احبار 14

چم دی بیماری تُوں پاک تھیوݨ دی قُربانی

1رب العالمین مُوسیٰ کُوں آکھیا، 2”چم دی خطرناک بیماری کنُوں شِفایاب بندے کُوں پاک صاف کرݨ کیتے شرع ایہ ہے جو اُونکُوں کاہِن دے کولھ گِھن تے آیا ونجے 3جیہڑا ڈیرے دے باہر وَنج تے اُوندا معائنہ کرے۔ جیکر او ڈیکھے جو مریض دی صحت واقعی بحال تھی گئی ہے 4تاں کاہِن اُوندی پاکیزگی کیتے ڈُو زندہ تے حلال پکھی، دیار1 دی لکڑ، رتّے رنگ دا دھاگا تے زُوفا منگواوے۔ 5کاہِن حُکم ڈیوے جو پکھیاں ءچوں ہِک کُوں تازے پانڑی دے بھرے ہوئے مِٹی دے تھاں اُتے ذبح کیتا ونجے۔ 6کاہِن زندہ پکھی کُوں دیار دی لکڑ، رتّے رنگ دے دھاگے تے زُوفے دے نال ذبح کیتے گئے پکھی دی رَت ءچ بوڈ ڈیوے جیہڑی پانڑی ءچ رَل گئی ہئی۔ 7او پانڑی رَلی رَت سَت پھیری پاک صاف تھیوݨ آلے بندے اُتے چِھنڈک تے اُونکُوں پاک صاف قرار ڈیوے۔ وَل زندہ پکھی کُوں کُھلے میدان ءچ چھوڑ ڈیوے۔ 8جیہڑا آپنڑے آپ کُوں پاک صاف کرویندا پئے او آپنڑے کپڑے دھووے تے یکے وال مُنوا تے غُسل کر گِھنے۔ اِیندے بعد او پاک صاف ہے۔ ہُنڑ او ڈیرے ءچ وڑ سگدے پر او مزید سَت ڈینہہ آپنڑے تمبُو ءچ نئیں وَنج سگدا۔ 9ستویں ڈینہوار او ولا آپنڑے سر دے وال، ڈاڑھی، بھربھٹے تے باقی وال مُنواوے۔ او آپنڑے کپڑے دھووے تے غُسل کر گِھنے، تاں او پاک صاف ہے۔

10اٹھوِیں ڈینہوار او بھیڈ دے ڈُو نَر لیلے تے ہِک سال دی ہِک بے عیب لیلی چُنڑ گِھنے۔ نال ای او غلے دے نذرانے کیتے ساڈھے چار کلو تیل رَلیا بہترین میدہ تے ہِک پیالہ2 تیل گِھنے۔ 11وَل اُونکُوں پاک صاف قرار ڈیوݨ آلا کاہِن اُونکُوں اِجتماع آلے تمبُو دے دَر اُتے اُنہاں قُربانیاں سمیت رب العالمین کُوں پیش کرے۔ 12وَل کاہِن بھیڈ دا ہِک نَر لیلا تے ہِک پیالہ تیل قصُور دی قُربانی کیتے ہلائے ونجنڑ آلی قُربانی دے طور تے رب العالمین دے حضُور ہلاوے۔ 13وَل او بھیڈ دے اِیں لیلے کُوں تمبُو دے دَر اُتے ذبح کر ڈیوے جِتھاں ساڑے ونجنڑ آلیاں قُربانیاں تے گُناہ تُوں پاک کرݨ آلیاں قُربانیاں ذبح کیتیاں ویندیاں ہِن۔ گُناہ تُوں پاک کرݨ آلیاں قُربانیاں آلی کار، قصُور دیاں ایہ قُربانیاں کاہِن دا حصہ ہِن تے بہُوں پاک ہِن۔ 14کاہِن قصُور دی قُربانی دی کُجھ رَت گِھن تے پاک صاف تھیوݨ آلے دے سجے کَن دی لو، تے سجے ہتھ دے انگوٹھے تے سجے پیر دے انگوٹھے اُتے لاوے۔ 15ہُنڑ کاہِن تیل ءچوں کُجھ گِھن تے آپنڑے کھبے ہتھ دی تلی اُتے پاوے۔ 16او آپنڑے سجے ہتھ دے انگوٹھے دے نال آلی انگل اِیں تیل ءچ بوڈ تے اُونکُوں سَت پھیری رب العالمین دے حضُور چِھنڈکے۔ 17او آپنڑی تلی آلے تیل ءچوں کُجھ بِیا گِھن تے پاک صاف تھیوݨ آلے دے سجے کَن دی لو، اُوندے سجے ہتھ دے انگوٹھے تے سجے پیر دے انگوٹھے اُتے لا ڈیوے، یعنی اُنہاں جاہیں اُتے جِتھاں اُوں پہلے قصُور دی قُربانی دی رَت لائی ہئی۔ 18کاہِن آپنڑی تلی دا باقی تیل پاک صاف تھیوݨ آلے دے سر اُتے لاوے۔ اِینویں کاہِن رب العالمین دے حضُور اُوندا کفارہ ڈیوے۔

