Skip to content
BibleKenya

Sikkiligar Bible

ವಿಮೊಚನ 16

ಮನ್ನ ವರಿ ಲಾವಕ್ಕಿ

ಇಸ್ರಾಯಲ ಸಮೂಹನಾ ಕ್ಹಾರಾ ಎಲಿಮೆನತಾ ಪ್ರಯಾಣ ಕರಿನ ತ್ಯುನೆ ಐಗುಪ್ತ ದೆಶತಾ ಬೆವಾ ಮ್ಹೈನಾನಾ ಪಂದ್ರಾವಾ ದಿನಮಾ ಎಲಿಮಿನೆ ಸಿನಾಯ ಡೊಂಗರನೆಬಿ ವಚ್ಮಾ ರ‍್ಹವಾನಾ ಸಿನ ಕವಾನಾ ಉಸಕನಿ ಜಿಮಿನೆ ಆಯಾ. ತೆಳಾಮಾ ಇಸ್ರಾಯಲನಾ ಸಮೂಹ ಕ್ಹಾರು ಉಸಕಿನಿ ಜಿಮಿನಮಾ ಮೊಶೆ ವರಿ ಆರೊನನಾ ಉಪ್ಪರ ಗುಣ ಗುಟ್ಯಾ. ಇಸ್ರಾಯೆಲೊ ಮೊಶೆ ವರಿ ಆರೊನನೆ, "ಆ ಸಮೂಹನಾ ಕ್ಹಾರು ಭುಕ್ಕಕ್ಹು ಕ್ಹಲಾಸ ಕರು ಕೈನ ತುಮೆ ಹಮೊನೆ ಆ ಉಸಕನಿ ಜಿಮಿನನೆ ಬಲೈಲಿನ ಆಯಾಸ. ಹಮೆ ಐಗುಪ್ತ ದೆಶಮಾ ರ‍್ಹತಾಮಾ ಮಾಕ್ಹನಾ ಸಮೊನೊನಾ ಬಾಜು಼ಮಾ ಬೈಟಿನ ಪೆಟ ಭರಿನ ರೊಕ್ಲೊ ಕ್ಹಾತಾಮಾ ಯಹೊವಾನಾ ಹತ್ತಕ್ಹು ಮರಿ ಜಾ಼ವತ್ತೊ ಕೆಕ್ಲು ಚೊಕು ವ್ಹತ್ತು” ಕದ್ಯಾ. ತೆಳಾಮಾ ಯಹೊವಾ ಮೊಶೆನೆ, "ಮಿ ಹಬಾಳತೊ ತುಮಾರಾಹುತಿ ಅನ್ನನೆ ರಿಚೌಸ. ಮನಕ್ಹೊ ಹರಯಕ್ಕ ದಿನ್ನೆ ಭಾರಾ ಗೈನ ತೆ ದಿನನೆ ಚಾ಼ಯೆ ಥಾಯಲಕ್ಲು ತೆಕ್ಲುಜ಼ ಜಮಾ ಕರಲ್ಯೂ. ಅನಾಕ್ಹು ತ್ಯುನೆ ಮಾರಾ ಆಜ್ಞೆವೊನೆ ಅನುಸರಸಿನ ಚಾ಼ಲಸ ಸು ನೈ ಕೈನ ತಿಳ್ದಿ ಲ್ಯುಸ. ಛೆಂವಾ ದಿನಮಾ ತ್ಯುನೆ ಲಾಯಲನೆ ತೆ ಹರಯಕ್ಕ ದಿನಮಾ ಜಮಾ ಕರಲತಿ ದುಪ್ಪಟ ಥಾವಸ ಕೈನ ಕದ್ಯೊ. ಮೊಶೆ ವರಿ ಆರೊನಬಿ ಇಸ್ರಾಯೆಲೊನೆಬಿ, "ತುಮೊನೆ ಐಗುಪ್ತ ದೆಶಮಾತೊ ಭಾರೊ ಆವಾ ಕರಲವಾಲೊ ಯಹೊವಾಜ ವ್ಹೈ ಕೈನ ಆಜ ಕ್ಹಾಂಜ಼ನಾ ಟೈಮಾ ತುಮೊನೆ ಗ್ವತ್ತಥಾವಸ. ಪಾಟಮಾ ಯಹೊವಾನಾ ಮಹಿಮೆ ತುಮೊನೆ ದಿಕ್ಹಸ, ಕಾ ಕದ್ಯಾಮ ತುಮೆ ಯಹೊವಾನೆ ವಿರೊದ ಥೈನ ಗುಣ ಗುಟ್ಟಲ ತೆ ಐಕ್ಯೊಸ. ಹಮಾರಾ ಉಪ್ಪರ ತುಮೆ ಗುಣಗುಟ್ಟಾನು ಸುವೈ? ಹಮೆ ಕೆಕ್ಲಾ ಚಾ಼ಯೆ ಥಯಲವಾಲಾ ಕೈನ ಕದ್ಯಾ. ತೆಳಾಮಾ ಮೊಶೆ "ಯಹೊವಾ ಕ್ಹಾಂಜ಼ನಾ ಟೈಮಾ ಮ್ಹಾಕ, ಪಾಟಮಾ ಚಾ಼ಯೆ ಅಕ್ಲಾ ರೊಕ್ಲಾವೊನೆ ದ್ಯುಸ. ತುಮಾರು ಗುಣಗುಟ್ಟಾನು ಯಹೊವಾನೆ ಐಕೈಯು. ಮಿ ವರಿ ಆರೊನ ಕಕ್ಲಾ ವ್ಹೈ? ತುಮಾರು ಗುಣಗುಟ್ಟಾನು ಯಹೊವಾನಾ ವಿರುದ್ದ ವ್ಹೈ ನೈತೊ ಅಪ್ನಾ ವಿರುದ್ದ ನವೈ” ಕದ್ಯೊ. ಮೊಶೆ ಆರೊನನೆ, "ತು ಇಸ್ರಾಯಲನಾ ಸಮಾಜ ಕನ ಗೈನ ತ್ಯುನೊನೆ, ‘ಯಹೊವಾ ತುಮಾರು ಗುಣಗುಟ್ಟಾನು ಐಕೊಸ. ತಿನಾಹುತಿ ತುಮೆ ಕ್ಹಾರಾ ತಿನಾ ಸನ್ನಿದಿನೆ ವಗ್ಗಟ ಥೈನ ಮಳಿನ ಔಕೈನ ಆಜ್ಞಾಕರ”’ ಕೈನ ಕದ್ಯೊ. ಆರೊನ ಇಸ್ರಾಯಲನಾ ಕ್ಹಾರಾ ಸಮಾಜನೆ ಆ ವಾತೊನೆ ತಿಳಸತಾ ಟೈಮೆ, ತ್ಯುನೆ ಉಸಕನಿ ಜಿಮಿನಕನ ದೆಕ್ತಾಮಾ, ಮೆಘಮಾ ಯಹೊವಾನು ಮಹಿಮಾ ತ್ಯುನೊನೆ ದಿಕ್ಹ್ಯೊ. ಯಹೊವಾ ಮೊಶೆನಾ ಕ್ಹಾತೆ ಬೊಲನ ಕದಲ ಸುವೈ ಕದ್ಯಾಮ, ಇಸ್ರಾಯೆಲೊ ಗುಣಗುಟ್ಟಾನು ಮನೆ ಐಕೈಯು. ತು ತ್ಯುನೊನೆ, ‘ತುಮೆ ಕ್ಹಾಂಜಮಾ ಮಾಕ್ಹನೆ, ಪಾಟಮಾ ಚಾ಼ಯೆ ಅಕ್ಲಾ ರೊಕ್ಲಾವೊನೆ ಕ್ಹಾಸಕೊಸಿ. ಇನಾಕ್ಹು ಮಿ ತುಮಾರೊ ಕ್ಹುದಾ ಥಯಲ ಯಹೊವಾ ವ್ಹೈಕೈನ ತುಮೊನೆ ಗ್ವತ್ತಥಾವಸ ಕೈನ ಕೌ”’ ಕವಾನು. ಕ್ಹಾಂಜ ಥಾತಾಮಾ ಲಾವಕ್ಕಿಯೊ ಐನ ತ್ಯುನಾ ಪಾಳೆಯನ ಭರಿಗಯಾ. ತೆನೈಸೊ ಹೊತ್ತಾರಮಾ ಇಬ್ಬನ್ನಿ ಪಾಳೆಯೆನಾ ಸುತ್ತೆಬಿ ಪಡಿತಿ. ತೆ ಇಬ್ಬನ್ನಿ ಕರಗಲ ಪರ ಉಸಕನಿ ಜಿಮಿನಮಾ ಇಬ್ಬನಿನಾ ಬುಂದೊ ನಿಂಗತ ಸು ಯಕ್ಕ ನ್ಹಾನ್ಹಾ ರವಾ ದಿಕ್ಹಿ. ಇಸ್ರಾಯೆಲೊ ತೆ ದೆಕಿನ ಯಕ್ಲಾನೆ ಯಕ್ಲೊ, "ಆ ಸುವೈ? ಕೈನ ಬೊಲಿದ್ಯಾ. ತೆ ಸುವೈ ಕೈನ ತ್ಯುನೊನೆ ತಿಳದ್ಯು ನೈ. ಮೊಶೆ ತ್ಯುನೊನೆ, " ಆ ಯಹೊವಾ ತುಮಾರಾಹುತಿ ಕ್ಹಾವಾನಾಹುತಿ ದಿದಲ ರೊಕ್ಲಾ ಥಯಾಸ. ಯಹೊವಾ ಅನಾ ವಿಷಯಮಾ ಆಜ್ಞಾ ಕರಲ ಸುವೈ ಕದ್ಯಾರೆ: ಹರಯಕ್ಲೊ ತಿನಾ ಕುಟಂಬವಾಲಾನಾ ಸಂಖ್ಯಾನಾ ಅನುಸಾರ ಮಾತಾನೆ ತನ್ನ ಸೆರ ನಿಂಗತ ತಿನಾ ಬಿಜಾ಼ವೊನಾ ಹುತಿ ಜಮಾ ಕರಾದೆ. ಹರಯಕ್ಲೊ ತೆ ಕೆಕ್ಲು ಕ್ಹಾವಸತೊ ತೆಕ್ಲು ತುಮೆ ಜಮಾ ಕರಲಿವೊಸಿ” ಕೈನ ಕದ್ಯೊ.

ಇಸ್ರಾಯೆಲೊ ತಿಮ್ಮಜ಼ ಕರ‍್ಯಾ. ದಕ್ಹಾಜ಼ನಾ ಹೆಚ್ಚ ದಕ್ಹಾಜ಼ನಾ ಕಮ್ಮ ಜಮಾ ಕರಲಿದ್ಯಾ. ತ್ಯುನೆ ತಿನೆ ಶೆರಕ್ಹು ಅಳತಿ ಕರ‍್ಯಾ. ಘನಾ ಜಮಾ ಕರಲವಾಲಾನೆ ಸುಜ ಹೆಚ್ಕಿ ಥಯು ನೈ, ದಕ್ಹಾ ಜಮಾ ಕರಲವಾಲಾನೆ ಸುಜ ಕಮ್ಮ ಥಯು ನೈ. ಹರಯಕ್ಲೊ ತ್ಯುನಾ ಭೊಜನನೆ ಕರೆಟ್ಟ ಥಾವಾ ವರಕ್ಹು ಜಮಾ ಕರಲಿದ್ಯೊತೊ. ತೆನೈಸೊ ಮೊಶೆ ತ್ಯುನೊನೆ, "ಅನೆ ಕುನ್ನಜ ವಂತಾ ಲಕ್ಕಾ ಮ್ಹಲ್ಯುಜ ನೈ”ಕೈನ ಕದ್ಯೊ. ತೆ ಥಯಲ್ಪರ ತ್ಯುನೆ ಮೊಶೆನಾ ವಾತ ನೈ ಐಕ್ಯಾಮ ತಿಮಾನು ದಕ್ಹುನೆ ಅಗಲ್ಯಾ ದಿನ್ನ ಲಕ್ಕಾ ಮ್ಹೆಲ್ಲಿದ್ಯಾಮ ತಿಮಾ ಕಿಡಾ ಪಡಿನ ಗಂದಬಾಸ ಧರಿನ ಕೆಟ್ಟಿಗಯು. ತೆನೆ ಮೊಶೆ ತ್ಯುನಾ ಉಪ್ಪರ ಸಿಟ್ಟ ಕರ‍್ಯೊ. ಮನಕ್ಹೊ ಹರದಿನ್ನೆ ಪಾಟಮಾ ತ್ಯುನಾ ಭೊಜನನೆ ಚಾ಼ಯೆ ಅಕ್ಲು. ಜಮಾ ಕರಲಿದ್ಯಾ. ತಡಕೊ ಹೆಚ್ಚ ಥಾತಾಮಾ ತೆ ಕರಗಿನ ಜಾ಼ತುತು. ಛೆವಾ ದಿನೆ ದುಪ್ಪಟ್ಟ ಕ್ಹಾವಾನಾಹುತಿ, ಕದ್ಯಾಮ ಯಕ್ಕ ಯಕ್ಲಾನೆ ಶೆರ ನಿಂಗತ ಇನಿಲಿನ ಭರಲಕ್ಹು ಸಮೂಹನಾ ಅದಿಕಾರಿ ಕ್ಹಾರಾ ಮೊಶೆಕನ ಐನ ಆ ಸಂಗತಿನೆ ತಿಳಸ್ಯಾ. ತಿನೆ ತೆ, " ಆ ಯಹೊವಾ ಕದಲ ವಾತ, ‘ವಂತಾ ಯಹೊವಾನೆ ಅರಾಮ ಕರಾನು ಪರಿಶುದ್ದ ಸಬ್ಬತ ದಿನ ಥಯುಸ. ಆ ದಿನಮಾ ಬಾಳಾನು ಬಾಳಿನ ಬೆಯಿಸಾನು ಬೆಸೊ. ಅಮಾ ಉಗ್ರಲಕ್ಹಾರು ವಂತಾ ಲಕ್ಕಾ ಮ್ಹೆಲ್ಲಿಯೊ’” ಕದ್ಯೊ. ಮೊಶೆ ಆಜ್ಞಾ ಕರಲನಿಂಗತ ತ್ಯುನೆ ಅಗಲ್ಯಾ ದಿನ್ನ ಲಕ್ಕಾ ತಿನೆ ಮ್ಹೆಲ್ಲಿದ್ಯಾ. ತೆ ನೈಸೊ ತೆ ಕೆಟ್ಟಲ ನ್ಹೊತು, ಕಿಡಾ ಪಡ್ಯಾಬಿ ನೈ. ಪಾಚಾತೊ ಮೊಶೆ ತ್ಯುನೊನೆ, "ಆ ಟೈಮಾ ತಿನೆ ಕ್ಹಾವೊ. ಆ ದಿನ್ನೆ ಯಹೊವಾನು ಸಬ್ಬತ ದಿನ ರ‍್ಹಯಲಕ್ಹು ಆ ದಿನ ತೆ ಕ್ಹೆತರಮಾ ದಿಕ್ಹತು ನೈ. ಛೆ ದಿನ್ನ ತಿನೆ ಜಮಾ ಕರು. ಕ್ಹಾತವಾ ದಿನ್ನ ಸಬ್ಬತ ದಿನ ರ‍್ಹಯಲಕ್ಹು ತೆ ದೊರಕತು” ನೈ ಕೈನ ಕದ್ಯೊ ತೆ ತಿಮ್ಮಜ಼ ಥಯು. ಮನಕ್ಹೊಮಾ ದಕ್ಹಾಜ಼ನಾ ಕ್ಹಾತವಾ ದಿನ್ನಮಾ ತಿನೆ ಜಮಾ ಕರಲಿವಾನಾ ಹುತಿ ಜಾ಼ತಾಮಾ ತ್ಯುನೊನೆ ಸುಜ ಮಳ್ಯು ನೈ. ತೆಳಾಮಾ ಯಹೊವಾ ಮೊಶೆನೆ, " ತುಮೆ ಕಿಜಾ಼ಲಕ್ಕಾ ಮಾರಾ ಆಜ್ಞಾನ್ಯಾವೊನೆ, ಮಿ ಕರಲ ನಿಯಮೊನೆ ನೈ ಅನುಸರಸಿನ ಅಲಕ್ಷ್ಯ ಕರೊಸಿ? ದೆಕೊ, ಯಹೊವಾ ತುಮೊನೆ ಸಬ್ಬತ ದಿನನೆ ಆಚರಣೆ ಕರುಕೈನ ಅಪ್ಪಣೆ ದಿದಕ್ಹು ಛೆವಾ ದಿನಮಾ ಬೆ ದಿನನೂ ಅನ್ನನೆ ತುಮೊನೆ ಮಳಾ ವರಕ್ಹು ಅನುಗ್ರಹಶ್ಯೊಸ. ತುಮಾರಾಮಾ ಹರಯಕ್ಲೊ ತ್ಯುನೆ ರ‍್ಹವಾನಾ ಜ಼ಗಾಮಾ ರ‍್ಹೌ. ಕ್ಹಾತವಾ ದಿನಮಾ ಯಕ್ಲೊ ತಿನಿ ಜ಼ಗಾ ಛೊಡಿನ ಭಾರೊ ಜೌ಼ ನೈ” ಕೈನ ಕದ್ಯೊ. ತಿನಾಹುತಿ ಕ್ಹಾತವಾ ದಿನಮಾ ಮನಕ್ಹೊ ಕಾಮ ನೈ ಕರಿನ ಅರಾಮ ಕರ‍್ಯಾ.

