احبار 16

کفارے دا ڈینہہ

1ہارُون دے ڈُو پوتراں دی وفات دے بعد جیہڑے رب العالمین دے حضُور آ تے ہلاک تھی گئے ہَن، رب العالمین مُوسیٰ نال ہم کلام تھیّا تے 2اُونکُوں آکھیا،

”آپنڑے بِھرا ہارُون کُوں ڈسا جو او صرف مقررہ ویلے اُتے پڑدے دے پِچُھوں سبھ تُوں مُقدّس کمرے ءچ وڑ تے عہد دے صندوق دے ڈھکنڑ دے سامنڑے کھڑا تھیوے، نہ تاں او ماریا ویسی کیوں جو مَیں خود اِیں ڈھکنڑ دے اُتے بدّل ءچ ظاہر تھیساں۔ 3تے سبھ تُوں مُقدّس کمرے ءچ وڑن تُوں پہلے ہارُون گُناہ تُوں پاک کرݨ آلی قُربانی کیتے ہِک جوان ڈاند تے ساڑے ونجنڑ آلی قُربانی کیتے ہِک چھترا پیش کرے۔ 4او لینن دا مُقدّس زیر جامہ پا گِھنے تے اُوندے تلے لینن دا پجامہ۔ وَل لنین دا کمر بند بدھے تے لینن دا عمامہ پاوے۔ ایہ مُقدّس کپڑے ہِن، اِیں واسطے او اِنہاں کُوں غُسل کر تے پاوے۔ 5بنی اِسرائیل دی جماعت ہارُون کُوں گُناہ تُوں پاک کرݨ آلی قُربانی کیتے ڈُو بکرے تے ساڑے ونجنڑ آلی قُربانی کیتے ہِک چھترا ڈیوے۔

6پہلے ہارُون آپنڑے تے آپنڑے خاندان دے کفارہ کیتے جوان ڈاند کُوں گُناہ تُوں پاک کرݨ آلی قُربانی دے طور تے پیش کرے۔ 7وَل او اِجتماع آلے تمبُو دے دَر تے ڈوہائیں بکرے رب العالمین دے حضُور گِھن آوے۔ 8اُتھاں ہارُون پرچیاں پا تے ہِک بکرے کُوں رب العالمین کیتے مقرر کرے تے ڈُوجھے کُوں عزازیل1 کیتے۔ 9جیہڑے بکرے دی پرچی رب العالمین کیتے نِکلے، اُونکُوں ہارُون گُناہ تُوں پاک کرݨ آلی قُربانی دے طور تے پیش کرے۔ 10ڈُوجھا بکرا جیندی پرچی عزازیل کیتے نِکلے، اُونکُوں پہلے رب العالمین دے حضُور کھڑا کیتا ونجے تے وَل جماعت دا کفارہ ڈیوݨ کیتے قصور چاوݨ آلا بنڑا تے بیابان ءچ چھوڑ ڈِتا ونجے۔

11پر پہلے ہارُون جوان ڈاند کُوں گُناہ تُوں پاک کرݨ آلی قُربانی دے طور تے پیش کرے تے آپنڑا تے آپنڑے خاندان دا کفارہ ڈیوے۔ اُونکُوں ذبح کرݨ تُوں بعد 12او رب العالمین دے سامنڑے آلی قُربان گاہ ءچوں بکھدے ہوئے کولیاں دا بھریا ہویا تھاں گِھن تے آپنڑیاں ڈوہائیں مُٹھاں باریک خوشبودار مصالحے نال بھر گِھنے تے سبھ تُوں مُقدّس کمرے ءچ وڑ ونجے۔ 13اُتھاں او رب العالمین دے حضُور خوشبودار مصالحے کُوں بکھدے ہوئے کولیاں اُتے پا ڈیوے۔ اِیں تُوں نِکلںڑ آلا دُھوواں عہد دے صندوق دا ڈھکنڑ لُکا ڈیسی جیہڑا کفارے دی جاہ ہے، تاں جو ہارُون مر نہ ونجے۔ 14ہُنڑ او جوان ڈاند دی رَت ءچوں کُجھ گِھن تے آپنڑی انگل نال ڈھکنڑ دے سامنڑے آلے حصے اُتے چِھنڈکے تے کُجھ کُوں ڈھکنڑ دے سامنڑے زمین اُتے سَت پھیری چِھنڈکے۔ 15اِیندے بعد او اُوں بکرے کُوں ذبح کرے جیہڑا قوم کیتے گُناہ تُوں پاک کرݨ آلی قُربانی ہے۔ او اُوندی رَت سبھ تُوں مُقدّس کمرے ءچ گِھن آوے تے اُونکُوں ڈاند دی رَت آلی کار عہد دے صندوق دے ڈھکنڑ اُتے جیہڑا کفارے دی جاہ ہے تے اُوندے سامنڑے وی چِھنڈکے۔ 16اِینویں او بنی اِسرائیل دیاں ناپاکیاں، گُناہاں تے نافرمانیاں پارُوں مُقدّس کمرے دی پاکیزگی دی رسم کُوں پُورا کریسی تے اِینویں ای اِجتماع آلے تمبُو دی وی جیہڑا ڈیرے ءچ بنی اِسرائیل دیاں ناپاکیاں دے وچال راہندے۔

