಯುನೊನೆ ನ್ಯಾಯಾ ಕರಿನ ಕ್ಹುದಾನಾ ಆಜ್ಞಾ ವಿದಿಯೊನೆ ಸಾರುಸ” ಕೈನ ಕದ್ಯೊ. 17ತೆ ಐಕಿನ ಮೊಶೆನೊ ಮಾಮೊ ತಿನೆ, " ತು ಕರಾನು ಆ ಕಾರ್ಯ ವಿದಾನ ಚೊಕೊ ನವೈ. 18ಆ ಕಾಮ ಘನ್ನು ಕಷ್ಟ ರ‍್ಹಯಲ ವ್ಹೈ. ತಾರಾ ಯಕ್ಲಾಕ್ಹು ತಿನೆ ನೈ ಚಲಾವಾನೆ ಥಾತು. ತು ತಾರಾ ಕ್ಹಾತೆ ರ‍್ಹವಾನಾ ಆ ಮನಕ್ಹೊ ಕ್ಹರಿಮಾಜ ತ್ರಾಸನೆ ಮ್ಹೈ ಥಾವೊಶಿ. 19ಆ ವಾತನೆ ಐಕ. ಮಿ ತುಮೊನೆ ಯಕ್ಕ ಆಲೊಚನೆ ಕೌಸ ವರಿ ಕ್ಹುದಾ ತಾರಾ ಕ್ಹಾತೆ ರ‍್ಹವಾದೆ ತು ಮನಕ್ಹೊನೆ, ಕ್ಹುದಾನೆ ವಚ್ಮಾ ರ‍್ಹಯಲ ಮನಕ್ಹೊನಾ ಲಡೈವೊನೆ ಕ್ಹುದಾಕನ ಲೌ. 20ತು ಕ್ಹುದಾನಾ ಆಜ್ಞಾ ವಿದಿಯೊನೆ ಸಾರಿನ, ತ್ಯುನೆ ಚಾಲಾನಿ ವಾಟನೆ, ಕರಾನಾಹುತಿ ಕಾಮೊನೆ ತ್ಯುನೊನೆ ತಿಳಸು. 21ತೆನೈಸೊ ತು ಮನಕ್ಹೊಮಾ ಸಮರ್ಥರೊ, ಭಕ್ತೊ, ನಂಬಿಗಸ್ತೊ, ಲಂಚಮಟನಾ ಥಯಲ ದಾಣ್ಗಾವೊನೆ ಇನಿಲಿನ ತ್ಯುನೊನೆ ಹಜಾ಼ರ ಮನಕ್ಹೊನಾ ಉಪ್ಪರಬಿ, ಕ್ಹೊ ಮನಕ್ಹೊನಾ ಉಪ್ಪರಬಿ, ಐವತ್ತ ಮನಕ್ಹೊನಾ ಉಪ್ಪರಬಿ, ದಕ್ಹ ಮನಕ್ಹೊನಾ ಉಪ್ಪರಬಿ ಅದಿಕಾರಿಯೊ ಕೈನ ನೆಮಸು. 22ತ್ಯುನೆಜ಼ ಕೆಳಮಾಬಿ ಮನಕ್ಹೊನೆ ನ್ಯಾಯಾ ತಿರಸಾದೆ. ತ್ಯುನೆ ಮ್ಹೊಟಾ ಲಡೈಯೊನೆ ತುಕನ ಲಾವಾದೆ. ನ್ಹಾನಾ ಲಡೈಯೊನೆ ತ್ಯನೆಜ ಛೊಡಾವದೆ. ತ್ಯುನೆ ತಾರಾ ಕ್ಹಾತೆ ಆ ವಜನ ಉಚಾವಕ್ಹು ತ್ಯುನೆ ಹಲಕು ಥಾವಸ. 23ಕ್ಹುದಾ ತುನೆ ಅಮ್ಮ ಕರಾನಾಹುತಿ ಅಪ್ಪಣೆ ದಿದ್ಯಾಮ, ತು ಆ ಕಾಮನಾ ಹೊರೆನೆ ನಿರ್ವಸಾನೆ ಸಾದ್ಯ ಥಾವಸ. ಆ ನೈಸೊ ಆ ಮನಕ್ಹೊ ಕ್ಹಾರಾ ಸಂತುಷ್ಟ ಥೈನ ತ್ಯುನಾ ತ್ಯುನಾ ಘರೊಯೆ ಜಾ಼ವಸ” ಕೈನ ಕದ್ಯೊ.

24ಮೊಶೆ ತಿನಾ ಮಾಮಾನಾ ವಾತೆ ಒಪ್ಪಿಲಿನ ತೆ ಕದಲ ನಂಗತ ಕ್ಹಾರುಜ಼ ಕರ‍್ಯೊ. 25ಮೊಶೆ ಇಸ್ರಾಯೆಲೊಮಾ ಸಮರ್ಥವಾಲವೊನೆ ಇನಿಲಿನ ಹಜಾ಼ರ ಮನಕ್ಹೊನಾ ಉಪ್ಪರಬಿ, ಕ್ಹೊ ಮನಕ್ಹೊನಾ ಉಪ್ಪರಬಿ, ಐವತ್ತ ಮನಕ್ಹೊನಾ ಉಪ್ಪರಬಿ, ದಕ್ಹ ಮನಕ್ಹೊನಾ ಉಪ್ಪರಬಿ, ಅದಿಕಾರಿಯೊನೆ ನೆಮಸ್ಯೊ. 26ಔನೆ ಕೆಳಾಮಾಬಿ ಮನಕ್ಹೊನೆ ನ್ಯಾಯಾ ತಿರಸಾಲಾ ಥೈನ ಮ್ಹೊಟಾ ಲಡೈಯವೊನೆ ಮೊಶೆಕನ ಲಾತಾ, ನ್ಹಾನಾ ಲಡೈವೊನೆಬಿ ತ್ಯುನೆಜ಼ ತಿರಸತಾ ಆಯಾ. 27ತೆ ಥಯಲ್ಪರ ಮೊಶೆ ತಿನಾ ಮಾಮಾನೆ ಅಪ್ಪಣೆ ದೆತಾಮಾ, ತೆ ತಿನಾ ಸ್ವಂತ ಗಾಮೆ ಫರಿನ ಗಯೊ.