احبار 12

بال جمنڑ تُوں بعد ماء دی طہارت

1رب العالمین مُوسیٰ کُوں آکھیا، 2”بنی اِسرائیل کُوں ڈسا جو جِیں ویلے کہیں عورت دا پوتر جمّے تاں او ماہواری دے ڈینہاں آلی کار سَت ڈینہہ تئیں ناپاک راہسی۔ 3اٹھویں ڈینہہ چھوہر دا ختنہ کیتا ونجے۔ 4اِیندے بعد ماء آپنڑی رَت تُوں پاک صاف تھیوݨ کیتے تیتریح ڈینہہ بِیا اِنتظار کرے۔ اِیں دوران نہ او کہیں مُقدّس شے کُوں ہتھ لاوے تے نہ مُقدّس تمبُو دے کولھ ونجے۔

5جیکر اُوندی دِھی جم پووے تاں او چوڈھاں ڈینہہ تئیں ماہواری دے ڈینہاں آلی کار ناپاک راہسی۔ وَل او آپنڑی رَت تُوں پاک صاف تھیوݨ کیتے چِھیئیٹھ ڈینہہ بِیا اِنتظار کرے۔

6جِیں ویلے پوتر یا دِھی پارُوں پاک صاف تھیوݨ دے ڈینہہ لنگھ ونجنڑ تاں او اِجتماع آلے تمبُو دے در تے کاہِن کُوں ایہ شیواں پیش کرے: ساڑے ونجنڑ آلی قُربانی کیتے ہِک سال دا بھیڈ دا لیلا تے گُناہ تُوں پاک کرݨ آلی قُربانی کیتے ہِک جوان کبوتر یا گُھگی۔ 7کاہِن ایہ جانور رب العالمین کُوں پیش کر تے اُوندا کفارہ ڈیوے۔ وَل او رَت واہوݨ آلی ناپاکی تُوں پاک صاف تھی ویسی۔ شرع ہِکو ہے بھانویں چھوہر ہووے یا چھوہیر۔

8جیکر او غریبی پارُوں بھیڈ دا لیلا نہ ڈے سگے تاں وَل او ڈُو گُھگیاں یا ڈُو جوان کبوتر گِھن آوے۔ ہِک ساڑے ونجنڑ آلی قُربانی کیتے تے ڈُوجھا گُناہ تُوں پاک کرݨ آلی قُربانی کیتے۔ اِینویں کاہِن اُوندا کفارہ ڈیوے تاں او پاک صاف تھی ویسی۔“