ಇಸ್ರಾಯೆಲೊ ತೆ ಅನ್ನನೆ "ಮನ್ನ” ಕೈನ ನಾಮ ಮ್ಹೆಲ್ಯಾ. ತೆ ಧೊಳಿ ಕೊತಮಿರನಾ ಕಾಳ ನಂಗತ ವ್ಹತ್ತು ರುಚಿಮಾ ಜೆನ ತುಪ್ಪ ನಂಗತ ಕರಲ ದೊಶಿ ನಂಗತ ವ್ಹತ್ತು. ಮೊಶೆ ಮನಕ್ಹೊನೆ, "ಯಹೊವಾ ಆಜ್ಞಾ ಕರಲ ಆಜ ವ್ಹೈ, ‘ ಮಿ ಐಗುಪ್ತ ದೆಶತೊ ತುಮೊನೆ ಆವಾ ಲಗಾಡಿನ ಉಸಕನಿ ಜಿಮಿನಮಾ ಕ್ಹಾವಾನಾಹುತಿ ದಿದಲ ಅನ್ನನೆ ತುಮಾರಾ ಸಂತಾನವಾ ದೆಕಾನಿಂಗತ ತ್ಯುನಾ ತುಮೆ ಯಕ್ಕ ಶೆರ ಮನ್ನನೆ ಭರಿನ ಸುರಕ್ಷಿತ ಥೈನ ಮ್ಹೆಲ್ಲಿವೊ’” ಕೈನ ಕದ್ಯೊ. ತಿನಾಹುತಿ ಮೊಶೆ ಆರೊನನೆ, " ತು ಯಕ್ಕ ತಪಾಲೊ ಕಾಡಿಲಿನ, ತಿಮಾ ಯಕ್ಕ ಶೆರ ಅಕ್ಲು ಮನ್ನ ಘಾಲಿನ ತುಮಾರಾ ಸಂತತಿವಾಲಾ ದೆಕಾನಾಹುತಿ ತೆ ಯಹೊವಾನಿ ಸನ್ನಿದಿಮಾ ಮ್ಹೆಲು” ಕೈನ ಕದ್ಯೊ. ಯಹೊವಾ ಮೊಶೆನೆ ಆಜ್ಞಾ ಕರಲನಿಂಗತ, ಆರೊನಬಿ ಆಜ್ಞಾ ಶಾಸನನಾ ಮಂಜುಶನಾ ಬಾಜು಼ಮಾ ತಿನೆ ಉತಾರ‍್ಯೊ. ಇಸ್ರಾಯೆಲೊ ತ್ಯುನೆ ವಾಸ ಕರಲ ಪ್ರದೆಶನೆ ಆಯೆಲಕ್ಕಾ ಕದ್ಯಾಮ ಕಾನಾನ್ ದೆಶನೆ ಐನ ಮುಟ್ಟೆಲಕ್ಕಾ ಚಾಳಕ್ಹ ವರಕ್ಹ ಮನ್ನಜ ಕ್ಹಾದ್ಯಾ. ಓಮೆರ್ ಕವಾನು ಎಫಾಮಮಾ ದಕ್ಹವಾನು ಯಕ್ಕ ಪಾಲ ಧರಾ ವರಕ್ಹು ಯಕ್ಕ ಆಳತೆನಾ ಮಾಪನ ಥಯುಸ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.