احبار 13

چم دیاں بیماریاں

1رب العالمین مُوسیٰ تے ہارُون کُوں آکھیا، 2”جیکر کہیں دے چم ءچ سوج یا کھرنڈ یا چِٹا داغ ہووے تے لگدا ہووے جو او چم دی خطرناک بیماری ہے تاں اُونکُوں کاہِناں دے کولھ گِھن تے آونڑا ہے یعنی ہارُون یا اُوندے پوتراں دے کولھ۔ 3کاہِن اُوں جاہ دا معائنہ کرے۔ جیکر اُوں جاہ دے وال چِٹے تھی گئے ہووݨ تے او چم دے اندر وڑی کھڑی ہووے تاں او خطرناک بیماری ہے۔ جِیں ویلے کاہِن کُوں اِیں گالھ دا پتہ لگے تاں او اِینکُوں ناپاک قرار ڈیوے۔ 4پر جے چم آلی جاہ چِٹّی تاں ہووے پر چم دے اندر نئیں وڑی کھڑی تے نہ اُوندے وال چِٹے تھئے ہووݨ تاں کاہِن اُونکُوں سَت ڈینہہ تئیں اَنج راہوݨ دا حُکم ڈیوے۔ 5ستویں ڈینہہ کاہِن وَل اُوندا معائنہ کرے۔ جیکر او ڈیکھے جو او جاہ اُونویں ای ہے تے کِھنڈی نئیں تاں او بئے سَت ڈینہہ اُونکُوں اَنج راہوݨ دا حُکم ڈیوے۔ 6ستویں ڈینہوار او ہِک پھیری ولا مریض دا معائنہ کرے۔ جیکر اُوں جاہ دا رنگ ولا صحت مند چم آلی کار تھیندا پِیا ہووے تے کِھنڈدی نہ پئی ہووے تاں اُونکُوں پاک صاف قرار ڈے ڈیوے کیوں جو ایہ عام کھرنڈ ہے۔ مریض آپنڑے کپڑے دھو گِھنے تے پاک صاف تھی ونجے۔ 7جیکر کاہِن دے اُونکُوں پاک صاف کھڑاوݨ تُوں بعد او کھرنڈ کِھنڈݨ لگے تاں مریض ولا کاہِن کولھ آوے۔ 8کاہِن اُوں جاہ دا معائنہ کرے۔ جیکر کھرنڈ کِھنڈ گئی ہووے تاں کاہِن اُونکُوں ناپاک قرار ڈیوے کیوں جو ایہ چم دی خطرناک بیماری ہے۔

9جیکر کہیں بندے کُوں چم دی خطرناک بیماری1 ہووے تاں اُونکُوں کاہِن دے کولھ گِھن تے آیا ونجے۔ 10کاہِن اُوندا معائنہ کرے۔ جیکر اُوں چم ءچ چِٹّی سوج ہووے تے اُوندے وال وی چِٹے تھی گئے ہووݨ تے اُوندا گوشت پھٹ گِیا ہووے، 11تاں اِیندا مطلب ہوسی جو ایہ چم دی پُرانڑی بیماری ہے۔ کاہِن اُونکُوں سَت ڈینہہ کیتے اَنج راہوݨ دا حُکم نہ ڈیوے تے اِنتظار نہ کرے بلکہ اِینکُوں ناپاک قرار ڈیوے کیوں جو ایہ اُوندی ناپاکی دا ثبوت ہے۔ 12پر جیکر بیماری جلدی کِھنڈ گئی ہووے، تے اِینویں لگے جو سر تُوں گِھن تے پیراں تئیں چم متاثر تھیّا ہے 13تاں کاہِن اِینکُوں غور نال ڈیکھ تے مریض کُوں پاک صاف قرار ڈیوے، کیوں جو پُورا چم چِٹا تھی گئے، اِیں کیتے او پاک صاف ہے۔ 14پر جِیں ویلے کڈھائیں وی گوشت پھٹیا ہویا نظر آوے تاں اُوں ویلے او ناپاک تھی ویندے۔ 15کاہِن ایہ ڈیکھ تے مریض کُوں ناپاک قرار ڈیوے۔ پھٹیا ہویا گوشت ہر صورت ءچ ناپاک ہے کیوں جو اِیندا مطلب ہے جو چم دی خطرناک بیماری لگ گئی ہے۔ 16جیکر پھٹے ہوئے گوشت دا ایہ زخم بھریج ونجے تے متاثرہ جاہ دا چم چِٹا تھی ونجے تاں مریض کاہِن دے کولھ ونجے۔ 17جے کاہِن ڈیکھے جو واقعی اِینویں تھئے تے متاثرہ چم چِٹا تھی گئے تاں او اُونکُوں پاک صاف قرار ڈیوے۔

18جے کہیں دے چم اُتے مَلّا نِکلے تے او ٹھیک تھی ونجے 19تے اُوں جاہ تے چِٹّی سوج یا چِٹا رَتّا داغ نظر آوے تاں مریض کاہِن دے کولھ آوے۔ 20جیکر او اُوندا معائنہ کر تے ڈیکھے جو متاثرہ جاہ چم دے اندر وڑی کھڑی ہے تے اُوندے وال چِٹے تھی گئے ہِن تاں او مریض کُوں ناپاک قرار ڈیوے کیوں جو اِیندا مطلب ہے جو جِتھاں پہلے مَلّا ہا، اُتھاں چم دی خطرناک بیماری پیدا تھی گئی ہئی۔ 21پر جیکر کاہِن ڈیکھے جو متاثرہ جاہ دے وال چِٹے نئیں تھئے تے او جاہ چم ءچ وڑی ہوئی نئیں تے اُوندا رنگ ولا صحت مند چم آلی کار تھیندا ویندے تاں اُونکُوں سَت ڈینہہ تئیں اَنج راہوݨ دا حُکم ڈیوے۔ 22جیکر اِیں دوران بیماری بئی کِھنڈ ونجے تاں کاہِن مریض کُوں ناپاک قرار ڈیوے کیوں جو اِیندا مطلب ہے جو چم دی خطرناک بیماری لگ گئی ہے۔ 23پر جیکر داغ تبدیل نہ تھیّا ہووے تے نہ کِھنڈیا ہووے تاں اِیندا مطلب ہوسی جو ایہ صرف اُوں بھرے ہوئے زخم دا نشان ہے جیہڑا مَلّے پارُوں بنڑیا ہا۔ کاہِن مریض کُوں پاک صاف قرار ڈیوے۔

24جیکر کہیں دا چم سڑ ونجے تے اُوں جاہ اُتے چِٹا رَتّا یا بالکل چِٹا داغ تھی ونجے، 25تاں کاہِن سڑی ہوئی جاہ دا معائنہ کرے تے جے پتہ لگے جو جاہ دے وال چِٹے تھی گئے ہِن تے او چم ءچ وڑی کھڑی ہے تاں اِیندا مطلب ہے جو سڑی ہوئی جاہ اُتے چم کُوں خطرناک بیماری لگ گئی ہے۔ کاہِن اُونکُوں ناپاک قرار ڈیوے کیوں جو چم دی وبائی بیماری لگ گئی ہے۔ 26پر جیکر کاہِن کُوں پتہ لگے جو داغ ءچ چِٹے وال نئیں تے او چم ءچ وڑیا ہویا نئیں تے اُوندا رنگ صحت مند چم آلی کار تھیندا ویندے تاں او مریض کُوں سَت ڈینہہ تئیں اَنج راہوݨ دا حُکم ڈیوے۔ 27جے کاہِن کُوں ستویں ڈینہوار پتہ لگے جو متاثرہ جاہ کِھنڈ گئی ہے تاں او اُونکُوں ناپاک قرار ڈیوے کیوں جو اِیندا مطلب ہوسی جو چم کُوں خطرناک بیماری لگ گئی ہے۔ 28پر جیکر داغ کِھنڈیا ہویا نئیں تے سڑے ہوئے چم دا رنگ صحت مند چم آلی کار تھی گئے تاں اِیندا مطلب ہے جو ایہ صرف اُوں زخم دا نشان ہے جیہڑا سڑن نال بنڑیا ہا۔ کاہِن مریض کُوں پاک صاف قرار ڈیوے۔