19وَل کاہِن گُناہ تُوں پاک کرݨ آلی قُربانی پیش کر تے پاک صاف تھیوݨ آلے دا کفارہ ڈیوے تے اِیندے بعد او ساڑے ونجنڑ آلی قُربانی دا جانور ذبح کرے۔ 20او اُونکُوں غلے دے نذرانے دے نال قُربان گاہ اُتے پیش کرے۔ اِینویں کاہِن اُوندا کفارہ ڈیوے تے او پاک صاف ہوسی۔

21جیکر شِفا پاوݨ آلا بندہ غریبی پارُوں ایہ قُربانیاں پیش نہ کر سگدا ہووے تاں وَل او قصُور دی قُربانی کیتے بھیڈ دا صرف ہِک نَر لیلا گِھن آوے تاں جو او اُوندا کفارہ ڈیوݨ کیتے رب العالمین دے حضُور ہلایا ونجے۔ غلے دے نذرانے کیتے ڈیڈھ کلو تیل رلیا ہویا بہترین میدہ پیش کیتا ونجے تے ہِک پیالہ تیل وی۔ 22اِیں تُوں علاوہ او ڈُو گُھگیاں یا ڈُو جوان کبوتر پیش کرے۔ ہِک کُوں گُناہ تُوں پاک کرݨ آلی قُربانی کیتے تے بئے کُوں ساڑے ونجنڑ آلی قُربانی کیتے۔ 23اٹھوِیں ڈینہوار او اُنہاں کُوں اِجتماع آلے تمبُو دے دَر اُتے کاہِن دے کولھ تے رب العالمین دے حضُور گِھن آوے تاں جو او پاک صاف تھی ونجے۔ 24کاہِن بھیڈ دے لیلے کُوں تیل سمیت گِھن تے ہلائے ونجنڑ آلی قُربانی دے طور تے رب العالمین دے حضُور ہلاوے۔ 25او قصُور دی قُربانی کیتے اِیں بھیڈ دے لیلے کُوں ذبح کرے تے اُوندی کُجھ رَت گِھن تے پاک صاف تھیوݨ آلے دے سجے کَن دی لو، اُوندے سجے ہتھ دے انگوٹھے تے سجے پیر دے انگوٹھے اُتے لاوے۔ 26وَل او تیل ءچوں تھوڑا جِیہا آپنڑے کھبے ہتھ دی تلی اُتے پاوے۔ 27او آپنڑے سجے ہتھ دے انگوٹھے دے نال آلی انگل، اِیں تیل ءچ بوڈ تے اُونکُوں سَت پھیری رب العالمین دے حضُور چِھنڈکے۔ 28او آپنڑی تلی دے تیل ءچوں کُجھ بِیا گِھن تے پاک صاف تھیوݨ آلے دے سجے کَن دی لو، اُوندے سجے ہتھ دے انگوٹھے تے سجے پیر دے انگوٹھے اُتے لا ڈیوے یعنی اُنہاں جاہیں اُتے جِتھاں اُوں پہلے قصُور دی قُربانی دی رَت لائی ہئی۔ 29آپنڑی تلی دا باقی تیل او پاک صاف تھیوݨ آلے دے سر اُتے لا ڈیوے تاں جو رب العالمین دے حضُور اُوندا کفارہ ڈِتا ونجے۔ 30اِیندے بعد کاہِن شِفایاب بندے دی گُنجائش دے مطابق ڈُو گُھگیاں یا ڈُو جوان کبوتر پیش کرے، 31ہِک کُوں گُناہ تُوں پاک کرݨ آلی قُربانی کیتے تے بئے کُوں ساڑے ونجنڑ آلی قُربانی کیتے۔ نال نال او غلے دا نذرانہ پیش کرے۔ اِینویں کاہِن رب العالمین دے حضُور اُوندا کفارہ ڈیوے۔ 32ایہ شرع ایجھے بندے کیتے ہے جیہڑا چم دی وبائی بیماری تُوں شِفا پا گئے پر آپنڑی غریبی پارُوں پاک صاف تھیوݨ کیتے ساریاں قُربانیاں پیش نئیں کر سگدا۔“

