احبار 11

پاک تے ناپاک جانور

1رب العالمین مُوسیٰ تے ہارُون کُوں آکھیا، 2”بنی اِسرائیل کُوں ڈساؤ، ’زمین اُتے راہنڑ آلے جانوراں ءچوں تُساں ایہ جانور کھا سگدے ہیوے، 3جِنہاں دے پیر چریجے ہوئے ہِن تے جیہڑے جُگالی وی کریندے ہِن۔ 4پر جیہڑے جانور یا جُگالی کریندے ہِن یا جِنہاں دے پیر چریجے ہِن، اُنہاں کُوں تُساں نہ کھوائے۔ اُوٹھ تُہاڈے کیتے حرام ہے کیوں جو بے شک او جُگالی تاں کریندے پر اُوندے پیر چریجے ہوئے نئیں۔ 5بِجُو تُہاڈے کیتے حرام ہے کیوں جو بے شک او جُگالی تاں کریندے پر اُوندے پیر چریجے ہوئے نئیں۔ 6خرگوش وی تُہاڈے کیتے حرام ہے کیوں جو بے شک او جُگالی تاں کریندے پر اُوندے پیر چریجے ہوئے نئیں۔ 7سُؤر تُہاڈے کیتے حرام ہے کیوں جو بے شک اُوندے پیر چریجے ہوئے ہِن پر او جُگالی نئیں کریندا۔ 8نہ اِنہاں جانوراں دا گوشت کھاونڑیں تے نہ اِنہاں دیاں لاشاں کُوں ہتھ لاونڑیں۔ ایہ تُہاڈے کیتے حرام ہِن۔

9سمندری تے دریائی جانوراں ءچوں تُساں اُنہاں کُوں کھا سگدے ہیوے جِنہاں دے کھمب تے چھِلکے ہووݨ۔ 10پر بغیر کھمب تے چِھلکے آلے جانور تُہاڈے کیتے مکرُوہ ہِن، بھانویں او سمندر تے دریاواں ءچ راہندے تے پِھردے ہِن۔ 11او تُہاڈے کیتے مکرُوہ ہِن، اِیں کیتے اُنہاں دا گوشت ہرگز نہ کھوائے بلکہ اُنہاں دیاں لاشاں تُوں وی نفرت کرائے۔ 12پانڑی ءچ راہنڑ آلے یکے جانور جِنہاں دے کھمب یا چِھلکے نئیں، او تُہاڈے کیتے مکرُوہ ہِن۔

13تے پکھیاں ءچوں جیہڑے تُہاڈے کیتے مکرُوہ ہِن تے جِنہاں کُوں کھاوݨ منع ہے او ایہ ہِن: عقاب، دھاری آلا گِدھ، کالا گِدھ، 14رتّی ہِل، ہر قِسم دی کالی ہِل، 15ہر قِسم دا کاں، 16عقابی اُلُّو، نِکے کَن آلا اُلُّو، وڈے کَن آلا اُلُّو، ہر قِسم دا باز، 17چِربل، ہڑگیلا، وڈا اُلُّو، 18چِٹا اُلُّو، صحرائی اُلُّو، مِصری گِدھ، 19لق لق، ہر قِسم دا بگلا، ہُد ہُد تے چام چِٹھ1۔

20کھمباں آلے یکے کِیڑے جیہڑے چار پیراں اُتے ٹُردے وی ہِن، تُہاڈے کیتے مکرُوہ ہِن، 21سوائے اُنہاں دے جِنہاں دے ٹپے مارݨ کیتے لتاں دے ڈُو حصے ہِن۔ اُنہاں کُوں تُساں کھا سگدے ہیوے 22یعنی تُساں ہر قِسم دیاں ٹِڈیاں ٹِڈے کھا سگدے ہیوے۔ 23کھمباں آلے باقی یکے کِیڑے جیہڑے چار پیراں اُتے ٹُردے ہِن، تُہاڈے کیتے مکرُوہ ہِن۔

24جیہڑے جانوراں نال تُساں ناپاک تھیسو، او ایہ ہِن۔ جیہڑا وی اِنہاں جانوراں دی لاش کُوں ہتھ لیسی، او شام تئیں ناپاک راہسی، 25تے جیہڑا کوئی اِنہاں دی لاش ءچوں کُجھ وی چیسی، او آپنڑے کپڑے دھووے تے او شام تئیں ناپاک راہسی۔ 26یکے جانور جِنہاں دے پیر چریجے ہوئے نئیں تے جیہڑے جُگالی نئیں کریندے، او تُہاڈے کیتے حرام ہِن۔ جیہڑا کوئی اُنہاں کُوں ہتھ لیسی او ناپاک تھی ویسی۔ 27تے او یکے جانور جیہڑے آپنڑے چار پنجیا ں اُتے ٹُردے ہِن، تُہاڈے کیتے حرام ہِن تے جیہڑا وی اُنہاں دی لاش کُوں ہتھ لیسی، او شام تئیں ناپاک راہسی، 28تے جیہڑا اُنہاں دی لاش کُوں چیسی، او آپنڑے کپڑے دھووے تے شام تئیں ناپاک راہسی۔ ایہ سبھ تُہاڈے کیتے حرام ہِن۔