29جیکر کہیں دے سر یا ڈاڑھی دے چم ءچ داغ نظر آوے 30تاں کاہِن اُوں جاہ دا معائنہ کرے۔ جے او چم دے اندر وڑی ہوئی نظر آوے تے اُوندے وال باریک تے پِیلے رنگ دے ہووݨ تاں کاہِن مریض کُوں ناپاک قرار ڈیوے۔ اِیندا مطلب ہے جو سر یا ڈاڑھی دے چم اُتے اِیہو جیہی خطرناک بیماری لگ گئی ہے جِیندے نال خارش تھیندی ہے۔ 31پر جیکر کاہِن کُوں پتہ لگے جو او جاہ چم ءچ وڑی ہوئی نئیں بھانویں اُوندے والاں دا رنگ کالا نئیں تھیّا تاں او مریض کُوں سَت ڈینہہ کیتے اَنج راہوݨ دا حُکم ڈیوے۔ 32ستویں ڈینہہ کاہِن چم دی متاثرہ جاہ دا معائنہ کرے۔ جیکر او کِھنڈی ہوئی نئیں تے اُوندے والاں دا رنگ پِیلا نئیں تے نال ای او جاہ چم ءچ وڑی ہوئی وی نئیں 33تاں مریض آپنڑے وال مُنواوے تے صرف متاثرہ جاہ تُوں نِکلنڑ آلے والاں کُوں چھوڑ ڈیوے۔ کاہِن مریض کُوں سَت ڈینہہ مزید اَنج راہوݨ دا حُکم ڈیوے۔ 34ستویں ڈینہہ کاہِن مریض دا معائنہ کرے۔ جیکر متاثرہ جاہ کِھنڈی ہوئی نئیں تے چم ءچ وڑی ہوئی وی نئیں تاں کاہِن اُونکُوں پاک صاف قرار ڈیوے۔ او آپنڑے کپڑے دھو گِھنے تے پاک صاف تھی ونجے۔ 35پر جیکر اِیندے بعد چم دی متاثرہ جاہ کِھنڈݨ شروع تھی ونجے 36تاں کاہِن ولا اُوندا معائنہ کرے۔ جیکر او جاہ کِھنڈی ہوئی نظر آوے تاں کاہِن کُوں لوڑ کائنی جو او متاثرہ جاہ دے پِیلے وال گولھے کیوں جو مریض ناپاک ہے۔ 37پر جے کاہِن دے خیال ءچ متاثرہ جاہ کِھنڈی ہوئی نئیں نظردی پر اُوندے ءچوں کالے رنگ دے وال نِکلدے پئے ہِن تاں اِیندا مطلب ہے جو مریض ٹھیک تھی گِیا ہے تے کاہِن اُونکُوں پاک صاف قرار ڈیوے۔

38جیکر کہیں عورت یا مرد دے چم اُتے چِٹے داغ تھی ونجنڑ 39تاں کاہِن اُنہاں دا معائنہ کرے۔ جیکر اُنہاں دا چِٹا رنگ ہلکا ہووے تاں ایہ خطرناک کھرنڈ کائنی تے مریض پاک صاف ہے۔

40جے کہیں مرد دے سر دے وال جھڑ گئے ہووݨ، او گنجا تاں ہے پر پاک صاف ہے۔ 41تے جے اُوندے متھے آلے پاسے دے وال جھڑ گئے ہووݨ تاں او اگلے پاسُوں گنجا تاں ہے پر پاک صاف ہے۔ 42پر جیکر اُوندی گنج آلی جاہ اُتے چِٹا رَتّا داغ ہے تاں اِیندا مطلب ہے جو اُتھاں چم دی خطرناک بیماری لگ گئی ہے۔ 43کاہِن اُوندا معائنہ کرے۔ جیکر گنج آلی جاہ اُتے رتّی چِٹّی سوج ہووے جیہڑی چم دی خطرناک بیماری آلی کار نظر آوے 44تاں مریض کُوں چم دی خطرناک بیماری لگ گئی ہے تے کاہِن اُونکُوں ناپاک قرار ڈیوے۔

