احبار 9

ہارُون قُربانیاں پیش کریندے

1کاہِناں کُوں مخصوص کرݨ دے بعد اٹھوِیں ڈینہوار مُوسیٰ ہارُون تے اُوندے پوتراں تے اِسرائیل دے بزُرگاں کُوں سڈیا۔ 2اُوں ہارُون کُوں آکھیا، ”گُناہ تُوں پاک کرݨ آلی قُربانی کیتے ہِک بے عیب ویہڑا تے ساڑے ونجنڑ آلی قُربانی کیتے ہِک بے عیب چھترا گِھن تے رب العالمین کُوں پیش کر۔ 3وَل بنی اِسرائیل کُوں آکھ جو گُناہ تُوں پاک کرݨ آلی قُربانی کیتے ہِک بکرا، تے ساڑے ونجنڑ آلی قُربانی کیتے ہِک سال دا بے عیب ویہڑا تے ہِک سال دا بے عیب بھیڈا لیلا پیش کرو۔ 4نال ای سلامتی دی قُربانی کیتے ہِک ڈاند، ہِک چھترا تے تیل رَلیا ہویا غلے دا نذرانہ وی گِھن تے سبھ کُجھ رب العالمین کُوں پیش کرو۔ کیوں جو رب العالمین تُہاڈے اُتے اَج ای ظاہر تھیسی۔“

5بنی اِسرائیل او سبھ شیواں جِنہاں دا مُوسیٰ حُکم ڈِتا ہا، اِجتماع آلے تمبُو دے سامنڑے گِھن آئے۔ پُوری جماعت کولھ آ تے رب العالمین دے حضُور کھڑ تھئی۔ 6مُوسیٰ اُنہاں کُوں آکھیا، ”ایہ اُوہو کم ہے جیندے کرݨ دا حُکم رب العالمین تُہاکُوں ڈِتے تاں جو رب العالمین دا جلال اَج ای تُہاڈے اُتے ظاہر تھیوے۔“

7وَل مُوسیٰ ہارُون کُوں آکھیا، ”قُربان گاہ دے کولھ وَنج تے گُناہ تُوں پاک کرݨ آلی قُربانی تے ساڑے ونجنڑ آلی قُربانی پیش کر تے آپنڑا تے لوکاں دا کفارہ ڈے۔ رب العالمین دے حُکم دے مطابق لوکاں کیتے وی قُربانی پیش کر تاں جو اُنہاں دا کفارہ ڈِتا ونجے۔“

8ہارُون قُربان گاہ دے کولھ آیا تے اُوں ویہڑے کُوں ذبح کیتا جیہڑا اُوندے کیتے گُناہ تُوں پاک کرݨ آلی قُربانی ہا۔ 9اُوندے پوتر اُوندے کولھ ویہڑے دی رَت گِھن آئے۔ اُوں آپنڑی انگل رَت ءچ بوڈ تے اُونکُوں قُربان گاہ دے سینگاں اُتے لایا۔ باقی رَت اُوں قُربان گاہ دے تلے آلے حصے اُتے وِیٹ ڈِتی۔ 10وَل اُوں اُوندی چربی، گُردیاں، تے جِگر دی چربی کُوں قُربان گاہ اُتے ساڑ ڈِتا۔ ہارُون سبھ کُجھ اُونویں ای کیتا جِینویں رب العالمین مُوسیٰ کُوں حُکم ڈِتا ہا۔ 11ویہڑے دا گوشت تے کَھل اُوں ڈیرے دے باہر وَنج تے ساڑ ڈِتی۔

12اِیندے بعد ہارُون ساڑے ونجنڑ آلی قُربانی کُوں ذبح کیتا۔ اُوندے پوتراں اُوندی رَت اُونکُوں ڈِتی تے اُوں او رَت قُربان گاہ دے چارے پاسُوں چِھنڈک ڈِتی۔ 13اُنہاں قُربانی دے مختلف ٹوٹے سِری سمیت اُونکُوں ڈِتے تے اُوں اُنہاں کُوں قُربان گاہ اُتے ساڑ ڈِتا۔ 14وَل اُوں اُوندیاں آندراں تے لتاں دھو تے ساڑے ونجنڑ آلی قُربانی دیاں باقی شیواں اُتے رکھ تے ساڑ ڈِتیاں۔

15اِیندے بعد ہارُون او قُربانی پیش کیتی جیہڑی لوکاں کیتے ہئی۔ اُوں گُناہ تُوں پاک کرݨ آلی قُربانی کیتے بکرا ذبح کر تے اُونکُوں پہلی قُربانی آلی کار پیش کیتا۔ 16تے ساڑے ونجنڑ آلی قُربانی وی شرع دے مطابق پیش کیتی۔ 17وَل اُوں غلے دا نذرانہ پیش کیتا تے اُوندے ءچوں مُٹھ بھر تے قُربان گاہ اُتے ساڑ ڈِتا۔ غلے دا ایہ نذرانہ سویلے پیش کیتی گئی ساڑے ونجنڑ آلی قُربانی تُوں علاوہ ہا۔ 18وَل اُوں لوکاں کیتے سلامتی دی قُربانی دے طور تے ڈاند تے چھترے کُوں ذبح کیتا۔ اُوندے پوتراں اُونکُوں جانوراں دی رَت ڈِتی تے اُوں رَت کُوں قُربان گاہ دے چارے پاسُوں چِھنڈک ڈِتا۔ 19پر اُنہاں ڈاند دے تے چھترے دے چربی آلے حصے تے پُچھڑ، آندراں دی چربی تے جِگر دی چربی کُوں کڈھ تے 20سینے دے ٹوٹیاں اُتے رکھ ڈِتا۔ ہارُون اُوں چربی کُوں قُربان گاہ اُتے ساڑ ڈِتا 21پر سینے دے ٹوٹے تے سجی ستھل اُوں ہلائے ونجنڑ آلی قُربانی دے طور تے رب العالمین دے حضُور ہلائی۔ اُوں سبھ کُجھ مُوسیٰ دے حُکم دے مطابق ای کیتا۔

22گُناہ تُوں پاک کرݨ آلی قُربانی، ساڑے ونجنڑ آلی قُربانی تے سلامتی دی قُربانی پیش کرݨ تُوں بعد ہارُون آپنڑے ہتھ چا تے لوکاں کُوں برکت ڈِتی، تے وَل قُربان گاہ تُوں لہہ آیا۔ 23وَل مُوسیٰ تے ہارُون اِجتماع آلے تمبُو ءچ داخل تھئے تے جِیں ویلے او باہر آئے تاں اُنہاں لوکاں کُوں برکت ڈِتی تے رب العالمین دا جلال یکے لوکاں اُتے ظاہر تھیّا۔ 24رب العالمین دے حضُور تُوں بھاہ نِکل تے قُربان گاہ اُتے پئی ہوئی ساڑے ونجنڑ آلی قُربانی تے چربی دے ٹوٹیاں کُوں ساڑ تے سواہ کر ڈِتا۔ ایہ ڈیکھ تے لوک خوشی دے نعرے مریندے ہوئے مُنہ دے بھار ڈھے پئے۔