گھراں ءچ پھپھُوندی

33رب العالمین مُوسیٰ تے ہارُون کُوں آکھیا، 34”جِیں ویلے تُساں کنعان دے مُلک وڑو جیہڑا مَیں تُہاکُوں ڈیساں تے اُتھاں تُہاڈے اِیہو جِیہے مکان ہووݨ جِتھاں مَیں پھپھُوندی کِھنڈݨ ڈیواں 35تاں گھر دا مالک وَنج تے کاہِن کُوں ڈساوے جو مَیں آپنڑے گھر ءچ پھپھُوندی جیہی کوئی شے ڈِٹھی ہے۔ 36وَل کاہِن حُکم ڈیوے جو گھر دا معائنہ کرݨ تُوں پہلے گھر دا سارا سامان باہر کڈھیا ونجے تاں جو او سبھ کُجھ ناپاک نہ قرار ڈِتا ونجے۔ اِیندے بعد کاہِن اندر وَنج تے گھر دا معائنہ کرے۔ 37او کندھیاں نال لگی ہوئی پھپھُوندی دا معائنہ کرے۔ جیکر کندھیاں دے اُنہاں جاہیں اُتے ساوے یا رتّے رنگ دے داغ ہووݨ تے ایہ داغ صرف کندھی دے اُتے نئیں بلکہ اُوندے اندر وی ہووݨ 38تاں وَل کاہِن گھرُوں نِکل تے گھر کُوں سَت ڈینہاں کیتے بند کر ڈیوے۔ 39ستویں ڈینہوار کاہِن وَل آ تے گھر دا معائنہ کرے۔ جیکر پھپھُوندی کِھنڈی ہوئی نظر آوے، 40تاں او حُکم ڈیوے جو خراب پتھراں کُوں کڈھ تے آبادی دے باہر کہیں ناپاک جاہ تے سٹیا ونجے، 41تے اندر دیاں کندھیاں کُوں کُھرچیا ونجے تے کُھرچی ہوئی مِٹی کُوں آبادی دے باہر کہیں ناپاک جاہ تے سٹیا ونجے۔ 42وَل لوک نویں پتھر لا تے گھر کُوں نویں گارے نال پلستر کرݨ۔

43پر جیکر خراب پتھراں کُوں کڈھنڑ تے پُرانڑا پلستر لہا تے نواں پلستر کرݨ دے باوجود پھپھُوندی ولا جم پووے 44تاں کاہِن ولا آ تے اُوندا معائنہ کرے۔ جیکر او ڈیکھے جو پھپھُوندی گھر ءچ کِھنڈ گئی ہے تاں اِیندا مطلب ہے جو او لاعلاج پھپھُوندی ہے، تے اِیں کیتے گھر ناپاک ہے۔ 45لازم ہے جو اُونکُوں مکمل طور تے ڈھا ڈِتا ونجے تے سبھ کُجھ یعنی اِیندے پتھر، لکڑ تے پلستر کُوں آبادی دے باہر کہیں ناپاک جاہ تے سَٹ ڈِتا ونجے۔

46جیکر کاہِن کہیں گھر دا معائنہ کر تے اُونکُوں بند کر ڈِتا ہووے تے وَل وی کوئی اُوں گھر ءچ وڑ ونجے تاں او شام تئیں ناپاک راہسی۔ 47جیہڑا اِیہو جِیہے گھر ءچ سمے یا ٹُکر کھاوے، لازم ہے جو او آپنڑے کپڑے دھو گِھنے۔ 48پر جیکر گھر کُوں نویں سرے تُوں پلستر کرݨ تُوں بعد کاہِن آ تے ولا گھر دا معائنہ کرے تے ڈیکھے جو پھپھُوندی ولا نئیں نِکلی تاں اِیندا مطلب ہے جو پھپھُوندی مُک گئی ہے، او اُونکُوں پاک صاف قرار ڈیوے۔ 49اُونکُوں پاک صاف کرݨ کیتے او ڈُو پکھی، دیار دی لکڑ، رتّے رنگ دا دھاگا تے زُوفا گِھن گِھنے۔ 50پکھیاں ءچوں او ہِک کُوں تازے پانڑی نال بھرے ہوئے مِٹی دے تھاں اُتے ذبح کرے۔ 51اِیندے بعد او دیار دی لکڑ، زُوفا، رتّے رنگ دا دھاگا تے زندہ پکھی گِھن تے اُوں تازہ پانڑی ءچ بوڈے جیندے نال ذبح کیتے ہوئے پکھی دی رَت ملائی گئی ہے تے اِیں پانڑی کُوں سَت پھیری گھر اُتے چِھنڈک ڈیوے۔ 52اِنہاں شیواں نال او گھر کُوں پاک صاف کرے۔ 53وَل او زندہ پکھی کُوں آبادی دے باہر کُھلے میدان ءچ چھوڑ ڈیوے۔ اِینویں او گھر دی پاکیزگی دی رسم پوری کریسی تے او پاک صاف تھی ویسی۔

‏ 54چم دی ہر قِسم دی خطرناک بیماری تے خارش، 55تے کپڑیاں یا گھراں ءچ پھپھُوندی، 56تے سوج، کھرنڈ یا چِٹے داغ کیتے شرع اِیہو ہے 57جیندے مطابق فیصلہ کرنڑے جو کوئی بندہ یا شے پاک صاف ہے یا ناپاک۔“