45چم دی خطرناک بیماری دا مریض پھٹے ہوئے کپڑے پاوے، اُوندے وال کِھنڈے راہوݨ، او آپنڑے مُنہ کُوں کہیں کپڑے نال لُکاوے تے زور نال اواز ڈیندا راہوے جو ’ناپاک ناپاک۔‘ 46جِیں ویلے تئیں چم دی وبائی بیماری لگی راہوے، او ناپاک ہے۔ اِیں دوران او ڈیرے تُوں باہر وَنج تے اَنج راہوے۔

پھپھُوندی نال نِبڑن دا طریقہ

47تھی سگدے جو اُون یا لینن دے کہیں لباس کُوں پھپھُوندی لگ گئی ہووے۔ 48یا پھپھُوندی اُون یا لینن دے کہیں کپڑے دے ٹوٹے یا چمڑے یا چمڑے دی کہیں شے کُوں لگی ہووے۔ 49جیکر پھپھُوندی دا رنگ ساوا یا رَتّا جِیہا ہووے تاں او کِھنڈݨ آلی پھپھُوندی ہے تے لازم ہے جو او کاہِن کُوں ڈِکھائی ونجے۔ 50کاہِن اُوندا معائنہ کر تے اُونکُوں سَت ڈینہہ کیتے اَنج رکھنڑ دا حُکم ڈیوے۔ 51ستویں ڈینہوار او ولا اُوندا معائنہ کرے۔ جیکر پھپھُوندی کِھنڈ گئی ہووے تاں اِیندا مطلب ہے جو او نُقصان ڈیوݨ آلی ہے تے متاثرہ شے ناپاک ہے۔ 52کاہِن اُوں متاثرہ شے کُوں ساڑ ڈیوے کیوں جو پھپھُوندی نُقصان ڈیوݨ آلی ہے۔ لازم ہے جو اُونکُوں ساڑ ڈِتا ونجے۔ 53پر جیکر اِنہاں سَت ڈینہاں ءچ پھپھُوندی کِھنڈی ہوئی نئیں نظردی 54تاں کاہِن متاثرہ شے کُوں دھووݨ دا حُکم ڈیوے۔ وَل او مزید سَت ڈینہاں کیتے شے کُوں اَنج رکھنڑ دا حُکم ڈیوے۔ 55اِیندے بعد کاہِن ولا اُوندا معائنہ کرے۔ جے اُوندا رنگ اُونویں دا اُونویں ہے بھانویں پھپھُوندی کِھنڈی ہوئی نئیں نظردی، وَل وی او ناپاک ہے۔ اُونکُوں ساڑ ڈیوائے بھانویں پھپھُوندی متاثرہ شے دے سامنڑے یا پِچھلے حصے اُتے لگی ہووے۔ 56پر جیکر پتہ لگے جو کپڑا دھووݨ تُوں بعد پھپھُوندی دا رنگ پِھکا پے گئے تاں کاہِن کپڑے یا چمڑے ءچوں متاثرہ جاہ پھاڑ تے کڈھ ڈیوے۔ 57پر جے پھپھُوندی اُوں کپڑے یا چمڑے اُتے ولا نظر آوے تاں اِیندا مطلب ہے جو او کِھنڈی پئی ہے، وَل لازم ہے جو اُونکُوں ساڑیا ونجے۔ 58پر جیکر کپڑا دھووݨ تُوں بعد پھپھُوندی غیب تھی ونجے تاں اُونکُوں ہِک پھیری ولا دھوونڑیں۔ وَل متاثرہ شے پاک صاف ہوسی۔

59پھپھُوندی نال نِبڑن کیتے اِیہو ہدایات ہِن بھانویں او اُون یا لینن دے کہیں لباس کُوں لگ گئی ہووے یا اُنہاں دے ٹوٹے یا چمڑے دی کہیں شے کُوں لگی ہووے۔ متاثرہ شے دے پاک صاف یا ناپاک ہووݨ دا فیصلہ کرݨ دی شرع اِیہو ہے۔“