احبار 10

ندب تے ابِیہُو دا گُناہ

1ہارُون دے پوتراں ندب تے ابِیہُو آپنڑے آپنڑے خوشبو ساڑن آلے تھاں گِھن تے اُنہاں ءچ بکھدے ہوئے کولے تے خوشبودار مصالحے پا تے رب العالمین دے حضُور او بھاہ پیش کیتی جیہڑی ناجائز ہئی کیوں جو رب العالمین ایہ پیش کرݨ دا حُکم نہ ڈِتا ہا۔ 2اِیں پارُوں رب العالمین دے حضُور تُوں بھاہ نِکلی جئیں ڈوہائیں بِھرانواں کُوں ساڑ تے سواہ کر ڈِتا۔ او اُتھائیں رب العالمین دے حضُور مر گئے۔

3مُوسیٰ ہارُون کُوں آکھیا، ”ایہ اُوہو تھئے جِینویں رب العالمین فرمایا ہا جو

جیہڑے لوک میڈی قُربت ءچ آندے ہِن

اُنہاں دے ذریعے مَیں آپنڑی پاکیزگی ظاہر کریساں۔

مَیں یکے لوکاں دے سامنڑے ای

آپنڑے جلال دا اِظہار کریساں۔“

ہارُون چُپ ریہا۔ 4مُوسیٰ ہارُون دے چاچے عُزی ایل دے پوتراں میسائیل تے الصفن کُوں سڈ تے آکھیا، ”اِتھاں آؤ تے آپنڑے بِھرانواں کُوں مُقدّس تمبُو دے اگُوں چا تے ڈیرے دے باہر گِھن ونجو۔“ 5او آئے تے اُنہاں کُوں مُوسیٰ دے حُکم دے مطابق زیر جامیاں سمیت چا تے ڈیرے دے باہر گِھن گئے۔

6مُوسیٰ ہارُون تے اُوندے ڈُوجھے پوتراں الِیعزر تے اِتمر کُوں آکھیا، ”ماتم ءچ نہ آپنڑے وال کِھنڈائے تے نہ آپنڑے کپڑے پھڑائے نہ تاں تُساں مارے ویسو تے رب العالمین دا قہر پُوری جماعت اُتے نازل تھیسی۔ پر باقی اِسرائیلی جیہڑے تُہاڈے بِھرا ہِن، اِنہاں دا ماتم کر سگدے ہِن جِنہاں کُوں رب العالمین بھاہ نال ہلاک کر ڈِتے۔ 7اِجتماع آلے تمبُو دے دَر دے باہر نہ ونجائے نہ تاں مر ویسو، کیوں جو تُہاکُوں رب العالمین دی خدمت آلے تیل نال مسح کیتا گئے۔“ بس اُنہاں مُوسیٰ دے آکھنڑ دے مطابق اِینویں ای کیتا۔

کاہِناں کیتے ہدایتاں

8رب العالمین ہارُون کُوں آکھیا، 9”تُوں یا تیڈے پوتر، انگُور دا رَس یا شراب پی تے کڈھائیں وی اِجتماع آلے تمبُو ءچ داخل نہ تھیوݨ، نہ تاں تُساں مارے ویسو۔ ایہ شرع نسل در نسل قائم راہسی۔ 10تے تُساں مُقدّس تے غیر مُقدّس تے پاک صاف تے ناپاک شیواں ءچ فرق رکھو۔ 11تُساں بنی اِسرائیل کُوں او یکے قانُون سکھاونڑے ہِن جیہڑے مَیں مُوسیٰ دی معرفت تُہاکُوں ڈسائے ہِن۔“

12مُوسیٰ ہارُون تے اُوندے پوتراں الِیعزر تے اِتمر کُوں جیہڑے باقی رہ گئے ہَن، آکھیا، ”غلے دے نذرانہ دا جیہڑا حصہ رب العالمین دے حضُور ساڑیا نئیں ویندا، اُونکُوں گِھن تے بے خمیری روٹی پکائے تے قُربان گاہ دے کولھ ای کھوائے، کیوں جو او بہُوں پاک ہے۔ 13اُونکُوں مُقدّس جاہ تے کھوائے کیوں جو او رب العالمین دے ساڑے ونجنڑ آلے نذرانیاں ءچوں تیڈا تے تیڈے پوتراں دا حصہ ہے۔ میکُوں اِینویں ای حُکم ڈِتا گئے۔ 14جیہڑا سینہ ہلائے ونجنڑ آلی قُربانی دے طور تے، تے جیہڑی سجی ستھل چاتے ونجنڑ آلی قُربانی دے طور تے پیش کیتی گئی ہے، اُونکُوں تُوں تے تیڈے دِھیاں پوتر پاک صاف جاہ تے کھا سگدے ہِن۔ بنی اِسرائیل دیاں سلامتی دیاں قُربانیاں ءچوں ایہ حصے تیڈا تے تیڈے پوتراں دا حق ہِن۔ 15پر پہلے کاہِن ستھل تے سینے کُوں ساڑے ونجنڑ آلے نذرانیاں دی چربی سمیت پیش کرݨ۔ او اُنہاں کُوں ہلائے ونجنڑ آلی قُربانی دے طور تے رب العالمین دے حضُور ہلاوݨ۔ رب العالمین فرمیندے جو ایہ حصے ہمیشاں تئیں تیڈا تے تیڈے پوتراں دا حق ہوسن۔“

16مُوسیٰ پُچھیا جو اُوں بکرے دے گوشت دا کیا تھیّا جیہڑا گُناہ تُوں پاک کرݨ آلی قُربانی دے طور تے پیش کیتا گِیا ہا۔ اُونکُوں پتہ لگیا جو او وی سڑ گِیا ہا۔ ایہ سُنڑ تے اُونکُوں ہارُون دے بچے ہوئے پوتراں الِیعزر تے اِتمر اُتے کاوڑ چڑھی تے اُوں آکھیا، 17”تُساں گُناہ تُوں پاک کرݨ آلی قُربانی دا گوشت کیوں نئیں کھادا؟ تُہاکُوں او گوشت مُقدّس تمبُو ءچ کھاونڑاں ہا۔ ایہ ہِک بہُوں پاک حصہ ہے جیہڑا رب العالمین تُہاکُوں ڈِتے تاں جو تُساں رب العالمین دے حضُور جماعت دا کفارہ ڈے تے اُوندا قصُور دُور کرو۔ 18اِیں بکرے دی رَت تاں مُقدّس تمبُو ءچ گِھن آئی ای نہ گئی ہئی، اِیں واسطے تُہاکُوں اُوندا گوشت مُقدّس تمبُو ءچ کھاونڑا ہا، جِینویں مَیں تُہاکُوں حُکم ڈِتا ہا۔“

19وَل ہارُون مُوسیٰ کُوں ولدا ڈِتا، ”ڈیکھو، اَج اُنہاں آپنڑے کیتے گُناہ تُوں پاک کرݨ آلی قُربانی تے ساڑے ونجنڑ آلی قُربانی رب العالمین کُوں پیش کیتی ہے۔ پر میڈے اُتوں ایجھی آفت لنگھی ہے جو جیکر اَج مَیں گُناہ تُوں پاک کرݨ آلی قُربانی ءچوں کھا گِھندا تاں کیا ایہ رب العالمین کُوں چنگا لگدا؟“ 20ایہ گالھ سُنڑ تے مُوسیٰ مُطمئن تھی گِیا۔