احبار 15

مرداں دی ناپاکی

1رب العالمین مُوسیٰ تے ہارُون کُوں آکھیا، 2”بنی اِسرائیل کُوں ڈسا جو جیکر کہیں مرد کُوں جریان دا مرض ہووے تاں او واہوݨ آلے پانڑی پارُوں ناپاک ہے۔ 3بھانویں پانڑی واہندا راہندا ہووے یا رُک گِیا ہووے، او ناپاک ہے۔ 4جیہڑی شے اُتے وی مریض لیٹے یا باہوے او ناپاک تھی ویسی۔ 5جیہڑا وی اُوندے بستر کُوں ہتھ لاوے، او آپنڑے کپڑے دھو تے غُسل کر گِھنے تے شام تئیں ناپاک راہسی۔ 6جیہڑا وی اُوندے بَہوݨ دی جاہ اُتے بہہ ونجے، او آپنڑے کپڑے دھو تے غُسل کر گِھنے تے شام تئیں ناپاک راہسی۔ 7اِینویں جیہڑا وی اِیہو جِیہے مریض کُوں ہتھ لاوے، او آپنڑے کپڑے دھو تے غُسل کر گِھنے تے شام تئیں ناپاک راہسی۔ 8جیکر مریض کہیں پاک صاف بندے اُتے تُھک سَٹ ڈیوے تاں او وی آپنڑے کپڑے دھو تے غُسل کر گِھنے پر شام تئیں ناپاک راہسی۔

9جِیں ویلے اِیہو جِیہا مریض کہیں جانور اُتے سوار تھیوے تاں او شے جیندے اُتے او باہوے او ناپاک تھی ویسی۔ 10جیہڑا وی اُوں شے کُوں جِیندے اُتے مریض بیٹھا ہا، ہتھ لاوے او شام تئیں ناپاک راہسی، تے جیہڑا اُونکُوں چا تے گِھن ونجے، او آپنڑے کپڑے دھو تے غُسل کر گِھنے پر شام تئیں ناپاک راہسی۔ 11جِینکُوں وی مریض ہتھ دھوتے بغیر ہتھ لاوے، او آپنڑے کپڑے دھو تے غُسل کر گِھنے تے شام تئیں ناپاک راہسی۔ 12اِیہو جِیہا مریض مِٹی دے جیہڑے تھاں کُوں ہتھ لا ڈیوے اُونکُوں بَھن ڈِتا ونجے، پر جے تھاں لکڑ دا ہووے تاں اُونکُوں چنگی طرحاں دھوتا ونجے۔

13جِینکُوں اِیں مرض تُوں شِفا مِلے او پاک صاف تھیوݨ کیتے سَت ڈینہہ اِنتظار کرے، اِیندے بعد او تازے پانڑی نال آپنڑے کپڑے دھو تے غُسل کر گِھنے۔ وَل او پاک صاف تھی ویسی۔ 14اٹھویں ڈینہہ او ڈُو گُھگیاں یا جوان کبوتر گِھن تے اِجتماع آلے تمبُو دے دَر تے رب العالمین دے حضُور کاہِن کُوں ڈیوے۔ 15کاہِن اُنہاں ءچوں ہِک کُوں گُناہ تُوں پاک کرݨ آلی قُربانی دے طور تے، تے ڈُوجھے کُوں ساڑے ونجنڑ آلی قُربانی دے طور تے پیش کرے۔ اِینویں او رب العالمین دے حضُور اُوں مریض دا کفارہ ڈیسی۔

16جیکر کہیں مرد دا نُطفہ خارج تھی ونجے تاں او آپنڑے پُورے جِسم کُوں دھووے پر او شام تئیں ناپاک راہسی۔ 17ہر کپڑا یا چمڑا جِینکُوں نُطفہ لگ گِیا ہووے، اُونکُوں دھوتا ونجے تے او کپڑا یا چمڑا شام تئیں ناپاک راہسی۔ 18جیکر نُطفہ مرد تے عورت دے ہمبستر تھیوݨ پارُوں خارج تھیّا ہووے تاں ڈوہائیں دھاوݨ تے او شام تئیں ناپاک راہسن۔