17جِیں ویلے تئیں ہارُون سبھ تُوں مُقدّس کمرے ءچ آپنڑا، آپنڑے خاندان تے بنی اِسرائیل دی یکی جماعت دا کفارہ ڈے تے باہر نہ نِکل آوے، اُوں ویلے تئیں کہیں بئے کُوں اِجتماع آلے تمبُو ءچ ونجنڑ دی اِجازت نئیں۔ 18وَل او سبھ تُوں مُقدّس کمرے ءچوں نِکل تے رب العالمین دے حضُور خوشبودار مصالحے ساڑن آلی قُربان گاہ دی پاکیزگی دی رسم کُوں پُورا کرے۔ او ڈاند تے بکرے دی کُجھ رَت گِھن تے اُونکُوں قُربان گاہ دے چارے سینگاں اُتے لاوے۔ 19کُجھ رَت او آپنڑی انگل نال سَت پھیری قُربان گاہ اُتے چِھنڈکے۔ اِینویں او اُونکُوں بنی اِسرائیل دیاں ناپاکیاں تُوں پاک صاف کر تے مخصوص تے مُقدّس کر ڈیسی۔

20سبھ تُوں مُقدّس کمرے، اِجتماع آلے تمبُو تے قُربان گاہ دی پاکیزگی دی رسم کُوں پُورا کرݨ تُوں بعد ہارُون اُوں زندہ بکرے کُوں سامنڑے گِھن آوے۔ 21او آپنڑے ڈوہائیں ہتھ بکرے دے سر اُتے رکھ تے بنی اِسرائیل دے یکے قصُوراں، نافرمانیاں تے گُناہاں دا اِقرار کر تے اُنہاں کُوں بکرے دے سر اُتے لڈ ڈیوے۔ وَل او بکرے کُوں کہیں مُقرر بندے دے حوالے کر تے اُونکُوں بیابان ءچ دُور بھیج ڈیوے۔ 22بکرا اُنہاں دے یکے قصُور آپنڑے آپ اُتے چا تے کہیں سُنجھی جاہ اُتے گِھن ویسی۔ وَل جیہڑا بندہ بکرے کُوں گِھن گِیا ہا، او اُونکُوں اُتھاں چھوڑ آوے۔

23اِیندے بعد ہارُون اِجتماع آلے تمبُو ءچ ونجے تے لینن دے او کپڑے جیہڑے اُوں سبھ تُوں مُقدّس کمرے ءچ وڑن تُوں پہلے پاتے ہَن، لہا تے اُتھائیں چھوڑ ڈیوے۔ 24او مُقدّس جاہ اُتے غُسل کر تے آپنڑے عام کپڑے پا گِھنے۔ وَل او باہر آ تے آپنڑے کیتے تے آپنڑی قوم کیتے وی ساڑے ونجنڑ آلی قُربانی پیش کرے تاں جو آپنڑا تے آپنڑی قوم دا کفارہ ڈے سگے۔ 25اِیندے علاوہ او گُناہ تُوں پاک کرݨ آلی قُربانی دی چربی قُربان گاہ اُتے ساڑ ڈیوے۔

26جیہڑا بندہ قصور چا ونجنڑ آلے بکرے کُوں بیابان ءچ چھوڑ تے آوے، او آپنڑے کپڑے دھو تے غُسل کر گِھنے۔ اِیندے بعد او ڈیرے ءچ ولا آ سگدے۔

27جیہڑے ڈاند تے بکرے کُوں گُناہ تُوں پاک کرݨ آلی قُربانی کیتے پیش کیتا گئے تے جِنہاں دی رَت کفارہ ڈیوݨ کیتے ہارُون سبھ تُوں مُقدّس کمرے ءچ گِھن آئے، لازم ہے جو اُنہاں دیاں کَھلاں، گوشت تے گوبر کُوں ڈیرے دے باہر ساڑ ڈِتا ونجے۔ 28اِنہاں شیواں کُوں ساڑن آلا بندہ بعد ءچ آپنڑے کپڑے دھو تے غُسل کر گِھنے۔ وَل او ڈیرے ءچ آ سگدے۔

29لازم ہے جو ستویں مہینے دے ڈاہویں ڈینہہ بنی اِسرائیل تے اُنہاں دے وچال راہوݨ آلے یکے پردیسی آپنڑی جان کُوں ڈُکھ2 ڈیوݨ تے کم نہ کرݨ۔ ایہ شرع تُہاڈے کیتے نسل در نسل قائم راہوے۔ 30اُوں ڈینہہ تُہاڈا کفارہ ڈِتا ویسی تاں جو تُہاکُوں پاک صاف کیتا ونجے تے اُوں ویلے تُساں رب العالمین دے حضُور آپنڑے یکے گُناہاں تُوں پاک تھی ویسو۔ 31ایہ ارام کرݨ دے سبت آلی کار ہِک ڈینہہ ہے۔ آپنڑی جان کُوں ڈُکھ ڈیؤ، ایہ شرع ہمیشاں تئیں قائم راہسی۔

32اُوں ڈینہوار او کاہِن جِینکُوں اُوندے پِیُو دی جاہ اُتے کاہِنِ اعظم ہووݨ کیتے مقرر تے مسح کیتا گِیا ہووے، تُہاڈا کفارہ ڈیوے۔ او لینن دے مُقدّس کپڑے پا تے 33سبھ تُوں مُقدّس کمرے، اِجتماع آلے تمبُو، قُربان گاہ، کاہِناں تے جماعت دے یکے لوکاں دا کفارہ ڈیوے۔ 34لازم ہے جو سال ءچ ہِک پھیری بنی اِسرائیل دے یکے گُناہاں دا کفارہ ڈِتا ونجے۔ ایہ شرع تُہاڈے کیتے ہمیشاں تئیں قائم راہوے۔“

سبھ کُجھ اُونویں ای کیتا گِیا، جِینویں رب العالمین مُوسیٰ کُوں حُکم ڈِتا ہا۔