29زمین اُتے ریڑھن آلے جانوراں ءچوں ایہ جانور تُہاڈے کیتے حرام ہِن: نیولا، چوہے، مختلف قِسم دیاں کِرلیاں، 30حرذُون، کِرلی، گوہ، سانڈا تے گِرگٹ۔ 31ریڑھن آلے جانوراں ءچوں ایہ سبھ تُہاڈے کیتے ناپاک ہِن۔ جیہڑا وی اِنہاں کُوں ہتھ لیسی بھانویں او زندہ ہووݨ یا موئے ہوئے ہووݨ، شام تئیں ناپاک راہسی۔ 32جیکر اِنہاں ءچوں کہیں دی لاش کہیں شے اُتے ڈھے پووے تاں او وی ناپاک تھی ویسی بھانویں او شے لکڑ، کپڑے، چمڑے یا ٹاٹ دی بنڑی ہوئی ہووے۔ اِیندے نال کوئی فرق نئیں پوندا جو او کِیں کم کیتے اِستعمال تھیندی ہے، اُونکُوں ہر صورت پانڑی ءچ بوڈنڑیں تے او شام تئیں ناپاک راہسی۔ اِیندے بعد او پاک تھیسی۔ 33جیکر اِیہو جیہا جانور مِٹی دے کہیں تھاں ءچ ڈھے پووے تاں اُوندے ءچ جیہڑا کُجھ وی ہوسی یکا ناپاک تھی ویسی تے تھاں کُوں بَھننڑاں پوسی۔ 34اِیہو جِیہے تھاں دا پانڑی کھاوݨ آلی جیہڑی شے اُتے پاتا ویسی او ناپاک تھی ویسی۔ تے جے اِیں تھاں ءچ پِیوݨ آلی کوئی شے ہوسی تاں او وی ناپاک تھی ویسی۔ 35جیہڑی شے اُتے وی اِیہو جیہی لاش ڈھے پووے، او ناپاک تھی ویسی۔ جیکر او چُلھ یا تنُور ءچ ڈھے پووے تاں اُونکُوں بَھن ڈیؤ۔ او ناپاک تھی گئے تے تُہاڈے کیتے ناپاک راہسی۔ 36پر جیہڑے چشمے یا حوض ءچ اِیہو جیہی لاش ڈھاوے، او پاک راہندے پر او بندہ ناپاک تھیسی جیہڑا لاش کُوں ہتھ لاوے۔ 37جیکر اِیہو جیہی لاش ایجھے بِیجاں اُتے ڈھے پووے جِنہاں کُوں حالی رہاونڑا ہے، تاں او پاک راہسن۔ 38پر جے بِیجاں اُتے پانڑی سٹیا گِیا ہووے تے اُنہاں اُتے لاش ڈھے پووے تاں او ناپاک ہوسن۔

39جیکر اِیہو جِیہا جانور جِینکُوں کھاوݨ جائز ہے مر پووے، تاں اُوندی لاش کُوں ہتھ لاوݨ آلا شام تئیں ناپاک راہسی۔ 40جیہڑا اُوندے ءچوں کُجھ کھاوے یا اُونکُوں چا تے گِھن ونجے، اُونکُوں آپنڑے کپڑیاں کُوں دھوونڑا پوسی پر او شام تئیں ناپاک راہسی۔ 41زمین اُتے ریڑھن آلا ہر جانور مکرُوہ ہے تے اِینکُوں کھاوݨ منع ہے، 42بھانویں او ڈھیڈ دے بھار ٹُردے ہِن یا چار پیراں اُتے ٹُردے ہِن یا او جِنہاں دے بہُوں سارے پیر ہِن۔ 43اِنہاں یکے ریڑھن آلیاں تُوں آپنڑے آپ کُوں ناپاک تے مکرُوہ نہ بنڑائے، 44کیوں جو مَیں رب العالمین تُہاڈا خُدا ہاں۔ تُساں آپنڑے آپ کُوں پاک رکھو کیوں جو مَیں پاک ہاں۔ آپنڑے آپ کُوں زمین اُتے ریڑھن آلے کہیں جانور نال ناپاک نہ کرائے۔ 45مَیں رب العالمین ہاں جیہڑا تُہاکُوں مِصر ءچوں کڈھ آیا ہاں تاں جو تُہاڈا خُدا ہوواں2۔ اِیں کیتے تُساں پاک بنڑو کیوں جو مَیں پاک ہاں۔

46زمین اُتے ٹُرݨ آلے جانوراں، پکھیاں، پانڑی دے جانوراں تے زمین اُتے ریڑھن آلے یکے جانوراں کیتے شریعت اِیہو ہے۔ 47لازم ہے جو تُساں پاک تے ناپاک جانوراں ءچ فرق کرو یعنی اِیہو جِیہے جانوراں ءچ جیہڑے کھاوݨ کیتے حلال یا حرام ہِن‘۔“