عورتاں دی ناپاکی

19ماہواری ویلے عورت سَت ڈینہہ تئیں ناپاک ہے تے جیہڑا وی اُونکُوں ہتھ لیسی او شام تئیں ناپاک راہسی۔ 20اِیں دوران او جِیں شے اُتے وی لیٹے یا باہوے، او ناپاک ہے۔ 21جیہڑا وی اُوندے بستر کُوں ہتھ لا گِھنے، او آپنڑے کپڑے دھو تے غُسل کر گِھنے تے شام تئیں ناپاک راہسی۔ 22جیہڑا وی اُوندے بَہوݨ دی جاہ اُتے بہہ ونجے، او آپنڑے کپڑے دھو تے غُسل کر گِھنے تے شام تئیں ناپاک راہسی۔ 23بھانویں بستر ہووے یا بَہوݨ دی جاہ، اُونکُوں ہتھ لاوݨ آلا شام تئیں ناپاک راہسی۔ 24جیکر مرد عورت نال ہمبستر تھیوے تے اُوندی ماہواری دی رَت اُونکُوں لگ ونجے تاں مرد رَت لگنڑ پارُوں سَت ڈینہہ تئیں ناپاک راہسی۔ جیہڑے بستر اُتے وی او لیٹسی، او ناپاک تھی ویسی۔

25جیکر کہیں عورت کُوں ماہواری دے ڈینہاں دے علاوہ کہیں بئے ویلے کئی ڈینہاں تئیں رَت آوے یا ماہواری دے ڈینہاں دے بعد وی رَت آندی راہوے تاں او ماہواری دے ڈینہاں آلی کار اُوں ویلے تئیں ناپاک راہسی جِیں ویلے تئیں رَت رُک نہ ونجے۔ 26ماہواری دے ڈینہاں آلی کار اِنہاں ڈینہاں ءچ وی او جیہڑی وی شے اُتے لیٹسی یا باہسی، او ناپاک تھی ویسی۔ 27جیہڑا وی اِیہو جیہی شے کُوں ہتھ لاوے، او ناپاک ہوسی۔ او آپنڑے کپڑے دھو تے غُسل کر گِھنے پر شام تئیں ناپاک راہسی۔ 28رَت رُک ونجنڑ تُوں بعد عورت سَت ڈینہہ بِیا اِنتظار کرے، وَل او پاک صاف تھی ویسی۔ 29اٹھویں ڈینہہ او ڈُو گُھگیاں یا جوان کبوتر گِھن تے اِجتماع آلے تمبُو دے دَر تے کاہِن دے کولھ آوے۔ 30کاہِن اُنہاں ءچوں ہِک کُوں گُناہ تُوں پاک کرݨ آلی قُربانی کیتے تے بئے کُوں ساڑے ونجنڑ آلی قُربانی کیتے پیش کرے۔ اِینویں او رب العالمین کُوں اُوندی ناپاکی دا کفارہ ڈیسی۔

31اِینویں تُساں بنی اِسرائیل کُوں ناپاکی تُوں دُور رکھائے تاں جو او میڈے مُقدّس تمبُو کُوں جیہڑا اُنہاں دے وچال ہے ناپاک کر تے ہلاک نہ تھی ونجنڑ۔

32-33اُوں مرد کیتے جیہڑا جریان دا مریض ہے یا جیہڑا نُطفہ خارج تھیوݨ پارُوں ناپاک ہے، تے اُوں عورت کیتے جِینکُوں ماہواری آئی ہووے تے اُوں مرد کیتے جیہڑا ناپاک عورت نال ہمبستر تھیوے، شرع اِیہو ہے۔“